Milagres de Jesus

UJesu Usilisa Isiphofu Lesimungulu

27 Kwathi uJesu esuka lapho amadoda ayiziphofu amabili amlandela ememeza esithi, "Sihawukele, Ndodana kaDavida!"

28 Esengenile endlini iziphofu lezo zeza kuye wazibuza wathi, "Liyakholwa na ukuthi ngingakwenza lokhu?"

Zamphendula zathi, "Yebo Nkosi."

29 Wasezithinta amehlo wathi kuzo, "Kuzakwenziwa kini njengokukholwa kwenu"; 30 zasiliswa zabona. UJesu waziqonqosela wathi, "Akungabi lomuntu ozakwazi ngalokhu." 31 Kodwa zasuka lapho zafakaza ngaye indawo yonke yelizwe lelo.

Iziphofu Ezimbili Zenziwa Zibone

29 Kwathi uJesu labafundi bakhe sebesuka eJerikho ixuku elikhulu labantu lamlandela. 30 Amadoda amabili ayiziphofu ayehlezi eceleni komgwaqo athi esizwa ukuthi uJesu wayesedlula khonapho amemeza athi, "Nkosi, Ndodana kaDavida, sihawukele!"

31 Ixuku labantu lawakhuza lathi kawathule kodwa amemeza ngamandla athi, "Nkosi, Ndodana kaDavida, sihawukele!"

32 UJesu wema wawabiza, wawabuza wathi, "Lifuna ukuba ngilenzeleni?"

33 Aphendula athi, "Nkosi, sifuna ukuthi sibone."

34 UJesu wawazwela isihawu wawathinta emehlweni. Masinyane nje ahle abona asemlandela.

Ukusiliswa Kwesiphofu EBhethisayida

22 Bafika eBhethisayida, abanye abantu baletha indoda eyayiyisiphofu bancenga uJesu ukuba ayibeke izandla. 23 Wasithatha isiphofu leso wasibamba ngesandla wasiholela ngaphandle komuzi. Esekhafulele emehlweni aso wasibeka izandla uJesu wabuza wathi, "Kukhona okubonayo na?"

24 Sathalaza sathi, "Ngibona abantu; bakhangeleka njengezihlahla ezihambahambayo."

25 UJesu waphinde wabeka izandla zakhe emehlweni ayo indoda leyo. Amehlo ayo avuleka, yabona kuhle, isibona zonke izinto kakuhle. 26 UJesu wayibuyisela ekhaya layo wathi, "Ungayi edolobheni ukuyakhuluma ngale indaba."

Ukusiliswa Kwendoda Eyisacuthe, Eyisimungulu

31 UJesu wasesuka endaweni yeThire wadabula eSidoni waze wayafika oLwandle lwaseGalile wehla waya emangweni waseDekhapholisi. 32 Khonale abantu bamlethela indoda eyayiyisacuthe isehluleka lokukhuluma, bamcela ukuthi abeke isandla sakhe phezu kwayo.

33 UJesu wayisusela eceleni kwexuku labantu wasefaka iminwe yakhe ezindlebeni zaleyondoda. Wasekhafula wathinta ulimi lwayo indoda. 34 Wakhangela ezulwini wakhokha umoya wathi kuyo, "Efifatha!" (okutsho ukuthi, "Vuleka!"). 35 Ngalokhu indlebe zendoda zavuleka, ulimi lwayo lwatshwaphuluka yahle yaqalisa ukukhuluma kuhle.

36 UJesu wabaqonqosela ukuthi bangatsheli muntu. Kodwa wathi ngokwenza njalo baqhubeka ngamandla befakaza ngakho. 37 Abantu bamangala baphela amandla. Bathi, "Konke asekwenzile kuhle. Uyenza futhi lezacuthe zizwe, lezimungulu zikhulume."

Isiphofu UBhatholomewu Uvulwa Amehlo

46 Basebefika eJerikho. Kwathi uJesu labafundi bakhe kanye lexuku elikhulu sebesuka edolobheni, indoda eyisiphofu, uBhathimewu (kutsho indodana kaThimewu) yayihlezi eceleni kwendlela icela. 47 Yathi isizwa ukuthi kwakunguJesu waseNazaretha yamemeza yathi, "Jesu, Ndodana kaDavida, ake ungihawukele!"

48 Abanengi bayikhuza bathi kayithule, kodwa yaqhubeka yamemeza ngamandla isithi, "Ndodana kaDavida, ake ungihawukele!"

49 UJesu wema wathi, "Mbizeni."

Basebeyibiza indoda eyisiphofu bathi, "Thokoza ndoda! Phakama! Uyakubiza." 50 Walahla ijazi lakhe phansi wasukuma weza kuJesu.

51 UJesu wambuza wathi, "Ufuna ngikwenzeleni na?"

Indoda eyisiphofu yathi, "Rabi, ngifuna ukuthi ngibone."

52 UJesu wathi, "Hamba-ke, ukukholwa kwakho sekukusilisile." Masinyane yahle yabona yasilandela uJesu endleleni.

Isiceli Esiyisiphofu Senziwa Sibone

35 UJesu esebanga eJerikho kwakulendoda eyisiphofu eyisiceli ihlezi eceleni kwendlela icela. 36 Yathi isizwa kudlula ixuku labantu yabuza ukuthi kuyini okwakusenzakala. 37 Bayitshela bathi, "UJesu waseNazaretha uyedlula khonapha."

38 Yamemeza yathi, "Jesu, Ndodana kaDavida, ake ungihawukele!"

39 Labo ababehamba phambili bayikhuza bathi kayithule, kodwa yona yasimemeza ngamandla yathi, "Ndodana kaDavida ake ungihawukele!"

40 UJesu wema wathi indoda leyo ilethwe kuye. Isifikile uJesu wayibuza wathi, 41 "Ufuna ukuthi ngikwenzeleni?"

Yaphendula yathi, "Nkosi, ngifuna ukuthi ngibone."

42 UJesu wathi kuyo, "Kuzuze-ke ukubona; ukukholwa kwakho kukusindisile." 43 Masinyane yahle yabona, yasimlandela uJesu idumisa uNkulunkulu. Kwathi bonke abantu bekubona lokho, labo bamdumisa uNkulunkulu.

UJesu Usilisa Indoda Eyazalwa Iyisiphofu

1 UJesu wathi elokhu ehamba wabona indoda eyayiyisiphofu kusukela ekuzalweni kwayo. 2 Abafundi bakhe bambuza bathi, "Rabi, ngubani owenza isono, indoda le loba abazali bayo ukuze izalwe iyisiphofu na?"

3 UJesu wathi, "Kakusikho ukuthi abazali bayo loba yona indoda le yenza isono kodwa lokhu kwenzakala ukuze umsebenzi kaNkulunkulu ubonakaliswe empilweni yayo. 4 Nxa kulokhu kusemini kumele siwenze umsebenzi wakhe ongithumileyo. Ubusuku buyeza lapho kungelamuntu ongasebenza khona. 5 Nxa ngisesemhlabeni, ngiyikukhanya komhlaba."

6 Esekutshilo lokhu wakhafulela emhlabathini, wavuba udaka ngamathe walunameka emehlweni endoda. 7 Wayitshela wathi, "Hamba uyegeza esizibeni saseSilowami" (ibizo leli litsho ukuthi "Ukuthunywa"). Ngakho indoda yahamba yayageza, yabuyela ekhaya isibona.

2 Indoda eyayilobulephero yeza yaguqa phambi kwakhe yathi, "Nkosi nxa uthanda ungangenza ngihlambuluke."

3 UJesu welula isandla sakhe wayithinta wathi, "Ngiyathanda, hlambuluka!" Masinyane nje yasila ebulepherweni bayo. 4 UJesu wasesithi kuyo, "Zwana, ungatsheli muntu ngalokhu. Kodwa hamba uyeziveza kumphristi, unikele ngesipho esamiswa nguMosi njengobufakazi ebantwini."

2 Amanye amadoda aletha kuye indoda eyayome umhlubulo ilele ecansini. UJesu ebona ukholo lwawo wathi kweyome umhlubulo, "Woba lesibindi, ndodana; izono zakho sezithethelelwe."

3 Bekuzwa lokho abanye abafundisi bomthetho bahleba bodwa bathi, "Umuntu lo uyahlambaza!"

4 Esazi imicabango yabo uJesu wathi kubo, "Kungani licabanga izinto ezimbi ezinhliziyweni zenu na? 5 Yikuphi okulula ukuthi, ‘Izono zakho sezithethelelwe’ kumbe ukuthi, ‘Sukuma uhambe’? 6 Kodwa ngifuna lazi ukuthi iNdodana yoMuntu ilamandla okuthethelela izono emhlabeni." Wasesithi kweyome umhlubulo, "Sukuma uthathe icansi lakho uhambe uye ekhaya." 7 Indoda yasukuma yaqonda ekhaya.

10 khonapho kulendoda eyayitshwabhene isandla. Kwathi ngoba bedinga indlela yokubeka uJesu icala bambuza bathi, "Kuyavunyelwa emthethweni ukusilisa ngeSabatha na?"

11 Wathi kubo, "Nxa omunye wenu engaba lemvu esuka iwele egodini ngeSabatha, kazukuyibamba ayikhuphe na? 12 Pho umuntu uligugu elinganani kulemvu! Yikho-ke, kusemthethweni ukwenza okuhle ngeSabatha."

13 Wasesithi kuleyondoda, "Yelula isandla sakho." Ngakho yaselula sahle sabuyela ngokupheleleyo, sesiqinile njengesinye.

30 Uninazala kaSimoni wayelele phansi ephethwe ngumkhuhlane, basebetshela uJesu ngaye. 31 Ngakho wasesiya kuye, wambamba isandla wasemvusa. Umkhuhlane waphuma kuye, wahle waqalisa ukubaphakela.

UJesu Usilisa Indoda Elobulephero

40 Kweza kuye indoda eyayilobulephero yamncenga iguqe phansi ngamadolo yathi, "Nxa uthanda ungangihlambulula."

41 UJesu eyizwela isihawu welula isandla sakhe wayibamba indoda. Wathi, "Ngiyathanda. Hlanzeka!" 42 Masinyane ubulephero baphela, wahlambuluka.

3 Kwafika amadoda amane ethwele eyayome umhlubulo. 4 Kwathi ngoba bengafinyeleli kuJesu ngenxa yexuku, bavula isikhala ephahleni malungana loJesu, emva kokuphendla ngaso, behlisela umendlalo owawulele indoda eyome umhlubulo. 5 Kwathi uJesu ebona ukholo lwawo wathi endodeni eyome umhlubulo, "Ndodana, izono zakho sezithethelelwe."

6 Khonapho kwakuhlezi abanye abafundisi bomthetho, benakana besithi, 7 "Umuntu lo ukhulumeleni kanjalo? Uyahlambaza! Ngubani ongathethelela izono ngaphandle kukaNkulunkulu yedwa?"

8 Masinyane uJesu wakwazi emoyeni wakhe ukuthi yilokho ababekucabanga ezinhliziyweni zabo, wasesithi kubo, "Kungani linakana izinto ezinje ezinhliziyweni zenu? 9 Yikuphi okulula: ukuthi kowome umhlubulo: ‘Izono zakho sezithethelelwe,’ loba ukuthi, ‘Phakama, thatha icansi lakho uhambe’? 10 Kodwa ukuze lazi ukuthi iNdodana yoMuntu ilamandla emhlabeni ukuthethelela izono." Wathi kowome umhlubulo, 11 "Ngiyakutshela, phakama, thatha icansi lakho uye ekhaya." 12 Waphakama wathatha icansi lakhe waphuma wahamba bonke bemkhangele. Lokho kwamangalisa umuntu wonke, bamdumisa uNkulunkulu besithi, "Kasikaze sikubone okunje!"

UJesu Usilisa NgeSabatha

1 Ngesinye isikhathi uJesu wangena esinagogweni, kukhona lapho indoda elesandla esitshwabheneyo. 2 Abanye babo babedinga izaba lokubeka uJesu icala, yikho bamlinda ukubona ingabe wayezasilisa ngeSabatha. 3 UJesu wathi endodeni yesandla esitshwabheneyo, "Sukuma ume phambi kwabo bonke."

4 UJesu wasebabuza wathi, "Kuyini okusemthethweni ngeSabatha; ukwenza okuhle loba ukwenza okubi, ukusindisa impilo kumbe ukubulala?" Kodwa bathula zwi.

5 Wabakhangela ngolaka, ehlutshwa yibuqholo bezinhliziyo zabo, wasesithi kuleyondoda, "Yelula isandla sakho." Yaselula, isandla sesilunge saphelela.

Indoda Eyayilobulephero

12 Kwathi uJesu ekwelinye lamadolobho kweza indoda eyayigcwele ubulephero. Yathi ibona uJesu yathi mbo phansi ngobuso yamncenga yathi, "Nkosi, nxa uthanda ungangihlambulula."

13 UJesu welula isandla sakhe wayithinta indoda leyo. Wathi, "Ngiyathanda. Hlambuluka!" Masinyane nje ubulephero bahle baphela.

18 Kwafika amanye amadoda ethwele indoda eyayome umhlubulo ngecansi efuna ukungena laye endlini ambeke phambi kukaJesu. 19 Athi esehlulekile ngenxa yokuminyana kwabantu, akhwela ephahleni, amehlisela phansi ngesikhala amuthi qithi phakathi laphakathi kwabantu phambi kukaJesu.

20 Kwathi uJesu ebona ukholo lwawo wathi, "Mngane, izono zakho sezithethelelwe."

21 AbaFarisi labafundisi bomthetho bakhonona bathi, "Ungubani yena lo umuntu okhuluma ehlambaza na? Ngubani ongathethelela izono ngaphandle kukaNkulunkulu kuphela?"

22 UJesu wayekwazi abakucabangayo wasebuza wathi, "Kungani linakana izinto ezinje ezinhliziyweni zenu? 23 Yikuphi okulula: ukuthi, ‘Izono zakho sezithethelelwe,’ loba ukuthi, ‘Sukuma uhambe’? 24 Kodwa ukuze lazi ukuthi iNdodana yoMuntu ilamandla okuthethelela izono emhlabeni." Wasesithi kuyo indoda eyome umhlubulo, "Sukuma, thatha icansi lakho uhambe uye ekhaya." 25 Masinyane wathi lothu phambi kwabo, wabutha ayekade elele phezu kwakho waya ekhaya edumisa uNkulunkulu.

6 Ngelinye iSabatha waya esinagogweni wafundisa, khonapho kulendoda elesandla sokudla esitshwabheneyo. 7 AbaFarisi labafundisi bomthetho babedinga izaba lokubeka uJesu icala, yikho bamlinda ukubona ingabe wayezasilisa ngeSabatha. 8 Kodwa uJesu wakwazi ababekucabanga, wasesithi endodeni yesandla esitshwabheneyo, "Sukuma ume phambi kwabantu bonke." Lakanye yasukuma yema khonapho.

9 UJesu wasesithi kubo, "Ngiyalibuza, kuyini okusemthethweni ngeSabatha: ukwenza okuhle loba ukwenza okubi, ukusindisa impilo kumbe ukuyibhubhisa?"

10 Wabakhangela wababhoda bonke, wasesithi endodeni leyo, "Yelula isandla sakho." Yenza njalo, isandla sayo sasiliswa ngokupheleleyo.

Ukholo Lwenduna Yekhulu

1 Kwathi uJesu eseqedile ukukhuluma konke lokhu abantu labo besizwa wayangena eKhaphenawume. 2 Khonapho inceku yenduna yekhulu eyayiligugu kakhulu enkosini yayo, yayigula isibangwa lezibi. 3 Induna yekhulu yezwa ngoJesu yathuma kuye abanye abadala bamaJuda icela ukuba eze azosilisa inceku yayo. 4 Bafika kuJesu bamncenga kakhulu bathi, "Indoda le ifanele ukuthi uyenzele lokhu, 5 ngoba iyasithanda isizwe sakithi njalo yiyo eyakha isinagogu yethu." 6 Ngakho uJesu wahamba labo.

Wayengasekhatshana lendlu lapho induna yekhulu yathuma abangane bayo ukuyakuthi kuye, "Nkosi, ungazihluphi, akungifanelanga mina ukuthi ungene ngaphansi kophahla lwami. 7 Yikho okwenze ngazibona ngingafanele ukuthi ngize kuwe. Kodwa tshono ilizwi nje inceku yami izasila. 8 Ngoba mina ngokwami ngingumuntu ongaphansi komthetho, ngilamabutho angaphansi kwami. Lo ngimtshela ngithi, ‘Hamba,’ ahambe; ngithi kuloyana, ‘Buya,’ lakanye abuye. Ngithi encekwini yami, ‘Yenza lokhu,’ ikwenze."

9 UJesu wathi ekuzwa lokhu wamangala ngaye, wasephendukela exukwini labantu ababemlandela wathi, "Ngiyalitshela, kangikaluboni ukholo olukhulu kangaka kanye lako-Israyeli." 10 Abantu ababethunyiwe babuyela endlini bafica inceku isiziphilela.

11 khonapho kulowesifazane owangenwa ngumoya wamenza waba yisilima okweminyaka elitshumi lasificaminwembili. Wayegogekile esehluleka ukuhlala aqonde. 12 Kwathi uJesu embona wambizela phambili wathi kuye, "Mama, usukhululwe ekugogekeni kwakho." 13 Wasebeka izandla zakhe phezu kwakhe, masinyane nje owesifazane watshwaphuluka, waqonda, wasedumisa uNkulunkulu.

UJesu Endlini YomFarisi

1 Ngelinye iSabatha uJesu wayakudla endlini yomFarisi owayedume kakhulu, babemkhangele kakhulu. 2 Phambi kwakhe khonapho kwakulendoda eyayilesifo sikambizankulu, esivuvukisa izitho. 3 UJesu wasebuza abaFarisi lezazi zomthetho wathi, "Kusemthethweni yini ukusilisa ngosuku lweSabatha kumbe hatshi?" 4 Kodwa bathula. Ngakho waseyibamba indoda leyo wayisilisa wathi kayihambe.

UJesu Usilisa Abalitshumi Abalobulephero

11 Ngalesosikhathi eseqonde ukuya eJerusalema, uJesu wahamba ngendlela esemngceleni phakathi kweSamariya leGalile. 12 Wathi efika komunye umuzi, wahlangabezwa ngamadoda alitshumi ayelobulephero. Ema bucwala, 13 amemeza ngelizwi elikhulu athi, "Jesu, Nkosi, sihawukele!"

14 Wathi ewabona wathi kuwo, "Hambani liyoziveza kubaphristi." Athi esahamba ahlambuluka.

15 Omunye wawo wathi ngokubona ukuthi usesilile waphenduka, edumisa uNkulunkulu ngelizwi elikhulu. 16 Wazilahla phansi ezinyaweni zikaJesu wambonga, yena wayengumSamariya.

17 UJesu wabuza wathi, "Kanti kabahlanjululwanga bonke abalitshumi yini? Bangaphi abanye abayisificamunwemunye na? 18 Ubengekho yini obengabuya azoletha udumo kuNkulunkulu ngaphandle kwalo owezizweni na?" 19 Wasesithi kuye, "Phakama uhambe; ukukholwa kwakho kukusilisile."

Ukusilisa Echibini

1 Emva kwesikhathi esithile uJesu waya eJerusalema emkhosini wamaJuda. 2 EJerusalema kukhona ichibi eduze lesango leZimvu, elithiwa ngesi-Aramu yiBhethisayida, elalihonqolozelwe ngensika ezinhlanu ezibiyelweyo. 3 Khonapho abantu abayizilima abanengi babandise ukuhlala khona, iziphofu, abaqhulayo, abome imihlubulo [belindele ukudungwa kwamanzi; 4 ngoba kwakusithi ngezikhathi ezithile ingilosi yeNkosi yayisehlela echibini, idungadunge amanzi besekusithi umuntu oqalayo ukungena emanzini ngemva kokudungeka kwawo asiliswe loba kuwuphi umkhuhlane owawumbambile].* 5 Omunye owayelapho wayeyisigoga okweminyaka engamatshumi amathathu lesificaminwembili. 6 Kwathi uJesu embona elele khonapho njalo esetsheliwe ukuthi kade abanjalo okwesikhathi eside, wambuza wathi, "Uyafuna na ukusila?"

7 Oyisilima waphendula wathi, "Nkosi, kangilamuntu wokungisiza angingenise echibini lapho amanzi edungwa. Ngithi lapho ngizama ukungena omunye angingenele kuqala."

8 UJesu wasethi kuye, "Sukuma! Thatha icansi lakho uhambe." 9 Khonokho nje indoda yasila; yathatha icansi layo yahamba.

Lokhu kwenzakala ngelanga leSabatha,

46 Wabuya njalo wethekelela eKhana laseGalile, lapho aphendula khona amanzi abaliwayini. Kwakukhona lapho isiphathamandla sasesikhosini esasigulelwa yindodana yaso eKhaphenawume. 47 Kwathi indoda leyo isizwile ukuthi uJesu wayesefikile eGalile evela eJudiya, yaya kuye yamncenga ukuthi eze azosilisa indodana yayo eyayisibangwa lezibi.

48 UJesu wasitshela wathi, "Ngaphandle kokuthi lina bantu libone izibonakaliso ezididayo lezimangaliso kalisoze lafa lakholwa."

49 Sathi isiphathamandla sasesikhosini, "Nkosi, woza umntanami engakafi."

50 UJesu waphendula wathi, "Usungahamba. Indodana yakho izaphila."

Indoda yalikholwa ilizwi likaJesu yahamba. 51 Yathi ilokhu isesendleleni, izinceku zayo zayihlangabeza zayibikela ukuthi indodana yayo yayisiluleme. 52 Isibuzile ukuthi kwakuyisikhathi bani lapho indodana yayo eyasila ngaso, zathi kuyo, "Umkhuhlane uyixolele izolo ngehola lakuqala emini."

53 Uyise wananzelela ukuthi leso yiso kanye isikhathi uJesu atsho kuye ukuthi, "Indodana yakho izaphila." Ngakho yena kanye labendlu yakhe bonke bakholwa.

54 Lo kwakungumangaliso wesibili uJesu awenzayo esefikile eGalile evela eJudiya.

20 Khonokho owesifazane owayehlutshwa ngumopho okweminyaka elitshumi lambili weza ngemva kwakhe wabamba umphetho wesembatho sakhe. 21 Wazitshela wathi, "Nxa ngingathinta nje isembatho sakhe kodwa lokhu, ngizasila."

22 UJesu wanyemukula wambona. Wathi kuye, "Mana isibindi ndodakazi, ukholo lwakho lukusilisile." Lakanye owesifazane lowo wasila ngalesosikhathi.

25 Kwakulowesifazane khonapho owayephethwe yikopha sekumhluphe iminyaka elitshumi lambili. 26 Wayesehlupheke kakhulu loba wayeselatshwa ngabelaphi, njalo esechithe konke ayelakho, kodwa ekubeni abe ngcono kwakusiya phambili. 27 Wathi esezwile ngoJesu, weza ngemva kwakhe phakathi kwexuku labantu wabamba isembatho sakhe, 28 ngoba wacabanga wathi, "Nxa ngingathinta izigqoko zakhe kodwa nje, ngizasila." 29 Masinyane nje ukopha kwakhe kwaphela njalo wezwa emzimbeni wakhe ukuthi wayesekhululekile ekuhluphekeni kwakhe.

43 Khonapho kwakulowesifazane owayeseleminyaka elitshumi lambili esopha kodwa kungekho owayengamelapha. 44 Weza ngemva kukaJesu wathinta umphetho wesembatho sakhe, masinyane nje ukopha kwahle kwaphela.

45 UJesu wabuza wathi, "Ngubani ongithintileyo?"

Kwathi ngoba bonke bephika uPhethro wathi, "Nkosi, abantu bayaminyezelana besondela kuwe."

46 Kodwa uJesu wathi, "Ukhona ongithintileyo; ngiyazi ukuthi amandla aphumile kimi."

47 Owesifazane esebone ukuthi uzacina eboniwe weza ethuthumela wazilahla ezinyaweni zakhe. Wachaza phambi kwabantu bonke ukuthi kungani wayemthintile uJesu lokuthi wasiliswa njani masinyane. 48 UJesu wasesithi kuye, "Ndodakazi, ukholo lwakho lukusilisile. Hamba ngokuthula."

Intombazana Efileyo Lomfazi Ogulayo

18 Wathi esakhuluma lokhu kwafika umbusi waguqa phambi kwakhe wathi, "Indodakazi yami isanda kufa. Kodwa ngicela uzebeka isandla sakho phezu kwayo, izaphila." 19 UJesu wasuka wahamba laye kanye labafundi bakhe.

23 UJesu wathi esengenile endlini yombusi wesinagogu wabona ababetshaya imihubhe kanye lexuku elalixokozela, 24 wathi kubo, "Phumani. Intombazana kayifanga kodwa ilele." Kodwa bamhleka usulu. 25 Ixuku labantu selikhutshelwe phandle, wangena wayibamba ngesandla intombazana yaphakama.

22 Kwasekufika omunye wabaphathi besinagogu okwakuthiwa nguJayirosi, wathi ebona uJesu wazilahla ezinyaweni zakhe. 23 Wamncenga kakhulu wathi, "Indodakazi yami encinyane iyafa. Ngicela ubuye uzobeka izandla zakho phezu kwayo ukuze isile njalo iphile." 24 UJesu wahamba laye.

Ixuku elikhulu lamlandela laminyezela.

38 Bathi befika emzini wenduna yesinagogu uJesu wabona isiphithiphithi abantu bekhala benqongoloza. 39 Wangena wathi kubo, "Ngesani isiphithiphithi sonke lesi lomkhosi wonke lo? Umntwana kafanga, kodwa ulele." 40 Kodwa bamhleka usulu.

Esebakhuphele phandle bonke wathatha uyise womntwana lonina kanye labafundi ayelabo wangena lapho umntwana ayekhona. 41 Wambamba ngesandla wathi kuye, "Thalitha khumi!" (okutsho ukuthi, "Ntombazana, ngithi kuwe, sukuma!") 42 Masinyane intombazana yasukuma yahambahamba (wayemdala okweminyaka elitshumi lambili). Lokhu kwabamangalisa baphela amandla.

31 UJesu waqhubeka wathi, "Pho ngingabafanisa lani abantu besizukulwane lesi? Bafanana lani? 32 Banjengabantwana behlezi emkambo bememeza abanye besithi:

‘Salitshayela umhubhe,

kodwa kaligidanga,

salihlabelela ingoma yesililo,

kodwa kalililanga.’

33 Ngoba uJohane uMbhaphathizi weza engadli isinkwa njalo enganathi iwayini, lina lithi, ‘Uledimoni.’ 34 INdodana yoMuntu yafika yadla, yanatha, laselisithi, ‘Nansi isidli lesidakwa, umngane wabathelisi lezoni.’ 35 Kodwa ukuhlakanipha kuziveza ukuthi kuqondile ebantwaneni bakho bonke."

UJesu Ugcotshwa Ngumfazi Oyisoni

36 Omunye wabaFarisi wanxusa uJesu ukuzakudla laye isidlo sakusihlwa, ngakho waya endlini yalowo mFarisi wahlala etafuleni. 37 Kwathi owesifazane othile owayephila impilo yesono kulelodolobho esezwile ukuthi uJesu wayesidla endlini yomFarisi weza ephethe imbodlela yamakha,

41 Indoda eyayithiwa nguJayirosi, umbusi wesinagogu, yeza yazilahla ezinyaweni zikaJesu, imncenga ukuthi eze endlini yayo 42 ngoba indodakazi yayo eyodwa zwi, intombazana eyayileminyaka elitshumi lambili, yayisifa.

Kwathi uJesu esesiya khona abantu baminyezela ingathi bazampatshaza.

49 Kwathi uJesu elokhu esakhuluma omunye weza evela endlini kaJayirasi umphathi wesinagogu, wafika wathi, "Indodakazi yakho isifile. Ungabe usamhlupha umfundisi."

50 UJesu wathi ekuzwa lokhu wathi kuJayirasi, "Ungesabi, kholwa nje kuphela, izasiliswa."

51 Wathi esefikile endlini kaJayirasi, kavumelanga muntu ukuthi angene laye ngaphandle kukaPhethro, uJohane loJakhobe, kanye loyise womntwana lonina. 52 Ngalesosikhathi abantu bonke babeqhinqa isililo bekhalela intombazana. UJesu wathi kubo, "Thulani, lingakhali. Kafanga kodwa ulele."

53 Bamhleka usulu uJesu ngoba besazi ukuthi intombazana yayisifile. 54 Kodwa wayibamba ngesandla wathi, "Mntanami, vuka!" 55 Umoya wayo wabuya, masinyane yasukuma yathi lothu! UJesu wasesithi kabamnike ukudla. 56 Abazali bakhe bamangala, kodwa wabalaya ukuthi bangatsheli muntu ngalokho okwakwenzakele.

Ukufa KukaLazaro

1 Kwakulendoda eyayithiwa nguLazaro eyayigula. YayingeyaseBhethani, umuzi okwakuhlala khona uMariya lodadewabo uMatha. 2 (UMariya lo olomnewabo uLazaro owayephethwe ngumkhuhlane nguye owathela amakha ezinyaweni zeNkosi wazesula ngenwele zakhe.) 3 Ngakho odadewabo laba bathumela ilizwi kuJesu bathi, "Nkosi, lowo omthandayo uyagula."

4 UJesu esekuzwile lokhu wathi, "Ukugula lokhu kakuzukucina ngokufa. Kodwa kungokodumo lukaNkulunkulu ukuze iNdodana kaNkulunkulu idunyiswe ngakho." 5 UJesu wayemthanda uMatha lodadewabo kanye loLazaro. 6 Kodwa loba esezwile ukuthi uLazaro wayegula wazihlalela khona lapho ayekhona okwezinye insuku ezimbili. 7 Wasesithi kubafundi bakhe, "Kasibuyeleni eJudiya."

8 Bathi, "Oh, Rabi, muvana nje amaJuda ake azama ukukukhanda ngamatshe kodwa wena usubuyela khona futhi?"

9 UJesu waphendula wathi, "Kakusikho yini ukuthi kulamahola alitshumi lambili okukhanyisa kwelanga na? Umuntu ohamba emini kayikukhubeka ngoba ebona ngokukhanya kwalapha emhlabeni. 10 Ukhubeka nxa ehamba ebusuku ngoba kalakho ukukhanya."

11 Esekutshilo lokhu wasebatshela wathi, "Umngane wethu uLazaro uselele kodwa ngiya khonale ukuyamvusa."

12 Abafundi bakhe baphendula bathi, "Nkosi, nxa kuvuma ukuthi alale, uzabangcono." 13 UJesu wayekhuluma ngokufa kwakhe kodwa abafundi bakhe babesithi kumbe utsho ukulala okujayelekileyo.

14 Wasebatshela ephumela egcekeni wathi, "ULazaro usefile,

UJesu Uthulisa Isiphepho

23 UJesu wasengena esikepeni abafundi bakhe bamlandela. 24 Masinyane nje kwaphakama isiphepho esesabekayo echibini, amagagasi atshaya phezu kwesikepe. Kodwa uJesu wayelele. 25 Abafundi bahamba bayamvusa besithi, "Nkosi, sihlenge, Sesigalula!"

26 Waphendula wathi, "Lina bokukholwa okuncinyane, kungani lisesaba kangaka?" Wasephakama wawukhuza umoya kanye lamagagasi, kwasekuthula cwaka.

27 Amadoda amangala abuza athi, "Ngumuntu bani lo? Oze alalelwe ngumoya kanye lamagagasi!"

15 Kwathi selithambeme abafundi beza kuye bathi, "Le yindawo ekhatshana kakhulu njalo sekuntambama. Wothi lababantu bahambe ukuze bayozithengela ukudla emizini."

16 UJesu waphendula wathi, "Kakudingeki ukuthi bahambe. Bapheni lina ukudla."

17 Baphendula bathi, "Thina esilakho lapha yizinkwa ezinhlanu lenhlanzi ezimbili."

18 Wathi, "Kuletheni lapha." 19 Waselaya abantu ukuthi bahlale phansi phezu kotshani. Wathatha izinkwa ezinhlanu lenhlanzi ezimbili wakhangela ezulwini wabonga, wasehlephuna izinkwa. Waseziqhubela abafundi, bazinika abantu. 20 Bonke badla basutha, abafundi bakhe babutha okuseleyo bagcwalisa izitsha ezilitshumi lambili. 21 Inani lalabo abadlayo lalingaba ngamadoda azinkulungwane ezinhlanu kungabalwa abesifazane labantwana.

25 Kwathi ngomlindo wesine ebusuku uJesu waya kubo ehamba phezu kwechibi.

32 UJesu wabiza abafundi bakhe wathi, "Ngibazwela usizi lababantu; sebehlale lami insuku ezintathu bengadlanga lutho. Angifuni kubakhulula belambile funa bayathe endleleni."

33 Abafundi bakhe bamphendula bathi, "Singakuthatha ngaphi ukudla okwaneleyo endaweni ekhatshana kanje ukuba sisuthise ixuku elingaka na?"

34 UJesu wabuza wathi, "Lilezinkwa ezingaki?"

Bathi, "Eziyisikhombisa lenhlanzi ezincane ezimbalwa."

35 Wasetshela ixuku labantu ukuba lihlale phansi. 36 Wasethatha lezozinkwa eziyisikhombisa lenhlanzi, kwathi esebongile, wazihlephula waziqhubela abafundi, labo bazinika abantu. 37 Bonke badla basutha. Ngemva kwalokho abafundi babutha imvuthu kwagcwala izitsha eziyisikhombisa. 38 Inani lalabo abadlayo lalizinkulungwane ezine kungabalwa abafazi labantwana.

Umthelo WeThempeli

24 UJesu labafundi bakhe sebefikile eKhaphenawume, abaqoqi bomthelo wamadrakhima amabili beza kuPhethro babuza bathi, "Umfundisi wenu kawuhlawuli yini umthelo wethempeli?"

25 Wathi, "Yebo, uyawuthela."

Kwathi uPhethro engena endlini, uJesu nguye owakhuluma kuqala, wabuza wathi, "Ucabangani kambe Simoni? Amakhosi omhlaba ayithatha kubani inkongozelo lemithelo, emadodaneni abo na loba kwabanye abantu?"

26 UPhethro waphendula wathi, "Kwabanye abantu."

UJesu wasesithi kuye, "Ngakho-ke amadodana akhululekile. 27 Kodwa ukuze singabakhubi, yana echibini uphosele iwuka yakho khona. Ubothatha inhlanzi yokuqala ozayibamba, uvule umlomo wayo uzafumana khona uhlamvu lwemali engamadrakhima amane. Uyithathe ubaphe ibe ngumthelo wami lowenu."

Isihlahla Somkhiwa Siyabuna

18 Ekuseni kakhulu esebuyela edolobheni wezwa eselambile. 19 Wabona isihlahla somkhiwa eceleni kwendlela, waqambukela kuso kodwa wathola kungelalutho kuso ngaphandle kwamahlamvu nje. Wasesithi kuso, "Ungaphindi uthele izithelo lanini!" Khonapho nje isihlahla sahle sabuna.

20 Abafundi bathi bekubona lokhu bamangala kakhulu. Babuza bathi, "Kwenzeke kanjani ukuthi isihlahla somkhiwa sibune masinyane kangaka?"

21 UJesu waphendula wathi, "Ngilitshela iqiniso ngithi nxa lilokukholwa njalo lingathandabuzi, kalisoze lenze okwenziwe kulesi isihlahla somkhiwa kuphela kodwa njalo lingathi kule intaba, ‘Suka, uziphosele olwandle,’ lakanye kuzenzeka. 22 Nxa likholwa, lizaphiwa loba yini eliyicelayo ngomkhuleko."

37 Kwaqubuka isiphepho esesabekayo, amagagasi atshaya esikepeni kwaze kwangathi sesitshona. 38 UJesu wayengemuva ezilalele emendlalweni obuthakathaka. Abafundi bamvusa bathi, "Awu, mfundisi kawunanzi yini nxa sigalula?"

39 Waphakama wawukhuza umoya wathi emagagasini, "Thulani lithi cwaka!" Ngakho umoya wadeda, kwasekuthula cwaka.

40 Wathi kubafundi bakhe, "Kungani lisesaba kangaka? Lilokhu lingakholwa na?"

41 Babethuthumela babuzana bathi, "Ungubani lo na? Kambe aze alalelwe ngumoya lamagagasi!"

35 Ngalesi isikhathi kwasekusemini kakhulu, ngakho abafundi bakhe beza kuye bathi, "Le yindawo esesikhaleni, njalo sekusemini kakhulu. 36 Tshela abantu bahambe ukuze baziyele emadolobheni lasemizini bayezithengela abangakudla."

37 Kodwa waphendula wathi, "Bapheni lina ukudla."

Bathi kuye, "Lokho kungathatha umholo wendoda owenyanga eziyisificaminwembili! Uthi sihambe siyochitha imali engako sithenge isinkwa sibaphe badle?"

38 Wabuza wathi, "Lilezinkwa ezingaki na? Ake liyokhangela."

Sebezibonile bathi, "Zinhlanu lenhlanzi ezimbili."

39 UJesu wasebalaya ukuthi bahlalise bonke abantu phansi etshanini ngamaxuku. 40 Yikho bahlala phansi ngamaxuku alikhulu. Abanye ngamatshumi amahlanu. 41 Ethatha izinkwa ezinhlanu lenhlanzi ezimbili wakhangela ezulwini, wabonga, wasehlephuna izinkwa. Waseziqhubela abafundi bakhe ukuba bazabele abantu. Waphinda wabehlukanisela inhlanzi zombili. 42 Bonke badla basutha, 43 abafundi basebebutha imvuthu zezinkwa lenhlanzi bagcwalisa izitsha ezilitshumi lambili. 44 Abadlayo babengamadoda azinkulungwane ezinhlanu.

48 Wabona abafundi begwedla ngamandla emagagasini ngoba umoya wawuphambana labo. Kwathi ngomlindo wesine ebusuku waya kubo ehamba phezu kwechibi. Wayengathi usesedlula kubo 49 kodwa bathi bembona ehamba phezu kwesiziba bacabanga ukuthi lithonga. Bahlaba umkhosi 50 ngoba bonke bambona besaba.

Masinyane wabakhulumisa wathi, "Manini isibindi! Yimi. Lingesabi." 51 Wasengena kubo esikepeni umoya wahle wathula. Bamangala kakhulu,

UJesu Usuthisa Abazinkulungwane Ezine

1 Ngalezonsuku kwaphinde kwabuthana elinye ixuku labantu. Kwathi ngoba bengelalutho lokudla uJesu wabiza abafundi bakhe wathi kubo, 2 "Ngilosizi ngalaba abantu; sebebe lami okwensuku ezintathu, kodwa bengadli lutho. 3 Ngingababuyisela emakhaya belambile bazayatha endleleni ngoba abanye babo bavela khatshana."

4 Abafundi bakhe baphendula bathi, "Kodwa kungaphi endaweni emi yodwa kanje umuntu angathola khona izinkwa ezanele ukubapha?"

5 UJesu wababuza wathi, "Lilezinkwa ezingaki na?"

Bathi, "Eziyisikhombisa."

6 Wasetshela ixuku labantu ukuthi lihlale phansi. Wathi esezithethe izinkwa eziyisikhombisa njalo esebongile, wazihlephula waziqhubela abafundi bakhe ukuba baqhubele abantu. Lakanye benza khonokho. 7 Njalo babelenhlanzi ezincane ezimbalwa, wazikhulekela lazo wathi abafundi bazabele abantu. 8 Abantu badla basutha. Ngemva kwalokho abafundi badobha imvuthu kwagcwala izitsha eziyisikhombisa. 9 Ababekhona kwakungamadoda azinkulungwane ezine. Esebabuyisele emakhaya,

UJesu Uhlambulula IThempeli

12 Ngelanga elilandelayo bathi besuka eBhethani uJesu wayeselambile. 13 Wabona bucwadlana isihlahla somkhiwa sihlumile amahlamvu, wasondela ukuyabona ingabe sasilezithelo yini. Wafika wabona kungamahlamvu kuphela ngoba kwakungasiso isikhathi sezithelo zomkhiwa. 14 Wasesithi esihlahleni, "Akungabi lamuntu lanini ozaphinda adle izithelo zakho." Abafundi bakhe bamuzwa esitsho lokho.

Umkhiwa Obunileyo

20 Ekuseni babehambahamba basebebona isihlahla somkhiwa esasibunile kusukela empandeni. 21 UPhethro wakhumbula wasesithi kuJesu, "Rabi, khangela! Isihlahla somkhiwa owasiqalekisayo sibunile!"

22 UJesu waphendula wathi, "Woba lokholo kuNkulunkulu. 23 Ngilitshela iqiniso ukuthi nxa omunye esithi entabeni le, ‘Suka, ziphosele olwandle,’ engelakuthandabuza enhliziyweni yakhe, kodwa ekholwa ukuthi lokho akutshoyo kuzakwenzakala, kuzakwenziwa kuye. 24 Ngakho ngiyalitshela ukuthi loba kuyini elikucelayo ngomkhuleko, kholwani ukuthi selikwamukele, sekuzakuba ngokwenu. 25 Njalo nxa lisima likhuleka, nxa lilesikhwili komunye, mthetheleleni, ukuze uYihlo ezulwini alithethelele izono zenu. [

Ukubizwa Kwabafundi Bokuqala

1 Ngelinye ilanga uJesu emi eduze kweChibi laseGenezaretha abantu beminyezelana kuye belalela ilizwi likaNkulunkulu, 2 wabona ekhunjini lechibi izikepe ezimbili zitshiywe khonapho ngabagoli benhlanzi ababegezisa omambule babo. 3 Wangena kwesinye isikepe esasingesikaSimoni, wamcela ukuthi akathi gudlu asuke kancane okhunjini. Wasehlala phansi wafundisa abantu ehlezi esikepeni.

4 Eseqedile ukukhuluma wathi kuSimoni, "Gwedla ungene enzikini uphosele omambule bakho ukuze ubambe inhlanzi."

5 USimoni waphendula wathi, "Nkosi, sisebenze gadalala ubusuku bonke, kodwa kasibambanga lutho. Kodwa njengoba usitsho njalo ngizabehlisa omambule."

6 Kwathi sebenze njalo babamba inhlanzi ezaba zinengi kwaze kwaqalisa ukudabuka omambule. 7 Basebebiza abakhula babo kwesinye isikepe ukuthi bazobelekelela. Beza abakhula babo kwesinye isikepe ukuthi bazobelekelela. Beza bazigcwalisa zombili izikepe zathi phamu zaze zaqalisa ukutshona.

8 Kwathi uSimoni Phethro ekubona lokhu wazilahla phansi phambi kukaJesu wathi, "Suka kimi, Nkosi; ngingumuntu oyisoni!" 9 Ngoba yena labakhula bakhe babemangele ngenhlanzi ababezibambile, 10 kwamangalisa njalo uJakhobe loJohane amadodana kaZebhediya, ababe phathisana loSimoni.

UJesu wasesithi kuSimoni, "Ungesabi; kusukela manje usuzagola abantu." 11 Basebedonsela izikepe zabo okhunjini batshiya konke bamlandela.

UJesu Uthulisa Isiphepho

22 Ngelinye ilanga uJesu wathi kubafundi bakhe, "Kasiyeni ngaphetsheya kwechibi." Basebengena esikepeni bahamba. 23 Bathe belokhu behamba yena walala. Kwafika isiphepho echibini isikepe saqalisa ukugalula, baba sengozini embi.

24 Abafundi bahamba bayamvusa besithi, "Nkosi, Nkosi, sesigalula bo!"

Wavuka wawukhuza umoya kanye lamagagasi; isiphepho sadeda, kwasekuthula cwaka. 25 Wababuza abafundi bakhe, wathi, "Kungaphi ukukholwa kwenu?"

Babuzana ngokumangala lokwesaba bathi, "Kanti ungubani lo? Ukhuza kanye lomoya lamanzi kumlalele."

UJesu Uthulisa Isiphepho

22 Ngelinye ilanga uJesu wathi kubafundi bakhe, "Kasiyeni ngaphetsheya kwechibi." Basebengena esikepeni bahamba. 23 Bathe belokhu behamba yena walala. Kwafika isiphepho echibini isikepe saqalisa ukugalula, baba sengozini embi.

24 Abafundi bahamba bayamvusa besithi, "Nkosi, Nkosi, sesigalula bo!"

Wavuka wawukhuza umoya kanye lamagagasi; isiphepho sadeda, kwasekuthula cwaka. 25 Wababuza abafundi bakhe, wathi, "Kungaphi ukukholwa kwenu?"

Babuzana ngokumangala lokwesaba bathi, "Kanti ungubani lo? Ukhuza kanye lomoya lamanzi kumlalele."

Ukusiliswa Kwendoda Ephethwe Lidimoni

26 Bagwedla isikepe baya emangweni wamaGerazini, okungaphetsheya kwechibi kusuka eGalile.

12 Emini abalitshumi lambili beza kuye bathi, "Wothi abantu bahambe ukuze baye emadolobheni lasemizini bayezidingela ukudla lezindawo zokulala ngoba lapha sisendaweni ekhatshana eyisikhala."

13 Waphendula wathi, "Bapheni lina ukudla."

Baphendula bathi, "Thina silezinkwa ezinhlanu lenhlanzi ezimbili kuphela, ngaphandle kokuthi sihambe siyothenga ukudla kwabantu bonke laba." 14 (Kwakulamadoda angaba zinkulungwane ezinhlanu khonapho.)

Kodwa wathi kubafundi bakhe, "Bahlaliseni phansi ngamaxuku abantu abangamatshumi amahlanu ngalinye." 15 Benza njalo abafundi, wonke umuntu wahlala phansi. 16 Ethatha izinkwa ezinhlanu lenhlanzi ezimbili wakhangela ezulwini, wabonga wazihlephula. Waseziqhubela abafundi ukuba bazabele abantu. 17 Bonke badla basutha, abafundi basebebutha bagcwalisa izitsha ezilitshumi lambili imvuthu ezasalayo.

UJesu Uphendula Amanzi Abe Liwayini

1 Ngosuku lwesithathu kwaba khona umthimba eKhana laseGalile. Unina kaJesu wayekhona, 2 loJesu labafundi bakhe labo babenxusiwe emthimbeni. 3 Kwathi iwayini seliphelile unina kaJesu wathi kuye, "Sebephelelwe liwayini."

4 UJesu waphendula wathi, "Mama, mina lawe singena njani kulokho na? Isikhathi sami kasikafiki."

5 Unina wasesithi ezincekwini, "Libokwenza loba kuyini azalitshela khona."

6 Eduze kwalapho kwakumi imbiza zamatshe eziyisithupha, uhlobo lolo amaJuda ayelusebenzisa enkonzweni yokuzihlambulula, imbiza yinye ingagcwala amalitha alikhulu kusiya ekhulwini elilamatshumi amahlanu.

7 UJesu wathi ezincekwini, "Zigcwaliseni amanzi imbiza lezi"; ngakho bazigcwalisa zathi phamu.

8 Wasezitshela wathi, "Khanini-ke liphe umphathi wedili."

Benza njalo, 9 umphathi wedili wahubula wawanambitha amanzi ayesephendulwe abaliwayini. Kakwazanga ukuthi lavela ngaphi, kodwa izinceku ezaziwakhile amanzi zazisazi. Wasebizela umyeni eceleni 10 wathi, "Wonke umuntu uletha iwayini elimnandi kuqala, kuthi nxa izethekeli sezinathe kakhulu abesekhupha elibi; kodwa wena ugodle elimnandi kuze kube khathesi."

11 Lo waba ngumangaliso wakhe wokuqala, uJesu awenza eKhana laseGalile. Wabonakalisa kanjalo inkazimulo yakhe, abafundi bakhe basebebeka ukholo lwabo kuye.

6 Wabuza lokhu emlinga nje kuphela ngoba wayevele esekwazi ayezakwenza.

7 UFiliphu wamphendula wathi, "Amadenari angamakhulu amabili ngeke athenge isinkwa esenela ukuthi umuntu munye nje azuze ucezwana!"

8 Omunye wabafundi bakhe, u-Andreya, umfowabo kaSimoni Phethro wakhuluma wathi, 9 "Nangu umfana olezinkwa zebhali ezinhlanu lenhlanzi ezimbili ezincinyane, kodwa zingafika ngaphi ebantwini abanengi kangaka na?"

10 UJesu wathi, "Hlalisani abantu phansi." Kwakulotshani obunengi kuleyondawo, asehlala phansi (amadoda ubunengi bawo bungaba zinkulungwane ezinhlanu). 11 UJesu wasezithatha izinkwa, wakhuleka, wasezabela labo abasebehlezi phansi, wabapha njengokufuna kwabo. Wenza njalo langenhlanzi.

12 Kwathi bonke sebesuthi, wasesithi kubafundi bakhe, "Buthani imvuthu eziseleyo. Kakungalahlwa lutho." 13 Ngakho bazibutha bagcwalisa izitsha ezilitshumi lambili ngemvuthu zezinkwa zebhali ezatshiywa yilabo ababedlile.

19 Sebegwedle okwamakhilomitha amahlanu loba ayisithupha bambona uJesu esiza esikepeni ehamba phezu kwamanzi; bethuka kakhulu. 20 Kodwa wathi kubo, "Yimi; lingesabi." 21 Babefuna ukumngenisa esikepeni, kwathi masinyane isikepe sahle safika ekhunjini lapho ababeqonde khona.

UJesu Lomangaliso Wokubamba Inhlanzi

1 Ngemva kwesikhathi uJesu waphinda waziveza kubafundi bakhe oLwandle lwaseThibheriyasi. Kwenzakala kanje: 2 USimoni Phethro, loThomasi (othiwa nguDidimasi) loNathaneli waseKhana eseGalile, lamadodana kaZebhediya labanye abafundi ababili babendawonye. 3 USimoni Phethro wabatshela wathi, "Ngisayagola inhlanzi" bona bathi, "Sizahamba lawe." Ngakho baphuma bayangena esikepeni kodwa kababambanga lutho ngalobobusuku.

4 Ekuseni kakhulu uJesu wema ekhunjini kodwa abafundi kabananzelelanga ukuthi kwakunguJesu.

5 Wabamemeza wathi, "Bangane, lilokhu lingabambanga nhlanzi yini?"

Baphendula bathi, "Hatshi."

6 Wathi, "Phoselani umambule wenu ngakwesokunene kwesikepe lizagola khona." Bathe sebenze njalo behluleka ukudonsa umambule ngenxa yobunengi benhlanzi.

7 Lowomfundi owayethandwa nguJesu wathi kuPhethro, "YiNkosi!" USimoni Phethro wonela ukuzwa esithi, "YiNkosi," wazembathisa ngesigqoko sakhe sejazi (ngoba wayesikhulule) weqela emanzini. 8 Abanye abafundi balandela ngesikepe bedonsa umambule ugcwele inhlanzi ngoba babengakhatshana lasokhunjini, kwakungaba yizinyathelo ezilikhulu. 9 Ekufikeni kwabo okhunjini babona umlilo wamalahle uvutha kulenhlanzi phezulu kanye lesinkwa.

10 UJesu wathi kubo, "Lethani ezinye inhlanzi elizibambileyo." 11 USimoni Phethro wagada esikepeni, wadonsela umambule okhunjini. Wawugcwele inhlanzi ezinkulu, zilikhulu lamatshumi amahlanu lantathu (153), kodwa loba zinengi kangaka umambule kawudabukanga.

Ukholo LweNduna YeKhulu

5 UJesu esengenile eKhaphenawume, kwafika kuye induna yekhulu izocela uncedo. 6 Yathi, "Nkosi, inceku yami ilele phansi endlini, yome umhlubulo, isebuhlungwini obukhulu."

7 UJesu wathi kuyo, "Ngizakuza ngizeyisilisa."

8 Induna yekhulu yaphendula yathi, "Kakungilingananga ukuthi ungeza ungene ngaphansi kophahla lwami. Kodwa tshono ilizwi nje kuphela, inceku yami izasila. 9 Ngoba mina ngokwami ngingumuntu ongaphansi komthetho, ngilamabutho angaphansi kwami. Lo ngimtshela ngithi, ‘Hamba,’ ahambe; ngithi kuloyana, ‘Buya,’ lakanye abuye. Ngithi encekwini yami, ‘Yenza lokhu,’ ikwenze."

10 UJesu wathi ekuzwa lokhu wamangala wathi kulabo ababemlandela, "Ngilitshela iqiniso, kangikamboni loyedwa ko-Israyeli olokukholwa okukhulu kangaka. 11 Ngithi kini abanengi bazavela empumalanga lentshonalanga, bahlale edilini lo-Abhrahama, lo-Isaka loJakhobe embusweni wezulu. 12 Kodwa abanini bombuso bazaxotshelwa phandle emnyameni lapho okuzakuba khona ukukhala lokugedla kwamazinyo."

13 UJesu wasesithi enduneni yekhulu, "Hamba! Kuzakwenziwa njengalokhu ukholwa ukuthi kuzakwenziwa." Inceku yayo yahle yasila ngalesosikhathi.

Ukusiliswa Kwamadoda Amabili Alamadimoni

28 Wathi ekufikeni kwakhe ngakwelinye icele emangweni wamaGadarini wahlangabezwa ngamadoda amabili ayelamadimoni eqhamuka emathuneni. Ayelodlakela, kungasadluli muntu ngaleyondlela. 29 Amemeza athi, "Ufunani kithi, Ndodana kaNkulunkulu? Uze lapha ukuzasihlupha singakafiki isikhathi esimisiweyo na?"

30 Bucwala kwawo umhlambi omkhulu wengulube wawusidla. 31 Amadimoni amncenga uJesu athi, "Nxa usikhupha, sithumele emhlambini wengulube."