1 Festas cu cuvai ram a batnak ni thum hnukah, Sisaria khawpi in Jerusalem khawpi ah a feh. 2 Cuva ah Puithiam upa pawl le Judah mi hruaitu pawl nih Paul sual an puhmi cu a sinah an sim. 3 Paul cu lampi lakih thah an duh ruangah Jerusalem khawpi ah thlah dingin thinfah an dil. 4 Festas nih, "Paul cu Sisaria khawpi ih thawngtla a i ih keima khaw Sisaria khawpi ah ka kir tawn thok. 5 Curuangah nan hruaitu pawl cu ka thlun dah seu la hivai pa nih sualnak a neih a sih ahcun sual puh seu," tiah a let hnei.

6 Festas cu an sinah ni riat a ih lole ni hra nakih tam a cam hnukah Sisaria ah a tlung. A zingthlala ah thuṭhennak tokheng ah a to ih, Paul cu ko dingin thu a pe. 7 Paul cu thuṭhennak zung ih a tian tikah, Jerusalem khawpi in a tiangmi Judah mi pawl cu a kimvel ah an ding ih, rauh ngai in sual an puh; asinain sual an puhmi cu a dik rori tiah an langter thei lo. 8 Paul cu ama le ma a humfa ih, "Judah daan dokalh in iseh, Biakinn dokalh in iseh, Caesar dokalh in iseh zangkhaw thilsual ka tuah lo," tiah a ti.

9 Asinain Festas cu Judah mi pawl lungawiter a duh ruangah, Paul cu a sawn ih, "Jerusalem ah feh in cuva ah ka hmai ah taza ta cuai seu la na lungkim im?" tiah a ti.

10 Cule Paul nih a sawn ih, "Caesar ih thuṭhennak zung hmai ah atun hi ka ding, hivai hmunah taza ka cuai seu. Fiangngai ih na fiah mangin Judah mi pawl sinah thilsual zangkhaw ka tuah lo. 11 Thihnak tlak thilsual tuah hnik ningla cu thih hi ka el lo. Asinain anni ih sual ka na puh eng mi hi pakhat khaw a dik lo a sih ahcun, hutu khaw nih an kut ah ka na pe eng thei thok lo. Caesar sinah a zu ka khan," tiah a ti.

12 Cun Festas cu a khonsil upa pawl thawn thu an ronfak hnukah Paul cu, "Caesar sinah a zu na khan mangin Caesar sin na feh thok," tiah a let.

13 Ni tawkfang hnukah Siangpahrang Agrippa le a nupi Bernis cu Festas cibai buk dingah Sisaria khawpi ah an tiang. 14 Cuva ah ni rei nawn an cam hnukah, Festas nih Paul ih thuhla cu siangpahrang Agrippa sinah hitihin a sim, "Felix ih thawngthlak tak mi pa hiva ah a um. 15 Jerusalem khawpi ih na feh lai ah Judah upa pawl le puithiam upa pawl nih sual an puh ih a thu ṭhen dingah ka na hler eng. 16 Cule kei nih an sinah, ‘Sual an puh mi pa cu sual a puhtu pawl hmai ah ama le ma humfaknak can a neih hlanah an kut ih ap cu Rom mi pawl ih nunphung a i lo,’ tiah ka ti hnei. 17 Curuangah ka sinih an tian tikah, tikcu tlaiter loin a zingthlala ah thuṭhennak tokheng ah ka to ih Paul cu ko dingin thu ka pe hnei. 18 Sual a puhtu pawl cu an ding ih thu an sip tikah, ka ruah mang tlukin sualpuh theimi an nei lo. 19 Cunakin an biaknak thuhla le Jesuh an tihmi pa cu a thi ih a nung sal tiah Paul ih a sipmi thu sawn ah alfaknak an nei. 20 Cule cuvai an alfaknak pawl cu zangtih ih zingzoi ding ka fiah lo ruangah, Jerusalem khawpi ah feh in cuva ah sual ta puhmi pawl hi thuṭhen sak i la na lungkim nam, tiah Paul cu ka sut. 21 Asinain Paul nih a zu a khan ih a thuhla cu Caesar nih relsak dingah ka na hler. Curuangah Caesar sinih ka kuat hlan sung cu ralkap pawl nih kil dingin thu ka pe," tiah a ti.

22 Cutikah Agrippa nih Festas sinah, "Cuvai pa ih thusipmi cu keima rori nih theih ka duh," tiah a ti.

Festas nih, "Zingthlala ah na thei thok," tiah a let.

23 Cun a zingthlala ah Agrippa le a nupi Bernis cu an tiang, hmuahkhawm faknak khan sungah sunglawi ngai in an lut ih ralbawipi pawl le khaw sung upa nih an thlun. Cule Festas ih thupeknak mangin Paul cu an tianpit. 24 Cun Festas nih, "Siangpahrang Agrippa le kan sinih a um mi hmahhmah nih hivai pa hi nan hmu. Jerusalem khawpi ah iseh, hiva Sisaria khawpi ah iseh, Judah mi hmahhmah nih a thuhla ka sinah an tianpit ih hivai pa cu nung ding tlak a i i lo tiah an hek. 25 Asinain thihnak tlak zangkhaw a tuah lo tih ka hmu, cule ama rori nih Caesar sinah a zu a khan ruangah a sinih kuat dingin thu ka ṭhencat cem. 26 Asinain bawipa Caesar sinah hivai pa ih thuhla ngan ding zangkhaw ka fiah cuca lo. Curuangah a thuhla ka zingzoi thokih ngan ding zangmawtal ka neih pangah tiah, nan zate hmai le Siangpahrang Agrippa na hmai rori ah ka suahpit. 27 Zangahtihle thawngtla pakhat dokalh in sual an puh mi cu a thu felfai ngai fiangter lo in Rom ih kuat ding cu a mawi deuh lo tiah ka ruat," tiah a ti.