Marcos 1

बप्तिस्मा याने युहन्नालो ओसोर

1 परमेस्वरलो ओज़ा येसु ख्रीस्टलो चाव ओसोर ऐजैडे सुरु ओटाव। 2 यसैया अगमबक्तालो उकितापटं एटाव सर्सिवले,

"रःङ, ङा ङाकटंवाललाई नङ भन्डा ङाःडे ङापरिःङ,

नोये नयेम तयार झैनेले।✝1:२ मलाकी ३:१

3 कडिज़ मालेव बनलं टोबो किःज़्याव मीलो ओगा,

‘प्रभुलो ओलागिटं डोहा झैच्यो,

नोलो ओलागिटं येमरं सिडा झैच्यो!’"✝1:3 यसैया ४०:३

4 बप्तिस्मा झैने युहन्ना बनलं ओरोःनो नलं मीरंलाई बप्तिस्मा झोयोग्यान ऐ वार्डे प्रचार ओडोज़्याव, "जेपापलाम वोल्च्यो होसोनो बप्तिस्मा टाच्यो होकाम परमेस्वरये जेपाप छेमा डाड्यानेले।" 5 नो लेवकं स्यान्टै यहुडिया प्रडेस सोनो यरुसलेम सहरला लेने मीरं पुलुडे युहन्ना लेवकं याराव। नोराई यापापरं स्वीकार डाडे नोलो उकुइटाम यर्डन भैलं बप्तिस्मा याटाव।

6 युहन्नाये उँटलो उमुःलये झैसिव क्वा क्वाइसिये, ओवाङलं छालालो वाम्फो पोसिये, सलंह कैडे सोनो बन राबं ज़्याडे लेये।✝1:६ २ राजा १:८ 7 नोये ऐ वार्डे प्रचार ओडोव, "जो ङा भन्डा झिन्डे रानेले, हो ङा भन्डा पनि बनै ओसक्ति लेव ची ले, ङा के घोम लेडे नोलो ओपनैलो ओटस्मा पलाने हाडङका पनि ङाम्ले। 8 जेलाई ङा रीःये बप्तिस्मा झैडेङानैच्यो, हैनि पनि नोये जेलाई चोखो आत्माये बप्तिस्मा*1:८ बप्तिस्मा रीःल डुबैने झैनेले।"

येसुलो बप्तिस्मा सोनो परिछ्या

9 हो बेलाकं ऐ ओटाव येसु गालील प्रडेसला नासरत सहरलाम राडे युहन्नालो उकुइटाम यर्डन भैलं बप्तिस्मा ओटाव। 10 रीःलाम पुलुडे ओरावपानाज़ येसुये स्वर्ग ओफैसिव सोनो आत्मालाई परिवालो उरुपलं ओल लेवकं ओराज़्याव ओरोःङो। 11 होकामटानि स्वर्गटाम परमेस्वरलो टोबो एटाव ओगा ओराव, "नङ ङायुङ्का ङाज़ाची ङा नङसं बनै खुसि ङाले।"✝1:11 सिर्जिव २१:२; भजनरं २:७; यसैया ४२:१; मत्ती १२:१८; मर्कुस ९:७

12 आत्माये येसुलाई होपानाज़ कडिज़ मालेव बनलं ओलाङो। 13 येसु चालीस डिन समं कडिज़ मालेव बनलं ओलेव। होबेलाकं सैतानये*1:१३ सैतान ज़्याःराई यासेःर परिछ्या ओडोव। येसु बनला बनकररासं बोलोङ ओलेव, होकाम स्वर्गटा कटंवालराई ओसेवा बनै याडोव।

येसुये चार जना जलाहारिरंलाई उखुलोरं

14 होकाम युहन्ना झ्यालखानालं ओखोरसिव छिन्डे येसु गालीललं ओराव। होकाम परमेस्वरलो चाव ओसोर प्रचार ओडोव। 15 येसुये हैओवारो, "बेला याटाडु, परमेस्वरलो ओराज्य नजिकं राडेले। जेपापलाम वोल्च्यो, होकाम चाव सोरटं बिस्वास डाच्यो।"✝1:१५ मत्ती ३:२

16 येसु गालीलला समन्डरलो ओगोराटाग्यान ओनाज़्याकं सिमोन सोनो ओभाइ अन्ड्रियासलाई समन्डरलं जाल नेख्याज़्याव ओरोःङोनि। कडालेकं होनि जालाहारिनि लेवनि। 17 नोनिलाई येसुये हैओडोवनि, "ङाछिन्ट राचीन ङा जिनलाई मीराई याजालाहारि ङाझैचिन।" 18 नोनि होपानाज़ नेजालरं राःडे, येसुलो उझिन्ट नेनाव।

19 होकाम जामा होसैकं ओनाकं येसुये जब्डियालो ओज़ानि याकुब सोनो ओभाइ युहन्नालाई डोङ्गाटं चुङडे जाल निरुपज़्याव ओरोःङोनि। 20 येसुये होनिलाई होपानाज़ उखुलोनि, होनि नेबाबु जब्डियालाई येःन डोनेरासं डोङ्गाटंज़ राःडे येसुलो उझिन्ट नेनाव।

भुत आत्मा लागिव मी

21 येसु सोनो उसिसरं कफर्नहुमलं यानाव, होकाम नाःसिने डिन छ्याम*1:२१ नाःसिने डिन सातालो आखिरला डिन। आव छ्याम यहुडीरं स्यान्टै यायेःन राःडे नासिरंये होसोनो परमेस्वरलो ओमहिमा डोरं। यहुडीरं याडुप्सिने ज़ीःमलं*1:२१ यहुडीरं डुप्सिने ज़ीःम पसिडे ओपोयोरं। 22 होला मीरं येसुये ओपोयो रोः ठैडे बक्क याटाव। कडालेकं येसुये होला मीरंलाई न्याम पैने मीरं मान्टि माङ्क, बुरु अडिकारसं ओपोयोरं।✝1:22 मत्ती ७:२८-२९

23 हो बेलाकं नो यहुडीरं याडुप्सिने ज़ीःमलं टोबो माचाव आत्माये ओडापो मी लेव। नोये किःडे हैओवारो, 24 "ए नासरतला येसु, गेसं नमी कडि उलिज़्याव? नङ गेलाई नास झैने वार्डे नराव रो? ङा नङलाई ङासरेसन, नङ परमेस्वरलो चोखो उमीज़ ची।"✝1:२४ मत्ती २:२३

25 होकाम येसुये नोलाई ऐ वार्डे ओहक्लोयो, "गाइगुइ टालेन, नोलो ओक्याङटाम पुलुडेनान।"

26 हो मीलाई फङ-फङ टडे कस्सिडे किःडे नो माचाव आत्मा हो मीलो ओक्याङटाम पुलुडे ओनाव। 27 होकाम होला मीरं बनै अचम्ब याटाव, होकाम यायाज़ ऐ वार्डे यापजैसिव, "आव कडि? आव के साःरौ सिछ्या ची ओलेवलेव। आवये के माचाव आत्मारंलाई पनि अडिकारसंची अरैज़्यावरं, होकाम होराई आवये ओअरैरंकं पनि याठैज़्याव ची ओलेव।"

28 होकाम चानोज़ येसुये ओडोव येःनलो ओबयान गालील प्रडेस आसै-होसैयालं स्यान्टैडे ओफैलिव।

येसुये बनै भ्या मीरं ओससोमो

29 होकाम येसु यहुडीरं याडुप्सिने ज़ीःमलाम चानोज़ पुलुडे याकुब सोनो युहन्नानिसं सिमोन सोनो अन्ड्रियासनि निज़ीःमलं ओनाव। 30 सिमोनलो उमैज्यु ओजोरोये ठाला टिकिडे ओनैज़्याव, होकाम होला मीरं येसुलाई चानोज़ हो रोः हैयाडोव। 31 येसु नोलो ओछ्योकं ओनाव, होकाम उकुइटाम क्योःडे ओसोचोयो। होकाम होमान्त्राज़ ओजोरोये ओराःव, होकाम सोडे येसुलो ओसेवा ओडोव।

32 होछ्याम रिःमडे निमी उनुपो छिन्डे मीराई ठलिवरं सोनो माचाव आत्माये ओडापोरं स्यान्टैरंलाईज़ येसु लेवकं यारोयोरं। 33 नो सहरला स्यान्टै मी भरि झलायेमलं डुप्सिडे यालिज़्याव। 34 भ्या किसिमला रोगो लागिव बनै भ्या मीरंलाई येसुये ओससोमोरं, होकाम बनै भ्या ज़्याःरं उपुलोयोरं, हो ज़्याःराई येसुलाई यासंरेवये येसुये नो ज़्याःरंलाई ओजमाज़ पाङो मायोवरंये।

येसुये गालीललं प्रचार ओडोव

35 येसु छकाल्ने मिरःन्ने भन्डा भ्या ङाःडेज़ सोडे पाखाङ काङ्काज़ मालेव पोलं नाडे प्रार्ठना ओडोव। 36 होकाम सिमोनये ओल्स लेव ओनैरासं येसुलाई खिम्ने पाखाङ यानाव। 37 होकाम येसुलाई याडोयोपान्ट्रा नोराई हैयाडोव, "स्यान्टै मीराई नङलाई खिम्सनज़्यारं।"

38 होकाम येसुये नोरंलाई हैओडोवरं, "गराच्योके गे नजिकयाला उरुका नाङखारयालं गेनाके, होकाम नलं नाडे ङा प्रचार डोवङाडैकं, कडालेकं ङा आवलो ओलागिटंज़ ङाराव ची।"

39 होकाम येसुये होला गालील प्रडेसयाला यहुडीरं याडुप्सिने ज़ीःमयालं प्रचार डोडे ओबारिव बेलाकं ज़्याःरं पनि बनै उपुलोयोरं।✝1:39 मत्ती ४:२३; ९:३५

येसुये टोबो मीलाई ओससोमो

40 होकाम टोबो कुःरिये येसु लेवकं राडे उघुन्डा टिकिसिडे ऐ वार्डे बिन्ती ओडोव, "नइछ्या यालेखे भने नङ ङालाई ससमडुने नले।"

41 होकाम उयुङ नाडे हो मीलाई उकुइये छुडे, हैओडोव, "ङा इछ्या ङाडो, नङ गसमङनके।" 42 होमान्त्राज़ नो मीलो ओक्याङटा कोःरो ओमाःव, होकाम ओसोमो। 43 होकाम होमान्त्राज़ येसुये होलाई ऐटाव कर्रा आग्या याडे उपरिःङो, 44 "रःङ, आव रोः नङ काङ्कालाई पनि हैटाडोरं, नङ सेवा डोने मीराई लेवकं नाडे सतन्सिनान होकाम नसमो रोः मीरंलाई प्रमान गटाकं वार्डे मोसालो ओआग्य अनंसार भेटी चरैडे चोखैसिने नान।"✝1:44 लेबी १४:१-३२

45 होकाम हो मी पुलुडे नाडे येसुलो ओरोः माठैडे ओसोमो रोः स्यान्टैरंलाई प्रचार ओडोवरं, होकारनये येसु सहरलं सटनसिडे माबाडुये, होकाम मीरं मालेव पोयालं ओलेव। हैनि पनि मीरं चारकोनाङाम येसु लेवकं याराव।