1 Sisaria khua ah Kornelias tihmi pa a um, ani cu "Italy Ralkap Burpi," tihmi Rom ralkap uktu ralbawi a i. 2 Kornelias le a innsungsang hmahhmah cu Pathian ngaihsak le ṭihzah tu an i ih mi fahrah pawl bawm ringring tu le Pathian sinah thlacam ringring tu an i. 3 Ni khat cu simla nazi pathum hrawngah Kornelias nih latnak a hmu. Pathian ih vancungmi cu fiangngai in a hmu ih a sinah tiang pitin, "Kornelias," tiah a ko.

4 Kornelias nih vancungmi cu ṭih nawn in a zoh ih, "Bawipa, Zangtu a i?" tiah a sut.

Cule vancungmi nih, "Na thlacamnak pawl le mi fahrah na bopmi pawl cu hmulh lo dingmi thawinak mangin Pathian hmai ah an hang tiang. 5 Cun a tun ah Joppa khawpi ah Peter tiah kawhmi Simon ko dingin mi thlah hnei. 6 Cuvai pa cu saphaw thawn thil tuahtu Simon ih inn ah a cam ih a inn cu tipi kapah a um. Ani nih na tuah dingmi ta sim thok," tiah a ti. 7 Cule vancungmi cu a zuang. Kornelias nih ama kil ringring tu lakih biaknak la taima mi ralkap pakhat, le a sin-um mi panih le cu a ko hnei. 8 Thil cangmi hmahhmah cu an sinah a sim hnei colh hnukah Joppa khawpi ah a thlah hnei.

9 A zingla, khualtlawn in an feh ih Joppa khawpi an phak sam ah, sun dir hrawngah Peter cu thlacam dingin inn cungta khan ah a hang kai. 10 Peter cu a caw a ṭam ih zangtumaw ei a duh; caw an timtuah lai ah Peter cu latnak a hmu. 11 Cule van cu a hong fa ih a kil pali ih khih mi puan a ṭiah mi thil pakhat leilung ih a ṭhumfa cu a hmu. 12 Cuvai sungah ke li nei ramsa pawl, leilung ih bokvak ramsa pawl le van ih a hawi mi vate a phunphun an um. 13 Cule aw pakhat nih a sinah, "Peter, hang tho. That pit in ei," tiah a ti.

14 Asinain Peter nih, "A i lo e, Bawipa! Zangahtihle a thiang lo mi le a borhhlawh mi thil ka ei kel lo," tiah a let.

15 Cule aw nih a sinah, "Pathian nih a thianter cem mi cu a thiang lo ah ruat hlah," tiah veinihnak a ti sal. 16 Cuvai cu veithum tiang a cang. Cule veikhatte ah puan cu van ah lak kir sal a i.

17 Cun Peter cu cuvai latnak ih sullam hi zangtu a i tiah a ruah ngelngo laiah, Kornelias ih thlahmi pawl cu Simon ih inn an hrawl ih kotka hmai ah an ding. 18 Cule an ko ih, cuva ah Peter tih kawhmi Simon a um le um lo an sut.

19 Peter cu latnak a hmuhmi a ruah ngelngo laifang ah Thlarau nih a sinah, "Ngaihnik, mi pathum* nih ta hrawl eng. 20 Curuangah hang tho pit in rong ṭum. Anma thawn feh dingah zangkhaw ṭhukṭhu hlah; zangahtihle anni cu ka thlahmi an i," tiah a ti. 21 Cun Peter cu a rong ṭum ih an sinah, "Nan hrawlmi cu kei hi ka si. Zangtu thu ruangah nan tiang?" tiah a sut hnei.

22 Anni nih, "Ralbawi Kornelias nih kan na thlah. Ani cu mi dingfel le Pathian ṭihzahtu, Judah mi pawl ih upat ngai mi a i. Na ṭonkam pawl ngai dingin a inn ih ta ko dingah a thianghlim vancungmi nih a forh," tiah an ti. 23 Cule Peter nih inn songah a ko hnei ih a riakter hnei.

A zingla ah Peter cu anni thawn a feh; Joppa khawpi ih zumtu hrekkhat pawl thawn an feh khat. 24 A zingla ah Sisaria khawpi an ban ih Kornelias nih a sungkhat pawl le a rualpi ṭha pawl thawn an hngak. 25 Peter cu inn songih a luh tikah Kornelias nih a hmuak, cule Peter ke hramah a bok ih a be. 26 Asinain Peter nih a han tho ih, "Hang ding, kei khaw minung ka i ve," tiah a ti. 27 Peter cu cupa be pah in inn songah a lut ih mi tamngai an hmuahkhawm fak cu a hmu. 28 Peter nih an sinah, "Judah mi nih Zentail mi va len le pawlkop cu kan biaknak daan nih a siang lo tih nan fiah. Asinain hutu khaw mi thiang lo le mi borhhlawh tiah ka tih hnei lo nak dingah Pathian nih ka na hmuh cem. 29 Curuangah ka na kawh eng tikah nan ta el loin nan sinah ka tiang. Zangtu ruangah ka na ko eng, tih nan ta suh ka duh," tiah a ti hnei.

30 Cule Kornelias nih, "A liamcia mi ni thum tunmang tikcu simla nazi pathum ah ka inn ah thla ka cam.* Veikhatte ah mi pakhat cu a tle mi hnipuan hru pit in ka hmaiah a ding ih, 31 ‘Kornelias, Pathian nih na thlacamnak a thei ih mi fahrah na bopnak pawl khaw a cing colh. 32 Joppa khawpi ah Peter tiah kawhmi Simon ko dingin mi thlah hnei. Cupa cu saphaw thawn thil tuahtu Simon inn ah a cam ih a inn cu tipi kapah a um,’ tiah ka na ti. 33 Curuangah na sinah mi ka thlah lohli; ka na el siang loin na tiang ih ka lungawi tuk. Atun hi Bawipa ih thu ta pekmi thil hmahhmah kan na sip dingmi pawl ngai dingah kan zatein hiva ah Pathian hmai ah kan tiang," tiah a ti.

34 Cun Peter cu ṭon a thok ih, "Pathian nih mi thleidan a nei lo tih cu dik ngai in ka fiah. 35 Zangtumang miphun i khaw sehla Pathian a ṭihzah tu le thil dik a tuahtu pawl cu Pathian nih a cohlang. 36 Zanghmahhmah tlunih Bawi, Jesuh Khrih thawngin remdaihnak Thuthang Ṭha, Pathian nih Israel mi pawl sinih a phuan mi thu, cu nan fiah. 37 Johan nih baptisma thu a sip hnukah Galilee peng in a thok ih Judea ram sung hmahhmah ah thil maktara a cangmi khaw nan fiah colh. 38 Nazareth mi Jesuh cu Pathian nih Thlarau Thianghlim le huham thawn zangtih in a thuam tih khaw nan fiah. A sinah Pathian a um ruangah hmunzakip ah feh pit in thil ṭha a tuah ih thlarau sia ih molhmi pawl hmahhmah a dam ter. 39 Cule Judah mi pawl ih ram sung le Jerusalem khawpi ih a tuahmi hmahhmah a fiahpittu cu kanma hi kan i. Thinglamtah cungah an thlai ih an that. 40 Asinain a ni thumnak ah Pathian nih thihnak in a thoter sal ih hmuhtheih in a langter. 41 Mi hmahhmah sinah i loin, Pathian ih a hrilmi a thu fiahpittu le thihnak in a thawhsal hnuk ama thawn a ding ei khat tu kan sin sawn ah a langter. 42 Cun mi sinah thuthang ṭha sim dingah le hivai pa cu Pathian nih a nungmi le a thimi cungah thuṭhentu ih a tuah mi pa a sihnak thu fiahter dingah kan na forh. 43 Profet pawl hmahhmah nih ani ih thu an sim ih, ama a zumtu hmahhmah cu a hmin ih huham thawngin sual ngaihthiamnak an co thok," tiah a ti.

44 Cutih ih Peter a ṭon berbo lai ah, a thu sipmi a ngaitu hmahhmah cungah Thlarau Thianghlim a rong tiang. 45 Cule Joppa khawpi in Peter thluntu serhtan mi zumtu pawl nih Zentail mi sin khaw ah Pathian nih a laksawng Thlarau Thianghlim a burh tih an hmuh tikah an mang a bang setak. 46 Zangahtihle cuvai pawl cu ṭon phun dangdang in an ṭon ih maktara Pathian sih zia an thangṭhat cu an theih ruangah a i. Peter nih, 47 "Hivai pawl hi kanma mangin Thlarau Thianghlim an co cem ve. Curuangah ti thawn in baptisma la dingah hutu nih a dawn hnei thei thok?" tiah a ti. 48 Curuangah Peter nih anni pawl cu Jesuh Khrih ih hmin in baptisma la dingah thu a pe. Cule anni nih Peter cu an sinah ni tawkfang cam rih dingin an sawm.