1 येसु नलाम पुलुडे ओनाङखारलंज़ ओनाव। उसिसरं पनि ओल्सज़ यानाव 2 नाःसिने डिन छ्याम यहुडीरं याडुप्सिने ज़ीःमलं येसुये स्यान्टैरंलाई ओपोयोरं। नो रोः ठैने भ्या मीरं बनै अचम्ब टाडे हैयावारो, "आव मीये आव रोः काङाम ओसोनो? आवलाई यासिव ग्यान खैटानाव? खैटाव सक्तिला येःनरं आवलो उकुइटाम टाज़्यारं? 3 आव नो सिङ टुःने येःन डोने मी माङ्क डोरो? आव के मरियमलो ओज़ा याकुब, योसेफ, यहुडा सोनो सिमोनराई याडाज्यु माङ्कडोरो? आवलो ओबैनीरं गेसंज़ याम्लिज़्याव डोरो?" होकाम हैलेडे नोरं येसुलाई बिस्वास डोने माभनरंये।

4 येसुये नोरंलाई हैओडोवरं, "अगमबक्तालाई ओडेसलं, ओभाइरं सोनो उज़ीःमला मीराई मान्त्रा ओमान माडाड्योरं, उरुकाराई के ओमानज़ डाड्योरं।"

5 हैजैडे नलं येसुये टोबो नेम्लो याजोरो राव मीरंलाई याक्याङटं उकुइये छुडे ओससोमोरंकाम, उरु कडि सक्तिला येःन पनि माडोडुवये। 6 नोराई बिस्वास याम्डोव रःङडे येसु बनै अचम्बज़ ओटाव। होकाम येसुये उरु नाङखार-नाङखारयालं नाडे परमेस्वरलो ओबचन ओपैनावरं।

7 नो बेलाकं येसुये बारं जना उसिसरंलाई ओल लेवकं खुल्डे नोरंलाई नेबऱ्याङ-नेबऱ्याङ झैडे माचाव आत्मारंलाई पुलैने अडिकार याडे उपरिःङोरं। 8 नोरंलाई येसुये हैओडोवरं, "येमटं जेनाकं जेसं बरे, ज़ःन सोनो जेवाम्फोटं पैसा कडिज़ टालाङच्यो, बुरु टोबो झुइ याज़ लाङच्यो। 9 जेखङटं चपल सोनो जेक्याङटा क्वासंयाज़ नाच्यो।" वार्डे हैओडोवर। 10 फरि येसुये नोरंलाई ऐ वार्डे अरैडे उपरिःङोरं, "जे जो ज़ीःमलं जेना नो नाङखारलाम जेमनाया समं हो ज़ीःमलंज़ लेच्यो। 11 जेलाई कोइराई जेमान माडाड्याच्योरंखे भने, जेपाङ माठैड्याच्योरंखे भने नो पोलाम जिपुलुकं नोराई याबिरोडलं गोहाइ याने जेखङटा ढुइरं पनि होकंज़ ठरैडे ख्यानैड्याच्योरं।"

12 नोरं नाडे जे जेपापलाम वोल्च्यो वार्डे प्रचार याडोव। 13 नोराई बनै भ्या ज़्याःरंलाई यापुलुयोरं, बनै भ्या ठलिव मीरंलाई परमेस्वरलो ओमिननि जैतुनलो उठी ठिडे याससोमोरं।

14 येसुलो उमिन चारकोना प्रचार ओटाव, हेरोड राजाये पनि ओठोयो। नो बेलाकं येसुलो ओरोः चारकोनाडेज़ स्यान्टैराई बात्रा याडोज़्याव। कोइराईची "बप्तिस्मा याने युहन्ना सिवलाम ज्युङडा ओटाव ची हैजैडे एटानाव सक्तिला येःन ओटाज़्याव यावार्ज़्याव।"

15 कोइराईची "आव के एलिया ची" यावार्ज़्याव।

कोइरं के फरि "आव के डोङ्का अगमबक्ता स्यानाव टोबो अगमबक्ता ची" ऐ यावार्ज़्याव।

16 हेरोडये आव रोः ओठोयो, होकाम हैओवारो, "जोलो ओङैः पोलो ङापरिःङोरं, हो युहन्नाके फरि सिवलाम ज्युङडा ओटाव ची ओलेव।" 17 कडालेकं हेरोडये ओभाइ फिलिपलो ओज्या हेरोडियासलाई रैडे ओनैज़्याव। होलो ओपाङ ठैडे युहन्नालाई क्योःव परिःङरंडे किडे झ्यालखानालं झाडे ओनैज़्याव। 18 होकाम युहन्नाये नो हेरोड राजालाई हैओडोज़्याव, "नङ नभाइलो ओज्यालाई रैने चाव माङ्कची।"

19 हैजैडे हेरोडियासये युहन्नासं इख नैडे नोलाई सैःने ओपान्ज़्याव। हैनि पनि सैःने मौका ओमडैटाव। 20 कडालेकं ओल हेरोड राजाये युहन्ना के बनै सहि सोनो चोखो मी ची वार्डे छेडे उलिज़्याव। हैजैडे नोये युहन्नालाई जोगैडे ओनैज़्याव। युहन्नालो ओपाङ ठैडे हेरोड राजालो उयुङ माचाव ओटानि पनि बनै ठैने युङ डोवये।

21 टछा हेरोडलो ओजर्म डिन मानिने बेला ओराव, नो छ्याम बनै घ्योव भोज ओयोवरं नो भोजलं घ्यो-घ्योव प्रडानरं, फौजीला हाकिमरं सोनो गालीलला बनै घ्यो-घ्योव मीरंलाई उखुलोरं। 22 नो बेलाकंज़ हेरोडियासलो मेमाओज़ा नो भोज ज़्यानेराई लेवकं नाडे ओस्याःव। स्याःडे स्यान्टैरंलाई खुसि ओझोयोरं, राजा हेरोड सोनो ओपाहुनारं बनै खुसि याटाव। होकाम राजाये नो लुज़ालाई हैओडोव, "नङ नइछ्या कडि लिज़्या हो गनिःके होकाम ङा होज़ ङायान।" 23 "नङलाई टभा ङाराज्ये टानि ङायान" वार्डे कबंल पनि ओडोव।

24 होकाम नो लुज़ा वामा लेवकं नाडे "ङा कडि ङानिःके आमा?" वार्डे हैओडोव। वामाये "नो बप्तिस्मा झैने युहन्नालो ओङैः नीः" वार्डे हैओडोव।

25 नो लुज़ा चानोज़ राजा लेवकं नाडे ङालाई नो बप्तिस्मा झैने युहन्नालो ओङैः टाठीलं झाडे याङ वार्डे हैओडोव।

26 नो लुज़ालो ओपाङ ठैडे राजालो उयुङ माचाव ओटाव, ओपाहुनाराई याङाःकं कबंल ओयोवये नो लुज़ालो ओपाङ ओठोयो। 27 हैजैडे राजाये उसिफाइँरंलाम टोबोलाई खुल्डे झ्यालला लिज़्याव बप्तिस्मा याने युहन्नालो ओङैः रै वार्डे हैओडोव, नो झ्यालखानालं नाडे युहन्नालो ओङैः पल्डे, 28 टाठीलं झाडे नो लुज़ालाई रैडे ओयोव नो लुज़ाये फरि वामालाई लाङडे ओयोव। 29 छिन्डे युहन्नालो उसिसरं नो रोः ठैडे राडे युहन्नालो ओमोरोःलाई लाङडे खाडरलं यागाडिनाव।

30 येसुये प्रचार डोने उपरिःङोरं नो प्रेरितरं वोल्डे राडे ओल लेवकं डुप्सिडे याडोव येःन भरि, सोनो यापैसिव रोः भरि हैयाडोव। 31 होकाम येसुये नोरंलाई, "जे पनि ङासं गराच्योके, टोबोकं मीरं मालेव पोयालं नाडे जामा जेनाःसिके" वार्डे हैओडोवर। कडालेकं आडे होडे बाने मीरं बनै भ्या लेवरं, हैजैडे नोरं काङ ज़्याने पनि यामढाज़्याव। 32 हैजैडे येसु उसिसरासं डोङ्गाटं पुलुडे मीरं मालेव टोबो पोकं यानाव।

33 बनै भ्या मीराई येसुरं यानाज़्याव यारोःङो नोरं येसुरंज़ वार्डे सरेःडे चानो-चानोज़ ज़ोनाडे येसुरंलाई ख्यानैडे पनि याङाःडेज़ याकेव। 34 येसु डोङ्गा टाम उझरिवपानाज़ बनै भ्या माहुले मीरं यालिज़्याव ओरोःङोरं, नो मीरंलाई याग्वाला मालेव भेडारं मान्टिव ओरोःङोरं, होकाम बनै उयुङ नाडे येसुये नो मीरंलाई बनै भ्या रोःरं ओपोयोरं।

35 नम उनुपरिव बेलाकं उसिसरं राडे येसुलाई हैयाडोव, "आव मीरं मालेव पोलं नम यानुपरिडु। 36 मीरंलाई गपंरिःङरंके, आसै-होसैयाला नाङखारयालं नाडे ज़्याव लःङडे गज़्योरंकं।"

37 येसुये उसिसरंलाई "नो मीरंलाई जेज़ ज़्याव याच्योरं।" वार्डे हैओडोवरं नोराई येसुलाई हैयाडोव,

"गे नोरंलाई नेःसै पैसालो बरे लःङडे ज़्याव यानेरं डोरो?"

38 येसुये उसिसरंलाई "जेसं खागोटा बरे लिज़्या? रःङच्यो?" वार्डे हैडोवरं।

नोराई "पाँस गोटा बरे सोनो नेबऱ्याङ ङाः याज़ लिज़्या" वार्डे हैयाडोव।

39 येसुये उसिसरंलाई नो मीरंलाई पिङो छि लेव बाङलं टाना-टाना झैडे सुचुनो उपरिःङोरं। 40 नो मीरं सय-सय सोनो पचास-पचास जना झैसिडे टाना-टाना याचुङो 41 येसुये नो पाँस गोटा बरे सोनो नेबऱ्याङ ङाः छेन्डे स्वर्गडे रःङडे आसिक ओयोव, होकाम बरे ओकेःव, आव मीराई याङाः-याङाःकं नैड्याच्योरं वार्डे उसिसरंलाई ओयोवरं, नो नेबऱ्याङ ङाः पनि स्यान्टैलाई भाडे ओयोवरं। 42 स्यान्टैरं ज़्याडे यावाःङो। 43 होकाम येसुलो उसिसराई येःलो बरे सोनो ङाःलो उकुत्रारं बारं फुङ्गा याडुपो। 44 नो ज़्याव ज़्याने खेपारंया मान्त्राज़ पाँस हजार लेवरं।

45 येसुये उसिसरंलाई चानोज़ होपंटं बेठसेडालं ओल भन्डा ङाःडेज़ डोङ्गाटं उपरिःङोरं, ओल होला लेव माहुले मीरासं याभासिव। 46 नोरासं भासिडे येसु डान्डाटं प्रार्ठना डोने ओनाव।

47 रिःमडे ओटारिज़्याकं डोङ्गा समन्डरलो ओमान्जलं केनाडे उलिज़्याव, येसु ओबाठङज़ पाखाटं नामलं उलिज़्याव। 48 येसुलो उसिसरंलाई डोङ्गा चलैने बनै डुखं ओटाज़्याव येसुये ओरोःङोरं, कडालेकं बतासं बिप्याङाम ओराज़्याव। छकाल्ने ठोकै तीन बजे काम छ बजेयालं येसु समन्डरलं रीः तर्ट बाडे ओराज़्याव, होकाम नोरंलाई ख्यानैने ओपानज़्याकं, 49 नोरं येसुलाई समन्डर तर्ट बाडे ओराज़्याव रःङडे आव के भुत ची वार्डे याकीःव। 50 कडालेकं येसुलाई रःङडे स्यान्टै याछेव।

ओल चानोज़ नोरंलाई "जियुङलं हिक्मत डोच्यो टाछेच्यो ङा ची" वार्डे हैओडोवरं। 51 ओल डोङ्गाटं उपुलुव मान्त्राज़ बतासं उठकंनिव, आव रःङडे उसिसरं बनै अचम्ब याटाव, 52 कडालेकं नोराई येसुये पाँस हजाररंलाई ओपर्भयो पाँस गोटा बरेलो ओबारेला रोःलो ओमाने यामबुझिटाव, कडालेकं नोराई यायुङ बनै खाव टाडे उलिज़्याव।

53 समन्डर होपंटं यानाकं नाम याडोयोमान्त्रा डोङ्गालाई ओछ्योटं नैडे नोरं गनेसरेत वार्ने पोलं याकेरिव। 54 नोरं डोङ्गाटाम याझरिवपानाज़ होला लेव मीराई येसुलाई यासःरेव, 55 आसै-होसैका छेत्रयालं नोरं ज़ोःये-ज़ोःये यानाव, नङं येसु लिज़्या वार्ने ठैडे, नलं ठलिवरंलाई टानटं झाडे यारोयोरं। 56 होकाम सहरयालं, नाङखारयालं, मीरं यालिज़्याव पो यालं जोकं-जोकं येसु ना होकं-होकं मीराई ठलिवरंलाई बजारयालं टोबोकं डुप्डे यानोयोरं, होकाम येसुलो ओक्वालो उफुर्का छुव गेडैकं वार्डे येसुलाई बिन्ती याडोव, येसुलो ओक्वालो उफुर्का छुने भरि स्यान्टै यासमो।