1 Antiok khawpi ih kawhhran ah profet pawl le zirhtu pawl cu an um: Cu pawl cu Barnabas, (Midum tih kawhmi) Simeon, (Sairin khawmi) Lucius, (Herod* zoh). Tetrak thawn a ṭhanglian khat mi) Manaen, le Saul le pawl an si. 2 Bawipa rian in leh caw ul in an um lai ah, Thlarau Thianghlim nih, "Barnabas le Saul hi ka thiahmi ṭuanṭuan kau ṭuan dingah a dangtein thia uh," tiah a ti.

3 Cun caw ul in thla an cam ih, Barnabas le Saul ih lu cungah kut an suang hnukah an thlah.

4 Cule Thlarau Thianghlim ih thlahsuaknak in, Barnabas le Saul cu Seleusia ah an feh ih cuvai hmun in Saipras tikulh ah lawng thawn an feh. 5 Salamis khawpi an tian tikah Judah mi pawl ih sinakok ah Pathian thu an sim. Bawmtu dingah Johan Marka khaw an ṭhita.

6 Cule Saipras tikulh pumpi an feh ih, Pafos khawpi tiang an feh. Cuva ah Judah mi Bar-Jesuh tihmi dawithiam pa profet deu an hmu. 7 Ani cu Saipras tikulh uktu Sergias Paulas thawn an um. Sergias Paulas cu mifing ngai a i. Pathian thu theih a duh ruangah Barnabas le Saul cu a sinah a ko hnei. 8 Asinain dawithiam Elimas (Elimas tih cu a Grik hmin a i) nih a dodal hnei ih, tikulh uktu Sergias Paulas cu a zupnak in pialter a tum. 9 Cule Paul tih khaw ih an kawhmi Saul cu Thlarau Thianghlim in a khat ih Elimas cu mit ṭhep lo in a zoh ih, 10 "Nang Seihtan fapa, dinfelnak hmahhmah ih ral, hrokhrawlnak phun zakip le thuphan ih khat, Bawipa ih zalam ding pawl merhkawi hi na cawlhnga thok lo maw? 11 Atun ah ngai hnik, Bawipa ih kut cu na cungah a um, na mit a khang thok ih tawkfang sung cu khua hmu lo in na um thok," tiah a ti.

Veikhatte ah Elimas cu khawdur le khawmaw nih a ron ṭilh ih a kut in sualtu ding hrawl in a dap ngelngo. 12 Cule tikulh uktu nih cuvai thil cangmi a hmuh tikah a zum; zangahtihle Bawipa ih thuhla an zirhmi ah a khawruah a har ngai.

13 Pafos khawpi in Paul le a rualpi pawl cu lawng thawn an feh ih, Pamfilia ram Perga khawpi an ban. Cuva in Johan Marka nih a ramta hnei ih Jerusalem khawpi ah a kir. 14 Perga khawpi in an feh ih, Pisidia ram Antiok khawpi an ban. Cun Sabbath ni ah sinakok ah an lut ih an to. 15 Cule Daan cabu le Profet pawl ih cabu pawl an siar hnukah, sinakok uktu pawl nih, "Unau pawl, mipi pawl hrangah thazang peknak ṭonkam nan neih asihle sim uh," tiah an ti. 16 Cun Paul cu a ding, a kut a zap ih thu a sim,

"Pathian a bia tu Zential mi pawl le ka phunpit Israel mi pawl, ka ngai hnik uh! 17 Israel mi pawl ih Pathian nih kan pupa pawl a hril hnei ih, Izipt ram ah a langte sung an um lai ah, miphun hnemngai ah a tuah hnei. Cule a maktara mi huham thawn cuvai ram in a hruaisuak hnei. 18 Cun ram ro ram car ah kum sawmli sung a kilkhawi hnei.* 19 Cule Kanan ram ih miphun pasarih pawl a siatsuah colh ih an ram cu ama ih miphun sinah a pe hnei. 20 Hitih in thil a cangmi hi kum 450 hrawng a rei.

"Cu hnukah* profet Samuel san a tian hlan sung an sinah Thuṭhentu pawl a pe hnei. 21 Cule Israel mi pawl nih siangpahrang an hler ih Pathian nih kum sawmli sung an siangpahrang si dingah Benjamin hrin Kish ih fapa Saul cu an sinah a pe hnei. 22 Pathian nih Saul cu a hnong ih David cu an siangpahrang dingah a tuah. David ih thu ah Pathian nih hitih in a ti: ‘Jesse ih fapa David, ka thinlung mang pu mi minung ka hmu cem. Ani nih tuahter ka duhmi hmahhmah a kimter thok,’ tiah a ti. 23 Cule a thutiam mangin, Pathian nih Israel mi pawl hrangah David cithlah sungin Rundamtu Jesuh a suakter. 24 ✝ Jesuh ih ṭuanṭuan a thok hlan ah, Johan nih Israel mi hmahhmah sinah an sual sir fa ding le baptisma co dingah thu a sim. 25 ✝ Cule Johan nih a ṭuanṭuan a colh i thok tikah, ‘Kei hi hutu ah ka ruat uh ci? Kei cu a cuvai pa ka si lo. Asinain ngai hnik uh, ka hnukah mi pakhat a tiang, kei cu a kedap phoihtu ding hmanah ka tlak lo,’ tiah a ti.

26 "U le nau pawl, Abraham ih tesinfa pawl le nan lakih Pathian ṭihzahtu Zentail mi pawl, hivai rundamnak thu hi kan zate sinah kuat a i. 27 Zangahtihle Jerusalem khawpi ih a ummi pawl le an hruaitu pawl nih Jesuh cu an fiahthiam lo. Sabbath ni cangcang an siarmi profet pawl ih nganmi thu pawl an fiahthiam lo ruangah Jesuh cu daan an tat ih cuvai profet pawl ih ṭonkam cu an kimter. 28 ✝ Cule thihnak tlak thu zangkhaw an hmu lo nain, ani cu that dingah Pilat sin an hler. 29 ✝ Cun a thuhla an ngan cia mi pawl hmahhmah an tuah colh hnukah thinglamtah cungin an ṭhum ih thlan ah an phum. 30 Asinain Pathian nih thihnak in a thoter sal ih, 31 ✝ ama Jesuh thawn Galilee peng in Jerusalem khawpi tiang khual a tlawntu pawl sinah ni tamngai sung a lang. Atun ah cuvai pawl cu Israel mi pawl sinah fiahpittu an i. 32,33 Cule kan pupa pawl sinah Pathian ih thutiam cu nan sinah kan phuang. Jesuh thawhter salnak thawgin an tesinfa kan sinah cuvai thutiam cu Pathian nih a famkim ter. Cuvai cu Saam panihnak sungah:

" ‘Nang cu ka Fapa na si,

nihin ni ah na Pa ka si i cem,’ tiah nganmi mangin a i.

34 Cun Jesuh ih ruak cu a ṭawtciam lonak dingah, Pathian nih mithi lak in a thoter. Cucu hitih in a sim cia:

‘David sinih ka tiamkammi a thianghlim ih

rinsantlak a i mi thlawsuah pawl cu nan ta pe thok,’ tiah a ti.

35 Curuangah a dang Saam sung khaw ah,

‘Na mi thianghlim cu a ṭawtciam men ding na siang thok lo,’ tiah a ti.

36 Zangahtihle David cu ama ih san sungah Pathian duhmi ṭuan a ṭuan ih a thih tikah a pupa pawl sinah phum a i, cule a ruak cu a ṭawtciam ta. 37 Asinain Pathian ih a thawhter salmi Jesuh cu a ṭawtciam lo. 38,39 Curuangah ka phunpit pawl, hivai hi fiah uh, Jesuh thawngin sual ngaihthiamnak thu cu nan sinah phuan a i; cule Moses daan nih nan ta luatter thei lo, asinain Jesuh a zumtu hmahhmah cu sual hmahhmah sungin luatter an i. 40 A tangla mangin Profet pawl nih an sipmi hi nan cungah* a tian pang lonak dingah ralring uh. Profet pawl cunih:

41 ‘Zoh hnik uh, nan mi nautat hmang pawl! Mangbang thinphang uhla riaral uh!

Zangahtihle nihin ni ih ka tuahmi hi

mi nih nan sinah an simfiang hmanah

nan zup duh lo dingmi a i,’ " tiah a ti.

42 Paul le Barnabas cu sinakok in an suah cangka ah mipi pawl nih hmaizarh Sabbath ni khaw thu sim sal dingin an sawm. 43 Sinakok ih mipi pumkhawmnak an colh i tikah, Judah mi tamngai le Judah biaknak ih a lutmi Zentail mi tamngai nih Paul le Barnabas cu an thlun. Paul le Barnabas nih an sinah thu an sim ih, Pathian thinfahnak sungah nung reuhro dingin an forh.

44 A hmaizarh Sabbath ni ah an khawpawh deuhthaw in Bawipa ih thu ngai dingah an tiang. 45 Judah mi pawl cu mipi tamngai an hmuh tikah nahsuahnak in an khat. Paul ih thusipmi pawl cu dokalh in ṭonkam sia an ṭon. 46 Cutikah Paul le Barnabas nih ralṭha ngai in, "Nan sinah Pathian thu sip hmasak cu a ṭul hrimhirm. Asinain nannih nan el ih nanma le nanma kumkhua nunnak co tlakih nan ruahfak lo ruangah, ngai hnik uh, Zentail mi pawl sinah ka her fa thok. 47 Zangahtihle Bawipa ih thu kan na pek mi cu hitih in a si:

" ‘Leilung ne tiang rundamnak kengtu dingah,

nan cu Zentail mi hrangah tleunak ah nan ta tuah cem,’ a ti," tiah an ti.

48 Zentail pawl nih cuvai thu an theih tikah an lung a awi ngai ih, Bawipa ih thu cu an sunloih. Cule kumkhua nunnak co dingah Pathian ih a hrilmi pawl nih an zum.

49 Cule Bawipa ih thu cu ram pumpuluk ah a darh. 50 Asinain Judah mi pawl nih Pathian a betu numi pawl le khaw sungih hruaitu pami pawl cu an tokhrolh. Cule cuvai pawl nih Paul le Barnabas cu an hrem ih an peng sungin an dawi. 51 ✝Paul le Barnabas cu an ke ih leivut an thingta ih, Ikoniam khawpi la ah an feh. 52 Cule dungthluntu pawl cu Thlarau Thianghlim le lungawinak thawn an khat.