1 Cun Agrippa nih Paul sinah, "Nangma na hrangah na thuhla sip ding cu ta sian," tiah a ti. Cutikah Paul cu a ban a han pharh ih a humfaknak thu a sim.

2 "Siangpahrang Agrippa, nihin sun na hmai ah Judah mi pawl ih sual ka na puhnak pawl lakin humfaknak thu sip can ka ngah ruangah mi vanṭha ka i tiah ka ruat fa. 3 Nang cu Judah mi pawl ih nunphung hmahhmah le an alfaknak pawl hmahhmah khaw a fiah ngai tu na sih ruangah ka vanṭha hlehhlo tiah ka ruat. Curuangah thinsaute in ka ngaisak hram tiah thinfah ta dil.

4 "Ka nappan lai ih ka nuntu khawsak dan iseh, ka miphun pawl lakih ka nuntu khawsak dan le Jerusalem khawpi ih ka nuntu khawsak dan pawl cu a thoktir in Judah mi pawl hmahhmah nih an fiah colh. 5 ✝Hlan lai ne in ka na fiah eng tuk cem, an duh a sih ahcun, kan biaknak ih a khoh bikmi bu Farasi pakhat mangin ka nung, tihmi khaw an sim thei thok. 6 Cule nihin sun hiva ah taza ka na cuai eng khaw hi kan pupa pawl sinah Pathian nih thu a tiam mi ruahsatnak ka neih ruangah a si. 7 Cuvai thutiam cu kan phunhnam hleinih pawl nih a sun a zan taima ngai in Pathian an biaknak in famkim dingah an ruahsat mi a i. Maw Siangpahrang Agrippa, cuvai ruahsatnak ruangah Judah mi pawl nih taza ka na cuai eng mi a i. 8 Pathian nih mithi a thoter tih cu zangruangah a cangtheilo tiah nan ruat?

9 ✝"Nazareth mi Jesuh ih hmin dokalh in thil hmahhmah ka tuah thok, tiah ka ruat ta dah. 10 Cuvai cu Jerusalem khawpi ih ka tuah tak dahmi a i. Puithiam upa pawl sinin thuneihnak ka ngah ih Pathian ih mithiang pawl tamngai thawng ah ka thla hnei. Thah dingih thu relsak an ih tikah ka lungkimpit hnei. 11 Vei tamngai sinakok cangcang ah cawhkuan ka pe hnei, lo theih loin Pathian thangsiatter hnei ka tum. An cungah ka thin a se tuk ih anni hrem dingah ramdang khawpi pawl tiang ka feh.

12 "Cutih in puithiam upa pawl ih thuneihnak le thupeknak thawn Damaskas khua ah ka feh. 13 Maw siangpahrang Agrippa, sun lai fang lampi ih ka feh vekvo lai ah, ni nakih a tle sawn mi meisa tle nih keima le ka fehpit mi pawl kimvel ah van in a ron tlet cu ka hmu. 14 Kan zatein leilung ah kan ok colh ih Hebru ṭon in aw pakhat ka thei ih ka sinah, ‘Saul, Saul, zangruangah ka na hrem ngelngo? Fungzum sirh cu na hrangah a har,’ tiah a ti. 15 Cutikah kei nih, ‘Bawipa, hutu na si?’ tiah ka sut. Cule ani nih, ‘Na hrem ngelngo mi Jesuh ka si. 16 Hang tho la na ke in ding. Ka na riantu dingah le na hmuh cia mi pawl le ta hmuh lai dingmi pawl fiahpittu dingah ta hril cem, cuvai tumtahnak thawn na sinah ka lang mi a i. 17 Nang cu Israel mi pawl le Zentail mi pawl sinah ta thlah thok ih, an kut sungin ta rung thok. 18 An mit vangter dingah le khawmaw sungin khawvang ah, Seihtan ih huham cahnak sungin Pathian sinih kir ter dingah a i. Cutih ih ka na zupnak thawngin an sualnak pawl ngaihthiam an i thok ih Pathian ih thianhlimter mi pawl lakah an tel ve thok,’ tiah ka na ti.

19 "Curuangah siangpahrang Agrippa, van la in langnak ka hmuhmi cu ka el thei lo. 20 ✝Hmasabik ah Damaskas khawpi ah, cun Jerusalem khawpi ah, cule Judea peng sung hmahhmah le Zentail mi pawl sinah ka feh ih, an sual sir in Pathian sin kir dingah le sualsirnak thawn a mil fa mi ṭuan ṭuan dingin thu ka sim hnei. 21 Hivai thu pawl ruangah Judah mi pawl nih Biakinn sungih ka um lai ah ka na tlai eng ih thah ka na tum. 22 Asinain nihin ni tiang Pathian nih ka na bawm ih atun na hmai ah ka ding, ka hmuhmi thu cu mi picang le mi tenau nan a zate hmai ah ka sim. Ka sipmi thu hi Moses le profet pawl nih a cang leh thok tih ih an sip cia mi an i. 23 ✝Cutih ih an sipmi cu: Khrih cu a tuar thok ih, ani cu mithi lak in tho hmasabik a i thok; Judah mi pawl le Zentail pawl sinah tleunak thu a phuang thok, tih hi a i," tiah Paul nih a ti.

24 Paul nih cutih ih a humfaknak thu a rel lai ah, Festas cu tha ngai in a hek ih, "Paul, na aa i sang! Na zir tamtuknak nih ta aa ter i hmahsin!" tiah a ti.

25 Asinain Paul nih, "Upat tlak Festas, ka aa lo sangkhaw! Ka sipmi hi thutak le ruahtlak an i. 26 Zangahtihle hih thu pawl hi siangpahrang pa nih a fiah colh ih a sinah zalen ngai in ka sim. Hivai thil pawl hmahhmah hi a thupte ih tuahmi an ih lo ruangah siangpahrang pa nih a fiah colh tih ka fiang. 27 Siangpahrang Agrippa, profet pawl cu zum cim? Na zum tih ka fiah," tiah a ti.

28 Cun Agrippa nih Paul sinah, "Hivai tikcu tawite sungah Khristian cang kau ka na lem na tum maw?" tiah a ti.

29 Cule Paul nih, "Tikcu a tawi ah iseh, a sau ah iseh, nang ma kau i lo in nihin sun hiva ah ka thu a ngaitu nan zatein, hivai ka kut ih khihmi thirhri pawl hrello, kei mang i colh ula, tih hi Pathian sinah ka thlacamnak a i," tiah a ti.

30 Siangpahrang, a nupi Bernis, ram uktu le an sinih a totu pawl cu an ding ih, 31 an feh hnukah pakhat le pakhat, "Hivai pa hi thihnak tlak le thawngthlaknak tlak zangkhaw a tuah lo," tiah an ti fa. 32 Cun Agrippa nih Festas sinah, "Ama nih Caesar sinah a zu khan hlah sehla cu kan luatter thei thok nan bolh," tiah a ti.