1 Ni khat ah Peter le Johan cu thlacam tikcu simla nazi pathum ah Biakinn ah an feh. 2 Cun a suahkeh in keze mi pakhat cu Biakinn a fehtu pawl sinin bopnak hler dingah Kotka Mawi tih kawhmi Biakinn kotka ah ni cang in an to ter. 3 Peter le Johan Biakinn sung an luh cu a hmu hnei ih bopnak pe dingah a hler hnei. 4 Peter nih Johan thawn cuvai pa cu mit ṭhep loin an zoh ih, "Kan zoh hnik," tiah Peter nih a ti. 5 Cun an sinin thil pakhat khat tal ngah ding ruahsat in a zoh hnei. 6 Cule Peter nih, "Sui le ngun ka nei lo; asinain ka neihmi ta ka pe: Nazareth mi Jesuh Khrih hmin in hang ding la feh," tiah a ti. 7 Cule a vorhla kut in a awh ih a ding ter. Hmakhatte ah a ke le kemit pawl cu an dam. 8 A hang tho ih a ke in a ding, cule a feh. Feh pah, sawsok fa pah in Pathian a thangṭhat ih Peter le Johan thawn Biakinn sungah a lut. 9 Cutih in a feh thei le Pathian a thangṭhat cu mi hmahhmah nih an hmu. 10 Biakinn ih Kotka Mawi ah bopnak thil mi hlertu khi a si tih an fiah tikah an mang a bang ih an khawruah a har ngai.

11 Cuvai pa cu Solomon Zauhliap tihmi ah Peter le Johan thawn a um tih an hmuh tikah mipi pawl cu mangbang in an sinah an va zuang. 12 Cuvai cu Peter nih a hmuh tikah an sinah, "Israel mi pawl, zangruangah hi thu ah nan mang a bang ih kanma la mit ṭheṭhep loin kan na zoh? Kanmai thil tihtheinak le thil ṭha kan tuahnak ruangah hi pa kan fehter thei ah maw nan ruat? 13 Abraham, Isak, le Jakob ih Pathian, kan pupa pawl ih Pathian nih a siahhlawh Jesuh cu sunloihnak a pe cem. Asinain thuneitu pawl ih kut ah nan pe. Pilat nih thlah dingin thu a ṭhen cia mi hman ama ih mithmuh rori ah nan hnong. 14 ✝Mi thianghlim le mi dingfel cu nan hnong ih, mi thattu sawn nan ta thlahsak dingah nan hler. 15 Cule nunnak petu cu nan that, asinain Pathian nih thihnak in a thoter sal ih — cuvai thu fiahpittu cu kanma hi kan si. 16 Jesuh hmin ih huham ruangah hivai keze pa nih damnak a ngah. Nan hmuhmi le nan theihmi hi Jesuh ih hmin zupnak thawngin tuahmi a i. Nan zate ih nan hmuh colh mangin Jesuh zupnak in hivai pa hi damter a i.

17 "Curuangah u le nau pawl, nan hruaitu pawl ih an tuah mangin, nan fiah lo ruangah nan tuah ve mi a i, tih ka fiah. 18 Khrih cu harsatnak a tuar thok tiah Pathian nih profet pawl hmahhmah kaa in a sipcia mi pawl cu a famkimter cem. 19 Curuangah nan sualnak ngaihthiam a sih theinak dingah sir fa uhla Pathian sinah kir uh. 20 Cule Bawipa sinin tharthawh faknak tikcu a tiang thok ih nan hrangih a hrilcia mi Khrih tihmi Jesuh cu nan sinah nan ta pe thok. 21 Pathian nih hlanlaine in a profet thianghlim pawl hmahhmah ih kaa in a phuan cia mangin, zanghmahhmah tuahtharsal tikcu a kim hlanlo Jesuh cu vancung ah a um thok. 22 Zangahtihle Moses nih, ‘Bawipa nan Pathian nih kei ka na thlah mangin* nan miphun a si mi profet pakhat nan sinah a thlah thok. Ani ih nan ta sipmi hmahhmah cu nan thlun colh a ṭul. 23 Cuvai profet ih sipmi thu a ngai lotu minung cu Pathian miphun sung in dawi a i thok ih siatsuah a i thok,’ tiah a ti. 24 Cule thuphuan ding a neitu profet hmahhmah, profet Samuel thokin a hnukih a tiangmi profet pawl khaw nih, an zatein tunsan thu pawl hi an sipcolh cia mi a i. 25 Nan cu Pathian nih kan pupa pawl sinih a tuahmi thukam cotu le profet pawl ih tefa nan i. Abraham sinah, ‘Na tesinfa sung in leilung tlunih mi hmahhmah cu thlawsuahnak ka pe thok,’ tiah a ti. 26 Curuangah nan ṭhat lonak ihsin nan kir ih nan ta thlawsuah theinak dingah Pathian nih a siahhlawh Jesuh cu a thoter sal hnukah a hmasabik ah nan sinah a thlah," tiah a let hnei.