1 Cun himdamte in tikap kan tian tikah cuvai tikulh cu Malta tikulh a i tih kan fiah. 2 Cuvai tikulh ih om minung pawl cu kan cungah an ṭha ngai. Zuah a zu ih i a sik tuk ruangah kan hrangah meipawl kan na tih sak ih ṭha ngai in kan na cohlang eng. 3 Paul nih thing a khawlkhawm ih meipawl ah a paih. Meisa a sat ruangah thing sungin rul a hang suak ih Paul ih kut ah a cu. 4 Paul kut ih rul thlaifa cu tikulh om minung pawl nih an hmuh tikah, pakhat le pakhat, "Hivai pa hi laithat a i tengteng, tifingriat sungin himdamte in a suak kau nain diknak khawzing nih nun a sian lo si lai tu!" tiah an ti fa. 5 Asinain Paul nih rul cu meisa sungah ṭil in a thing ih ama cu a zangkhaw a poih lo. 6 Cuvai tikulh ih om minung pawl nih, a thling thok ih hmakhatte ah ok pit in a thi thok, tiah an ruat. Asinain reingai an zoh ih a cungah zangkhaw a cang lo tih an hmuh tikah, an thinlung an thleng ih, "Hivai pa hi pathian a i thok," tiah an ti.

7 Cuvai hmun kiangkap ah, tikap upa Publias tihmi pa nih lo a nei. Publias nih a inn ah kan na cohlang ih ni thum sung ṭha ngai in kan na zohkhen. 8 Cuvai can ah Publias ih pa cu isik le santen in a fak ih a it. Paul cu a sinah a lut ih a cungah a kut suang in thla a camsak ih a dam. 9 Cutih ih a tuah ruangah cuvai tikulh ih a um mi mifak hmahhmah cu Paul sinah an tiang ih damnak an ngah colh. 10 Upatnak ah laksawng tamngai kan na pe ih lawng thawn kan feh tum fangah kan ṭul mi din ei ding pawl lawng tlunah kan na siah sak.

11 Thla thum hnukah Alexandria khawpi in a tiangmi, Castor le Pollux faphir pathian pawl zuk thawn hminhlihnak a ummi lawng cu kan to. Cuvai lawng cu isik sung hmahhmah cuvai tikulh ah a ummi a i. 12 Cule Sirakus khawpi ah kan ban ih cuva ah ni thum kan cam. 13 Cuva in kan suak sal ih Rezium an tihmi khawpi kan ban. Ni khat hnukah thlangla in zil a hang zuang ih a ni nih nak ah Puteoli khawpi kan ban. 14 Cuva ah zumtu unau pawl an um ih an sinah ni sarih sung cam dingin kan na sawm. Cule Rom khawpi la ah kan feh. 15 Rom khawpi ih zumtu unau pawl nih kan tian an fiah tikah Appius Dawr an tihmi khua le Riahbuk Pathum an tihmi khua tiang kan na bawh eng. Paul nih a hmuh hnei tikah, Pathian sinah a lung a awi ih a hna a ngam.

16 Rom khawpi kan tian tikah Paul cu amate in an umter ih ralkap pakhat an kilter.

17 Cule hitih in a si, ni thum hnukah Paul nih Judah mi pawl lakih an hruaitu pawl a kokhawm. An tian tikah Paul nih an sinah, "Ka phunpit Israel mi pawl, kan miphun le kan pupa pawl ih nunphung kalhzawng in zangkhaw ka tuah lo, cu cingin Judah mi pawl nih Jerusalem ah thawng ka na thla ih Rom mi pawl kut ah ka na ap. 18 Rom mi pawl nih ka na cekfel ih ka na thlah an duh, zangahtihle thihnak tlak sual ka tuah lo tih an hmu. 19 ✝ Asinain Judah mi pawl nih an el, curuangah Caesar sinah lo theih loin a zu ka khan. Ka miphun pawl dokalhnak zangkhaw ka nei lo. 20 Curuangah nan ta hmuh ding le nan sinah thusim ding ih ka hlerhnak san a i. Thirhri thawn ih ka na khih eng nak san cu Israel mi pawl ih ruahsatnak ruangah a si," tiah a ti.

21 Cun Judah hruaitu pawl nih Paul sinah, "Na thuhla thawn pehpar in Judea ram in cakuat zangkhaw kan ngah lo. Cule na thuhla a sia a ṭha simtu dingah acuvai ram la in a tiangmi kan milai hukhaw an um lo. 22 Asinain na ruahdan cu theih kan duh, zangahtihle hmunzakip ah nan bu dokalh in an rel, tih kan fiah," tiah an let.

23 Cule Paul thawn hmuak fa dingah ni an khiah fa ih a riahnak hmun ah mi tamngai nih an pha. Mawla in zanla tiang Pathian Uknak thu cu an sinah a sim ih, Moses Daan cabu sung le profet pawl ih cazual sungin Jesuh ih thuhla cu an lung lut dingin a simfiang hnei. 24 Cule a sipmi thu cu mihrek khat nih an fiang ih, mi hrekkhat nih cu an zum lo. 25 Cun Paul ih netabik thu pakhat a sipmi ruangah pakhat le pakhat an lung a rual lo ih an ṭhenṭhek fa. Cuvai a sipmi cu, "Thlarau Thianghlim nih kan pupa pawl sinah profet Isaiah hmangin thu dik ngai a sim. 26 Profet Isaiah ih a sipmi cu,

" ‘Hivai minung pawl sinah va feh la va sim hnei;

Nan ngai ngelngo thok nain nan cingthiam thok lo;

Nan zoh ngelngo thok nain nan hmu thok lo.

27 Zangahtihle hivai minung pawl ih thinlung cu a pit,

an naa a set ih

an mit an cawce.

Cutih in i hlah sehla an mit in an hmu thok,

an naa in an thei thok ih

an thinlung in an cingthiam thok.

Cule ka sinah an kirsal thok ih

ka damter hnei thok,’ tih hi a si.

28 "Curuangah Pathian ih rundamnak cu Zentail mi pawl sinah pek a i cem, tih hi nan fiah a ṭul. Anni nih cuvai thu cu an ngai thok!" tiah a ti. 29 *

30 Cun Paul cu amate in a sawnmi inn ah kum nih sung a um ih ama hmu dingin a sinih a tiangmi pawl hmahhmah cu a cohlang hnei. 31 Ralṭha ngai le zalen ngai in Pathian Uknak thu cu a sim ih Bawi Jesuh Khrih ih thu khaw a zirh.