1 Ananias tih kawhmi pa le a nupi Safira cu an neihmi an zuar ih, 2 a nupi ih fiahpitnak thawn a man hrekkhat cu an sup ih a hrekkhat cu forhthlah pawl ih kutah an ap. 3 Asinain Peter nih, "Ananias, Thlarau Thianghlim sinah thuphan sim ding le na hmunram man hrekkhat sup dingin zangruangah Seihtan nih na thinlung ta luahkhat? 4 Na zuar hlanah na ta a i kau lo maw? Na zuar hnuk khawah nangma na thuneihnak sungah a um kau law mawh? Zangruangah hi mangin tuah ding hi na thinlung sungin na tum? Minung na deu a i lo, Pathian na deu sawn a i," tiah a ti. 5 Ananias cu cuvai ṭonkam pawl a theih tikah a ok ih a hnuk a cat. Cule cuvai thu a theitu hmahhmah cu an tuk a sum colh. 6 Cun tlangval pawl an tho ih a ruak cu puan thawn an tuam hnukah lengah an zawn ih an phum.

7 Nazi pathum rei hnukah zang a cang tih fiah lo in a nupi cu a tiang ve. 8 Cule Peter nih a sinah, "Aizat hi nan hmunram zuar man zate a i maw? Ka sim hnik" tiah a sut.

Ani nih, "Hngi, kan hmunram man zate a i," tiah a ti.

9 Cutikah Peter nih, "Bawipa ih thlarau hneksak dingah zangtih in nan lung a rual? Na pasal phumtu tlangval pawl cu suahka hram ah an um rih; nang khaw lengah ta zawn eng ve thok," tiah a ti. 10 Hmakhatte ah ani khaw Peter ih ke hram ah a ok ih a thi. Cule tlangval pawl an tiang ih a thi cem tih an hmu. A lengah an zawn ih a pasal ih hramah an phum. 11 Cule kawhhran mipi zate le hivai thu a theitu hmahhmah cu ṭihnak in an khat.

12 Cun forhthlah pawl nih mipi pawl lakah hmuhsaknak le mangbangza tamngai an tuah. Zumtu pawl hmahhmah cu Solomon Zauhliap ah an hmuakkhawm fa. 13 Mipi nih an zohsang ngai nan, hutu khaw an sinah an tel ngam taktak lo. 14 Bawipa a zumtu numi le pami tamngai cu an pawlkom ah tam sinsin in an lut. 15 Curuangah mifak tamngai cu zalam ah an zawn ih Peter an hramih a feh tikah a thlam nih phen hliap hnei thei dingin ihkhun le pher cungah an thlim. 16 Cule khaw kiangkap in Jerusalem khawpi ah mipi pawl an tiang ih mifak pawl le khawsia molhmi pawl cu an tianpit ih an zatein an damter colh.

17 Puithiam Lubik le a hramih um tu Sadusi pawl hmahhmah cu an dingih an nahsuah ih an thin a se ngai. 18 Forhthlah pawl cu an tlai ih mipi thawnginn ah an thla. 19 Asinain Bawipa ih vancungmi nih zan ah thawnginn suahka pawl cu a hong ih a lengah a suah hnei. Cule an sinah, 20 "Va feh uhla, Biakinn sungah ding in, hi nunnak thu hmahhmah hi va sim uh," tiah a ti. 21 Cuvai thu an theih tikah, zingmaw ngai in Biakinn ah an feh ih thuzirh an thok.

Culai fangah Puithiam Lubik le a hramih um mi pawl cu an tiang ih, Khonsil thurelnak tuah dingah Israel tlangsuak pawl hmahhmah an ko khawm. Cule thawnginn ihsin forhthlah pawl ṭhi dingah mi an hei thlah. 22 Asinain thawnginn bawi pawl an va tian tikah, thawnginn ah an va hmu lo; curuangah an kirsal ih Khonsil upa pawl an sim: 23 "Thawnginn cu ṭha in a hrenfa kau, suahka hramah a kiltu pawl an ding, a sungah hutukhaw kan hmu lo," tiah an ti. 24 Cuvai thu cu puithiam upa pawl le Biakinn kiltu bawi nih an theih tikah zang a cang la si na, tiah khawruahhar in an um. 25 Cule mi pakhat a tiang ih, "Ngaihnik uh, Thawnginn ih nan thlak mi pawl khi Biakinn ah an um ih mipi pawl thu an zirh berbo," tiah a ti. 26 Cun Biakinn kiltu bawi cu a kuttang pawl thawn an va feh ih forhthlah pawl cu an va ṭhi sal. Hramhram in an ṭhi lo, zangahtihle misenpi pawl nih lung in kan na nam pang thok tih an phang.

27 Cun Forhthlah pawl cu an ron ṭhi ih Khonsil hmaiah an dingter. Cule Puithiam Lubik nih thu a sut hnei, 28 ✝ "Hi pa ih hmin in thuzirh i hlah uh tiah fak ngai in thu nan ta pe i lo maw? Nan thuzirhmi cu Jerusalem khawpi nan khatter cem ih hi pa ih thisen mawh kan cungah ṭilhter nan tum," tiah a ti.

29 Peter le a dang forhthlah pawl nih, "Minung thu nakin Pathian thu kan ngai sawn thok. 30 Thinglamtah cungih nan thlai thah mi Jesuh cu kan pupa pawl ih Pathian nih a thoter sal cem. 31 Israel mi pawl sual sirnak le ngaihthiamnak pe dingah Pathian nih Hruaitu le Rundamtu dingah a vorhla ah a khaisang cem. 32 Hi thil hmahhmah a fiahpittu cu kanma hi kan si; Pathian nih a thu ngaitu pawl sinah a pekmi Thlarau Thianghlim khaw hi thu fiahpittu a i ve," tiah an ti.

33 Cuvai thu an theih tikah, an thin a se tuk lawmlam ih forhthlah pawl cu thah colh an duh. 34 Asinain Khonsil lakih tel Farasi, a hmin Gamaliel, Daan zirhtu le mi hmahhmah ih upatmi pa cu a hang ding ih, forhthlah pawl cu a lengah tawite sung suak ter dingin thu a pe. 35 Cule an sinah, "Israel mi pawl, hi pawl cungih thil nan tuahdingmi hi ralring laiuhcih. 36 Zangahtihle aihlan ah Theudas tihmi pa a suak ih, ama le ma mithupi pakhat ka i a ti fa ih, minung 400 hrawng nih an thlun. Asinain thah a tuar ih a dungthluntu pawl cu an ṭekdarh colh ih zanghman lo ah a cang. 37 Cu hnukah mipum siar lai ah Galilee mi Judas a hang suak ih mi tamngai nih an thlun. Asinain thah a i ve ih a dungthluntu pawl cu an ṭekdarh colh. 38 Curuangah atun thu ah nan ta sim, hi pawl hi hrial uhla anma tein umter uh; zangahtihle an tumtahmi le an tuahmi hi minung ih thokmi a ih ahcun a riaral kau thok. 39 Asinain Pathian ih tuahmi a ih ahcun nan neh thei cuang thok lo. Pathian dodaltu sawnah nan cang thok," tiah a ti.

Curuangah Khonsil upa pawl nih Gamaliel ih ruahnak pekmi cu an thlun. 40 Cule forhthlah pawl cu an ko ih an thawi hnukah Jesuh ih hmin in thu sim i lo dingah thu an pe ih an thlah. 41 Jesuh ih hmin ruangah ningzahnak tuar tlak ih ruah an ih cu an lung a awi ngai ih, Khonsil upa pawl sinin an suak. 42 Cule ni cangcang in Biakinn sung le inn khat hnuk inn khat ah, Jesuh cu Khrih a i tihmi thuthangṭha zirh le phuan an cawlhnga lo.