1 Umbono Ka-Obhadaya.

Nanku okutshiwo nguThixo Wobukhosi nge-Edomi:

Sesizwe ilizwi elivela kuThixo:

Kuthunywe isithunywa ezizweni ukuba sithi,

"Phakamani, asihambeni silwe laye impi":

2 "Khangela, ngizakwenza ube mncinyane phakathi kwezizwe;

uzakweyiswa kakhulu.

3 Ukuzigqaja kwenhliziyo yakho sekukukhohlisile,

wena ohlala ezingoxweni zamadwala wakhe

umuzi wakho eziqongweni,

wena ozitshela uthi,

‘Ngubani ongangiwisela phansi enhlabathini na?’

4 Lanxa uqonga njengengqungqulu

wakhe isidleke sakho phakathi kwezinkanyezi,

ngizakwethula khonale,"

kutsho uThixo.

5 "Nxa amasela efike kuwe,

nxa abaphangi ebusuku,

Awu, yeka ubukhulu bomonakalo okulindeleyo,

kabayikuntshontsha kuphela lokho okwanele abakufunayo na?

Nxa abavuni bamavini befike kuwe,

kabangeke batshiye amalutshwana na?

6 Kodwa yeka ukuphangwa okuzakwenziwa u-Esawu,

inotho yakhe efihliweyo izathunjwa!

7 Bonke abamanyane lawe bazakuxotshela emngceleni;

abangane bakho bazakukhohlisa bakunqobe;

labo abadla ukudla kwakho bazakuthiya ngomjibila,

kodwa wena kawuyikuwubona.

8 Ngalolosuku," kutsho uThixo,

"kangiyikuwabhubhisa yini amadoda ahlakaniphileyo ase-Edomi,

amadoda aqedisisayo ezintabeni zako-Esawu na?

9 Amabutho akho, wena Themani, azathuthumela,

njalo bonke abasezintabeni zako-Esawu

bazacakazelwa phansi ekubulaweni kwabanengi.

10 Ngenxa yodlakela kumfowenu uJakhobe,

uzakwembeswa lihlazo;

uzachithwa nini lanini.

11 Ngosuku owema ngalo khatshana

mhla izihambi zithumba inotho yakhe

labezizweni bengena emasangweni akhe

bephosa inkatho ngeJerusalema,

wawunjengomunye wabo.

12 Akumelanga weyise umfowenu

ngosuku lokuhlupheka kwakhe,

loba uthokoze ngabantu bakoJuda

ngosuku lokubhujiswa kwabo,

loba uklamase kangaka

ngosuku lokuhlupheka kwabo.

13 Akumelanga ungene ngamasango abantu bami

ngosuku lomonakalo wabo,

loba ubeyise osizini lwabo

ngosuku lomonakalo wabo,

loba uthumbe inotho yabo

ngosuku lomonakalo wabo.

14 Akumelanga ume emahlukanandlela

ukuba ubulale ababalekayo babo,

loba unikele abaphephileyo babo

ngosuku lokuhlupheka kwabo.

15 Usuku lukaThixo selusondele

ezizweni zonke.

Njengalokho okwenzileyo,

yikho okuzakwenziwa kuwe;

izenzo zakho zizaphendukela

phezu kwekhanda lakho.

16 Njengokunatha elakwenzayo entabeni yami,

ngokunjalo izizwe zonke zizanatha njalonjalo;

zizanatha, zinathe kuze kube

angathi kazizange zivele zibe khona.

17 Kodwa phezu kweNtaba iZiyoni kuzakuba lokusindiswa;

kuzakuba ngcwele,

lendlu kaJakhobe izazuza ilifa layo.

18 Indlu kaJakhobe izakuba ngumlilo

lendlu kaJosefa ibe lilangabi;

indlu ka-Esawu izakuba libibi,

njalo bazayithungela ngomlilo ozayiqothula.

Akuyikuba khona abasilayo

endlini ka-Esawu."

UThixo usekhulumile.

19 Abantu abavela eNegebi

bazathumba izintaba zako-Esawu,

labantu abavela emawatheni ezintaba

bazathumba ilizwe lamaFilistiya.

Bazathumba amasimu ako-Efrayimi lawaseSamariya,

loBhenjamini uzathumba iGiliyadi.

20 Lelibutho labako-Israyeli abathunjwayo abaseKhenani

lizalithatha ilizwe kusiyafika eZarefathi;

abathunjwa eJerusalema abaseSefaradi

bazathatha amadolobho aseNegebi.

21 Abakhululi bazakhwela iNtaba iZiyoni

ukuba babuse izintaba zako-Esawu.

Njalo umbuso uzakuba ngokaThixo.