Milagres de Jesus

Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.

Curas de cegos e surdos

Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.

बेठसेडाला अन्डला मी ओसोमो

22 होकाम येसु बेठसेडालं ओराव। मीरं टोबो अन्डला मीलाई येसु लेवकं रैडे, नो मीलाई येसुये गुछुड्यासिवकं वार्डे बिन्ती याडोव। 23 येसुये हो मीलाई उकुइटाम चेङडे नाङखारलाम टङकं ओरोयो, होकाम उमिलङटं ट्युल्डे ओक्याङटं उकुइ नैडे होलाई ओपजोयो, "नङ कडिरं नमरःङज़्या?"

24 होकाम हो मीये याडे रःङडे हैओवारो, "ङा मीरंलाई सिङरं स्याव याबारिज़्याव ङारःङज़्या।"

25 होकाम येसुये फरि हो मीलो उमिलङटं उकुइये उछुकं, हो मीलो उमिलङ ओफैसिव होकाम स्यान्जाति चावसं रःङने ओटाव। 26 येसुये होलाई नाङखारलं मापसिडे उज़ीःमडे उपरिःङो।

Marcos 8:22-26

येसुये भैरा सोनो लाटालाई ससोमोये

31 होकाम येसु टुरोसलाम पुलुडे डस सहरलो ओछेत्रला डेकापोलिस येम टाडे सीडोनलो ओसान्डिलो ओमान्जलाग्यान टाडे गालील डहंलं ओनाव। 32 नला मीराई टोबो ओना माठोयो सोनो ओयाः मापाङो मीलाई येसु लेवकं यारोयो, होकाम आवलो ओक्याङटं नकुइ नैडेगोयोके वार्डे बिन्ती याडोव।

33 येसुये नो मीलाई माहुले मीराई याखार्लाम जामा होसैकं सुनसान पोकं लाङडे उकुइसै नोलो ओनालं झाडे ओयोव। होकाम ट्युल्डे नोलो ओसेटं छाप्डे ओयोव। 34 होकाम स्वर्गडे रःङडे खेव ओसं चेङडे नोलाई, "इफ्फाता," हैओडोव। आवलो ओमाने "ओफैसिकं।"

35 होपानाज़ नो मीलो ओना ओफैसिव, होसोनो नोलो ओसेलो ओबन्डन ओपलासिव होकाम नो चावसंज़ ओपाङो। 36 "आव काङ्कालाईज़ हैटाडाच्यो" वार्डे येसुये नोरंलाई हैओडोवरं। जतिज़ मीरंलाई हैटालेच्यो डोवरं, नोरं झन-झन बनै बात्रा याडोव। 37 मीरं बनै अचम्ब टाडे बक्क टाडे हैयावारो, "आवये स्यान्टै रोः ठीकंज़ डोज़्याव। आवये याना माठोयोरंलाई याना फैडे ओयोज़्यावरं यायाः मापाङोरंलाई पाङडुने समं झैज़्यावरं।"

Marcos 7:31-37

अन्डला बारतिमै ओसोमो

46 होकाम येसु सोनो उसिसरं यरीहो सहरलं याराव, येसु उसिसरासं सोनो माहुले मीरासं यरीहोलाम उपुलुज़्याकं तिमैलो ओज़ा बारतिमै, टोबो अन्डला भिखारी, येमलो ओगोराटं चुङडे उलिज़्याव। 47 नोये आव के नासरतला येसु ची ओलेव वार्डे ओठोयो, होकाम किःडे हैओवारो, "ए येसु, डाउडलो ओज़ा, ङालाई डया डाङ।"

48 होकाम भ्या मीराई हो मीलाई टापाङ्ङन वार्डे याहक्लोयो। होकाम नो अजं कस्सिडे किःडे हैओवारो, "ए डाउडलो ओज़ा ङालाई डया डाङ।"

49 होकाम येसु ठन अडिडे हैओडोवरं, "नोलाई खुल्च्यो।"

होकामटानि होराई नो अन्डलालाई ऐ वार्डे याखुलो, "हिक्मत डोडे च्याङसिडे गराङन्के, येसुये नङलाई खुल्सनज़्याव।" 50 होकाम ओक्वा हुँइख्याडे नो ठरच्याङसिडे येसु लेवकं ओराव।

51 येसुये नोलाई हैओडोव, "नङलाई कडि ओचाहिज़्याव, नलागिटं ङा कडि झैने?"

हो मीये येसुलाई हैओडोव, "रब्बी ङामिलङ फरि ओरःनकं।"

52 होकाम येसुये नो मीलाई हैओडोव, "नयेम्डे गनानके। नबिस्वासये नङलाई ससम्डेनैसोनो।"

होकाम होमान्त्राज़ नोलो उमिलंङ ओरोःनो, होकाम येम्ट येसुलो उछिन-उछिन ओनाव।

Marcos 10:46-52

येसुये अन्डला भिखारीलाई ओससोमो

35 येसु यरीहो लेवकं ओकेव। होकं टोबो अन्डला येम छ्योकं चुङडे भिख उनीःज़्याव। 36 बनै भ्या मीरं ओछ्योला ग्याःन्ट यानाज़्याव ठैडे हो मीरंलाई ओपंजोयोरं आव कडि?

37 नो मीराई होलाई हैयाडोव, "नासरतला येसु आलाग्यान्त नाज़्या।"

38 होकाम नो ऐ वार्डे उकिःव, "ए येसु डाउडलो ओज़ा, ङालाई डया डाङ।"

39 ङाःटा बानेराई नोलाई गाइगुइ टालेन वार्डे याहक्लोयो। हैनि पनि नो झन कस्सिडे उकिःव, "ए डाउडलो ओज़ा, ङालाई डया डाङ!"

40 येसु ठन ओअडिव, होकाम नो अन्डला मीलाई ओल लेवकं रैने हुकुम ओयोवरं। नो मी ओछ्योकं ओरावपान्त्रा येसुये ओपजोयो, 41 "नङ कै नवार्ज़्याव? ङा नलागिटं कडि येःन डाने?"

नोये हैओवारो "प्रभु, ङा रोःङो ङाडैकं।"

42 होकाम येसुये नो मीलाई हैओडोव, "नमिलंङ रःन्ने ओटाकं। नबिस्वासये नङलाई ससम्डे नैसोनो।"

43 होकाम होपान्त्राज़ नोलो उमिलङ ओरोःनो, होकाम परमेस्वरलो ओप्रसन्सा डोये-डोये हो मी येसुलो उझिन्ट ओबाव। आव रःङडे स्यान्टै मीराई परमेस्वरलो ओप्रसन्सा याडोव।

Lucas 18:35-43

येसुये ओजर्मनकामटा अन्डलालाई ओससोमो

1 नलाग्यान्ट ओनाज़्याकं येसुये ओजर्मनकामज़ अन्डलाव टोबो अन्डलालाई ओरोःङो। 2 उसिसराई येसुलाई यापजोयो, "रब्बी, काङ्काये पाप ओडोव, आवये सै आवलो वामा-ओबाबुये, होकाम आव अन्डला उजर्मिव?"

3 येसुये जबाफ ओयोवरं, "न आवये पाप ओडोव न आवलो वामा ओबाबुये, बुरु आवलाई ससम्डे परमेस्वरलो ओसक्तिला येःन आव मीलो उजीबनटं गरःनकं वार्डे 4 ङालाई परिःङनेलो ओयेःन गेसं बेला उलिज़्याकंज़ डाव परिये। रि ओटाकंके, काङ्कायेज़ येःन माडोडुव। 5 ङा आव प्रिठीबीलं ङालेव समं ङा प्रिठीबीला ज्योती ची।"

6 आव रोः हैवार्डे येसुये नामलं उट्युलो, होकाम उट्युलये गम मुछिडे चिरिव झैडे उमिटं सेःडे ओयोव। 7 होकाम येसुये नोलाई हैओडोव, "गनानके, सिलोआमलो (जोलो ओमाने, परिःङसिव) कुन्डलं नाडे हुर।" नोये नाडे उहुरो, होकाम रःङने टाडे ओवोलो।

João 9:1-7

Curas de paralíticos e enfermos

Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.

30 सिमोनलो उमैज्यु ओजोरोये ठाला टिकिडे ओनैज़्याव, होकाम होला मीरं येसुलाई चानोज़ हो रोः हैयाडोव। 31 येसु नोलो ओछ्योकं ओनाव, होकाम उकुइटाम क्योःडे ओसोचोयो। होकाम होमान्त्राज़ ओजोरोये ओराःव, होकाम सोडे येसुलो ओसेवा ओडोव।

Marcos 1:30,31

येसुये टोबो मीलाई ओससोमो

40 होकाम टोबो कुःरिये येसु लेवकं राडे उघुन्डा टिकिसिडे ऐ वार्डे बिन्ती ओडोव, "नइछ्या यालेखे भने नङ ङालाई ससमडुने नले।"

41 होकाम उयुङ नाडे हो मीलाई उकुइये छुडे, हैओडोव, "ङा इछ्या ङाडो, नङ गसमङनके।" 42 होमान्त्राज़ नो मीलो ओक्याङटा कोःरो ओमाःव, होकाम ओसोमो।

Marcos 1:40-42

3 होकाम चार जना मीरं टोबो नसालो रोगो लागिव मीलाई घुर्डे येसु लेवकं यारोयो। 4 नलं बनै भ्या मीरं लेवरं हैजैडे हो मीलाई येसुलो ओछ्योकं मारैडुडे हो मीराई येसु उलिज़्याव सोराटं रोटं छाने कोडे, होलाम नसालो रोगो लागिव मीलाई ऐस्याडे उलिज़्याव ओटानसंज़ मेलं याकेव। 5 येसुये नो मीराई याबिस्वास रंःङडे नसालो रोगो लागिव मीलाई हैओडोव, "ए ङाज़ा नपाप छेमा याटाडु।"

6 नकं नेबऱ्याङया सास्त्रटा न्याम पैने मीरं चुङडे यालिज़्याव, होरं यायुङलं एटाव बिचार याडोज़्याव, 7 "आव मीये कडाने ऐ लेडे ओपाङज़्याव? आव के परमेस्वरलो उबिज्याट ची। टोबो, परमेस्वरकाम उरु काङ्काये पाप छेमा डोडुवडं?"

8 होकाम होरं एटाव बिचार डोज़्यारं वार्डे होपानाज़ येसुये ओआत्मालं सन्डे हैओवारो, "जे कडाने जियुङलं एटाव बिचार जेडोज़्याव? 9 नसालो रोगो लागिव मीलाई ‘नपाप छेमा याटा’ हैडोने सजालो सै ‘सोङन, होकाम नटान छेन्डे नान’ हैडोने, कडि सजालो टा? 10 मानवालो ओज़ालाई प्रिठीबीलं पाप छेमा डोने अडिकार ले वार्ने रोः सन्डेनैच्यो।" होकाम येसुये हो नसालो रोगो लागिव मीलाई हैओडोव, 11 "ङा नङलाई हैङाडानज़्या, गोसोनके, नटान गछेन्के, होकाम नज़ीःमडे गनानके।"

12 नो मी सोडे, चानोज़ ओटान छेन्डे हो मीराई याङाःकाम ओनाव। होला स्यान्टै मी भरि बक्क टाडे हैयावारो, "एटावके खर्कज़ गेरोःङो माले" वार्डे परमेस्वरलो ओप्रसन्सा याडोव।

Marcos 2:3-12

उकुइ स्याङो मी

1 होकामटानि फरि टखेप येसु यहुडीरं याडुप्सिने ज़ीःमलं ओनाव। होलं टोबो उकुइ स्याङो मी लेव। 2 कैलेकं नाःसिने डिनछ्याम हो मीलाई याससोमोखे भने आरोप लैने वार्डे मीरं येसुलो उचिवारे चुङडे यालिज़्याव। 3 होकाम येसुये उकुइ स्याङो मीलाई हैओडोव, "ङाःङ गरानके।" 4 होकाम येसुये नो मीरंलाई हैओडोवरं, "नाःसिने डिन छ्याम चाव येःन डोने सै माचाव येःन डोने, पोहोन जोगैने सै नास झैने कडि येःन चाव?"

होकाम नोरं काङ्का पनि गाइगुइ मालेरंये। 5 नो मीराई यायुङ खाव उलिज़्याव रःङडे येसुये उयुङ माचाव झैडे होला स्यान्टै मीरंलाई उरिसैये टखेप ओरोःङोरं, होकाम हो मीलाई ऐ ओडोव, "नकुइ गपंलाके।" होये उकुइ ओपंलाव होकाम उकुइ ओसोमो।

Marcos 3:1-5

येसुये टोबो मीलाई ओससोमो

12 टखेप येसु टोबो नाङखारलं उलिज़्याकं, टोबो ओक्याङ भरि कोःरो टाव मी येसुलाई रःङडे ओखङटं फुलुप्सिडे बिन्ती ओडोव, "ए प्रभु, नङ इछ्या नडोखे भने नङ ङालाई ससोमो नुढु।"

13 येसुये हो मीलाई उकुइये छुडे "ङा इछ्या ङाडो, नङ समङंन" वार्डे हैओडोव, होकाम होपान्ट्राज़ हो मीलो ओक्याङटा कोःरो ओसोमो।

Lucas 5:12,13

18 मीराई ओखङ उकुइ सिव टोबो मीलाई चारपाईटं झाडे यारोयो, होकाम नोराई हो मीलाई ज़ीःमलं येसुलो ओङाःकं रैने यापानो। 19 हैनि पनि मीरं भ्या याटाव कारनये नोलाई ज़ीःमलं लाङने येम माडैडे ज़ीःम ढुरिटं यापुलुव, होकाम ज़ीःमलो ओछाने कोडे हो मीलाई ओचारपाईसंज़ येसुलो ओङाःकं यारोयो। 20 होकाम येसुये हो मीराई याबिस्वास रःङडे ओजोरो राव मीलाई हैओडोव, "नपाप छेमा याटाडु।"

21 होकाम न्याम पैने मीरं सोनो फरिसीरं ऐ यावारो, "परमेस्वरलो उबिरोड डाने आव काङ्का? पाप के परमेस्वरये मान्त्राज़ छेमा डोडुव।"

22 हैनि पनि नोराई हैवार्ने यापान्ज़्याव रोः ठा सन्डे येसुये होरंलाई ऐ वार्डे जबाफ ओयोवरं, "जे जियुङलं कडि जिसुन्चिज़्याव? 23 ‘नपाप छेमा याटा’ वार्ने सै ‘सोडे बाडे नान’ वार्ने, कैवार्ने सजालो उलिज़्याव? 24 हैनि पनि मानवालो ओज़ालाई प्रिठीबीलं पाप छेमा डाने अडिकारले वार्ने जे सन्डे नैच्यो।" होकाम येसुये हो ओखङ उकुइ सिव मीलाई हैओडोव, "ङा नङलाई हैङाडानज़्या, सोङंन होकाम नचारपाई छेन्डे नज़ीःमडे गनानके।"

25 होकाम होपान्ट्राज़ होराई याङाःकंज़ सोडे, ओल गलङडे उलिज़्याव चारपाई घुर्डे परमेस्वरलो ओमहिमा डोये-डोये उज़ीःमडे ओनाव।

Lucas 5:18-25

उकुइ स्याङो मी

6 होकाम फरि छुटं नाःसिने डिन छ्याम येसुये यहुडीरं याडुप्सिने ज़ीःमलं नाडे ओपोयोरं। होलं टोबो वोःरटा उकुइ स्याङो मी लेव। 7 येसुये नाःसिने डिन छ्याम ससम्ने येःन याडोवखे भने येसुलाई ओडोस पुलैड्याने वार्डे न्याम पैने मीरं सोनो फरिसीरं येसुलो ओचीवारे चुङडे यालिज़्याव। 8 हैनि पनि येसुये होराई याबिचार ठा ओसोनो, होकाम उकुइ स्याङो मीलाई हैओडोव, "आकं राडे च्याङसिन।" होकाम हो सोडे ओच्याङसिव। 9 होकाम येसुये नोरंलाई हैओडोवरं, "ङा जेलाई ङापजैच्यो, नाःसिने डिन छ्याम कडि येःन डाने न्याम अनंसारला टाये, चाव येःन डाने सै माचाव येःन डाने, ज्यु जोगैने सै नास झैने, खेटाव येःन डाने चाव टाये?" 10 होकाम येसुये आडेहोडे चारकोनाडे रःङडे हो मीलाई, "नकुइ गपंलाके" वार्डे हैओडोव। होये हैज़ ओझोयो, होकाम उकुइ ओसोमो।

Lucas 6:6-10

येसुये रोमी कप्तानलो ओनौकरलाई ओससोमो

1 ओरोः स्यान्टै मीरंलाई ओसठोयोरं पानाज़ येसु कफर्नहुमलं ओनाव। 2 टोबो रोमी कप्तानलो बनै उयुङ्का टोबो ओनौकर लेव, नो ठलिडे सिने ओपान्ज़्याव। 3 नोये येसुलो ओबारेलं ओठोयोपानाज़ ङानौकरलाई ससमड्याङ वार्डे नोये यहुडीरंला अगंवारंलाई बिन्ती डोव उपरिःङोरं। 4 नोरं येसुलेवकं राडे ऐ वार्डे येसुलाई बिन्ती डाडे हैयाडोव, "नो मी आव नडया डैने हाडङका ले, 5 कडालेकं नोये गे गेमीरंलाई मया डोवरंये, होकाम नोयेज़ गे आराढना गेडोने ज़ीःम झैडे ओयासिव।"

6 येसु नोरासं ओनाव। येसु कप्तानलो उज़ीःम छ्योकं उलिज़्याकं, कप्तानये ओनैरंलाई येसु लेवकं ऐवार्डे उपंरिःङोरं, "ए प्रभु, डुखं टाडो, कडालेकं ङा नङलाई ङाज़ीःमलं खुल्ने हाडङका ङाम्ले, 7 ङाज़ नङ लेवकं राने हाडङका पनि ङाम्ले। आबो पाङया मान्त्रा पाङड्याङ, होकाम ङानौकर सम्नेले। 8 कडालेकं ङा पनि हाकिमराई याढुङलं लेने मी ची, होकाम ङाढुङलं सिफाइँरं लेरं। ङा टोबोलाई ‘नान’ हैङाडोये, हो नाये, होकाम छुटंलाई ‘रान’ ङाडोये, होकाम नो राये। ङाकमारालाई ‘आव डो’ हैङाडोये, नोये हो डोवये।"

9 आव रोः ठैडे येसु नोलाई रःङडे अचम्बज़ ओटाव, होकाम वोल्डे ओल उझिन्ट राने भ्या मीरंलाई ऐ ओडोवरं, "ङा जेलाई हैङाडाच्यो, ङा इस्राएललं पनि आल्लुः घ्योव बिस्वास ङारोःङो माले।"

10 नो सोर रोयो मीरं वोल्डे ज़ीःमडे यानाव, होकाम नोराई हो नौकरलाई सम्डे उलिज़्याव याडैनाव।

Lucas 7:1-10

11 नलं टोबो मेमा लेव, नोलाई अठार बर्सकाम कम्जोर झैने माचाव आत्माये डापो लेव। नोलो ओवाःङ कुमल्याउ लेव, होकाम नो ओल्ज़ सिडा ओमटाडुज़्यावं। 12 येसुये नोलाई ओरोःङो, होकाम खुल्डे हैओडोव, "ए मेमा, नङ नरोगोटाम नसमडुखे।" 13 होकाम येसुये नो मेमालो ओङैःटं उकुइ ओनोयो, होकाम नो होपानाज़ सिडा टाडे परमेस्वरलो ओप्रसन्सा ओडोव।

Lucas 13:11-13

येसुये टोबो ठलिव मीलाई ओससोमो

1 नाःसिने डिन छ्याम येसु टोबो फरिसीराई यासेःरलो उज़ीःमकं काङ ज़्याने ओनाव। मीरं येसुलाई बनै ढ्यान याडे यारःङज़्याव। 2 जलग्रहये ठलिव टोबो मी येसुलो ओङाःकं लेव। 3 येसुये न्याम पैने मीरंलाई सोनो फरिसीरंलाई ओपंजोयोरं, "नाःसिने डिन छ्याम याजोर रावरंलाई ससम्ने न्याम अनंसार चाव, सै माचाव?"

4 हैनि पनि नोरं गाइगुइज़ मालेरंये, होकाम येसुये नो रोगीलो ओक्याङटं उकुइये छुडे ओससोमो होकाम नो मीलाई उपरिःङो।

Lucas 14:1-4

येसुये डस जना लाई ओससोमोरं

11 येसु यरुसलेमडे ओनाज़्याकं सामरिया सोनो गालीलनि नेसान्डिलाग्यान्टं ओनाव। 12 येसु टोबो नाङखारलं ओनाज़्याकं डस जना कुःरिरासं ओडैसिव। नोरं टाडाङामज़ च्याङसिडे 13 कस्सिडे कीःडे हैयाडोव, "ए येसु गुरबा, गेलाई डया डासि।"

14 येसुये नोरंलाई रःङडे हैओडोवरं, "गनाच्योके नाडे सेवा डोनेरं लेवङ सतन्सिनाच्यो।" नोरं यानाज़्याकंज़ यासमो। 15 नोरंलाम टोबोये ओल ओसोमो रोः ओसोनो होकाम कस्सि-कस्सि किःडे परमेस्वरलो ओप्रसन्सा डोये डोये वोल्डे ओराव, 16 होकाम येसुलाई ढन्याबाड याडे ओखङटाम ढो ओडोव, नो मी टोबो सामरी लेव। 17 येसुये हैओवारो, "होकाम समोरं डस जनारं माङ्क डोरो? उरु नौ जनारं कान्डे यानाव? 18 होकाम वोल्डे राडे परमेस्वरलो ओप्रसन्सा डाने आव बिडेसी काम उरु काङ्काज़ याम्लेव रो?" 19 होकाम येसुये होलाई हैओडोव, "गच्याङसिनके होकाम नयेम्डे गनानके। नबिस्वासये नङलाई ससम्डे नैसोनो।"

Lucas 17:11-19

रीःलो कुन्डलं सम्ने

1 होकाम, येसु यहुडीराई यापर्बटं यरुसलेमलं ओनाव। 2 यरुसलेमलं भेडा उमिन लेव झलालो ओछ्योकं टोबो कुन्ड ले, नोलो ओगोराटं पाँस गोटा मैरा लेव, नोलाई हिब्रुङाम बेठस्डा डोरंये। 3 नलं स्यान्टै किसिमला रोगीरं, अन्डलारं, लङ्गरारं, आढा याक्याङ सिवरं गलङडे लेरंये। नोरं रीः खाबलाकं छल्किने हो समय केनरंये। 4 कडावार्क स्यान्टैराई भन्डा घ्योव प्रभुलो टोबो ओकटंवाल बेला-बेलाकं रीःलो कुन्डलं झरिडे रीः हल्लैडेवरंये, होकाम रीः उछल्किव पाना जो ङाडे रीःलं पसि, जोस्याव रोगोये ठलिव मी पनि नो समये।

5 नलं अरतिस बर्सकाम ठलिव टोबो मी लेव। 6 येसुये नोलाई नलं गलङडे उलिज़्याव ओरोःङो नो भ्या समंज़ नेटानाव ठलिवज़ ओलेवलेव वार्ने ठा सन्डे येसुये नोलाई हैओडोव, "नङ सम्ने नुयुङ उलिज़्याव रो?"

7 रोगीये येसुलाई हैओडोव, "अँ, प्रभु जो बेला रीः छल्किये ङालाई रीःलो कुन्डलं झाने काङ्का ङामीरं मालेरं, ङा ङानाज़्याकंज़ ङा भन्डा ङाःडे छुटं मी रीःलं नाये।"

8 येसुये नोलाई हैओडोव, "च्याङसिडे नटान सोचैडे नान।" 9 होपानाज़ नो मी ओसोमो, होकाम ओटान घुर्डे नो मी ओनाव।

नोछ्याम यहुडीरं यानाःसिने डिन लेव।

João 5:1-9

46 होकाम फरि येसु गालीलला काना वार्ने नाङखारलं ओराव, नलं येसुये ङाःडेज़ रीःलाई अङ्गुरलो उरीः ओझोयो। कफर्नहुमलं टोबो घ्योव कप्तान लेव, नोलो खेपा ओज़ा ठलिव लेव। 47 येसु यहुडियालाम गालीललं राडेले वार्ने ठैडे नो येसु लेवकं ओराव, होकाम राडे ङाज़ालाई ससमड्याङ वार्डे येसुलाई बिन्ती ओडोव, कडावार्क नोलो ओज़ा सिने ओपान्ज़्याव। 48 येसुये नोलाई हैओडोव, "जे चिन्न सोनो अचम्बला येःनरं जेमरःङया समं ओजमाज़ बिस्वास जेमडा।"

49 नो घ्योव कप्तानये येसुलाई हैओडोव, "ए प्रभु ङाज़ा सिने भन्डा ङाडेज़ राङन।"

50 येसुये नोलाई हैओडोव, "गनानके, नज़ा सम्नेले।" येसुये नोलाई हैओडोव बचन नो मीये बिस्वास ओडोव, होकाम ओनाव।

51 होकाम नो येमकं ओनाज़्याकं नोलो ओनौकरये नोसं डैसिडे नज़ाके यासम्डु वार्डे नोलाई हैओडोव।

52 खाडंङ बजियालं ओसोमो वार्डे नोलाई ओपजैकं नो नौकरये हैओवारो, "आज्यो लाकं एक बजिकाम नोलाई जोरोये ओराःव।" 53 येसुये नोलाई "नज़ा सम्नेले" हैओडोव बेलाकंज़ ओलेवलेव वार्डे कप्तानये ठा ओसोनो। होकाम ओल सोनो उज़ीःमला स्यान्टै ओझानराई बिस्वास याडोव।

54 यहुडियालाम गालीललं राडे येसुये ओडोव आव डोस्रा चिन्न लेव।

João 4:46-54

A mulher com fluxo de sangue

Uma mulher que sofria há doze anos tocou a orla do manto de Jesus e foi curada instantaneamente pela sua fé.

25 नो मीराई याखार्ल बार बर्सकाम्टानि ओक्याङटाम झी भोने रोगो लागिव टोबो मेमा पनि लेव। 26 नो मेमा सम्नेलो लागिटं बैडरं लेवकं नाडे ओल्स लिज़्याव स्यान्टै ओढन सम्पति खेम्डे पनि मासमये झन भ्या ठलिडे उलिज़्याव। 27 येसुलो ओबारेलं नो मेमाये ठैडेओनैज़्याव, हैजैडे मीराई याखार्ल पसिडे येसुलो उझिनङाम राडे ओक्वाटं उछुव। 28 नो मेमाये उयुङ-उयुङलं, "येसुलो ओक्वाटं मान्त्राज़ छुवङाडैनि पनि ङासम" वार्डे हैओवारो।

29 येसुलो ओक्वा उछुवपानाज़ नो मेमालो ओक्याङटाम झी भोने रोगो ओसोमो, नो रोगो ओसोमो ओक्याङटंज़ ठा ओसोनो।

Marcos 5:25-29

43 बारं बर्सकामटा झी भोडे डुखं डैज़्याव टोबो मेमा लेव, नोसं जो लेव नो स्यान्टै बैडरासं वासं ओझैसिकं ओखेमो, नोलाई काङ्काये पनि यामसंसमडुज़्याव, 44 नोये येसुलो उझिनङाम राडे येसुलो ओक्वालो उफुर्का उछुव, होपानाज़ नो मेमालो झी भोने ओसोमो।

45 येसुये हैओवारो, "ङालाई काङ्काये उछुसोङो?" स्यान्टैये गे माङ्क ची यावारो, होकाम पत्रुस सोनो नोरासं लिज़्यावराई हैयावारो, "गुरबा, माहुले मीराई नङलाई घिरिडे हुटैसंनज़्यारं।"

46 येसुये हैओवारो, "काङ्काये ङालाई छुडेज़ नैसोङो, कडालेकं सक्ति ङालेवटाम उपुलुव ङा ठा ङासोनो।"

47 आबो ओल मोःसिडे मालेडुने रोः ठा सन्डे नो मेमा गुये-गुये ओराव होकाम येसुलो ओङाःकं उफुलुप्सिव, होसोनो कडाने नोये येसुलाई उछुव, होकाम कैजैडे होपाना ओसोमो, नो स्यान्टै मीराई याङाःकं ओपानो। 48 येसुये नोलाई हैओडोव, "ङाज़ा, नबिस्वासये नङलाई ससम्डे नैसोनो, चावसं नान।"

Lucas 8:43-48

Ressurreições

Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.

22 नो बेलाकंज़ यहुडीरं याडुप्सिने ज़ीःमला टोबो याइरस उमिन लेव सेःर मी राडे, येसुलाई रःङडे येसुलो ओखङटंज़ उफुलुप्सिव, 23 "ज़ीमज़ा मेमाङाज़ा सिनेपान्ज़्या राडे नोलो ओक्याङटं नकुइ नैडे नयोखिन नो सम्डे बान्चिने ले" वार्डे बिन्ती ओडोव।

24 येसु नो मीसंज़ ओनाव। बनै भ्या मीरं येसुलो उझिन-उझिन आसै-होसै यालं केःकेः याछुइसिनाव।

Marcos 5:22-24

38 येसुरं यहुडीरं याडुप्सिने ज़ीःमला सेःर मीलो उज़ीःमकं याकेराकं मीरं बनै कस्सिडे याघरज़्याव येसुये ओरोःङो। 39 येसु नो ज़ीःमलं पसिडे होला घर्ज़्याव मीरंलाई हैओडोवर, "जे कडाने जेघर्ज़्याव? आव लुज़ा सिव माङ्कची ऐज़ ऐस्याडे उलिज़्याव ची।"

40 येसुलो ओपाङ ठैडे मीरं बनै यासाःव। येसुये मी भरिरंलाई पाखाडे पुलैडे लुज़ालो ओबाबु, वामा सोनो सोमबऱ्याङ उसिसरंलाई लाङडे लुज़ा लेव पोकं यानाव। 41 नो लुज़ालो उकुइटं क्योःडे येसुये हैओडोव, "तालिता कुमी।" तालिता कुमीलो ओमाने ए बची गोसोनके।

42 होपानाज़ नो लुज़ा ठर्च्याङसिडे आडे होडे ओबारिव। नो लुज़ा बारं बर्सका लेव। नो रःङडे मीरं बनै अचम्ब याटाव।

Marcos 5:38-42

31 येसुये हैओवारो, "आव पुस्ताला मीरंलाई ङा कडिसं ङामेडैरं के? नोरं कडि स्याव लेरं? 32 नोरं के बजारला लिज़्याव बाल्खरं स्यानाव लेरं, नोरं टोबोये छुटंलाई ऐ लेडे हक्लैरंये,

‘गे जेलागिटं बाङसुलि गेटपो,

जे जेमस्याःये।

गे डुखंला गीतं गेगैकं,

जे जेमघरये।’

33 बप्तिस्मा याने युहन्ना ओराव, होकाम नो उउपासिव, होसोनो मड्ड माओँवये। जे ‘नोलाई भुत लागिडेले’ वार्डे हैजेवार्ये। 34 मानवालो ओज़ा ओराव, होकाम होये ओज़्योव, सोनो ओओँव, होकाम जे हैजेवारये, ‘रःङच्यो, टोबो ज़्यावखानच्या सोनो मःङग्या, सिरमा डुप्नेराई सोनो पापीराई यानै!’ 35 परमेस्वरलो उबुड्डिला रोःलो ओप्रमान नोराई योरंये जो मीरं सत्यलं बारंये।"

येसु सिमोन फरिसीलो उज़ीःमलं

36 फरिसीरंलामटा टोबोये येसुलाई काङ ज़्याने उखुलो, होकाम येसु नो फरिसीलो उज़ीःमकं नाडे काङ ज़्याने उचुङो। 37 नो नाङखारलं टोबो पापी मेमा लेव। फरिसीलो उज़ीःमकं येसु काङ ज़्याने राडेले वार्ने ठैडे, टोबो सिङ्गमरमरलो बोतललं अत्तर रैडे नो मेमा नलं ओराव,

Lucas 7:31-37

41 याइरस उमिन लेव यहुडीरं याडुप्सिने ज़ीःमला टोबो सेःर मी राडे येसुलो ओखङकं उफुलुप्सिव, ङाज़ीःमकं रान वार्डे येसुलाई बिन्ती ओडोव, 42 कडालेकं नोलो बारं बर्स योव टोबोज़ाज़ मेमा ओज़ा लेव, नो सिने ओपानज़्याव। येसु ओनाज़्याकं मीरं केः-केः छुइसिडे येसुलाई याहुटैज़्याव।

Lucas 8:41,42

49 येसु ओपाङज़्याकं, यहुडीरं याडुप्सिने ज़ीःमला सेःर मीलो उज़ीःमङाम टोबो मी ओकेरिव, नोये हैओवारो, "नज़ाके यासिडु। आबो गुरबालाई डुखं टायो।"

50 येसुये आव ठैडे याइरसलाई हैओडोव, "टाछेङंन, बिस्वासया मान्त्रा डो, नो सम्नेले।"

51 येसु ज़ीःमकं ओकेरिव पाना येसुये पत्रुस, याकुब, युहन्ना सोनो लुज़ालो ओबाबु सोनो वामारंकाम उरु काङ्कालाई पनि ओल्स ज़ीःम ज्युङलं राव मायोवरंये। 52 स्यान्टैरं बनै डुखं मानिडे याछाती पिटि-पिटि याघरज़्याव, होकाम येसुये हैओडोवरं, "टाघर्च्यो, नो मासिये, नो के ङःल्डे उलिज़्याव ची।"

53 नो सिडेले वार्ने सन्डे नोराई येसुलाई यागिल्लोयो। 54 होकाम येसुये नो लुज़ालो उकुइटं क्योडे ऐवार्डे ओसंपाङो, "ए बची, गोसोङनके।" 55 होकाम नो लुज़ालो ओपोहोन वोल्डे ओराव, नो पःल ओसोव, होसोनो येसुये नोलाई ज़्याव याच्यो वार्डे ओअरोयोरं। 56 नोलो वामा-ओबाबुनि अचम्ब नेटाव, होकाम येसुये जो ओटाव हो काङ्कालाई पनि हैटाडाच्योरं वार्डे येसुये नोरंलाई हैओडोवरं।

Lucas 8:49-56

लाजरस उसिव

1 लाजरस उमिन लेव टोबो मी ठलिडे उलिज़्याव। नो मरियम सोनो नोलो ओनाना मार्ठानि नेगाउँ बेठानियाला लेव। 2 प्रभुलाई मङ-मङ बासिने ठी ठिडे ओखङटं ओचेमये सिड्याने मरियम आवज़। आवलो ओभाइ लाजरस ठलिव लेव। 3 आव नाना बैनीनि येसु लेवकं ऐवार्डे सोर निपरिःङो, "प्रभु, जोलाई नङ मया नडोये, नो ठलिडे ले।"

4 होकाम येसुये आव ठैडे हैओवारो, "आव जोरोये मी मासोयो, बुरु आव परमेस्वरलो ओमहिमा टाने लागिटं ची, कडालेकं आव मीटाम परमेस्वरलो ओज़ालो ओमहिमा गटाकं।"

5 येसुये मार्ठा, सोनो नोलो ओबैनी होसोनो लाजरसलाई मया डोवरंये, 6 हैटानि पनि लाजरस ठलिज़्या वार्ने ठैडे येसु जोङ उलिज़्याव, होङ अजं नेला ओलेव। 7 होकाम येसुये उसिसरंलाई हैओडोवरं, "बा आबो गे फरि यहुडियालं वोल्डे गेनाके।"

8 उसिसराई येसुलाई हैयाडोव, "रब्बी, बाभाज़ यहुडीराई नङलाई लुङये झोम्ने यापानसोनो, होकाम फरि नङ नलंज़ नना?"

9 येसुये जबाफ ओयोवरं, "कडा लाभरिलं बारं घन्टा माटाये डोरो? लाकं बानेलो ओखङ टुःम्ने माले, कडालेकं नोये आव प्रिठीबीला ज्योती रःङज़्याव, 10 हैनि पनि रिलं बानेलो ओखङ टुःमये, कडालेकं नो मीसं उज्यालो माटाये।" 11 होकाम येसुये नोरंलाई हैओडोवरं, "गेनै लाजरस ङल्डेले, नोलाई सोचैने ङा नलं ङाना।"

12 येसुलाई उसिसराई हैयाडोव, "प्रभु, नो ङःल्डे ओलेखिन्के सम्नेले।"

13 येसुये नो सिडे उलिज़्याव रोः हैओवारो, होकाम उसिसराई उमिरं राडे ङल्डे उलिज़्याव वार्डे हैओवार्ज़्याव वार्डे यासुन्चीव। 14 येसुये नोरंलाई प्रस्ट झैडे हैओडोवरं, "लाजरस सिडेले।

João 11:1-14

Domínio sobre a natureza

Jesus acalmou a tempestade, andou sobre as águas e multiplicou pães. A natureza obedece à voz do seu Criador.

37 यानाज़्याकं बनै घ्योव घुइरं राडे डोङ्गालाई रीःलं पल्टैने ओपानो रीःलो ओछल्का डोङ्गालं पसिडे डोङ्गालाई बुडैने ओपानो। 38 होबेलाकं येसु डोङ्गाटं उझिन्ङ उगुम झैडे ऐस्याडे ङःल्डे उलिज़्याव। उसिसराई येसुलाई सोचैडे हैयाडोव "गुरबा गे के बुडिडे गिसिरिडुखे वार्ने नङलाई चिन्ता माले?"

39 येसु सनसिडे च्याङसिडे घुइरंलाई हक्लैडे रीःलाई पनि "चिम लेन! गाइगुइटालेङन" वार्डे आग्या ओयोव। होकाम बतासं ओठकंनिव, रीः पनि ओअडिव। होकाम स्यान्टै च्याम-चिम ओटाव। 40 येसुये नोरंलाई हैओडोवरं "जे कडाने जेछेज़्याव? जेसं बिस्वासज़ उम्लिज़्यावरो?"

41 नोरं बनै छेडे या याज़ हैयावारो, आव मी काङ्का? घुइरंये सोनो रीःलो ओछल्काये पनि ओपाङची ठैज़्यारं।

Marcos 4:37-41

35 नम उनुपरिव बेलाकं उसिसरं राडे येसुलाई हैयाडोव, "आव मीरं मालेव पोलं नम यानुपरिडु। 36 मीरंलाई गपंरिःङरंके, आसै-होसैयाला नाङखारयालं नाडे ज़्याव लःङडे गज़्योरंकं।"

37 येसुये उसिसरंलाई "नो मीरंलाई जेज़ ज़्याव याच्योरं।" वार्डे हैओडोवरं नोराई येसुलाई हैयाडोव,

"गे नोरंलाई नेःसै पैसालो बरे लःङडे ज़्याव यानेरं डोरो?"

38 येसुये उसिसरंलाई "जेसं खागोटा बरे लिज़्या? रःङच्यो?" वार्डे हैडोवरं।

नोराई "पाँस गोटा बरे सोनो नेबऱ्याङ ङाः याज़ लिज़्या" वार्डे हैयाडोव।

39 येसुये उसिसरंलाई नो मीरंलाई पिङो छि लेव बाङलं टाना-टाना झैडे सुचुनो उपरिःङोरं। 40 नो मीरं सय-सय सोनो पचास-पचास जना झैसिडे टाना-टाना याचुङो 41 येसुये नो पाँस गोटा बरे सोनो नेबऱ्याङ ङाः छेन्डे स्वर्गडे रःङडे आसिक ओयोव, होकाम बरे ओकेःव, आव मीराई याङाः-याङाःकं नैड्याच्योरं वार्डे उसिसरंलाई ओयोवरं, नो नेबऱ्याङ ङाः पनि स्यान्टैलाई भाडे ओयोवरं। 42 स्यान्टैरं ज़्याडे यावाःङो। 43 होकाम येसुलो उसिसराई येःलो बरे सोनो ङाःलो उकुत्रारं बारं फुङ्गा याडुपो। 44 नो ज़्याव ज़्याने खेपारंया मान्त्राज़ पाँस हजार लेवरं।

Marcos 6:35-44

48 येसुलो उसिसरंलाई डोङ्गा चलैने बनै डुखं ओटाज़्याव येसुये ओरोःङोरं, कडालेकं बतासं बिप्याङाम ओराज़्याव। छकाल्ने ठोकै तीन बजे काम छ बजेयालं येसु समन्डरलं रीः तर्ट बाडे ओराज़्याव, होकाम नोरंलाई ख्यानैने ओपानज़्याकं, 49 नोरं येसुलाई समन्डर तर्ट बाडे ओराज़्याव रःङडे आव के भुत ची वार्डे याकीःव। 50 कडालेकं येसुलाई रःङडे स्यान्टै याछेव।

ओल चानोज़ नोरंलाई "जियुङलं हिक्मत डोच्यो टाछेच्यो ङा ची" वार्डे हैओडोवरं। 51 ओल डोङ्गाटं उपुलुव मान्त्राज़ बतासं उठकंनिव, आव रःङडे उसिसरं बनै अचम्ब याटाव,

Marcos 6:48-51

येसुये चार हजार मीरंलाई ओपर्भयोरं

1 हो डिन छ्याम फरि पनि माहुले मीरं याडुप्सिव, होरासं ज़्याने कडिज़ मालेव। होकाम येसुये उसिसरंलाई ओल लेवकं खुल्डे हैओडोवरं, 2 "आव माहुल्ये मीरंलाई रःङडे ङायुङ नाज़्या कडालेकं आवरं ङासं यालेव आछिम सोङला याटाडु होसोनो आवरासं ज़्याने कडि पनि माले। 3 होकाम आवरंलाई करेसंज़ ज़ीःमडे ङापरिःङरंखे भने के येमयालं बेहोस टाडे ढलिने लेरं आवरं कोइ कोइरं के टाडाङाम राव लिज़्यारं।"

4 येसुलो उसिसराई येसुलाई हैयाडोव, "आव कडिज़ मालेव बनलं आवरंलाई कैजैडे बरे यानेरं?"

5 येसुये उसिसरंलाई ओपजोयोरं, "जेसं खागोटा बरे उलिज़्याव?"

नोराई हैयाडोव, "सात गोटा लिज़्या"

6 येसुये हो माहुल्ये मीरंलाई नामलं चुङो उपरिःङोरं, होकाम सात गोटा बरे उकुइटं छेन्डे ढन्याबाड ओयोवपाना बरे केःडे, मीरंलाई भाड्याच्योरं वार्डे उसिसरंलाई हैओडोवरं, उसिसराई बरे लाङडे मीरंलाई याभाड्योवरं। 7 नोरासं टिगिडा आलिलिज़ा ङाःरं पनि लेवरं, नो पनि येसुये आसिक याडे नोराई याङाःकंज़ नोयो उपरिःङोरं। 8 होकाम हो मीरं ज़्याडे, यावाःङो। ओयेःलं याडुप्क घ्योव फुङ्गालं सात फुङ्गा ओटाव। 9 होल चार हजारया मीरं लेवरं। होकाम येसुये नो मीरंलाई उपरिःङोरं।

Marcos 8:1-9

येसुये डीलो उसिङलाई सराप ओयोव

12 ओपराटि येसु सोनो उसिसरं बेठानिया नाङखारलाम यावोलकं येसु ओकंरेव। 13 होकाम टाडाङाम ओख्या लेव डीलो उसिङ रःङडे होटं ओसै मलिज़्या वार्डे येसु सिङ खङकं ओनाव, होकाम हो सिङटं ओख्याकाम कडिज़ मालेव, नो बेलाकं डी सैने बेला मालेव।

14 होकाम येसुये हो सिङ्लाई, "आबो खर्कज़ मीराई नसै टाज़्योरंकं।" वार्डे हैओडोव उसिसराई याठोयो।

Marcos 11:12-14

ठोङो डीलो उसिङटाम पैसिने रोः

20 छकाल्ने फरि येसु सोनो उसिसरं हो येमज़ यावोलज़्याकं डीलो उसिङलाई ओजरालामज़ राःङो यारोःङो। 21 होकाम पत्रुसये होछ्यामका रोः ओचेटोयो, होकामटानि पत्रुसये येसुलाई हैओडोव, "रब्बी नङ सराप झाडे नोयोव डीलो उसिङके राःङडे ची ले।"

22 येसुये नोरंलाई जबाफ याडे हैओडोवरं, "परमेस्वरटं बिस्वास नैच्यो 23 डस्साज़ ङा जेलाई हैङाडाच्यो, कोइये यायुङलं सङ्खा माडाडे पाङसिव रोः पुरा टाये वार्डे बिस्वास डोडे आव डान्डा चिसिडे समन्डरलं नान हैयाडोरंखे भने नोलो ओलागिटं नैटावज़ टानेले। 24 हैजैडेज़ ङा जेलाई हैङाडाच्यो, जे जेप्रार्ठनालं जो जिनीःनी पनि हो गेडैडुखे वार्डे बिस्वास डाच्यो, होकाम हो जे डैने जेले। 25 जे प्रार्ठना डोने जेच्याङसिव बेलाकं, कोइ मीरासं माचाव रोः यालेखे भने छेमा याच्योरं, कडावार्क स्वर्गटा लिज़्याव जेबाबुये पनि जेसंका माचाव रोः छेमा ओडाच्योवकं

Marcos 11:20-25

येसुये ङाःडेङा उसिसरंलाई उखुलोरं

1 परमेस्वरलो ओपाङ ठैनेलो लागिटं बनै भ्या मीरं येसुलो ओछ्योयालं केःके याछुइसिरिव, येसु गनेसरेत वार्ने डहंलो ओछ्योकं च्याङसिडे उलिज़्याव। 2 येसुये डहंलो ओगोराटं नेबऱ्याङ डोङ्गा ओरोःङो, जाल रिःसिने मीरं हो डोङ्गालो ओछ्योकं चुङडे याजाल याछेज़्याव। 3 हो नेबऱ्याङ डोङ्गालाम टोबो डोङ्गा सिमोनलो लेव। येसुये हो डोङ्गालाई मीरं यालिज़्याव नाम काम जामा होसैकं लाङ वार्डे सिमोनलाई हैओडोव। होकाम येसु होटं चुङडे बनै भ्या मीरंलाई सिछ्या याने सुरु ओडोव।

4 पाङडे खेम्डे, येसुये सिमोनलाई हैओडोव, "ङाःरं क्योःनेलो लागिटं डोङ्गा बुडावलं लाङडे नजाल ख्या।"

5 हैनि पनि सिमोनये ऐ ओडोव, "गुरबा, गे तरिडुङ जाल ख्याडे पनि कडिज़ गेम्डैये, हैनि पनि नङ हैनडाङो अनंसार ङा जाल ङाख्या।"

6 होकाम होये ओजाल ओख्याकं आढङ भ्या ङाःरं याक्योःवरं हैजैडे नोराई याजाल चिने ओपानो। 7 होकाम नोराई छुटं डोङ्गाटा यासं बोलोङ ङाः सैःनेरंलाई साहान डाडे याखुलोरं, होकाम होराई राडे ङाःर नेबऱ्याङ डोङ्गाटं याझाकं डोङ्गाज़ बुडिने ओपानो। 8 सिमोन पत्रुसये आव रःङडे येसुलो ओखङटं फुलुप्सिडे हैओडोव, "ए प्रभु, ङाछ्योकं टालेन, कडालेकं ङा के पापी मी ची।"

9 एटावका ङाःर याक्योव रःङडे ओल सोनो ओल्स लेनेरं स्यान्टै बनै अचम्ब याटाव। 10 हैजैडे जब्डियालो ओज़ानि याकुब सोनो युहन्नानि पनि अचम्ब नेटाव। होनि सिमोनसं मिलिडे येःन नेडोज़्याव। येसुये सिमोनलाई हैओडोव, "टाछेङंन, नङ आबोकाम मीरंलाई क्योःनेरं नले।"

11 होकाम नोरं याडोङ्गारं पाखाकं रैडे, स्यान्जाति होकंज़ राःडे, येसुलो उझिन्ट यानाव।

Lucas 5:1-11

येसुये घुइरंलाई ओठंकंनोयो

22 टछा येसु उसिसरासं डोङ्गाटं यापुलुव, होकाम उसिसरंलाई हैओडोवरं, "बा गे डहं होपंटं गेनाके।" होकाम होरं डोङ्गाटं पुलुडे यानाव। 23 डोङ्गाटं यानाज़्याकं येसु ओङोःलो। डहंलं घुइरं ओराव। डोङ्गा रीःये ओब्यालो, होकाम नोरं आफंटलं यापरिव।

24 होकाम नोरं येसुलो ओछ्योकं राडे ऐ वार्डे यासोचोयो, "गुरबा, गुरबा गे गेबुडिरिखे।"

येसुये सोडे घुइरंलाई ओहक्लोयो, होकाम नो स्यान्टै ठकंनिडे चिम ओटाव। 25 येसुये नोरंलाई हैओडोवरं,

"जे जिबिस्वास कान्डे ओनाव?" नोरं बनै याछेव, होकाम अचम्ब टाडे या-याज़ ऐ यावारो, "आव काङ्का? आवये बतासं सोनो रीःलाई समं अरैज़्याव, नोराई पनि आवलो ओरोः ठैज़्यारं।"

Lucas 8:22-25

येसुये घुइरंलाई ओठंकंनोयो

येसुये भुत लागिव मीलाई ओससोमो

26 येसुरं गेरासेनस प्रडेसलं याकेरिव, नो गालील डहंलो ओहोपंटं ले।

Lucas 8:22-26

12 होकाम नम उढल्किरिव, होकाम बारं जना उसिसरं राडे येसुलाई हैयाडोव, "आव माहुले मीरंलाई गपरिःङरंके, होकाम नोरं आकाला आसै होसैयाला नाङखारलं नाडे गबासिनारंकं, होसोनो याज़्याव गखिमरंकं, कडालेकं गे के मीरं मालेव पोलं ची गेलिज़्या।"

13 होकाम येसुये नोरंलाई हैओडोवरं, "जे ज़ नोरंलाई ज़्याव याच्योरं।" होकाम नोराई हैयावारो, "गेसं के पाँस गोटा बरे सोनो नेबऱ्याङ ङाः याज़ लिज़्या, माटाखे भने के गे स्यान्टै नाडे आव स्यान्टै मीराई यालागिटं ज़्याव लःङने टाके।" 14 नोरं ठोकै पाँस हजारया खेपारंया मान्त्रा लेवरं।

होकाम येसुये उसिसरंलाई हैओडोवरं, "नोरंलाई पचास-पचास जना झैडे टाना-टाना सुचुनच्योरं।" 15 नोराई हैजैडेज़, स्यान्टैरंलाई यासुचुनोरं। 16 होकाम येसुये नो पाँस गोटा बरे सोनो नेबऱ्याङ ङाः छेन्डे स्वर्गडे रःङडे ढन्याबाड ओयोव, होकाम बरे केःडे मीरंलाई भाड्याच्योरं वार्डे उसिसरंलाई ओयोवरं। 17 स्यान्टैराई ज़्योडे यावाःङो, होकाम उसिसराई येःलो उकुत्रारं बारं फुङ्गा याडुपो।

Lucas 9:12-17

काना नाङखारला बेह्याँ

1 सोङलाका गालीलला काना नाङखारलं टोबो बेह्याँ लेव। येसुलो वामा पनि नलं लेव। 2 येसु सोनो उसिसरंलाई पनि नो बेह्याँलं खुल्डे यानैज़्यावरं। 3 अङ्गुरलो उरीः ओखेमो पाना येसुलो वामाये येसुलाई हैओडोव, "नोरासंके अङ्गुरलो उरीः माले।"

4 येसुये वामालाई हैओडोव, "ए आमा, ङा कडि डाने ङालाई हैटाडाङ। ङाबेला अजं माराटा।"

5 येसुलो वामाये नौकररंलाई हैओडोवरं, "जे येसुये हैओवारो स्यानाव झैच्यो।"

6 होकाम यहुडीराई चोखैसिने याचलनलो लागिटं रीः गप्ने लुङलो छ गोटा मान्ठरं नैसिव लेवरं नलं ठोकै बीस तीस पाठी नाये। 7 येसुये नोरंलाई हैओडोवरं, "मान्ठरं रीःये सब्यालच्यो।" नोराई मान्ठलो ओया समंज़ रीःये यासब्यालो। 8 येसुये नोरंलाई हैओडोवर, "टिगिडा वाप्डे आव बिह्याँ भोजला मुख्या लेवकं गलाङच्योके।" नोराई नो यालाङो। 9 बिह्याँ भोजला मुख्याये नो रीः ओडारो, नो के आबो अङ्गुरलो उरीः टाडे उलिज़्याव। नो काङाम ओराव नोलाई ठा मालेव, बुरु रीः गप्ने नौकररंलाई याज़ ठा लेव। होकाम भोजला मुख्याये डुलाहालाई खुल्डे हैओडोव, 10 "स्यान्टै मीराई ङाःडे चाव अङ्गुरलो उरीः योरंये होकाम मीराई बनै याओँव पाना माडारो अङ्गुरलो उरीः योरंये। नङके चाव अङ्गुरलो उरीः आर्क समंज़ जोगैडे नैडेननै।"

11 येसुये ओडोव येःनरं मढ्येलाम आव गालीलला काना नाङखारला येसुलो पैलाला अचम्बला चिन्न लेव। ऐजैडे येसुये ओमहिमा ओसोटोनो, होकाम येसुलो उसिसराई येसुलाई बिस्वास याडोव।

João 2:1-11

6 येसुये फिलिपलाई जान्चीनेलो लागिटं आव रोः हैओडोव, कडालेकं येसुये जो येःन ओडोरिज़्याव, हो येसुलाई ठा लेव।

7 फिलिपये येसुलाई जबाफ ओयोव, "स्यान्टैरंलाई टिगिडा-टिगिडा याडैनि पनि नेसै चान्डीलो पैसालो बरेये पनि नोरंलाई डुम्ने माले।"

8 येसुलो उसिसरं मड्यलाम टोबो, सिमोन पत्रुसलो ओभाइ अन्ड्रियासये हैओवारो, 9 "आकं टोबो छोऱ्या लिज़्या, नोसं चिकालो पाँस गोटा बरे सोनो नेबऱ्याङ ङाः लिज़्या। होकाम आढङ भ्याराई यालागिटं आडियाँ याज़ कडि डुमकेड?"

10 येसुये हैओवारो, "मीरंलाई चुङो गपंरिःङच्योरं के।" नो बाङलं बनै भ्या छि लेव। होकाम ठोकै पाँस हजारया खेपारं नलं याचुङो। 11 होकाम येसुये बरे रैडे, परमेस्वरलाई ढन्याबाड ओयोव झिन्डे चुङोरंलाई भाडे ओयोवरं, होकाम हैजैडेज़ ङाः पनि भाडे ओयोवरं। नोराई याज़्योडुने भरिज़ याज़्योव। 12 होकाम नोरं ज़्याडे यावाःङो, येसुये उसिसरंलाई हैओडोवरं, "येःलो कुत्रारं गुडुपच्योके, नो खेर टानाकं।" 13 ज़्यानेराई यासयःलो चिकालो नो पाँस गोटा बरेलो उकुत्रा नोराई याडुपो होकाम बारं फुङ्गा ओब्यालो।

João 6:6-13

19 पाँस छ किलो मिटर डोङ्गा चलैडे यानाव झिन्डे नोराई येसुलाई डहला रीःतर्ट बाडे डोङ्गालो ओछ्योकं ओकेरिव यारोःङो, होकाम नोरं याछेव। 20 होकाम येसुये नोरंलाई हैओडोवरं, "ङा ची, टाछेच्यो।" 21 नोरं खुसि टाडे येसुलाई डोङ्गाटं यासुचुनो, होकाम नोरं यानाज़्याव पोडे डोङ्गा होपान्त्राज़ ओकेरिव।

João 6:19-21

येसु सात जना उसिसराई याङाःकं ओसंतन्सिव

1 होकाम तिबेरियास समन्डरलो ओगोराटं उसिसराई याङाःकं येसु ओसंतन्सिव। येसुये ओललाई ऐजैडे टखेप फरि ओसोटोनो। 2 सिमोन पत्रुस, डिडुमस वार्ने ठोमा, गालीलला काना नाङखारला नठानेल, जब्डियालो नेबऱ्याङ ओज़ानि होसोनो उसिसरंकाम नेबऱ्याङनि टोबोकं लेवनि। 3 सिमोन पत्रुसये नोरंलाई हैओडोवरं, "ङा ङाः सैःने ङानाज़्या।" नोराई नोलाई हैयाडोव, "गे पनि नङसं गेरा।" नोरं नाडे डोङ्गाटं यापुलुव, नो रिलं नोराई कडिज़ माक्योरंये। 4 उज्यालो ओटारिज़्याकं, येसु समन्डर गोराटं च्याङसिडे उलिज़्याव। येसुलो उसिसराई नो येसुज़ वार्डे मासरेरंये। 5 येसुये नोरंलाई हैओडोवरं, "ढापा मीरं, जेसं टिगिडा ङाः लिज़्या रो?"

नोराई येसुलाई जबाफ यायोव, "माले।"

6 येसुये नोरंलाई हैओडोवरं, "जाल डोङ्गाकाम वोःरडे ख्याच्यो, होकाम डैने जेले।" होकाम नोराई जाल याख्याव, ङाःरं बनै भ्या यापरिवये नोराई जाल मासेल्डुरंये।

7 येसुये मया ओडोज़्याव उसिसये पत्रुसलाई हैओडोव, "नो के प्रभु ची ओलेव लेव।" "नो प्रभुज़ ओलेव लेव" वार्ने ठैडे सिमोन पत्रुस ओतर्टा ओक्वा ओवाङलं ओपोव, कडालेकं नोये ओक्वा पिःडे ओनैज़्याव, होकाम समन्डरलं फालओजाव। 8 उरु उसिसरं डोङ्गाटंज़ चुङडे ङाःये ब्यालो जाल सेःल्डे यारोयो। नोरं समन्डर गोराटाम भ्या टाडाके माङ्क, ठोकै टसय मिटरया लेव। 9 नोरं ओगोराटं याझरिवपाना नोराई मेःलो भुभुरालं ङाः हिप्सिव सोनो बरे यारोःङो। 10 येसुये नोरंलाई हैओडोवरं, "जे बाभा जेक्योव ङाः टिगिडा गरैच्योके।"

11 होकाम सिमोन पत्रुस डोङ्गाटं पुलुडे टसय त्रिपन्न गोटा घ्यो-घ्योव ङाःराई ब्यालो जाल पाखाटं सेःल्डे ओरोयो, आडङ भ्या ओटानि पनि जाल माचीये।

João 21:1-11

Libertações

Jesus expulsou demônios com autoridade. Os espíritos impuros não resistiam à sua palavra e saíam imediatamente.

23 हो बेलाकं नो यहुडीरं याडुप्सिने ज़ीःमलं टोबो माचाव आत्माये ओडापो मी लेव। नोये किःडे हैओवारो, 24 "ए नासरतला येसु, गेसं नमी कडि उलिज़्याव? नङ गेलाई नास झैने वार्डे नराव रो? ङा नङलाई ङासरेसन, नङ परमेस्वरलो चोखो उमीज़ ची।"

25 होकाम येसुये नोलाई ऐ वार्डे ओहक्लोयो, "गाइगुइ टालेन, नोलो ओक्याङटाम पुलुडेनान।"

26 हो मीलाई फङ-फङ टडे कस्सिडे किःडे नो माचाव आत्मा हो मीलो ओक्याङटाम पुलुडे ओनाव।

Marcos 1:23-26

येसुये माचाव आत्मा लेव मीलाई ससोमोये

1 येसुरं उसिसरासं गालील डह होपंटं गेरासेनस प्रडेसलं याराव। 2 येसु डोङ्गाटाम उझरिवपानाज़ माचाव आत्माये क्योःडे ओनैज़्याव टोबो मी खाडर लेव पोलाम राडे येसुसं ओडैसिव। 3 नो मी एकसप्ड्या खाडरयालंज़ लेये। नोलाई काङ्काये पनि साङ्गलये माकीडुरंये। 4 नो मीलाई भ्या पालाज़ क्योःडे साङ्गलये किडे हलालं झासिव लेव। साङ्गलये याकिनि पनि पाटा नि पटं छाङडे हलारं पनि केःडे ख्याने सक्ति लेव, हैजैडे काङ्कायेज़ माक्योःडुरंये। 5 नो, लाकं रिलं एकसप्ड्याज़ खाडरयालं, डान्डायालं किःवग्यान ओक्याङयालं लुङये रुमडे बारिये।

6 नोये येसुलाई टाडाङं ओरोःङोपानाज़ ज़ोरिडे उघुन्डा टिकिडे ओखङटाम ढो ओडोव। 7 बनै कस्सिडे किःडे ऐ ओवारो, "ए घ्योव परमेस्वरलो ओज़ा येसु, ङा नङसं कडि समन्ड उलिज़्याव ड? परमेस्वरलो उमिनङाम ङा नङलाई हैङाडान, ङालाई डुखं टायाङ।" 8 कडालेकं येसुये होलाई ए माचाव आत्मा नो मीलो ओक्याङटाम पुलुङंन वार्डे ङाःडेज़ हैडाडे ओनैज़्याव।

9 येसुये नोलाई हैओडोव, "नमिन कडि?"

नोये हैओवारो, "ङा ङामिन के ‘फौजी’ ची गे के बनै भ्या ची गेले।" 10 नो माचाव आत्माराई येसुलाई ऐ वार्डे बनै बिन्ती याडोव, गेलाई आव पोलाम टापुलैसि।

11 नो बेलाकंज़ याछ्योका डान्डाटं घ्योव टबगाल वोरं यालाज़्याव। 12 नो माचाव आत्माराई येसुलाई "गेलाई नो वोराई याक्याङटं नाव गयासिके गे नोराई लेवटंज़ गेपंसि" वार्डे बिन्ती याडोव। 13 येसुये नोरंलाई गनाच्योके वार्डे हैओडोरंकं नो माचाव आत्मारं नो मीलो ओक्याङटाम पुलुडे वोराई याक्याङटं यापसिव। होमान्त्राज़ नो वोरं डान्डाटाम मेडे उरालाडे गुर्किडे रहलं टेःडे होलंज़ बुडिडे यासिव। नो वोराई याबगाललं नेहजारया लेवरं।

14 नो रःङडे वो ग्वालारं याछ्यासैये ढोङ्डे सहर, नाङखारयालं बात्रा याडोनाव। नो रोः ठैने भरि कै ओटाव वार्डे यारःङरिव।

Marcos 5:1-14

11 कोइ मीये ओबाबु वामालाई जिन ङालेवङाम डैने फाइडा स्यान्टै परमेस्वरलाई चरैःसिव ची ले वार्डे हैयावार भने, 12 जे नो मीलाई ओबाबुनि वामानि कडि नेसेवाज़ डोव जेमयोये। 13 हैजैडे जे जेसाखा जेपुर्खाकाम्टा चलिडे राज़्याव चलनलाई मानिडे परमेस्वरलो ओपाङलाई फालिम जेजैज़्या। एटानाव उरु भ्या येःनरं जेडोज़्या।"

14 येसुये माहुले मीरंलाई फरि ओल लेवकं खुल्डे नोरंलाई ऐ ओडोवरं, "जे स्यान्टैये ङारोः ठैच्यो होकाम चावसं बुझिच्यो। 15 एटानाव कडि रोःज़ माले जो पाखाङाम मीलो उज्युङलं पसिडे मीलाई बलेने, मीलो युङलाम पाखाडे पुलुज़्याव रोःराई ची मीलाई माचाव झैरंये।

Marcos 7:11-15

टोबो मेमालो उबिस्वास

24 येसु नलाम पुलुडे टुरोस सोनो सिडोननि नेसान्डिडे नाडे टोबो ज़ीःमलं उपसिव। आलं ङाराव काङ्कायेज़ ठा टासनरंकं वार्डे हैओवारो, हैनि पनि मोसिडे मालेडुये। 25 नो बेलाकंज़ टोबो मेमाये येसुलो ओबारेलं ओठोयो होकाम राडे येसुलो ओखङटं उफुलुप्सिव। नो मेमालो मेमा ओज़ालाई माचाव आत्माये क्योःडे ओनैज़्याव। 26 नो मेमा सिरियाला फोनिके वार्ने पोलं जर्मीव लेव नो मेमा यहुडी मालेव। नो मेमाये येसुलाई मेमाङाज़ालो ओक्याङटाम ज़्याःरं हाइड्यो वार्डे बिन्ती ओडोव। 27 येसुये नो मेमालाई हैओडोव, "ङाःडे छोऱ्या लुज़ारंलाई ज़्याव योरं, कडालेकं छोऱ्या लुज़ाराई याबरे रैडे काःरंलाई ख्याड्याने चाव माङ्कची।"

28 नो मेमाये हैओडोव, "होज़ प्रभु, काःराई पनि छोऱ्या लुज़ाराई टेबलटाम मेलं यासंटेःव ज़्योरंसानि।"

29 येसुये नो मेमालाई हैओडोव, "नङ ऐ नवारोयेज़ नज़ा यासम्डु। नज़ालो ओक्याङटाम ज़्याः पुलुडे यानाडु।"

30 नो मेमा ज़ीःमकं ओनाकं के ओज़ालाई खाटंटं घ्याङसिडे उलिज़्याव ओडैनाव, ओक्याङटाम ज़्याः पुलुडे नाडे उलिज़्याव ओरोःङो।

Marcos 7:24-30

17 नो माहुल्ये मीरंकाम टोबोये येसुलाई हैओडोव, "गुरबा ङाज़ालाई मापाङ्ने माचाव आत्माये क्योःडे नोयो, होकाम नङ लेवकं रैडेङानै। 18 जोकं नो माचाव आत्माये ङाज़ालाई क्योःवये। होकाम छोऱ्यालाई नामलं टवये, होसोनो छोऱ्याये ओयाःलाम फेन राःवये, होकाम ओहा कट्र सपिडे गेखेङ्टेङ टाये, ङा नसिसरंलाई नो माचाव आत्मा पुलैच्यो वार्डे बिन्ती ङाडोवरं, नोराई माढुरंये।"

19 होकाम येसुये नोरंलाई हैओडोवर "ए बिस्वास माडोने पुस्ता, ङा जेसं खर्का समं ङालेके? ङा जेलाई खर्का समं ङासहिच्योके? नो छोऱ्यालाई आकं रैच्यो।" 20 हो छोऱ्यालाई येसु लेवकं यारैज़्याकं येसुलाई ओरोःङोपानाज़ हो माचाव आत्माये छोऱ्यालाई ल-ल ओटंव, छोऱ्या नामलं टसिडे ओयाःलाम फेन पुलैडे नाम्ल फर्लिङ-फर्लिङ उपल्टिव।

21 येसुये छोऱ्यालो ओबाबुलाई ओपजोयो, "खाबलाकाम आव छोऱ्यालाई ऐ ओटाव?"

छोऱ्यालो ओबाबुये हैओडोव "ज़ीमज़ा ओलेवकामज़। 22 ङाज़ालाई सैःने लागिटं नो आत्माये गरि मेःलं गरि रीःलं ख्यावये। नङ ससोमो नढुखे भने, नयुङ नाडे गेलाई सायता गयासिके!"

23 येसुये छोऱ्यालो ओबाबुलाई हैओडोव, "‘नङ नढुखिन!’ वार्डे नो कै नवार्ज़्याव? बिस्वास डोनेराई यालागिटं स्यान्टै रोःज़ टाये।"

24 होपानाज़ छोऱ्यालो ओबाबुये कीःडे हैओवारो "ङा बिस्वास ङाडो। ङा कम्जोर ङाबिस्वास बडैने ङालाई सायता डाङ।"

25 होकाम माहुले मीरं बोलोङ गुरक्याटं याराज़्याव रःङडे येसुये हो माचाव आत्मालाई ऐ वार्डे ओहक्लोयो, "ए मापाङने सोनो भैरा आत्मा, ङा नङलाई आग्या ङायान, नो छोऱ्याटाम पुलुडे रान, होकाम खर्क पनि नो लेवटं टानान।"

26 होकाम हो माचाव आत्मा चीर-चीर किःडे छोऱ्यालाई फङ-फङ टडे उपुलुव, होकाम हो छोऱ्या लल्याट्रो ओटाव, भ्या बिछुराई के उसिव ची वार्डे हैयावारो। 27 होकाम येसुये हो छोऱ्यालाई उकुइटं क्योःडे पङ्ल्याङ ओसोचोयो, होकाम छोऱ्या ओच्याङसिव।

Marcos 9:17-27

येसुये भ्या मीरंलाई ओससोमोरं

38 येसु यहुडीरं याडुप्सिने ज़ीःमलाम पुलुडे सिमोनलो उज़ीःमलं ओनाव। होलं सिमोनलो, उमैज्यु बनै ओजोरो राडे ठलिडे उलिज़्याव, होकाम नोराई होलो ओलागिटं येसुलाई प्रार्ठना डोड्यासि वार्डे बिन्ती याडोव। 39 येसुये होलो ओछ्योकं च्याङसिडे जोरोलाई ओहक्लोयो, होकाम होलाई जोरोये ह्वाङ ओराःव, होकाम होये होपान्ट्राज़ सोडे येसुराई यासेवा ओडोव।

Lucas 4:38,39

27 येसु डोङ्गाटाम उझिरिव पानाज़ टोबो मीलाई ओडोयो, हो मीलाई भुत लागिव लेव। नोये भ्या समयकामज़ क्वा माक्वाइसिडे उलिज़्याव, होसोनो नो ज़ीःमकं मालेडे नो खाडर लेव पो यालं उलिज़्याव। 28 नोये येसुलाई ओरोःङो, होकाम कस्सिडे कीःडे येसुलो ओङाःकं फुलुप्सिडे हैओवारो, "ए स्यान्टैराई भन्डा घ्योव परमेस्वरलो ओज़ा येसु, नङ ङासं कडि नयेःन? ङा नङलाई है ङाडान, ङालाई डुखं टायाङ।" 29 कडालेकं येसुये माचाव आत्मालाई नो मी लेवटाम पुलुडे नान हैडाडे ओनैज़्याव। नोलाई भ्या पाला ज़ भुतये ओटंव। नोलाई याखार्ल नैडे यागुज़्याव। नोलाई साङ्गलये सोनो हलालं झाडे किरंये, नोये नो याकिव साङ्गलरं फ्यावये। भुतये नोलाई कडिज़ मालेव बनलं लाङोये।

30 येसुये नोलाई ओपजोयो, "नमिन कडि?"

नोये हैओवारो, "फौजी।" कडालेकं भ्या भुतरं नो लेवटं पसिव लेवरं। 31 गेलाई बुडाव गाङलं टापरिःङसि वार्डे येसुलाई बिन्ती याडोव।

32 नजिकका डान्डाटं वोराई बनै घ्योव याबगाल यालाज़्याव। होकाम नोराई वोराई लेवटं नाव गयासिके वार्डे येसुलाई बिन्ती याडोव, होकाम येसुये गनाच्योके हैओडोवरं। 33 होकाम भुतरं नो मी लेवटाम पुलुडे नो वोराई याक्याङटं यानाव, नो वोराई याबगाल उरालाटं ज़ोःडे डहंलं बुडिडे यासिव।

34 जो ओटाव नो रःङडे वो छानेरं याढोङो, होकाम नाङखार सोनो आसै होसैयाला पो यालं आव रोः हैयावार्नाव। 35 नलं जो ओटाव नो रःङने मीरं येसु लेवकं याराव, होसोनो जो मी लेवटाम भुतरं यापुलुव, नो मीलाई क्वा क्वाइसिडे सम्डे येसुलो ओङाःकं चुङडे उलिज़्याव याडैरिव, होकाम नोरं बनै याछेव।

Lucas 8:27-35

27 डस्साज़ ङा जेलाई हैङाडाच्यो, आका च्याङसिडे लिज़्यावरंकाम कोइ-कोइ लिज़्यारं, जोराई परमेस्वरलो ओराज्य यामरःङया समं सिने मालेरं।"

येसुलो उरुपं ओफेरैसिव

28 येसुये आव रोः हैओवारो ठोकै आठ डिन झिन्डे पत्रुस, युहन्ना सोनो याकुबलाई ओल्स लाङडे प्रार्ठना डाने डान्डाटं ओनाव। 29 येसुये प्रार्ठना ओडोज़्याकं ओअनवारलो उरुप ओफेरैसिव, होसोनो येसुलो ओक्वा गोङज़ा उमिल्किका मान्टिव उज्यालो ओटाव। 30 होकाम येसुसं नेबऱ्याङ मीनि रोः नेडोज़्याव, नोनि मोसा सोनो एलिया लेवनि। 31 नोरं निमी मान्टिव चाङज़्याव रुपंलं रःन्डे येसुलो प्रिठीबीलाम ओनाने बारेलं रोः याडोज़्याव। आव रोः येसुये यरुसलेमलं पुरा झैने लेव।

Lucas 9:27-31

32 आबो पत्रुस सोनो नोसं लिज़्यावरं यामिरंये रोलाटा टाडे यालिज़्याव। यामिरंलाम यासन्सिकं नोराई येसुलो निमी मान्टिव चाःङो उरुप सोनो येसुसं च्याङसिव नेबऱ्याङ मीनिलाई यारोःङोरं। 33 होकाम नो नेबऱ्याङ मीनि येसुसं भासिडे नेनारिज़्याकं पत्रुसये येसुलाई हैओडोव, "गुरबा, गेलाई आकं लेने बनै चाव ओलेव लेव। गे सोमबऱ्याङ छाप्रा गेझैके टोबो नलागिटं, टोबो मोसालो ओलागिटं होसोनो टोबो एलियालो ओलागिटं।" कडि ओपाङो हो रोः नोये मासोनोये।

Lucas 9:32,33

38 नो माहुले मीराई याखार्लामटा टोबो मीये किःडे हैओवारो, "गुरबा, ङा नङसं बिन्ती ङाडो, ङाज़ालाई चावसं रःङड्याङ। कडालेकं ङाज़ा नो टोबोज़ाज़ ची। 39 रःङखेने, टोबो माचाव आत्माये नोलाई क्योःवये, होकाम नो अम्ल्याङसानि किःये, होसोनो नोलाई बारबुर किलोये होकाम नोये ओयाःलाम फेन ख्यावये। होसोनो नोलाई ल-ल टडे बल्ल-बल्ल राःवये। 40 नो माचाव आत्मालाई गुपुलैड्याङरंकं वार्डे नसिसरासं बिन्ती ङाडोव के, नोराई माढुरंये।"

41 होकाम येसुये जबाफ ओयोव, "ए बिस्वास माडोने सोनो झ्याङस्या पुस्ता, ङा खर्का समं जेसं ङालेकेडं, होसोनो ङा जेलाई खा समं ङासहिच्योके ड? नज़ालाई आकं रै।"

42 होकाम नो ओराज़्याकंज़ माचाव आत्माये नोलाई ल-ल ओटंव, होसोनो किल्ने ओपानो। होकाम येसुये नो माचाव आत्मालाई ओहक्लोयो, होकाम नो बाल्खलाई ससम्डे ओबाबुलाई ओयोव। 43 परमेस्वरलो बनै घ्योव ओयेःन रःङडे नोरं स्यान्टै बक्क याटाव।

येसु फरि उसिने बारेलं ओपाङो

येसुये ओडोव स्यान्टै येःनरं रःङडे स्यान्टैरं बक्क याटाव, होकाम येसुये उसिसरंलाई हैओडोवरं,

Lucas 9:38-43

येसु सोनो बालजिबुल

14 येसुये टोबो भुत उपुलोयो, नो भुत लाटा लेव। भुत उपुलुव पाना नो लाटा मी ओपाङो, होकाम माहुले मीरं बनै बक्क याटाव।

Lucas 11:14

50 नोरंलाम टोबोये सेवा डोनेराई यामुख्यालो ओनौकरलाई वोःरटा ओना च्वाट्ट पल्डेओयोव।

51 हैनि पनि येसुये हैओवारो, "याटा आबो ऐ टालेच्यो।" होकाम हो मीलो ओना छुडे नोलाई ओससोमो।

Lucas 22:50,51

24 युहन्नाये उपरिःङो उसिसरं यावोलो झिन्डे, येसुये युहन्नालो ओबारेलं माहुले मीरंलाई हैओडोवरं "जे कडिज़ मालेव बनलं कडि रःङने जेनाव? सै बतासंये ओहल्लैज़्याव ज़िःङलाई? 25 होकाम जे कडि रःङने जिपुलुव? सै चाव क्वा क्वाइसिव मीलाई रःङने? रःङच्यो, झिलिमिलि क्वा क्वाइसिनेरं, चावसं ज़्यानेरं सोनो चाव पोलं लेने मीरं के राजालो ओडरबारयालं ची लेरंये। 26 होकाम जे कडि रःङने जेनाव? सै अगमबक्तालाई? हो ङा हैङावार, जे अगमबक्ता भन्डा पनि घ्योवलाई जेरोःङो। 27 आव नोज़, जोलो ओबारेलं सर्सिव ले, ‘रःङच्यो, ङा ङाकटंवाललाई नङाः-नङाः ङापरिःङ, नोये नङाःडे नयेम तयार झैनेले।’ 28 ङा जेलाई हैङाडाच्यो, ‘मेमाङाम जर्मिवरंकाम युहन्ना भन्डा घ्योव काङ्काज़ माले, होटानि पनि जो परमेस्वरलो ओराज्यलं आलिज़ा भन्डा आलिज़ाले, हो युहन्ना भन्डा अजं घ्योव टा।’"

29 स्यान्टै मीरं सोनो सिरमा डुप्नेरं आव ठैडे परमेस्वरलो ओसत्यलाई बिस्वास याडोव, कडावार्क नोराई युहन्नालेवङाम बप्तिस्मा रैडेयानैज़्याव। 30 फरिसीरं सोनो न्याम पैने घ्योव मीरं युहन्नालेवङाम बप्तिस्मा यामरोयो कारनये परमेस्वरलो उबिचारलाई या यालागिटं मामानिरंये।

Lucas 7:24-30