1 Cun Paul cu Derbe le Listra khawpi ah a ban. Cuva ah Timote tihmi dungthluntu pakhat a um. A nu cu Judah mi a i ih zumtu a i. A pa cu Grik mi a i. 2 Timote cu Listra le Ikoniam khawpi ih zumtu unau pawl nih an lop ngaimi a i. 3 Paul nih Timote cu a khualtlotnak ah ṭhittak a duh. Curuangah a serh a tanter, zangahtihle cuva ih a ummi Judah mi pawl nih Timote ih pa cu Grik mi a i tih an fiah ruangah a si. 4 Khua cangcang in an tlawn pah riahro ih, Jerusalem khawpi ih forhthlah pawl le kawhhran upa pawl nih an relcatmi daan pawl cu thlun dingin an sim. 5 Curuangah kawhhran pawl cu zupnak ah an cak deuhdeuh ih ni cangin an karh.

6 Paul le a rualpi pawl cu Frizia ram le Kalatia ram ah an feh. Zangahtihle Thlarau Thianghlim nih Asia ram sungih Thuthang Ṭha sip ding cu a kham hnei. 7 Misia ramri an tian tikah, Bithinia ram sungah luh an tum, asinain Jesuh ih Thlarau nih a sian hnei lo. 8 Curuangah Misia ram cu pal pah in* Troas khawpi ah an feh. 9 Cun zanah Paul nih latnak a hmu ih Masidonia mi pakhat cu dingin, "Masidonia ram ah kan pha la kan bawm hram" tiah a hler. 10 Paul nih latnak a hmuh colh hnukah, Masidonia ram ih feh dingin kan tim kan tuah lohli, an sinih Thuthang Ṭha sim dingin Pathian nih kan na ko tiah kan ruat.

11 Cun Troas khawpi in lawng thawn dingte in Samothrace tikulh ah kan feh; cule a zingthlala ah Neapolis khawpi kan ban. 12 Cuva in Masidonia ram peng pakhat ih khaw thupi,* Rom ih ukmi khua, Filipi khawpi ah kan feh. Cuva ah ni tawkfang kan cam. 13 Sabbath ni ah khawpi kotka in tivakap ah kan feh ih cuva ah Judah mi pawl thlacamnak hmun a um thok tiah kan ruat. Kan to ih cuva ih a tiangmi numi pawl thawn thu kan ruah fa. 14 An lakih mi pakhat, kan thu ngai tu cu puan sendup zuartu le Pathian a betu Thiatira khawmi Lydia tihmi nu a si. Paul ih thusipmi pawl ṭhangai in ngai dingah Bawipa nih a thinlung cu a hon sak. 15 Cule ama le a innsang zate in baptisma an co colh hnukah, "Bawipa ah mi rinum tiah ka na ruah eng asihle ka inn ah tiangin ka cam ve hram uh," tiah kan na sawm. Hramhram in kan na sawm.

16 Cun hitih in a i, thlacamnak hmun ih kan feh laiah, khawse molhmi hmala thu a sim cia theitu sal nu pakhat nih kan na pha. Hmala thu a sipcianak ruangah a bawi pawl hrangah tangka tamngai a ngah. 17 Cuvai nu nih Paul le kan cu kan na thlun ih, "Hi pawl hi nan sinah rundamnak lampi a phuangtu, Cungnung Bik Pathian ih sal an si!" tiah a hek. 18 Cutih in ni tamngai a tuah. Paul cu a thin a se setak ih a dungla herfa pin khawsia sinah, "Hi nu sungin suak dingah Jesuh Khrih hmin in thu ta pe," tiah a ti. Culai fang rori ah khawsia cu a suak.

19 Asinain a bawi pawl nih an ruahsan mi hlawknak a um i lo tih an hmuh tikah, Paul le Silas cu an tlai. Cule dawr hmunah thuneitu pawl sin an dukta. 20 Cun Rom uktu pawl sinah an fehpit ih, "Hi pawl hi Judah mi an i ih kan khawpi sungah buainak an suakter. 21 Kan Rom mi pawl ih cohlan dingah le thlun ding daan thawn a kalh fa mi nunphung pawl an zirh," tiah an ti. 22 Cule mipi pawl khaw Paul le Silas an dokalh ve.

Rom uktu pawl nih an hnipuan an phoih sak ih fung thawn thawi dingin thu an pe. 23 Vei tamngai an thawi hnukah thawnginn sungah an khum ih thawnginn kiltu pa cu ṭhangai kil dingin thu an pe. 24 Cuvai thupek a don hnukah, Paul le Silas cu thawnginn sungta khan ah a khum hnei ih an ke ah hreng a sut.

25 Zanṭim hrawngah Paul le Silas cu thla an cam ih Pathian thangṭhatnak hla an sa. Cule thawngtla dang pawl nih an ngai. 26 Rinlopi ah rauh ngai in ling a hnin ih thawnginn innkil lung pawl an hnin colh. Cule veikhatte ah suahka pawl an hongfa colh ih thawngtla an khihnak thirhri pawl cu a poih colh. 27 Cun thawnginn kiltu cu a hang ṭhang ih suahka pawl hongfa colh in a hmu. Cutikah thawngtla pawl an zuang colh cem ah a ruat, cule a namte a zuk ih ama le ma thahfak a tum. 28 Asinain Paul nih a aw neih patawp in a hek ih, "Nangma le nangma tuahmawh fa hlah! Zangahtihle kan zatein hiva ah kan um colh kau," tiah a ti.

29 Cule meisa a hler hnei ih thawnginn sungah a lut, ṭih le ṭhia pah in Paul le Silas hmai ah a bok. 30 Cun lengah a ṭhita hnei ih, "Ka bawipa le pawl, rundammi i dingah zangtu ka tuah thok?" tiah a sut hnei.

31 Anni nih, "Bawi Jesuh zum la nangma le na innsang in rundam nan i thok," tiah an ti. 32 Cun Bawipa ih thu cu ama le a innsang zate sinah an sim. 33 Cuvai zan rori ah Paul le Silas cu a ṭhita hnei ih an hmeihma pawl cu a tuamhlawm sak hnei. Cule veikhatte ah ama le a innsang zatein baptisma an co. 34 Cun Paul le Silas cu a inn ah a ṭhi hnei ih an hmai ah caw a hlut hnei. Ama le a innsang zatein Pathian an zup ruangah lungawinak in an khat.

35 Cule khua a van tikah, Rom uktu pawl nih palik bawi pawl an thlah ih, "Anni le khi thlah uh," tiah thu an pe.

36 Cun thawnginn kiltu pa nih Paul sinah, "Rom uktu pawl nih nang le Silas thlah dingin thu an pe cem. Curuangah atun hi nan suak thei, hnangamte in feh uh," tiah a ti.

37 Asinain Paul nih palik bawi pawl sinah, "Rom mi kan i ve kau nain mawhlo cingin mipi hmai ah kan na thawi ih thawnginn sungah kan na hlon. Cule atun ah a thuptein kan na thlah nan tum maw? A cang thei lo! Rom uktu anma rori tiang pit in kan suah seu," tiah a ti.

38 Cun palik bawi pawl nih cuvai thu cu Rom uktu pawl sinah an sim. Cule Paul le Silas cu Rom mi an i, tih an fiah tikah an ṭih. 39 Cun an feh ih ngaihthiam an dil. Thawnginn sungin an suah hnukah khaw sung in suak dingin an hler. 40 Paul le Silas cu thawnginn sungin an suah hnukah, Lydia ih inn ah an lut. Cuva ah zumtu unau pawl nih an pha ih tha an pe, cule khaw sungin an suak.