Milagres de Jesus

Yesus Hep Aaftishuni Meyanonnawa Nibtaatoninna Fati

27 Yesus es dimaastan kabire hamfeen hep aaftishuni meya: «Dawitni naaso! Innotin fakifaywa» yit chaaget basa orfoose hamete. 28 Aaftishusakito Yesus girina keyaassi girsete. Bar: «Ta aafnitiison gachak chimanamato amanefetiyoso?» yire mamsi. Baasso dey: «Aa, amanefeniwa, Daamiiso!» yit wolgisete. 29 Estan Yesus kushubaasik baasso aafaason ta’ifaat: «Amantontiisimato nittok sinfawungwa» yi. 30 Aaffesiis dey gachche. Yesus dey: «Han wuzason ooniknu makotiita» yit chinire ajaje. 31 Sinuntano baasso estan kesere es daa zuuttambaase asiista basa chowaason maksete.

Yesus Hep Aaftishuni Meyanon Fati

29 Esseen orfo Iyyarikon kesse hamefeen showo dara Yesusneen ane hamete. 30 Estak dey ugunni teshta diise hep aaftishuni meya Yesus baassoki esta kamo aatbaason odeseteyse: «Daamiiso! Dawitni Naaso! Innotin fakifaywa!» yit chaagete.

31 Daraas dey: «Shaakkutiwa» yit ke’isete. Sinuntano baasso: «Daamiiso! Dawitni Naaso! Innotin fakifaywa!» yit aatamsire chaagete. 32 Yesus dey yerere baassotin barki teegere: «Nittok awu zagunak sholefetiso?» yi. 33 Baasso dey: «Daamiiso! Aafniis gachchonak zagaywa» yisete. 34 Yesus baassok kenashtefaat aaffesiison ta’i. Geregere dey aafbesiis biin Yesusneen ane hamete.

Yesus Betesayidak Isa Aaftishunin Fati

22 Betesayida kar’efe kabaasik asuni meya isa aaftishunin ephphe yeesere Yesus taptunak dey shiiphsete. 23 Bar dey aaftishuusi kushubaassi zatte ke’eessin gerakalo kisire aaffaassi tujfaat kushubaasik ta’ire: «Isa biidifata wuza faaroso?» yire mamsi.

24 Aaftishuus den kaanne: «Asusakito kutit yere i’onimato kutisedifeen biidifawungwa» yi.

25 Hepsa Yesus kushubaason aaffaasta ta’i. Estan asus mai’sire bi. Farire woksokneen fa wuzason zuutire mai’sire bi. 26 Estan Yesus asusin keeba gafkaat: «Ke’eessi girutaata*» yi.

Odo Oyoosnawa Nibtaatoosna Asi Faru

31 Estan Yesus Xirosun kesse Sidon kamo aatte asir katama yistefa daastak Galiilani baariiski ye. 32 Estak isa odoba oyonawa babula asuna asin asuni meya Yesusniki ephphe yeesete. Kushubaason dey basaasta ta’unak shiiphsete. 33 Yesus asusin daraasatan bar barin oor kisire kushubaasi waa’ak odobaassi gedaat tuja tujere asusa termanon tapti. 34 Den sama kaanne biyaat sikalere safarere «Eefta» yi. Kotbaas dey «gachcho» uu.

35 Geregere odobaas gachche. Terumbaas dey kotte. Isa tuusa’o foontonon mai’sire wolle. 36 Yesus: «Han baron ooknu makotiita» yire ephphe ye baassok ajaje. Sinuntano baasso makotiita yina baron beyfaat arkissire wolumsesete. 37 Asuni meya akamanon diinqok: «Zuuttambaase asin ma’ar zagiwa. Odo oyoni meya odosonek; nibtaatoni meya wolumsonek zagi!» yisete.

Yesus Aaftishu Bertemewosnin Fati

46 Yesus nawoni meyaneen Iyyariko yeesete. Estan kesefeen showo dara baassoneen ane hamedifer. Ugnaasi ha’ta dey Temewosni naa aaftishu Bartemewos diifaat shiiphet feer. 47 Naaziretki Yesus sinbaason odenayse: «Dawitni zalaassin koonte Yesusno! Taan maarowa» yit chaaga ephi.

48 Showo asuni meya shaakkunak ke’isete. Sinuntano bar: «Dawitni zalaassin koonte naaso taak kenashtowa» yit aatamsire chaagi.

49 Yesus yerefaat: «Teegotiwa!» yi. Baasso dey Aaftishusin: «Harewa! Kabuwa neen teegedifewa!» yit teegsete.

50 Bar dey geregere kabire tukaastaki maybaason ha’aat Yesusniki ye.

51 Yesus wolgire: «Awu neek zagunak sholefasso?» yi. Aaftishuus dey: «Assinynyano! Biyanakwa!» yi.

52 Yesus dey: «Hamma, amantonees neen fatiwa» yi. Geregere biyet ugunne basa orfoose hami.

Yesus Isa Aaftishunin Fati

35 Yesus Iyyariko tai’sefena kabaasik isa aaftishu ugunta diifaat shiiphedifer. 36 Aaftishuus teshba kamo aatfe daraasa kaamanon odefaat: «Han bar aambanso?» yire mamsi.

37 Baasso dey: «Naaziretki Yesustu hanta kamo aattiferwa» yisete.

38 Aaftishuus dey: «Dawitni naa Yesusno, taan fakifaywa» yit chaagi. 39 Sinaasta hamet fe asuni meya: «Shaakkuwa!» yit kalete. Sinuntano bar kaambaason teggire: «Dawitni naaso taan fakifaywa» yit chaagi.

40 Estan Yesus yerere asusin: «Hang taaki yowa» yit ajaje. Aaftishuus barki tai’sefena kabaasik: 41 «Neek awu zagunakinso sholefatari?» yire mamsi. Aaftishuus: «Daamiiso, biyanaktu sholefaungwa» yi.

42 Yesus dey: «Biwa, amantonees neen fatiwa» yi. 43 Aaftishuus geregere bi. Ha’ooson dey galattet Yesusneen ane hami. Daraas zuuttere es baron biyeteese Ha’ooson galattesete.

Yesus Aaftishu Sinne Koonte Asusin Fati

1 Yesus ugunne hamfet aaftishu sinne koonte asunin bi. 2 Nawoni meya: «Assinynyano! Han asus aaftishu sinne koontenaas oo wostena boor’aasikinso? Bar wostena boor’asikingwa wedey barin kooni aba intoos wostesete boor’aasikinso?» yire mamussete.

3 Yesus ekka yire wolgi: «Han asus aaftishu sinne koontenaas bar wedey barin kooni aba intoos wostesete boor’aasiktawa. Ha’oosi wosto barki kamo ammanon bestonakwa. 4 Wonaas chaarefbaase feen taan wosi basa wostonon wostonik sholsifawa. Oonu wostok chimnoyna talma yoonirwa. 5 Han daasta faana kabaasik ta han daasi chaarefawa.»

6 Es baron makefaat daasta tujere ho’a tushire haar’aasik aaftishuusa aafanon woshshaat: 7 «Ek hamfaat Silom yistefa kuphira kuni akaassi masowa» yi. Silom uusi kota: «Wostere hamar» uu. Es bari boor’a hamme dey masere biyet wolle ye.

2 Isa awataatoni mettan barki tai’sere: «Daamiiso! Taan shunfaatane fatuk chimatawa» yit sagade. 3 Yesus kushubaason shongere ta’ifaat: «Shunfawungwa kayimma» yin geregere merobaassin fari. 4 Estan Yesus: «Faruneeson ooknu makotaatawa. Sinuntano hamma teetneeson maagnik besuwa. Baassok zaala sinanak faruneeson besifa Muse ajajena maa’aason imma» yi.

2 Estak asuni meya oppota kuni isa laafa asunin Yesusniki ephphe yeesete. Yesus amantobesiison biyaat: «Ne han naataaso! Harewa, boor’neesi feeshun unon danitwa» yi. 3 Museni tumaasi assinynyaasasin isa isaas nibbesiissi «Han bar Ha’oosta mei’ni kaama makewa» yisete. 4 Yesus dey baasso safaraason arifaat: «Awuni boor’a nibnitiissi effatena mangu wuza safarefetiso? 5 Boor’nees feeshun usingwa wedey kabira hamma uusinso kashoyi? 6 Sinuntano Asuni Naa han daastak boor’aason feeshun uni ha’suni hugnaba faanamato arutikwa» iyaat laafa asusin: «Kabira opponeeson wor’a keene hamma» yi. 7 Asus dey kabire keeba hami.

10 Estak isa kushuba laafa asu feer. Yesusnin malatok sholet feese isa isa asuni meya: «Beysani wonaasik mettannin fatu faqqadtongwa aanenso?» yit mamussete. 11 Yesus baassok wolgire: «Nitto ganeyaassin fantuba faana isa asu beysani wonaasik gawusi gandefaanane kisunor oonso?» yi. 12 «Ese asu fantuustan denalo aakkak sina beynirinso? Es bari boor’a beysani wonaasik ma’a wuza zagu aane kaltowawa» yi. 13 Esseen orfo kushuba laafa asusin: «Kushuneeson zeephwa» yin zeephi. Isa kushusimato dey ma’a kushu sini.

30 Estak Simonni asusi into gumtanni mero mettera kunir. Bari mettooson geregere Yesusnik maksete. 31 Yesus barki tai’sere kushubaassi zatte kabgi. Meroos dey ma’in kabira baassotin irbasi.

Yesus Awataatoni Mettaniisin Fati

40 Isa awataatoni* mettan barki yeere kaa’nefaat: «Ne shunfaatane fatuk chimatawa» yit shiiphe.

41 Yesus barik kenashtefaat kushubaason shongere atubaason taptifaat: «Shunfaungwa, kayimma» yi. 42 Asus geregere merobaassin fari.

3 Acheech asu isa laafa asuni wor’e Yesusniki yeesete. 4 Dara showena boor’a Yesusniki tai’suk aane chimoto. Bar feena dimaastaki keyaasi aafanon kabgaat oppobaase yeet keer gedete. 5 Yesus baasso amantooson biyaat laafa asusin: «Naa! Boor’nees feeshun yistewa» yi.

6 Esta diise Museni tumaasi assinynyaasasin isa isaas nibbesiissi: 7 «Han asus awuni boor’a effatena mei’ni kaama makefeso? Isa Ha’oneen ooma boor’aason feeshun uuk chimnir oonso?» yisete.

8 Geregere Yesus nibbesiisi safaranon ayyanabaasik arifaat ekka yi: «Nibnitiissi awuniron ekka safaredifetirinso? 9 Laafaasin: ‹Boor’nees feeshun yistewa› usingwa ‹Kabira opponeeson wor’a hamma› uusinso kashoyi? 10 Sinuntano Asuni Naa daastak boor’aason feeshun uuk ha’suni hugnaba foobaason aruti» iyaat laafaasin: 11 «Neek makefawungwa: Kabira opponeeson wor’a keene hamma!» yi.

12 Geregere kabire oppobaason wor’e asu zuuttambaase asi sina kesse hami. Es bari boor’a asuni meya zuuttere diinqeset: «Effatena wuza biira aane aruweni!» yit Ha’ooson galattesete.

Yesus Kushuba Laafa Asusin Fati

1 Dey Yesus wolle Ayhudni shiiphoni keyaassi giri. Estak dey kushuba laafa asu feer. 2 Isa isa meya malatok chowa sholsefaat: «Han beysani wonaasik fatunitto biyaniwa» yire oodet feeseter. 3 Yesus dey kushuba laafa asusin: «Kabira hang ganeya yaara yerowa» yi. 4 Estan asuni meyak: «Beysani wonaasik ma’aron zagungwa wedey mangunon zagunso; kaani fatungwa wedey worun; aaffarinso faqadteri makebbetiso?» yire mamsi. Sinuntano baasso shaakisete. 5 Yesus nibbesiisi chimak haarefaat biratoosta feese asuni meyanon gi’ak biyaat asusin: «Kushuneeson zeephwa» yi. Bar dey zeephin kushubaas fari.

Yesus Awataatoni Mettaniisin Fati

12 Isawa Yesus isa katamasi feen atubaason awataatoni mero koi’sina asu barin biire sinba kaa’nefaat: «Daamiiso! Sholefaatane taan kayimsuk chimatawa» yit shiiphe. 13 Yesus kushubaason shongere atubaason taptifaat: «Sholefawungwa! Faruwa!» yi. Geregere merobaassin fari.

18 Asuni meya isa laafa asunin kuphota wor’ere Yesusniki yeesete. Laafaasin Yesus feena keyaassi gedde basa sina kunsuk sholsete. 19 Sinuntano asusa showotan kabi chowa laafa asusi keer gedak aane chimoto. Es bari boor’a keyaasi tukta kesfaat yiiroson bogge laafaasi kuphobaase keer gedde asusa ganesi Yesusni sina kunussete. 20 Yesus baasso amantooson biyaat laafaasin: «Ne han asuso! Boor’nees feeshun yistewa» yi.

21 Museni tumaasi assinynyanawa Ferisawini meena: «Ha’oosta mei’ni kaama makefees han bar oonso? Boor’aason feeshun uuk chimniis Ha’o bar bartano oom oonso?» yit nibbesiissi safarsete.

22 Yesus dey nibbesiisi safaranon arifaat: «Nibnitiissi awuniron ekka safarefetiso? 23 ‹Boor’nees feeshun› yistewa uustannawa: ‹Kabira hamma› uustanna aaffarinso kashoyi? 24 Sinuntano Asuni Naa han daasta boor’aason feeshun una ha’suni hugnaba faanamato arutik sholsifawa» iyaat laafaasin: «Ne han asuso kabira kuphoneeson wor’a keene hamma!» yi.

25 Geregere laafaas asusa sina kabire kunna kuphooson wor’e Ha’o galattet keeba hami.

Yesus Kushu Laafaasin Fati

6 Ooma beysani wonak dey Ayhudni shiiphoni keyaassi girire assit feer. Esta hoi’ta kushuba laafa sina isa asu feer. 7 Museni tumaasi assinynyanawa Ferisawini meena Yesusni malassone ugnani danak sholsefaat: «Beysani wonaasik asunin fatunitto biyaniwa» yit oodet feeseter. 8 Sinuntano Yesus baasso nibaasi safaranon arifaat kushuba laafa asusin: «Kabira ganeyaassi yerowa» yi. Bar dey kabire ganeyaassi yere. 9 Estan baassotin: «Ta nittotin mamsunawa; Beysani wonaasik ma’aron zagungwa wedey mangunon zagunso? Kaani fatungwa wedey tishkunso?» yi. 10 Biratobaasta fe asusi zuutire biinanneen orfo laafa asusin: «Kushuneeson zeephwa» yi. Bar dey zeephin Kushubaas dey fari.

Tii Meya Taar’oosa Ha’sinynyani Amano

1 Yesus es baron zuuttambaase daraasik makere koi’sinanneen orfo Kifirnahom yistefa katamaassi hami. 2 Estak isa Romanni tii meya taar’oni meeni gaanynya feer. Bar dey isa shunfena wostinynyaba akamanon mettere kituk tai’sere feer. 3 Es tii meya taar’oni meeni gaanynyaas Yesusni chowaason odenayse Ayhudni kur’uni meyanon: «Yesus yeere wostinynyataasin fatunak hamma taak shiiphotiwa» yire barki wosi. 4,5 Baasso Yesusniki hamere: «Han asu daraniisi shunar; Ayhudni shiiphoni keya dey keer’i; es bari boor’a han baron barik zagutak sholsuwa» yit chinire shiiphsete.

6 Es bari boor’a Yesus baassoneen ane hami. Keebaaski tai’sefena kabaasik tii meya taar’oni gaanynyaas zomobaasakitonin Yesusniki ekka yit wosi: «Daamiiso; ne taaki keer girutak ta sholsu asutewa; kutira hoputaata. 7 Ta teetnaasiknu neeki yoonak sholsu asutewa. Es bari boor’a ek faataasta faagedo kaama makowa; wostinynyataas dey farunawa. 8 Ta teetnaasik oom ha’sinynyani meeni sikalosi ha’i asuwa. Ta sikaloossi dey ta ajajefana meya taar’oni meya feeseterwa. Isaasin: ‹Ek hamma› iyaanane hamar; Oomiisin: ‹Hani yowa!› iyaanane yeer; wostinynyataasin: ‹Han baron zaguwa› iyaanane zagir» 9 Yesus es baron odere diinqe. Yerqere orfobaase yeesefe asuni meyak: «Israelni daraasasinnu effatena amanto aane danutwa» yi.

10 Wostere Yesusniki hama asuni meya tii meya taar’oosa gaanynyani keer wolle yeeseten wostinynyaas farire feen danete.

11 Estak asire nangne wogga kiina ayyana geshobaason kuupsina isa mashkasu faar. Bar dey kaanne kutuk aane chimfa. 12 Yesus baron biire barki teegefaat: «Ne han asuse meroneessin faritwe» yi. 13 Kushubaasik ta’in geregere kaanna yere. Ha’ooson dey galatte.

Yesus Hepsa Beysani Wonaasik Isa Mettannin Fati

1 Isa beysani wonak Ferisawini meeni gaanynyaasasin isaaski Yesus muu muunak giri. Ferisawini meya bar zaguna wuzason biyonek oodet feeseter. 2 Estak dey isa atuba wolsina mettan asu feer. 3 Yesus Museni tumaasi aruni meyanonnawa Ferisawini meyanonna: «Tumaas beysani wonaasik mettaniisin fatu kalfawa wedey aane kalfanso?» yit mamsi.

4 Sinuntano baasso shaakisete. Yesus asusin ta’ire fatire gafki.

Asir Awataatoni Mettan Fari

11 Yesus Yerusalem hamaas Samariyanewa Galiilane asi ganesi kamo aati. 12 Isa ke’esi kar’fena kabaasik asir awataatoni meroni mettanni meya barin huphsere woksok yeesesefaat: 13 «Yesus Daamniiso, innok kenashtefaywa!» yiset tega kaamak maksete.

14 Yesus baassotin biyaat: «Hamefaat atuntiison maagni meyak besutiwa» yi. Baasso dey hamefegedo ugnaastak farsete. 15 Baasso ganeyaassin isaas farubaason biinaase akama kaamak chaagge Ha’ooson galattet wolle ye. 16 Yesusni wochoossi kaa’nere galatte. Bar dey Samariyaki asu. 17 Yesus ekka yi: «Awataatoni merobesiissin fariis asir asutenoso? Eekin izginiis ayfeeseteso? 18 Han alaga asusteno oom Ha’ooson galattok wolle yeer aafenoso?» 19 Yesus es asusin: «Kabira hamma; amantonees neen fatiwa» yi.

Yesus Isa Laafa Asunin Fati

1 Esseen orfo Ayhudni meeni heebo faar sinna boor’a Yesus den Yerusalem kesi. 2 Yerusalemuk fantuus girifaat kesfana finynyaasi tesha isa kuphira kuni aka faar. Es akaas Ibrawini meeni kaamak «Betezata» yisteratu teegtefa. Bar dey uuch tukbaasta ukbare yere finoba faar. 3 Es finoossi showo mettan aaftishu, laafanawa engitfe meena esta kunsefer. *[Baasso dey akaasi shorkonon oodet feeseter. 4 Aat aatta daamiisa wosiya kuphira kuni akaassi keretaafa akaason shorkit faar. Es akaasi shorkoneen orfo zeemme akaassi giri asu aaffa tesa meroossinnu farit feer.] 5 Estak keezasire nangne neya laafa sinne fe isa asu feer. 6 Yesus es asusin kunfeen biyaat hashneen kar’e showo neya ekkak feenamato araat: «Farutak sholefatoso?» yi. 7 Mettan asus: «Daamtaaso! Akaas shorkefana kabaasik taan akaassi kessuni asuta aafewa; ta giruk hamfana kabaasik oom asu zeemfe» yi. 8 Yesus dey: «Kabira opponeeson wor’a hamma!» yi. 9 Mettan asus geregere farire oppobaason wor’e hami. Es bar sinnaas beysani wonakwa.

46 Esseen orfo Yesus akaason wayinini usha zagire soolena daa Galiilaki Qaana hepsa wolle ye. Es kabaasik Kifirnahomuk naaba mettena isa taatoni herasho feer. 47 Herashoos Yesus Yuudan Galiila yeenamato ode. Naabaas kitunak akamanon mettere feer sinna boor’a Yesusniki yeere: «Kifirnahom kerera naataasin fataywa» yire shiiphphe. 48 Yesus dey: «Nitto biistera artonoy wuznewa diinqi chowne biya shakaatine isanne aane amanefetiwa» yi. 49 Herashoos dey: «Daamtaaso! Naataas kitunoy feen tai’ni kar’wa» yi. 50 Yesus barik: «Hamma! Naanees farunawa» yi. Asus Yesus barik makena kaamaason amanere hami. 51 Wolle hamfeen basa wostinynyani meya barin sholok kesere ugunta uphsere: «Naas fariwa» yisere maksete. 52 Bar: «Naas apun sa’atikinso farinari?» yire mamsin. Baasso wolugsere: «Hazo naafun sa’atiktu atubaasi gumtana gafkiwa» yisete. 53 Naasa aba dey Yesus: «Naanees farunawa» yinaas es sa’atiista sinnamato ari. Barnawa keerki asuni meyaneen ane amanesete. 54 Esiis dey Yesus Yuudan Galiila yeere zagina hepsa biistera artonoy wuza.

20 Estak asire heppe wogga harinba wuuktet faana isa mashkasu Yesusni orfo kamo yaara maambaason ta’i. 21 Bar dey nibbaassi: «Maambaasi fashanonnu ta’ifaanane farunawa» yit faar. 22 Yesus yerqere barki biyaat: «Harewe naanaase! Amantonees neen fatiwe» yi. Asus dey es kabaasik fari.

25 Asire heppe neya harinba wuuktet faana isa asu faar. 26 Showo etni asuniki hamfaafa akamanon rakkatet waagbaason dey koi’sit faar. Sinuntano merobaas arkittu hamitano faruk aane chima. 27 Bar Yesusni chowaason odera faar sinna boor’a asusa ganesi orfo kamo yaara maambaason ta’i. 28 Es baron zaginaas: «Maambaasta ta’ifaanane farunawa» yira faar.

29 Es wuuktet fa harinbaas geregere yere. Merobaassin farinamato atubaastak ari.

43 Asire heppe neya barissin hanna wuuktet faana isa mashkasu dey faar. Bar dey fa waagbaason zuutira hetni asunik koi’si. Oonu baron fatuk aane chime. 44 Bar dey orfo kamo yaara Yesusni maamaasi fashanon ta’i. Geregere wuuktet fa harinbaas yere. 45 Yesus dey: «Taan ta’i oonso?» yire mamsi. Zuuttere: «Inno aane ta’uweniwa» yisete. Phexiros dey: «Daamiiso, dara zuuttere neen ganeya gedde tugire tiir’sifeen biifat taan ta’iis oonso?» yifatoso.

46 Sinuntano Yesus: «Hugna taaysin kesnamato aringwa, futoosik isa asu taan ta’iwa» yi. 47 Mashkasus dey aachonoy korkit yaara Yesusni sina sagade. Awuniron barin ta’inamatonawa aakkak geregere farinamatona dara zuuttambaase asi sinak make. 48 Yesus asusik: «Naanaase amantonees neen fatiwe. Nagak hamme» yi.

Iyyarosni Nawaasewa Yesusni Maamaason Ta’i Asuse

18 Yesus es baron makefeen isa gaanynya barki yeere sinba kaa’nere: «Naanaas kitiwa, yaara kushuneesik ta’ifaatane farunawa» yi. 19 Yesus dey kabire asusneen ane hami. Nawobaasakito dey ane hamete.

23 Yesus gaanynyaasa keer kar’fena kabaasik waasit, markata fugetnawa sasetna yere darani bi. 24 Yesus dey: «Nawaas afay’nintu kunitano aane kituwa; Hantan shaatotiwa» yin barin kanyere mi’esete. 25 Daraasin kisinanneen orfo keer girire nawaasi kushunon zatin daakun kabi.

22 Ayhudni shiiphoni keyaasi gaanynyaasasin Yayiros yiste isa asu yeere Yesusnin biinayse wochobaassi kaa’nere: 23 «Ate naanaas akamanon mettera kituna agaat kunirwa. Farira kaak foonak yaara kushuneeson barista ta’uwa» yire chinire shiiphe.

24 Yesus dey barneen ane hami. Showo asu orfobaase tiir’sisedifer.

38 Ayhudni shiiphoni keyaasi gaanynyaasa keer yeere kar’fena kabaasik asuni meya sasetnawa waasitna chaaga aatamsisefeen bi. 39 Keer girire: «Awuni boor’a saset waasidifetirinso? Nawaas afay’totu afay’tetano aane kituwa» yi.

40 Asuni meya dey kanyni mi’a mi’esete. Sinuntano Yesus baassotin zuutire keerun kalle kisaat nawaasi abaninnawa intononna dey barneen ane feese baassotin zoonsire nawa faanaassi giri. 41 Nawaasi kushunon dey zatte: «Xalita kum!» yi. Es kaamaasi kota dey: «Garo nawaase kabuwe yifawungwe» uu.

42 Bar dey geregere kabira ek hang kuti. Woggabaas dey asire heppe sinana. Es bar sinfana kabaasik asuni meya akamanon diinqesete.

31 Yesus tusire dey: «Han neyaasi koontonon awuneen hoossunarinso? Awune feeseterinso? 32 Gabata diisefaat bare bare teegsetaafa: ‹Markata fugni aane sursoweti; soosenik aane waassoweti› yiset kassefa naanggotaasne feeseterwa. 33 Haphquni Yohannis tusha muunoy wayinini usha ushnoy yeen nitto: ‹Kiina ayyana faarwa› yiseti. 34 Asuni Naa meetnawa ushetna yeen: ‹Han bar muunewa ushne shuna asuwa; dey girbo zuutife baassonawa boor’ni meena asi zomowa› yiseti. 35 Techmaasi futo sina naanggotba zuuttambaase asiistatu artefa» yi.

Isa Boor’ba Faana Mashkasu Yesusni Shitto Woshshi

36 Ferisawini meyaassin isar Yesus muu muunak keeba teege. Yesus dey asusa keer hamme muuk di. 37 Es katamaassi isa boor’inynya asu faar. Bar dey Yesus Ferisawiisa keer foobaason odefaat albastiros yiste shu’ak wosuste bilqadisi shitto ephpha esta hami.

41 Es kabaasik Ayhudni shiiphoni keyaasi gaanynya sunba Iyyaros yiste asu ye. Yesusni wochoossi gandere barki keer hamanak shiiphe. 42 Neebaas asire heppe sinna isa mashka nawubaas mettera kituk kar’a faar sinna boor’atu es baron zagi. Yesus barneen ane hamfena kabaasik ane hamfe daraas ugnaason tiir’sire tugit feer.

49 Yesus es baron makefeen isa asu Ayhudni shiiphoni keyaasi gaanynya Iyyarosni keerun yeere: «Naane kitiwa. Hanneen ekalo assinynyaasin baak hopsutaatawa» yi.

50 Sinuntano Yesus es baron odere Iyyarosnin: «Harewa! Digotaata. Amantowa, Naanees farunawa» yi.

51 Yesus Iyyarosni keer kar’fena kabaasik barneen ane giriis Phexiros, Yohannis, Yaqobnawa nawaasi abaneen intoneentano oom barneen girsonek aane sholowe. 52 Asu zuuttere: «Yi! Yi!» yit waassedifer. Sinuntano Yesus: «Waasutiita, nawaas kunutu kunitano aane kituwa» yi.

53 Asuni meya nawaas kitubaason arsete boor’a Yesusniista mi’esete. 54 Sinuntano Yesus kushubaason zatte: «Han Nawaase kabuwe» yi. 55 Nawaas dey kaaba wolin geregere kabira di. Yesus dey: «muuna muuba imotiwa» yire ajaje. 56 Kooni abaasnawa intoose diinqesete. Sinuntano Yesus sina chowaason ooknu maksonoytemato ajaje.

Alazarni Kitu

1 Bitaniyak Alazar yiste isa asu mettere feer. Bitaniya Maaraminewa eetba Maartane feesefe ke’e. 2 Es Maarami sinfa bar Daamiisa wochonon shitto woshshira dey sombaasik ku’a bar. Es mettees dey bari ay sina Alazar. 3 Eete eete dey: «Daamiiso! Es ne shunfata bar mettewa» yisere Yesuniki wosisete.

4 Yesus es baron odenaase: «Han meroos barin woruni merotawa; sinuntano Ha’oosik ulfina sinanaknawa Ha’oosi naa dey han merosik ulfintonaknatu mettewa» yi.

5 Yesus Maartanon; eetba Maaraminonnawa aybesi Alazarninna shunar. 6 Sinuntano Yesus Alazarni mettonon odefaat feena dimaasta hep wona feeshi. 7 Esseen orfo nawoni meyak: «Hepsa wolla Yuudaki daasta hamniwa» yi.

8 Nawoni meya: «Assinynyano! Garo wonaneen sinak Ayhudni meya neen shu’ak ichonek sholset feeseterwa. Hepsa dey wolla esta hamatak sholetoso?» yisete.

9 Yesus wolgire ekka yi: «Wonaassi asire heppe sa’atitanoso faari? Wonak kutife bar han daasi chaarefanon biidifer sinna boor’a aafawa tuusa’ona wuza. 10 Sinuntano talmaassi kutife bar chaarefa barki aafa sinna boor’a tuusa’erwa» yi. 11 Es baron makenanneen orfo: «Zomoni sina Alazar afay’tewa. Sinuntano ta hamma afay’nitan barin guzgunarwa» yi. 12 Nawoni meya dey: «Daamiiso! Afay’nin kunir sinfaanane farunawa» yisete. 13 Yesus Alazar kiti sinbaasontu baassok make. Sinuntano afay’nin kunnanne faar sinnatu baassok beste. 14 Es bari boor’a Yesus ammanon: «Alazar kitiwa.

Yesus Akaasi Guubonon Ke’i

23 Estan Yesus goonuussi girin nawobaasakito dey barneen ane hamete. 24 Baariistak akama akani guuboos kabira goonuuson koor’anak kar’i. Sinuntano es kabaasik Yesus kunfer. 25 Nawoni meya Yesusniki yeesere: «Daamiiso tishunirwa, innotin fu’aywa» yiset nuskisete. 26 Yesus dey: «Amantontiis yo’ina nitto awuni boor’a digefetiso?» yi. Estan kabire sirusewa baariise asin ke’in akama naga sini. 27 Asuni meya diinqesere: «Sirusewa baariise ajajamena han bar aro asunso» yisete.

15 Waalfana kabaasik nawobaasakito barki tai’sere «Han bar zabowa, gerok dey waali. Daraas hamme ke’esikitosin muubesi waagsonek geggessuwa» yisete.

16 Sinuntano Yesus: «Nitto baasso muusoneeson imotitano hamonek aane sholsifawa» yi.

17 Baasso dey: «Innoki fayiis uuch muuma daabbonewa hep kurxumminetano ooma hantak aafawa» yisete.

18 Bar dey: «Es baron hang taaki teshshotiwa» yi. 19 Daraas shaa’aasta duusonek ajaje. Estan uuch muuma daabboosonnawa hep kurxummiisonna ephphe den sama biire galatni shiipho shiiphe. Daabbooson dey batte nawobaasakitonik imin baasso dey daraasik woshete. 20 Zuuttambesiise meere gawuseten nawobaasakito dey fu’te battoos asire heppe masa tuumanon zuutisete. 21 Meese asuni meya mashkasusewa naanggotaase faadtonoyfeen uuch kum arqasu sinone.

25 Wassi izgin sa’atiistak Yesus baariista kutit nawobaasakitoniki ye.

Yesus Acheech Kum Asunin Maasi

32 Yesus nawobaasakitonin teegere: «Daraas taneen ane keez wona feeshete sinna boor’a muusone wuza aafa sinna boor’a baassok kenashtefawungwa; uguntak makak mikishere gandosonoytemato afurbesiise gafkuk aane sholefatwa» yi.

33 Nawobaasakito dey: «Eekin han effatena daraasin gausuni tusha han ichma daassik ayin dananirinso?» yisete. 34 Yesus: «Apun daabbonso nittoki faari?» yi. Baasso dey: «Naafun muuma daabbonewa garo garo kiisku kurxumminetu innokik faarwa» yisete. 35 Esseen orfo daraas daasta duusonek ajaje. 36 Naafun muuma daabboosewa garo garo kiisku kurxummiise asin ephphe Ha’o galattefaat batte nawobaasakitonik imi. Baasso dey daraasik woshete. 37 Zuuttambesiise meesere gawuseten fu’te battooson naafun masa zuutisete. 38 Meese baasso mashkasusewa naanggotaase faadtonoynaron acheech kum arqasu sinone.

Betemeqdesini Girboni Kaasuni Chowa

24 Yesusnawa nawobaasakitona Kifirnahom kar’efe kabaasik betemeqdesini girbo zuutife asuni meya phexirosniki tai’sere: «Nitto assinynyaas betemeqdesik giribtefa girbooson aane girbefenoso?» yit mamussete. 25 Phexiros wolgire: «Girberwa» yi. Estan Phexiros keer girifena kabaasik Yesus zeemme: «Simon phexiros; neek awu sinna bestefaso? Han daastaki taate meya karaxa wedey girbo zuutisefees ookininso? Naanggotbesiiskiningwa wedey irbanikininso?» yi. 26 Phexiros dey: «Irbaaskingwa» yire wolgi. Yesus dey: «Ese naanggotbesiisikito girbo aaffa kaasusone wuza. 27 Sinuntano baassosta tuusa sinnoynimato hamfaat kurxummiisi eshmiyanon baariissi ha’uwa. Estan zeemma ootte kurxummiisi noononon shoo’sifata kabaasik birri danata. Taamma dey ta sunaasiknawa ne sunaasikna kaasuwa» yi.

Yesus Erwina Belesini I’o

18 Yesus e’so wonsak wolle katama hamfet makte. 19 Ugnaasi teshta di isa belesini i’o biyaat ek barki hamin tosha toshatano isa gaanane aane dane. Estan ekka yi: «Hawungneen ekalo neekin isa gaanane bestonaatawe» yi. I’oos dey es kabaasik geregere ichimi. 20 Nawobaasakito es baron biyefaat: «Han belesiisi i’oos geregere aakkak ichimiso!» yiset diinqesete. 21 Yesus dey wolgire: «Futo nittok makefawungwa; amantonti faafaananenawa awuzakne uu shakaatinena han Belesiista sina barne faaron zagu koi’ba sinnoynaron han aamaasonnu: ‹Waatera yeet baariissi ha’towe› iyaatine sinanawa. 22 Amanera shiiphefeti baron zuutira ephphatootiwa» yi.

37 Akama akani guuboosi ipuwa kabira akaas goonuussi tuumananneen ipuwaas goonuuson ichet faar. 38 Es kabaasik Yesus goonuusi orfosi bokta boktere kunfer. Nawoni meya barin guzgisere: «Assinynyano! Inno tishuus neen aane tiir’efanoso?» yisete.

39 Bar guzire ipuwaason ke’i. Baariison dey: «Beyya shaakku!» yi. Ipuwaas dey siru beyi. Akama naganu sini. 40 Yesus nawoni meyanon: «Awuniron ekka digedifetirinso? Hashneen amantonti aafanoso?» yi.

41 Akamanon digesere baassotna baassotna: «Eekan ipuwaasewa baariise ajajamenar han bar oonso?» yisesete.

35 Geroki dimaas waalet hambaase nawobaasakito Yesusniki tai’sesere: «Han faani dimaas zabowa; gerok dey waaldifar; 36 Han asuni meya muusone wuza aafa sinna boor’a biratoosta fa beedeessinawa ke’eessina hamere muubesi waagsonek geggessuwa» yisete.

37 Sinuntano bar wolgire: «Baasso muusone muuson nitto imtiwa» yi. Baasso dey: «Eekan inno hamma hep tiya diinari zuutira kisira waagera imaniroso?» yisete.

38 Yesus: «Apun tushanso faari? Hamma biyebbetiso» yi. Baasso dey biyere: «Uuch muuma tushnewa hep qurxumminetu faarwa» yisete.

39 Yesus dey daraasi chiro kuwaasta bag bagge duussonek ajaje. 40 Estan tiya tiyanawa uuchasir uuchasirna sinefaafe madadak diisete. 41 Yesus dey ukkoti uuch muuma tushaasewa hep qurxummiise ephphe den sama biire Ha’o galattefaat tushaason batte daraasik woshonek nawobaasakitonik imi. Esiisimato hep qurxummiison imin zuuttambesiise asik haa’esete. 42 Zuuttambesiise meesere gawsete. 43 Nawoosakito dey fu’te batto tushaasewa qurxummiise asin asire heppe masa tuumanon zuutisete. 44 Tushaason me arqasusa faada uuch kum sinana.

48 Nawobaasakito siru baasso sinaasta siridifar sinna boor’a akaason ichche finak rakkassefeen bi. Wassi izgin sa’atin hamma asire heppe sa’atineen fa kabaassi baariista kutit hang baassoki ye. Baassotinnu aatte hamana kaba. 49 Sinuntano baasso baariista kutit hamfeen biyesefaat: «Kitawa» yisefaat chaagete. 50 Zuuttambesiise biyaat naysete. Yesus dey geregere: «Harewa! Tawa! Digotiitawa» yi. 51 Goonuussi girire baassoneen ane duubaase sirus beyya yere. Es bari boor’a nawoosakito akamanon diinqesete.

Yesus Acheech Kuma Asuni Meyanon Maasi

1 Es wonaassik showo dara hepsa dey zuutte. Muusone muu aafa sinna boor’a Yesus nawoni meyanon barki teegere: 2 «Daraas hawung keez wona kar’e taneen anetu feesete. Muubesi aafa sinna boor’a baassok safarefawungwa. 3 Baassossin isa isaas woka daan yeeseter sinna boor’a afur keebesi gafkaanane ugunta gooda taateseterwa» yi.

4 Nawobaasakito dey: «Han zaboossi asu ayin tusha danna han effetena daraasin maasuk chimnirinso?» yire wolugsete. 5 Yesus: «Nittoki apun tushanso faari?» yire mamsi. Baasso dey: «Naafun tushatu faarwa» yisete.

6 Daraasin daasta duussonek ajaje. Estan naafun muuma tushaason ephphe Ha’o galattefaat batte woshonek nawobaasakitonik imi. Baasso dey daraasik woshete. 7 Baassoki garo qurxummi faar. Es barik Ha’ooson galattefaat woshonek nawobaasakitonin ajaje. 8 Nawoosakito dey asuni meya meesere gawseten fu’te battooson inya inya naafun masa tuumanon zuutisete. 9 Tushaason meese asuni meya acheech kum sinone. Estan geggessi.

Yesus Erwina Belesini I’o

12 Wonotiri wono Bitaniyan kesefeen Yesus makte. 13 Toshbare yere belesini i’o woksok biyaat gaana barissin bestonitto iyaat barki hami. Sinuntano gaanfana asba sina beyna boor’a tosha toshatano isanne danna gaana aafa. 14 Es bari boor’a belesiison: «Hawungneen ekalo oonu neekin isanne gaana muunaatawe» yi. Nawobaasakito dey es baron odesete.

Belesini I’ooskin Beste Aru

20 E’so wonsak ugunne hamefeen belesiis tasbaasneen ichimma diifen biyete. 21 Phexiros nibbaasta kejfaan: «Assinynyano! Ne erwita belesiis ichimiwa» yi.

22 Yesus baassok wolgire ekka yi: «Ha’oosik amanotiwa. 23 Futo nittok makefawungwa; Oonu nibaassi sinungaso unoy makona bar zagtonamato amanere han aamaason: ‹Waatera baariissi ha’towe› iyaanane barik sinanawa. 24 Es bari boor’a shiiphok mamsiti wuzason zuutira dantir zagira amanotiwa nittok sinana. 25 Shiiphefeti kabaasik den samak fe Abantiis boor’nitiison feeshun unak asuniista isa chowniti faafaanane feeshun utiwa.

Yesus Nawobaasakitoni Teege

1 Isa wona Yesus Gensaretki Baarisi ha’a feen showo asuni meya ek barki tai’sere Ha’oosi kaamanon odok tugset feeseter. 2 Bar es Baarisi ha’a yere hep goonu bi. Kurxummi eshefe baasso goonuussin kerere yugudobesiison mei’sedifer. 3 Yesus Simoonnir sina goonuussi giri. Simoonnin: «Han goonuuson daastan ek akaasta garonon taak chiksuwa» yi. Estan goonuusta diifaat esta fe daraasin assi.

4 Wolumbaaso koi’sinanneen orfo Simoonnin: «Goonuuson tir’maasta eksaat neneen zomoneesakitoneen Kurxummiison eshak yugudontiison tir’maassi ha’utiwa» yi. 5 Simon wolgire: «Assinynyano! Waalaason zuutira kabet ha’ira isanne aane daneniwa. Sinuntano hash ne maketanneen kurxummiison eshak yugudooson akaassi ha’unawa» yi. 6 Es baron zagsobesiise yugudoos karatonanneen akama showo kurxummi hophete. 7 Estan ooma goonuusta fe zomobesiisakito yeesere argassonek giphsok teegsete. Baasso dey yeesere hep goonuuson akaas koor’ananneen kurxummik tuunisete. 8,9 Barnawa basa zomosakitona zuuttere ephete kurxummiisi aatamak akamanon diinqesete. Simon Phexiros dey sina chowaason biyaat Yesusni sina kaa’nere: «Daamiiso! Ta boor' sinna boor’a tayistan eksowa!» yi. 10 Esiisimato Simonni zomo sina Zebdewosni naanggotiis Yaqobnawa Yohannisna diinqesete. Yesus Simoonnin: «Harewa digotaata! Hawungneen ekalo asuni meyanon Ha’ooski zuutunir sinatawa.»

11 Baasso dey goonubesiison akaassin kisire daasta kunsaat zuuttambaase asin beyye Yesusni nawo sinete.

Yesus Ipuwaason Shaakkunak Zagi

22 Isa wono Yesus basa nawoosakitoneen goonuusta diifaat: «Han baarisi yesalo finaniwa» yi. Baasso dey finak kabsete. 23 Baariista hamefeen Yesus afay’ni kuni. Es kabaasik akaasta akama ipuwa kabi. Aka goonuussi tuumet hambaase zuuttambesiise asin tiir’o ephi. 24 Es kabaasik nawobaasakito: «Daamiiso! Daamiiso! Ko’unirwa!» yit Yesusnin guzgisete. Bar dey guzire ipuwaasewa akaasi guubone asin ke’in geregere shaakki dey akama naga sini. 25 Esseen orfo Yesus baassok: «Amantontiis ayfaso?» yi. Sinuntano baassotna baassotna digaknawa diinqokna: «Ipuwaasewa akaasi guubone ajajamenar han bar oonso?» yisesete.

Yesus Ipuwaason Shaakkunak Zagi

22 Isa wono Yesus basa nawoosakitoneen goonuusta diifaat: «Han baarisi yesalo finaniwa» yi. Baasso dey finak kabsete. 23 Baariista hamefeen Yesus afay’ni kuni. Es kabaasik akaasta akama ipuwa kabi. Aka goonuussi tuumet hambaase zuuttambesiise asin tiir’o ephi. 24 Es kabaasik nawobaasakito: «Daamiiso! Daamiiso! Ko’unirwa!» yit Yesusnin guzgisete. Bar dey guzire ipuwaasewa akaasi guubone asin ke’in geregere shaakki dey akama naga sini. 25 Esseen orfo Yesus baassok: «Amantontiis ayfaso?» yi. Sinuntano baassotna baassotna digaknawa diinqokna: «Ipuwaasewa akaasi guubone ajajamenar han bar oonso?» yisesete.

Yesus Kiina Ayyana Basaassi Ha’ina Asusin Fati

26 Baariison finere Galiilaki daasi yesalo fa Gerasenon kar’ete.

12 Gero waalfana kabaasik asire heppe nawobaasakito Yesusniki yeesere: «Han faani dimaas ichma daawa. Es bari boor’a daraas biratoosta fa katamaassinawa beedesina hamme muunewa kununi dimne sholsonek gafkuwa» yisete.

13 Yesus wolgire: «Nitto muusone baron baassok imtiwa» yi. Baasso dey wolugsere: «Innoki fayiis uuch muuma tushnewa hep kurxumminewa. Es bar dey hamma waagera daysu shakaanine han effe daraasik aafawa hoorona wuza» yisete. 14 Estak uuch kum sinni arqasu feer.

Yesus nawobaasakitonik: «Uuchasir uuchasir zagira bag bagga duusutiwa» yi.

15 Baasso dey Yesus makenaasimato duusisete. 16 Estan uuch muuma tushaasewa hep kurxummiise kabgire den sama kaanne Ha’o galattefaat batte daraasik haa’onek nawobaasakitonik imi. 17 Dara zuuttere meere gawi. Nawoni meya dey fu’te battooson zuutiseten asire heppe masa tuuma kabi.

Yesus Qaanaki Sargini Kootaasta Beste

1 Keezsinari wono Galiilani awurajjaassi Qaanani katamaassi sargi faar. Yesusni intoos dey estak faar. 2 Yesusnawa nawoni meena es sargiista teegtesere feeseter. 3 Waynini ushaas ko’ifana kabaasik Yesusni intoos: «Waynini ushbesiis koi’faantu feesetewa!» yira Yesusnik make. 4 Yesus wolgire: «Intonaase! eekin taan awu zaguwa yifasse? Ta wonaas hashnu aane kar’awe» yi. 5 Yesusni intoos dey wostinynyani meyak: «Bar makena baron zuutira zagutiwa» yi. 6 Ayhudni meya masere kayimefe tumaasimato issun shu’ni waasha esta diisefar. Isa isarbaas hep wedey keez gima akatu ephfa. 7 Yesus wostinynyani meyak: «Waashasikitosi aka tuunutiwa» yin noonobaastaneen katisere tuunisete. 8 Estan Yesus: «Hash kitta kootaasi gaanynyanik imtiwa» yin imete. 9 Gaanynyaas waynini usha sina akaason bechchire biin ayin yaanamato aane aruwe. Sinuntano akaason kita wostinynyani meya arsedifer. Gaanynyaas mariisin teegere 10 «Asu zuuttambaase zeemme ma’a waynini ushaasontu imfe. Estan ushshe zaysetenneen orfo manguuson imfe. Ne ma’a waynini ushaason hashneen duusaan diifar» yi. 11 Yesus es biistera artonoy wuzason zeemme Galiilaki fa Qanak zaguk ulfinbaason ammanon besi. Nawoni meya dey barik amanesete.

6 Bar zaguna baron arifet Filiphosnin fattanok es baron mamsi. 7 Filiphoos: «Garo garonon isa isarbesiis muusonek hep tiya wona wosuste wostoni waagni* birrik waagte tusha aafawa hoorona wuza» yire wolgi. 8 Nawobaasakitonisin isaas Simon Phexirosni ay sina Andriyas Yesusnik ekka yi: 9 «Uuch muuma tushnewa hep kurxummine epho naa hanta feerwa. Sinuntano effetena daranik Awagira kar’ni?» 10 Yesus: «Asuni meya duusonek zagutiwa» yi. Estak akama kuwa faar. Es diise baassossin arqasus uuch kum sinnir. 11 Yesus uuch tushaason ephphe galattefaat diise baassok hooroniison haa’osonek nawoni meyak imi. Kurxummiison dey esiisimato. 12 Meesere gawsetenneen orfo Yesus nawoni meyanon: «Isanne zigunoynamato fu’tana battooson zuututiwa» yi. 13 Baasso dey maaste uuch hagewni tushaastan fu’te batto zuutire asire heppe masa tuumi.

19 Uuch wedey issun kilometrine* faaron hametenneen orfo Yesus akaasta taarire kutit goonuuski tai’sefena kabaasik baasso biyaat digsete. 20 Sinuntano bar: «Tawa! Digotiita!» yi. 21 Bar goonuussi girire duunak sholsete; geregerenu goonuus hamme kar’one dimaasta kar’i.

Yesus Naafun Nawoni Meyak Beste

1 Esseen orfo Yesus Galiilaki* baarisi tesha hepsa nawoni meyak ammanon beste. Es baassok ammanon bestenaas haniisimatowa. 2 Simon Phexirons, «Mano» yistefe Tomas, Galiilak fa Qaanani katamaassiki Naatinael, Zabdiyosni naanggotiisnawa nawobaasasin oom hep nawoosna isarik feeseter. 3 Simon Phexiros baassok: «Kurxummni eshak hamnarwa» yi. Baasso dey: «Neneen ane hamaniwa» yisete. Kesere dey goonuussi girsete. Sinuntano es waalaasik isarinnu aane ephosoto. 4 Wonfana kabaasik Yesus es baarisi ha’a yere. Sinuntano nawoni meya Yesus sinbaason aane arsoto. 5 Yesus: «Naanggotno! Isa eshsha ephti qurxummi faaroso?» yire mamsi. Baasso dey: «Aafawa» yire wolugsete. 6 Bar dey: «Yugudooson goonuusi oi’ta teshta ha’utiwa; Estan danati» yi. Baasso dey ha’sete. Showo qurxummi ootte sinna boor’a zatte kisuk aane chimoto. 7 Yesus shunfena nawoos Phexirosnin: «Daamiiswabiti!» yi. Es bari boor’a Simon Phexiros daamniis sinbaason odenayse atatubaase sinna boor’a maambaason mayye baariissi giri. 8 Sinuntano oom nawoni meya daastan woketees isa tiya metiritano akamanon aane wokoto. Qurxummi tuumma fa yugudooson zatet goonuussi diisere yeesete. 9 Goonuussin kersefe kabaasik kurxummi barista kunna kaa’oni geenewa tushne biyete. 10 Yesus: «Hashti eshsha ephti kurxummiissin teshshotiwa» yi. 11 Simon Phexiros goonuussi girire isa tiirewa uuchasire keeze inya inya qurxummik tuumma fa yugudooson zatte daasta kisi. Effatena showo sinfanaknu yugudoos aane karatowa.

Yesus Tii Meya Taar’oni Meeni Gaanynyaasa Wostinynyanin Fati

5 Yesus Kifirnahomni katamaassi kar’fena kabaasik isa tii meya taar’oni meeni gaanynya barki yeere ekka yit shiiphe. 6 «Daamiiso! Wostinynyataas laafa sinne akamanon mettere keer kunferwa» yi. 7 Yesus dey: «Ta yaara wostinynyaneesin fatunawa» yi. 8 Tii meya taar’oni meeni gaanynyaas wolgire: «Daamiiso! Ne taaki keer girutak ta sholsu asutewa. Sinuntano isa kaamnin makefaatane wostinynyataas farunawa. 9 Ta dey oom gaanynye meeni ha’suusi sikalositu ha’ifawungwa. Ta dey ta sikaloossi ha’sifana meya taar’oni meya feeseterwa. Isaasin ‹Ek hamma› iyaanane hamar. Oomiisin dey ‹yowa› iyaanane yeer. Wostinynyataasin dey: ‹Han baron zaguwa› iyaanane zagir» yi. 10 Yesus es baron odenayse diinqere barneen ane feese baassok: «Futo nittok makefawungwa; Israelni meeni ganeyaassinnu effatena amantobare yere asunin aane danutwa. 11 Nittok makefawungwa; showobesiis awkesannawa awgirunna yeesere Abrahamneen Isaqneen Yaqobneen isarik Ha’oosi taatoni maddita ane muusone. 12 Sinuntano han Ha’oosi taatosi girsonek teegtere fe baasso ek gerakalo talmaassitu ha’tosone. Estak waasnewa ha’ni koyet foone baassok sinana» yi. 13 Yesus tii meya taar’oni meeni gaanynyaasin: «Hamma, amantoneesimato neek sinfawungwa» yi. Wostinynyabaas dey es kabaasik fari.