1 Puithiam Lubik nih Stefen cu, "Hitih ih an tihmi hi a si taktak maw?" tiah a sut.

2 Cule Stefen nih, "U le nau, pa le pawl, ka ngaihnik uh! Kan pu Abraham cu Haran ah um dingih a feh hlanah Mesopotamia ah Pathian sunlawinak a sinah a rong lang ih, 3 a sinah, ‘Na sungkhat le na ram ramta pit in ta hmuh dingmi ramah feh,’ tiah a ti. 4 Cutih in Khaldea ram in a suak ih Haran khua ah a um. A pa ih thih hnukah atun nan umnak ramah Pathian nih a thawnter. 5 Cuva cu zangtu ro khaw a pe lo, a ke cilnak ding hrang daih hman a pe lo; asinain Abraham nih tefa a nei lo kau na in, hi ram hi nangma le na tesinfa pawl ih ta a si thok, tiah thu a kam. 6 Cun Pathian nih a sinah, ‘Na tesinfa pawl cu ram dang ah an um thok; cuvai ram ah sal an cang thok ih kum 400 sung hremnak an tuar thok. 7 Asinain an rianmi miphun cungah thuṭhennak ka nei thok ih, cuhnuk ah cuvai ram ihsin an suak thok ih hivai hmunah ka na be eng thok, tiah Pathian nih a ti,’ tiah a sim. 8 Cule Pathian nih Abraham sinah serhtannak cu a thukam hminhlitnak ah a pe. Curuangah Abraham nih Isak a hring ih niriat nakah a serh a tansak. Isak nih Jakob a hring ih Jakob nih cithlahtu pupa hleinih a hring.

9 "Kan pupa pawl nih Josef cu an se-elsuah ih Izipt ramah sal ah an zuar. Asinain Pathian a sinah a um ih, 10 a harsatnak sung in Pathian nih a runsuak. Cule Izipt siangpahrang Faro ih hmaiah mithmai ṭha le fitnak a pe. Faro nih Josef cu a ram pumpi le a innsang hmahhmah tlunah uktu ah a tuah. 11 Izipt ram le Kanan ram hmahhmah ah mangṭam a tlung ih harsatnak rauhngai a tiang. Kan pupa pawl khaw ei ding ticaw an nei lo. 12 Jakob nih Izipt ram ah ticaw a um tih a theih tikah a fapa pawl, kan pupa pawl cu a thlah hnei; cucu Izipt ram an tian hmasa biknak a i. 13 A veinihnak Izipt ram an tian tikah Josef nih a unau pawl sinah a phuangfa ih Josef ih sungkhat pawl cu Faro ih mifiah ah an cang. 14 Curuangah Josef nih a pa Jakob le a sungkhat pawl sinah Izipt ramih vai dingin thu a cah. An zatein minung sawmsarih le panga an i. 15 Cule Jakob cu Izipt ram ah a feh; cuva ah ama le a fapa pawl cu an thi. 16 An ruak cu Shekhem ah an thiar ih Abraham nih Hamor ih fale pawl sinah paisa thawn a leimi thlan ah an phum.

17 "Pathian nih Abraham sinih thu a tiamkam mi a kimnak tikcu a nai mepmo tikah Izipt ramih a ummi kan phunpi pawl cu an pungṭhang. 18 Cule Izipt ram ah Josef fiah lotu siangpahrang dang a suah hlan tiangin an karhzai. 19 Cuvai pa nih kan pupa pawl cu ama ih hlawknak hrangah hmang hnei pit in a hrem hnei. Cule an tefa pawl khaw thi seuh tiah hramhram in a hlonter hnei. 20 Cuvai can ah Moses cu a suak ih Pathian mithmuh ah mimawi ngai a i. Thla thum sung a pa ih inn ah an kilkhawi. 21 Cule an hlon ih Faro siangpahrang fanu nih a sar ih a fapa dingah a kilkhawi. 22 Moses cu Izipt ram mi pawl ih fitnak hmahhmah zirh colh a i ih, a ṭonkam le a ṭuanṭuannak ah mi maktara a i.

23 "Moses cu kum sawmli a kim tikah Israel tefa pawl va len duhnak thinlung a nei. 24 An lakih mi pakhat dik lo ngai ih a tuar lai cu a hmu ih a hum, cule phu a la ih Izipt pa cu a that. 25 Zangahtihle Pathian nih anni luattertu dingah ka na hmang thok ih ka phunpi pawl khaw nih an fiahthiam thok, tiah a ruat nain an fiahthiam lo. 26 A zingla ah Moses cu Israel mi panih an velhfak lai ah an sin a feh ih a rem hnei tum, ‘Milai pawl, nan cu unau nan i. Zangruangah pakhat le pakhat nan velfa?’ tiah a ti hnei. 27 Asinain a innhram pa dik lo ih a titu pa nih Moses cu a til ih, ‘Hutu nih kan cungah uktu le thuṭhentu ah ta tuah? 28 Mahnia ih Izipt pa na thah mangin ka na thah na duh maw?’ tiah a ti. 29 Moses nih cucu a theih tikah Midian ramah a zuang; cuvai ram ah mikhual in a va um ih, fapa panih a nei.

30 "Kum sawmli a liam hnukah, Sinai Tlang hram ih ramṭhing ah hrambur meisa alh lakin Moses sinah vancungmi a rong lang. 31 Moses nih cuvai cu a hmuh tikah a mang a bang ih zohhliah dingin a va naih. Cule Bawipa ih aw nih a sinah, 32 ‘Kei cu na pupa pawl ih Pathian, Abraham ih Pathian, Isak le Jakob ih Pathian ka si,’ tiah a ti. Cule Moses cu a ṭhia ih a zoh ngam lo. 33 Cun Bawipa nih a sinah, ‘Na kedap cu phoihfa, zangahtihle na dinnak leilung hi hmun thianghlim a i. 34 Izipt ram ih ka minung pawl zanzaih tuarnak cu ka hmu. An aihramnak ka thei ih anma runsuak hnei dingah ka tiang. Atun ah ka pha, Izipt ramah ta thlah thok,’ tiah a ti.

35 "Moses cu, ‘Hutu nih kan tlunih uktu le thuṭhentu dingah ta tuah?’ tiah an hnawl dahmi pa a i. Hrambur lakih a langmi vancungmi ih bopnak thawn uktu le runsuaktu dingah Pathian ih thlahmi pa a i. 36 Izipt ram ih Israel mi pawl cu a runsuak hnei ih Izipt ram, Tipi Sen le ramṭhing lakah kum sawmli sung mangbangza le hmuhsaknak tamngai a tuah. 37 Moses cu Israel mi pawl sinah, ‘Pathian nih nan lakin nan hrangah kei mangin* profet a suakter thok,’ tiah a titu pa a si. 38 Ani cu, Sinai Tlang cungah a sinih thu a simtu vancungmi le kan pupa pawl thawn ramṭhing ah a umtu khi a si ih, Pathian thu nung kan sinih a tian theinak dingah a cohlangtu khaw a si.

39 "Kan pupa pawl nih a thu an thlun duh lo. An hnong ih an thinlung in Izipt ram ah kirhsal an duh sawn. 40 Curuangah Aaron sinah, ‘Kan hmai ih lamhmuhtu dingah pathian dangdang kan tuahsak; Izipt ram in kan na hruaisuaktu Moses hi zang a cang kan fiah lo,’ tiah an ti. 41 Curuangah caw zuk lem an tuah ih cuvai milem sinah thawinak an pe. Cule anma kut ih tuahmi ah an lung a awi. 42 Cun Pathian nih a dungtut hnei ih, van ih ni, thlapa le arsi pawl a be ter hnei. Profet cabu sungah:

" ‘Maw Israel mi pawl, kum sawmli sung

ramṭhing ih ramsa nan thah mi le thawinak pawl khi,

ka sinah nan pe maw?

43 Molek ih puanthlam,

nan pathian Refan ih arsi le

biak dingih nan tuahmi zuklem cu nan phur.

Curuangah nan cu Babilon pawn la ah nan ta kuat thok,’ tiah a um.

44 "Kan pupa nih ramṭhing ah fiahpittu Puanthlam cu an nei. Cuvai Puanthlam cu Pathian nih Moses sinih a lattermi pianhmang mangih sakmi a i. 45 Kan pupa pawl nih cuvai puanthlam cu an pupa pawl sinin an ngah hnukah, Pathian nih an hmaika ah miphun pawl a dawisuak ih an ram an lak lai ah Joshua thawn an lut pit. Cuvai puanthlam cu David ih san tiangin a um. 46 David cu Pathian ih mithmai ṭha a co ih Jakob ih Pathian* umnak ding inn sa dingin a hler. 47 Asinain Solomon nih inn cu a sa.

48 "Asinain Cungnungbik Pathian cu minung kutih tuahmi inn ah a um lo; profet ih sip mangin,

49 " ‘Bawipa nih, Vancung hi ka siangpahrang tokheng a si ih

Leilung hi ka ke siahnak a si, tiah a ti.

Ka hrangah zangtumang inn maw ka na saksak thok?

Asihlole ka cawlhngatnak ding hmun cu khoitu ah a si?

50 Hi pawl hmahhmah hi ka kut ih tuahmi an i lo maw?’ tiah a ti.

51 "Nan mi lungruh pawl le thinlung le naa serhtan lo pawl, nan pupa pawl mang thotho nan i: Thlarau Thianghlim nan dodal ringring. 52 Profet pawl lakah nan pupa pawl ih hrem lo mi pakhat tal an um maw? Mi dingfel pa tiang dingih a phuangtu pawl cu an that. Atun ah cuvai pa cu nan zuar ih nan that. 53 Vancungmi hmangin pekmi daan nan co nain, nan thlun lo," tiah a ti.

54 Khonsil upa pawl nih Stefen thusipmi an theih tikah an thin a se tuk ih an hacang an rial. 55 Asinain Stefen cu Thlarau Thianghlim in a khat ih vancung a han zoh tikah Pathian sunlawinak le Pathian vorhla ih a dingmi Jesuh cu a han hmu. 56 Cutikah, "Zohhnik uh! Van a hong fa ih Pathian vorhla ah Minung Fapa a ding ka hmu!" tiah a ti.

57 Cun Khonsil upa pawl cu thang ngai in an hek ih, an naa an phit, cule lungrual tein Stefen sinah zamrang ngai in an pha. 58 Khaw lengah an dawisuak ih lung in an phom. Fiahpittu pawl ih an hnipuan cu Saul an tihmi tlangval pa sinah an se. 59 Lung ih an nam lai ah Stefen cu Bawipa a ko ih, "Bawipa Jesuh, ka thlarau hi ron la hram!" tiah a ti. 60 A khuk a bil ih, "Bawipa, an sualnak hi cing hram hlah!" tiah tha ngai in a hek. Cutih ih a heh colh in a thi.