1 येसु प्रार्ठना डोने ज़ीःमलाम उपुलुज़्याकं, उसिसरंलाम टोबोये हैओडोव, "रःङखेने गुरबा, खा बनै चाव ज़ीःमरं सोनो बडा-बडाठासा लुङरं।"

2 येसुये नो उसिसलाई हैओडोव, "नङ आव नरःङज़्याव घ्यो-घ्योव ज़ीःमरं के स्यान्टै टैःडे टोबो लुङ तर्ट छुटं लुङ पनि रहिनेमाले।"

3 प्रार्ठना डोने ज़ीःम ङाःका जैतुन डान्डाटं येसु चुङडे उलिज़्याकं उसिसरं पत्रुस, याकुब, युहन्ना सोनो अन्ड्रियासरं याबाठङ येसु लेवकं राडे येसुलाई यापजोयो, 4 "गेलाई हैगडासिके, आव स्यान्टै घटनारं खर्क टानेलेरं? आव स्यान्टै रोःरं टाने बेलाकं खेटाव-खेटाव चिन्नरं टाने लेरं?"

5 येसुये उसिसरंलाई हैओडोवरं, "होस्यार लेच्यो, जेलाई काङ्काराई पनि टाछकैच्योरंकं। 6 भ्या मीरं ङामिन डाडे ‘ङा होज़’ वार्डे रानेलेरं, होकाम भ्यारंलाई झुकैने लेरं। 7 होकाम जे लराईलो ओगा सोनो ओसोर ठैने जेले हो बेलाकं जे टाछेच्यो। ऐटाव घटनारं के टानेज़ लेरं। हैनि पनि आखिरला डिन राने अजं पनि बाङ्कीज़ लिज़्या। 8 कडालेकं टोबो डेस छुटं डेससं खप्सिनेले, राज्य राज्यलं झगरा टानेले। कोइ-कोइ पोलं भुम्चाल नानेले, अनिकाल पनि टानेले। आव के मेमारं कोना याचुङ्सिरीका डुखं ओटारिका मान्टिव डुखं ओटारिज़्याव ची।"

9 "जे जेलागिटं होस्यार लेच्यो। होराई जेलाई अड्डालं झानेलेरं। जे यहुडीरं याडुप्सिने ज़ीःमलं लाफरा कैने जेले। होकाम घ्योव हाकिमरं सोनो राजाराई याङाःकं ङाबारेलं नोरंलाई गोहाइ याने ङासाची टाडे च्याङसिने जेले। 10 होकाम ङाःडे स्यान्टै डेसला मीरंलाई चाव सोर सठोयोज़ परिये। 11 होकाम मीराई जेलाई क्योःडे अड्डालं लाङने लेरं, हो बेलाकं ङाःडेकामज़ कडि गेपाङ्के वार्डे चिन्ता टाडाच्यो। होकाम हो बेलाकं जेलाई जो हैडासिनेले होज़ पाङच्यो। कडालेकं पाङने जे माङ्क चोखो आत्मा जियुङलाम पाङ्नेले।"

12 "टोबो भाइये छुटं भाइलाई ढोका याडे सोःयो परिःङनेलेरं। हैजैडेज़ बाबुये पनि ओज़ारंलाई सोःयो परिःङनेलेरं। जारं यामा याबाबुराई याबिरोडलं च्याङसिने लेरं, होकाम सोःयो परिःङने लेरं। 13 होकाम ङामिन्ट जेलाई स्यान्टैराई घिनैने लेरं। हैनि पनि जो झिन्डे समं बिस्वासलं रहिनेले होज़ बान्चिने ले।"

14 जे छे-छेङप्सिव माचाव बस्तलाई जोकं मालेने होकं ओलेव जेरःङ (परिःनेये उबुझिवकं), होकाम यहुडियाला लिज़्यावरं डान्डाडे ओढोङरंकं। 15 ज़ीःमलो तालटं लेनेरं मेलं टाझरिरंकं, होसोनो याज़ीःमलाम कडिरं हाइने वार्डे ज़ीःमलं टापसिरंकं। 16 येःङला लेनेरं याक्वा चनाने ज़ीःम्डे टावोलरंकं। 17 हैनि पनि चब्बनैला छे-छे ङप्सिव टानेले! नो बेलाका मुऱ्या लेवरं सोनो नुन सोवैने बाल्ख याज़ा लेव मेमारंलाई। 18 नेटाव युःङडाकं टाटाकं वार्डे प्रार्ठना डोच्यो। 19 कडालेकं नो बेलाकं ऐटाव घ्योव आफट रानेले, परमेस्वरये सुरुला स्रिस्टी ओझोयोकाम आर्क समं खर्कज़ ओटाव माले, होसोनो खर्क टाने पनि माले। 20 परमेस्वरये नेटाव डिनरं ओम्घटैखिन्के मीरं काङ्का पनि माबान्चिरं, हैजैडे ओल उरुजिव उमीराई याकारनये नेटाव डिनरं घटैडेनोयो।

21 "नो बेलाकं कोइराई जेलाई ख्रीस्ट के आङं लिज़्या नि होङं ची लिज़्या याडाच्योरं भने टापतिच्यो। 22 कडालेकं नो बेलाकं झुठा ख्रीस्टरं सोनो झुठा अगमबक्तारं टाने लेरं, अजं याढुव समं परमेस्वरये उरुजिवरंलाई झुकैनेलो लागिटं चिन्नरं सटन्ने लेरं, होकाम अचम्बला येःनरं पनि डोनेलेरं। 23 हैजैडे जे के होस्यार लेच्यो। सन्डे नैच्यो, ङा जेलाई स्यान्टै रोःरं ङाःडेकामज़ हैङाडाच्योज़्या।"

24 "हो बेलाकं नो बनै घ्योव आफंटला समय ओटाव झिन्डे निमी पनि अन्ड्यारो टाने ले, स्यावैये पनि ओचमक यानेमाले, 25 सोरोरं नम्टाम नाम्ल टेःनेलेरं, होसोनो नम्टा लिज़्याव सक्तिला येःनरं खल्बल टाने लेरं। 26 होबेलाकं मीरं मानवालो ओज़ालाई सक्ति सोनो महिमासं बाडलटं ओराज़्याव रःङनेलेरं। 27 होकाम होये कटंवालरंलाई परिःङडे प्रिठीबीलो ओछ्योङाम नमलो ओछ्योसमं चारडेसाङाम उरुजिवरंलाई डुप्नेरंले।"

28 "डीलो उसिङ रःङडे पैसिच्यो। नो सिङलो ओखार झ्याव टाडे ओपलाःव ख्या ओराःव रःङडे उभ्यालि ओलागिवची वार्डे जे ठा जेसनये। 29 हैजैडेज़ जे पनि आव घटनारं ओटाव जेरोःङोपाना बेलाके याटाडु, बुरु नो के झलायेमकंज़ लिज़्या वार्ने सन्ने जेले। 30 ङा जेलाई डस्साज़ हैङाडाच्योज़्या, आव स्यान्टै घटनारं टाडे याम्खेमया समं आव पुस्ता खेम्ने माले। 31 नम सोनो प्रिठीबी खेम्डे नानेले हैनि पनि ङाबचन खर्कज़ खेम्ने माले।"

32 "नो छ्याम सोनो नो बेला खाबला रा वार्ने बाबु परमेस्वरकाम उरुराई मासनरं, न स्वर्गटं लेने कटंवालरं, न मानवालो ओज़ाये। 33 होस्यार लेच्यो, टाङःलच्यो, कडालेकं हो बेला खाबला रा जे ठा जेमसन। 34 आव के टोबो साहुये ओनौकररंलाई ज़ीःमला स्यान्टै येःनरं याजिम्मा-याजिम्मालं यारंडे चौकिडारलाई एकसप्ड्या जागा लेन वार्डे अरैडे ओल छुटं डेसडे ओनाव स्यानावची।" 35 "हैजैडेज़ जे पनि जागा लेच्यो, कडालेकं ज़ीःम साहु रीःम्डे सै, आढा रिलं सै, भालेकोकं सै, छकाल्ने खाबला रा जे ठा जेमसन। 36 मानिके ज़ीःम साहु अम्ल्याङसानि ओराकं जेलाई ङःल्डे जिलिज़्याव डैरिच्योवके। 37 ङा जेलाई जो हैङाडाच्योज़्या हो स्यान्टैलाईज़ हैङाडोरं ‘जागा लेच्यो!’"