1 Cun Saul nih Bawipa ih dungthluntu pawl cu that dingin a hringhro hnei thotho. Puithiam Lubik sinah a feh ih, 2 Bawipa ih zalam a zawhtu numi pami tilo in tlai hnei pit in Jerusalem ih a ṭhittak hnei theinak dingah, Damaskas khawpi ih sinakok uktu pawl pek ding ca a la.

3 Cutih in khual a tlot lai, Damaskas khawpi a naih tikah, veikhatte ah van in tleunak nih a kimvel in a ron tlet. 4 Cun Saul cu leilung ah a ok ih, "Saul, Saul, zangruangah ka na hrem?" tiah a sinih sipmi aw pakhat a thei.

5 Cule Saul nih, "Bawipa, hutu na si?" tiah a sut.

"Na hrem ngelngo mi Jesuh ka si. 6 Hang tho la khawpi sungah lut, cule na tuah ṭulmi cu sip na i thok," tiah a let.

7 Cun a khualtlotpit pawl cu ṭon ding fiah loin an ding, aw cu an thei nain hutu khaw an hmu lo. 8 Saul cu leilung in a hang tho ih a mit a hrak, asinain zangtu khaw a hmu lo. Curuangah a kut in an ṭhi ta ih Damaskas khawpi sungah an fehpit. 9 Ni thum sung cu khua a hmu lo; cuvai ni thum sung cu zangkhaw a ei lo ih ti khaw a ding lo.

10 Damaskas khawpi sungah Ananias tihmi dungthluntu pakhat a um. Langnak sungin Bawipa nih, "Ananias!" tiah a ko.

Cule ani nih, "Bawipa, hiva ah ka um," tiah a let.

11 Cun Bawipa nih a sinah, "Hang tho la Zalam Ding tihmi ah feh. Judas inn ah Tarsas khawmi Saul tihmi pa cu hrawl. Ngaihnik, ani cu thla a cam lai berbo; 12 ani khaw langnak a hmu ve ih cuvai langnak sungah Ananias an tihmi pa cu a tiang ih, khua a hmuh thei salnak dingah, a lu cungah a kut a suan cu a hmu," tiah a ti.

13 Cutikah Ananias nih, "Bawipa, mi tamngai sinin hivai pa ih thuhla hi ka fiah cem, Jerusalem ih na mithiang pawl sinah thil ṭha lo tamngai a tuah. 14 Cun na hmin ko tu pawl hmahhmah tlai dingah puithiam upa pawl ih thuneihnak thawn hiva ah a tiang," tiah a let.

15 Asinain Bawipa nih a sinah, "Feh! Zangahtihle ani cu Zentail mi pawl, siangpahrang pawl sin le Israel mi pawl sinah ka hmin phurtu ding ka hmanrua ah ka hril cem. 16 Ka hmin ruangih a tuar dingmi thil tamngai a sinah ka hmuh thok," tiah a ti.

17 Cule Ananias cu a feh ih inn songah a lut. Saul cungah a kut a suang ih, "Unaupa Saul, hiva na tian lai lampi lakih nang sin a rong langmi Bawipa Jesuh nih, khua na hmuh sal theinak dingah le Thlarau Thianghlim thawn na khahnak dingah na sinah ka na thlah," tiah a ti. 18 Veikhatte ah Saul ih mit sungin ngakep mang a i mi a ṭil ih khua a hmu thei sal. A tho ih baptisma a la. 19 Cule caw a ei ih thazang a nei sal.

Cun Saul cu Damaskas khawpi ih dungthluntu pawl sinah ni tawkfang sung a cam. 20 Veikhatte ah Saul cu sinakok pawl ah a feh ih, Jesuh cu Pathian Fapa a i, tiah thu a sim.

21 Cule a theitu hmahhmah an mang a bang ngai ih, "Hivai pa cu Jerusalem ih Jesuh hmin a kotu pohpoh a hremtu khi a i lo maw? Cun mi tlai pit in puithiam upa sinih tianpit dingah aiva ah a tiangmi a i lo maw?" tiah an sut fa.

22 Asinain Saul ih thusipmi cu huham a nei deuhdeuh, cule Jesuh cu Khrih a i tih a fiangter ih, Damaskas khawpi ih a ummi Judah mi pawl mangbang kau a tuah hnei.

23 ✝ Ni tamngai a liam hnukah, Saul cu that dingin Judah mi pawl nih khua an khang. 24 Asinain Saul nih an khawkhan mi cu a fiah. Saul that dingah a sun a zan in khawpi kotka pawl cu an kil. 25 Asinain Saul a thluntu pawl nih zan ah an ṭhita, bawm sungah an se ih khawpi kulhnak hruang awng lakin a lengah an hei ṭhum.

26 Saul cu Jerusalem a tian tikah, dungthluntu pawl kop hnei a tum; asinain dungthluntu a i ve cem tih an zup lo ruangah Saul cu an ṭih. 27 Asinain Barnabas nih a ṭhita ih forhthlah pawl sinah a fehpit. Cule an sinah Damaskas khawpi fehnak zalam ah Saul nih zangtih in Bawipa a hmu ih, Bawipa nih Saul sinah zangtih in thu a sim tihmi pawl le, Damaskas khawpi ah Jesuh hmin in ralṭha ngai ih thu a sip mi thu pawl cu a simfiang hnei. 28 Curuangah Saul cu Jerusalem khawpi ih forhthlah pawl sinah lut suak in a um ih ralṭha ngai in Bawipa ih hmin in thu a sim. 29 Grik ṭon hmang Judah mi pawl sinah thu a sim ih thu khaw an al fa, asinain anni nih Saul cu thah an tum. 30 Cuvai thu cu zumtu unau pawl nih an theih tikah Saul cu Sisaria khawpi ah an fehpit ih Tarsas khawpi la ah an fehter.

31 Cutih cun Judea peng, Galilee peng le Samaria peng ih kawhhran pawl cu hnangam ngai in an um ih an pungṭhang deuhdeuh. Thlarau Thianghlim ih thazang peknak le Bawipa ṭihzahnak thawn an nung ih mipum an tam deuhdeuh.

32 Cun hitih in a si, Peter cu khuazakip ah a tlawn ih Lidda khawpi ih a ummi Bawipa ih mithiang pawl sinah a feh. 33 Cuvai hmunah taksa ze in kum riat sung ihkhun ih a lummi, Aenias tihmi pa cu a hmu. 34 Peter nih a sinah, "Aenias, Jesuh Khrih nih ta damter cem. Hang tho la na tangthah cu zawl," tiah a ti. Veikhatte ah Aenias cu a hang tho. 35 Lidda khawpi le Sharon hmunrawn ih a ummi hmahhmah nih Aenias cu an hmu ih Bawipa sin ah an kirsal.

36 Joppa khua ah Tabitha an tihmi dungthluntu pakhat a um, a Grik hmin cu Dorkas a si ih a sullam cu "Zukneng," tihnak a i. Cuvai nu cu thil ṭha a tuah ringring ih mi fahrah pawl a bawm ringring. 37 Cule hitih in a si, cuvai can ah Dorkas cu a fak ih a thi. A ruak cu an ṭawl hnukah cungta khan ah an thlim. 38 Lidda khawpi cu Joppa khawpi thawn a naihfa. Cule dungthluntu pawl nih Peter cu Lidda khawpi ah a um tih an fiah tikah, a sinah mi panih an hei thlah ih, "Thinfahte in, zamrang ngai kan sinah tiang hram," tiah an sawm. 39 Curuangah Peter cu a tho ih an sinah a feh. Cule a tian tikah Peter cu cungta khan ah an ṭhi. Nuhmei pawl hmahhmah cu Peter hramah an ding ih an ṭap, Dorkas an sinih a um lai ih a tuahmi kawt angki pawl le a dang hnipuan pawl cu an hmuh. 40 Peter nih an zatein khan sungin a suakter hnei colh, cule a khuk a bil ih thla a cam. Dorkas ih ruak la tut pitin, "Tabitha, hang tho!" tiah a ti. Dorkas cu a mit a hrak ih Peter a hmuh tikah a hang tho ih a to. 41 Cun Peter nih Dorkas cu a kut in a awh ih a ding ter; cule Bawipa ih mithiang pawl le nuhmei pawl cu a ko hnei ih nungdam in an sinah a ap hnei. 42 Cuvai thu cu Joppa khawpi sung hmahhmah ah a thang colh ih, mi tamngai nih Bawipa cu an zum. 43 Cule hitih in a si, Peter cu Joppa khawpi ah saphaw thawn thil tuahtu Simon inn ah ni reingai a cam.