1 Cun Paul nih Khonsil upa pawl cu hmaiton in a zoh hnei ih, "Ka phunpi Israel mi pawl, nihin ni tiang Pathian hmai ah sia le ṭha fiahthiamnak famkim in ka nung," tiah a ti. 2 Cule Puithiam Lubik Ananias nih Paul hramih a dingtu pawl sinah Paul cu a kaa ah beng uh, tiah thu a pe hnei. 3 ✝ Cutikah Paul nih a sinah, "Nang sii rang hnuhmi phar — Pathian nih ta beng thok! Daan mangin thuṭhen dingah cuva ah na to, asinain ‘beng uh’ tih ih thu na pekmi nih cuvai Daan cu na buar!" tiah a sawn.

4 Cule Paul hramih a ummi pawl nih Paul sinah, "Pathian ih Puithiam Lubik na hmuhsuam," tiah an ti.

5 Cutikah Paul nih, "Ka phunpit Israel pawl, Puithiam Lubik a i tih cu ka fiah lo pi; zangahtihle Ca Thianghlim sungah, ‘Na miphun uktu relse hlah,’ tih in a um," tiah a ti.

6 ✝ Cun Paul nih a hrekkhat cu Sadusi an i ih a hrekkhat cu Farasi an i tih a fiah tikah Khonsil upa hmai ah a hek ih, "Ka phunpit Israel mi pawl, kei hi Farasi fapa, Farasi rori ka i. A thi mi pawl an thosal thok tih ih ruahsatnak ka neih ruangah hiva ah tazacuai ka hmuak," tiah a ti.

7 Cuti ih a sip hnukah, Farasi pawl le Sadusi pawl karlak ah thu alfaknak nasa ngai a suak, cule mipi pawl cu an ṭhen fa. 8 ✝ Zangahtihle Sadusi pawl nih thawhsalnak a um lo, vancungmi khaw a um lo ih thlarau khaw a um lo, tiah an zum. Asinain Farasi pawl cu a pathum in an zum. 9 Cun an heh aw cu a thang deuhdeuh ih Farasi a i mi Daan Zirhtu hrekkhat pawl cu an ding ih ruahngai in an al ve. "Hivai pa sinah sualnak zangkhaw kan hmu lo, vancungmi lole thlarau nih a sinah thu a sim taktak a i men thok," tiah an ti.

10 O-alfaknak rauhngai in a suah tikah, Paul cu an thlekbauh colh pang thok tiah ralbawipi cu a thin a phang. Curuangah Paul cu mipi lakin la pit in ṭankulh ih fehpit dingin a ralkap pawl cu thu a pe.

11 Asinain a thang zan ah Bawipa cu Paul ih hramah a ding ih, "Paul, hnangamte in um! Jerusalem khawpi ih ka thu na phuansuah cem mangin, Rom khawpi khawah na phuangsuak tengteng thok," tiah a ti.

12 Cule khua a van tikah, Judah mi lakin mi hrekkhat pawl cu an hmuakfa ih khua an khan. Paul an thah hlan lo zangkhaw ei le ding lo ih um dingin thu an kam fa. 13 Cuti ih khua a khangtu hi minung sawmli luan an i. 14 Puithiam upa pawl le upa dang pawl sinah an feh ih, "Kanma le kanma siatti dingin thu kan kam fa cem, Paul kan thah hlan sung cu zangkhaw kan ei thok lo. 15 Curuangah nanma le Khonsil upa pawl nih Paul cu zingthlala ah kan sinah tianpit dingin, ralbawipi sinah ruahnak pe uhla, Paul ih thuhla kim deuh in fiah kan duh tiah tifater uh. Cule Paul a tian hlanah that dingin kan tiari fa cia thok," tiah an ti.

16 Asinain Paul ih naunu ih fapa nih cuti ih an bawhthup thu a theih tikah, ralkap ṭankulh ah a lut ih Paul cu a va sim. 17 Cule Paul nih ralbawi pa pakhat a ko ih a sinah, "Hivai tlangval pa hi ralbawipi sinah hei ṭhi; thuruah ding pakhat a nei," tiah a ti. 18 Cun ralbawipi sinah a hei ṭhi ih, "Thawngtla pa Paul nih ka na ko ih hivai tlangval pa hi na sinah fehpit dingin ka na forh, zangahtihle ani nih thu ta sip ding a nei," tiah a ti.

19 Cule ralbawipi nih tlangval pa cu a kut in a ṭhita ih kawkennak ah, "Zangtu ka na sip duh?" tiah a sut.

20 Cun ani nih, "Judah mi pawl nih zingthlala ah Paul cu Khonsil hmaiah suahpit dingin ta hler dingah an lung a kim cem. A thuhla famkim deuh in fiah kan duh tiah an tifater thok. 21 Asinain an thu cu ngai pang vai hlah; zangahtihle minung sawmli luan nih ani cu an bawhthup. Cuvai pawl cu Paul an thah hlan lo zangkhaw ding le ei lo dingin anma le anma thu an kam fa. Atun ah nangmai lungkimnak kau an hngah," tiah a sim.

22 Cule ralbawipi nih tlangval pa cu, "Ka sinih na sipmi pawl hi hutukhaw sim vai hlah," tiah thu a pe ih a tlungter.

23 Cule ralbawipi nih a kuttang ih ralbawi pa panih cu a ko hnei ih, "Sisaria khawpi ih feh dingah ralkap 200 in timtuah uh. Cun sai ralkap sawmsarih le thirfoi ralkap 200 khaw timtuah uh, zan nazi pakua ih poksuak dingin ralring seu. 24 Paul ih to dingah sai khaw timlam uhla Uktu Felix sinah himdamte in hei thlah uh," tiah a ti. 25 Cule ralbawipi nih atangla mangin cakuat a ngan:

26 "Kei, Klaudius Lisias nih ram Uktu Upat tlak Felix na sinah ca ta kuat. Cibai ta ka buk. 27 Na sinih ta kuat mi pa hi Judah mi pawl nih an tlai ih thah an tum. Rom mi a i tih ka fiah ih ka ralkap pawl thawn kan runsuak. 28 Zangruangah sual an puh tih fiah duh ah Khonsil upa pawl sinah ka fehpit. 29 Thihnak tlak le thawngthlaknak tlak thu zangkhaw a um lo tih ka hmu. Sual an puh mi cu anma ih daan thuhla khi a i. 30 Cule ama thah duh ah khua an khan tih ka fiah ruangah na sinah ta kuat lohli. Sual a puhtu pawl khaw na hmai ah sual puh dingin ka sim hnei," tiah a ti.

31 Cun ralbawipi ih thupeknak mangin ralkap pawl nih an tuah. Paul cu an ṭhita ih zan ah Antipatris khawpi tiang an feh. 32 A zingthlala ah ke ralkap pawl cu an ṭankulh ah an kir ih sai ralkap pawl nih Paul cu an fehpit. 33 Sisaria khawpi an ban ih ram uktu pa sinah cakuat cu an pek hnukah Paul cu a kut sungah an ap. 34 Ram uktu pa nih cakuat cu a siar ih, "Khoitu ram in na tiang?" tiah Paul cu a sut. Silisia ram in a tian tih a fiah tikah, 35 Paul sinah, "Sual ta puhtu pawl an tian tikah, na thuhla cu ka ngai leh thok," tiah a ti. Cule Paul cu Herod ih sakmi siangpahrang inn ah ralkap nih kil dingin thu a pe.