1 Cun buainak a net hnukah, Paul nih dungthluntu pawl cu a ko hnei ih tha a pe hnei. Cule cibai a buk hnei ih Masidonia ram ah a feh. 2 Cuvai ram cu a tlawn ih thapeknak awkam tamngai a sim hnei. Cule Grik ram ah a ban ih, 3 cuva ah thla thum sung a cam. Cun Siria ram la ih lawng thawn a pawh tum fangah Judah mi pawl nih ani dokalh in a thupte in thil ṭha lo an ruah ruangah, Masidonia ram la in kirsal dingah thu a ṭhencat. 4 Cule Berea khawmi Pirhas ih fapa Sopater, Thesalonika khawmi Aristarkas le Sekundas, Derbe khawmi Kaias, Asia rammi Taikhikas le Trofimas, leh Timote pawl nih Paul cu an fehpit. 5 Cuvai pawl cu an feh khan ih Troas khawpi in kan na hngah eng. 6 Colh tello Sang Puai a net hnukah Filipi khawpi in lawng thawn kan feh, ni nga hnukah Troas khawpi ah kan man ih cuva ah ni sarih sung kan cam.

7 Nipi ni* simla ah, zanriah ei khat dingin kan hmuakkhawm fa. Paul cu a zingthlala ah feh thok a ih ruangah an sinah zanvar thu a sim hnei. 8 Kan hmuahkhawm faknak cungta khan ah mei-inn tamngai a um. 9 Cule Zutikhas an tihmi tlangval pakhat Paul ih thu a sip berbo laiah cu tukvirh ah a to ih a ihhmul. A ihhmulh titngai lai ah inn ṭhat thumnak in leilung ah a rong ṭil. An rong sar tikah cu a thi cem. 10 Paul cu a rong ṭum ih tlangval pa ih cungah a bok ih a pom. Cule, "Nan thinphang hlah uh, a nung rih," tiah a ti. 11 Cule Paul cu cungta khan ah a hang kai sal ih sang a ṭhen ih an ei. Paul cu zingla nisuak tiang thu a sip hnukah a feh. 12 Tlangval pa cu nungdam in inn ah an fehpit ih an hna a ngam ngai.

13 Cun Assos khawpi ah lawng thawn kan feh ih, cuva ah Paul sawm pah thok kan i; zangahtihle ama ih khawkhan cia mangin ke thawn feh khan a tum. 14 Cule Assos khawpi ah Paul cu kan hmu ih, lawng cungah kan ṭhi ih Mitilene khawpi ah kan feh. 15 Mitilene khawpi in lawng thawn kan feh ih a zingthlala ah Khios tikulh ral khatla kan ban. A tipsun ah Samos tikulh kan ban ih a thiamsun ah Miletas khawpi kan ban. 16 Paul nih Asia ram ih cam rei ding cu a duh lo ruangah lawng thawn Efesa khawpi cu lat a tum; zangahtihle a canthiam ah cun Pentikos ni khel in Jerusalem ih tian lohli a duh.

17 Paul nih Miletas khawpi in Efesa khawpi ah mi a thlah ih, kawhhran upa pawl a ko hnei. 18 Kawhhran upa pawl an tian tikah an sinah, "Asia ram kan tiang ih a ni khatnak in ka tikcu hmahhmah cu nan sinah zangti mangin ka hmang tih cu nan fiah colh kau. 19 Judah mi pawl ih bawhthupnak ruangah a cangmi hneksaknak pawl le tangdor ngai le mitthli tamngai pawl thawn Bawipa cu ka rian. 20 Zapi hmai ah iseh, inn khat hnuk inn khat ah iseh, nan hrangih a ṭhahnem mi zangkhaw sup loin thu nan ta sim ih nan ta zirh tih khaw nan fiah. 21 Judah mi sinah iseh, Zentail mi pawl sinah iseh, an sual sir in Pathian la ah kir dingin leh kan Bawipa Jesuh zum dingin fakngai in thu ka sim. 22 Cule atun ah ngai hnik uh, Thlarau Thianghlim ih hruainak mangin Jerusalem khawpi ah feh ka tum; cuva ah ka cungah zangmang thil a cang thok tih ka fiah lo. 23 Khawpi cangcang in thawngtlaknak le harsat-hremnak hlanghlang nih ka na bawh tiah Thlarau Thianghlim ih ralrin peknak hlang kau hi ka fiahsun cu a si. 24 ✝Asinain ka hrangah ka nunnak hi zangkhaw ah ka siar lo; Bawipa Jesuh nih ṭuan dingin ka na pekmi Pathian ih thinfahnak Thuthang Ṭha phuansuah ding ṭuanvo hi ka colh hluhsuah thei ding kau hi ka saduhthah a i.

25 "Cun ngai hnik uh, Pathian uknak thu sim in nan lakah ka vak. Asinain atun cu hukhaw nih ka hmel nan hmu sal i thok lo, tih ka fiah. 26 Curuangah mi hmahhmah ih thisen lakin kei cu ka thiang tiah nihin sun ah nan ta fiahter. 27 Zangahtihle Pathian ih tumtahmi hmahhmah cu sup loin nan sinah ka phuang. 28 Nanma le nanma kilkhawi fa uhla, Thlarau Thianghlim nih tuurual pawl kilkhawi dingin nan ta tuah mangin nan tuurual pawl cu ṭhate in kilkhawi uh. Pathian* nih a Fapa thisen thawn* ama ta ih a tuah cemmi a kawhhran khaltu i hram uh. 29 Nan ta fehtak hnukah ṭihnungza sase pawl an tiang thokih tuurual pawl hi an zuah thok lo, tih ka fiah. 30 Nanma sung rori khaw in, dungthluntu pawl anma la ih hruaisual dingah thuphan simtu an suak thok. 31 Curuangah ralring uh. Sun le zan cawlhnga loin mitthli thawn kum thum sung nan ta zirhmi pawl khi hmulh hlah uh.

32 "Atun cu Pathian sinah le a thinfahnak thu sungah nan ta ap cem. Ama nih nan ta tungding thok ih mithiang pawl ih co dingmi ro khaw nan ta pe thok. 33 Sui iseh, ngun iseh, hnipuan khaw iseh hutu ih ta khaw ka daw hnei lo. 34 Keima le ka rualpi ih ṭulsammi pawl hmahhmah cu hivai ka kut nih a ṭuan tih cu nan fiah. 35 Santlai lo pawl nan bop theinak dingah himang ṭuanṭuan har ṭuan in zanghmahhmah nan ta hmuh cem. Bawipa Jesuh nih, ‘Ngah la nakin pek la ah thlawsuah a tamsawn,’ tiah a tihmi a ṭonkam pawl khi cing ringring uh," tiah thu a cah hnei.

36 Cule Paul nih cutih in thu a sip colh hnukah a khuk a bil ih an zatein thla an cam. 37 Cun an zatein an ṭap, Paul cu an bua ih an hnam. 38 Hutukhaw nih ka na hmu sal eng i thok lo tiah a tihmi nih an reh a se ter cuangce. Cule lawng umnak tiang an hei thla.