1 Paul le Silas cu Amfipolis le Apollonia khawpi an pal pah ih Judah mi pawl ih sinakok umnak Thesalonika khawpi ah an tlawn. 2 A tuahkel mangin Paul cu sinakok ah a feh. Cule Sabbath ni nithum sung Ca Thianghlim sungih thu pawl an relkhat ih, 3 Khrih cu thihnak a tuar tengteng a ṭul ih thihnak in a thawhsal tengteng a ṭul tih cu Ca Thianghlim hmangin a langter ih a simfiang hnei. "Nan sinih ka phuanmi Jesuh hi Khrih cu a si," tiah a ti. 4 Cule mi hrekkhat nih an zum ih Paul le Silas an kop. Cumangin Pathian ṭihzahtu Grik mi tamngai le numi hruaitu pawl khaw Paul le Silas sinah an kop ve.

5 Asinain Judah mi hrekkhat pawl nih an nahsuah. Curuangah dawr hmun in mi ṭhalo pawl cu an ko ih miburpi ah an cang. Cule khaw pumpuluk ah buainak tuah an thok. Cun mipi hmai ih suahpit dingah Jason ih inn cu an luhhnawh ih Paul le Silas cu an hrawl. 6 Asinain Paul le Silas cu an hmuh lo tikah Jason le zumtu unau hrekkhat pawl cu khaw uktu bawi pawl sinah an fehpit ih, "Leilung linglettu pawl cu atun kan sinah an tiang. 7 Anni cu Jason nih a cohlang hnei. Cule siangpahrang dang a um, a hmin cu Jesuh a si, tiah an ti ih an zatein Caesar ih thusuahmi pawl cu an dokalh," tiah an hek caimco. 8 Cutih ih an heh cu mipi pawl le khaw uktu bawi pawl nih an theih tikah an buai colh. 9 Cule Jason le a rualpi pawl cu thlah dingah a ṭul zat tangka an pe ter ih an thlah sal.

10 Cuvai zan ah zumtu unau pawl nih Paul le Silas cu Berea khawpi ah an thlah lohli. Berea khawpi an bat tikah Judah mi pawl ih sinakok ah an feh. 11 Berea khua ih Judah mi pawl cu Thesalonika khua ih Judah mi pawl nakin an thinlung a ṭha sawn. An thusipmi pawl cu hlawptlo ngai in an cohlang ih, Paul ih thusipmi cu a dik maw dik lo tiah ni cangcang in Ca Thianghlim thawn an zohṭhim. 12 Curuangah mi tamngai nih an zum; upat tlak Grik numi pawl le Grik pami tamngai khaw nih an zum ve. 13 Asinain Thesalonika khawpi ih Judah mi pawl nih, Paul nih Berea khawpi khaw ah Pathian thu a sim, tih an theih tikah Berea khawpi ah an feh ih mipi pawl cu an tokhrok ih an buaiter. 14 Cun zumtu unau pawl nih veikhatte ah Paul cu tifingriat la ah feh dingin an thlah; asinain Silas le Timote cu Berea khawpi ah an tangta. 15 Paul cu a thlahtu zumtu unau pawl nih Athens khawpi tiang an thlun; cule a thluntu pawl cu, a rang thei bikin Silas le Timote cu a sinah tiang dingin thu a cah hnei ih an kirsal.

16 Paul nih Silas le Timote cu Athens khawpi in a hngah hnei lai ah, cuvai khawpi cu milem in a khat tih a hmuh tikah a thinlung a fak ngai. 17 Judah mi pawl le Pathian ṭihzahtu Grik mi pawl thawn sinakok ah thu an al fa hlan; dawr hmun ih a tiang tu pawl thawn khaw ni cangcang thu an al fa reuhro. 18 Epikurian thuzirhtu hrekkhat le Stoik thuzirhtu hrekkhat pawl thawn khaw thu an al fa. Mi hrekkhat nih, "Hivai mi tlokciar pa hi zangtu thu sip a tum?" tiah an ti.

Midang pawl nih, "Ram dang pathian pawl ih thuhla a sim sirua," tiah an ti. Zangahtihle Paul nih an sinah Jesuh le thawhsalnak* thu a sip ruangah a si. 19 Curuangah Paul cu Areopagas tihmi an khua ih khonsil sinah an suahpit; cule, "Na sipmi zirhnak thar hi zangtu a i, tih fiah kan duh. 20 Zangahtihle ruahnak danglam kan na sim ih a sullam fiah kan duh," tiah an ti. 21 Zangahtihle Athens mi zate le cuvai hmun ih ram dang mi pawl cu an tikcu zate hmangin thu thar cu theih berbo le sip berbo a duh bikmi pawl an i.

22 Cule Paul cu an khua khonsil Areopagas hmaiah a ding ih an sinah, "Nan Athens minung pawl, biaknak la ah nan taima ngai tih ka fiah. 23 Zangahtihle nan khawpi sungih ka toihvah tikah Pathian nan biaknak hmin pawl khaw ka zoh ih biakṭheng pakhat cungah, ‘Fiah Lomi Pathian Sinah,’ tiah nan nganmi ka hmu. Cutih ih nan fiah lo nain nan biakmi Pathian cu atun nan sinih kan phuanmi cu a si. 24 ✝Cuvai Pathian cu nih leilung le a sungih ummi hmahhmah hi a sersiam. Ani cu lei le van ih Bawi a ih ruangah minung kut ih sakmi biakinn sungah a um lo. 25 Cuvai Pathian cu mi hmahhmah sinah nunnak, thaw le thil dang hmahhmah pawl petu a sih ruangah ṭulsammi nei mangin minung nih a hrangah kan tuahsak ṭulmi zangkhaw a um lo. 26 Minung pakhat sungin leilung miphun hmahhmah a tuah ih leilung pumpuluk ah a umter colh. Khawtik can ah an um thok ih khoitu hmun tiang an um thok, tih khaw a hlan khan in a ruatcia colh. 27 Zangah hitih in a tawlrel cia tihle, Pathian an hrawl ih an hmuh suak theinak dingah a i. Asinain taktakte in tihle Pathian cu kan lakih hutu thawn khaw an hlatfa lo. 28 Mi pakhat nih a sip cia mangin,

" ‘Ama ih sungah kan nung, kan cangvai ih kan um!’

tiah nan hla phuaktu mi hrekkhat nih an tih mangin,

‘Kan khaw hi a tefa kan si ve.’

29 Cutih in Pathian ih tefa kan sih ruangah Pathian ih sihnak cu minung ih thiamnak le ruahnak ih tuahmi sui milem, ngun milem le lung milem thawn ṭiahfa in kan ruah ding a i lo. 30 Hlan lai ah Pathian an fiah lo lai can pawl cu hmu lo mangin a umsan hnei men; asinain atun ah cun khawkakip ih mi hmahhmah cu an lung thleng dingin thu a pe. 31 Zangahtihle a hrilcia mi pa hmangin leilung pumpuluk hi dik ngai ih thu a ṭhen ding ni cu a khiah cem. Cuvai thu cu thudik a i tiah mi hmahhhmah sinih latternak ah cuvai pa cu thihnak in a thoter sal cem," tiah a ti.

32 Mithi thawhsalnak thu an theih tikah mi hrekkhat nih an zohsuam, asinain mi dang pawl nih, "Hivai thu hi na sinin ngai sal kan duh," tiah an ti. 33 Cule Paul cu an sinin a feh. 34 Mi hrekkhat nih an thlun ih an zum. A zumtu lakah Khonsil Areopagas sungtel pakhat Dionisias khaw a tel. Damaris tihmi numi pakhat le mi dang pawl khaw an tel ve.