Misericórdia

18 म्हारै परमेशर, ताह ज़िहअ निं कोह आथी! तंऐं छ़ांटै हाम्हैं कि हाम्हैं तेरी खास परज़ा होए। तंऐं किऐ म्हारै पाप-दोश माफ। तूह निं सदा लै रोश्श करदअ। तूह हआ झींण करना लै खुश।

पाप माफी लै अरज़

1 हे बिधाता, मुल्है दै जश,

किल्हैकि तूह झ़ूरा मुल्है सदा।

आपणीं महान झींण करी कर

तूह मेरै पाप दूर।

2 मेरी बूराई कर पठी खतम अर

तूह कर मुंह मेरै पापा का शुचअ।

6 हे बिधाता, ज़ीबाण, ऐहा गल्‍ला कर आद कि

तूह आअ जुगा-जुगा ओर्ही सबर अर झींण करदी।

7 हे बिधाता, मेरै खारकी अमरा किऐ दै पाप अर गलती कर माफ।

तूह कर ऐहा गल्‍ला प्रगट कि तूह झ़ूरा सदा अर

झींण करी डाह मुंह आद।

खरीए पलका बिधातो भरोस्सअ

1 हे बिधाता, खास्सै डुघै दी पल़ी पाआ हुंह

खरीए पलका ताह सेटा पकार।

2 हे मेरै मालक, ज़ीबाण, मुंह बाखा दै धैन,

तूह शुण मेरी लेर-पकार कि हुंह मांगा ताखा मज़त।

11 हे बिधाता, तूह निं मुल्है झींण करनी छ़ाडी,

तेरी अटल़ झ़ूरी अर सत्ता करै लोल़ी हुंह राज्ज़ी-राम्बल़अ रहअ।

6 अह गल्‍ल आसा पाक्‍की कि तूह झ़ूरा मुल्है अर ताह करनी मुल्है सदा झींण,

हे बिधाता, मुंह बस्सणअ तेरै घअरै सदा-सदा लै।

13 ज़िहअ बाब आपणैं शोहरू लै झणैल़ू हअ,

तिहअ झणैल़ू आसा बिधाता तिन्‍नां लै ज़ुंण तेऊओ अदर करा।

15 पर ज़ुंण दान परमेशरै दैनअ सह निं आदमी ज़िहअ आथी। किल्हैकि आदमी ज़ुंण सोभी का पैहलअ मणछ त, तेऊ किअ पाप अर तेता करै आई सोभी मणछा लै मौत। पर दुजअ आदमी ईशू मसीहा ज़ुंण बादा का आअ सह मूंअ हाम्हां सोभिए तैणीं, अह हुई हाम्हां लै परमेशरे झींण कि तेऊ बणाऐं हाम्हैं धर्मीं ज़ै कि हाम्हैं नांईं तै एता जोगी आथी।

पापे गलामी का छ़ुटी धर्में दास

15 तै किज़ै हुअ? बधाने बशै निं हाम्हैं आथी हाम्हैं आसा परमेशरे जशा दी, तै कै हाम्हैं पाप करी सका? नां, हाम्हैं निं पाप करी ई सकदै।

4 पर परमेशरा लागा म्हारी खास्सी झींण अर सह करा हाम्हां लै खास्सी झ़ूरी। 5 मसीहा दी विश्वास करनै का आजी तै हाम्हैं पाप करनै पिछ़ू मूंऐं दै ज़िहै, परमेशरै दैनी हाम्हां लै ज़िन्दगी ज़ेभै तेऊ मसीहा मरी करै भिई ज़िऊंदअ किअ अर परमेशरे जशा करै ई आसा थारअ उद्धार हुअ द।

9 पर तेऊ बोलअ हर बगत इहअ, "ताल्है आसा मेरअ जश ई बतेर्हअ। किल्हैकि मेरी शगती करा कमज़ोरी दी खास्सअ काम।" तैही करनअ मुंह आपणीं कमज़ोरी प्रैंदै बडै नंदा दी घमंड कि ईशू मसीहे शगती लोल़ी मुंह प्रैंदै बणी रही।

13 ज़ुंण आपणैं पाप च़ोरी डाहा, सह निं ज़िन्दगी दी सफल हंदअ।

पर ज़ुंण तिन्‍नां मना अर आजू पाप करनअ छ़ाडा, तेऊ लै करा बिधाता झींण।

7 कदुष्ट काम करनै का हटा पिछ़ू,

बूरी सोठ छ़ाडा पोर्ही,

म्हारै परमेशर बिधाता बाखा फिरा,

सह आसा झणैल़ू अर तेऊ हेरनै थारै पाप माफ करी।

18 तैबी रहा बिधाता न्हैल़अ लागी कि तम्हां लै तेऊओ जश होए। सह च़ाहा तम्हां लै झींण करनी, सह करा भलअ ई। सह हआ तिन्‍नां लै खुश ज़ुंण बिधाता दी भरोस्सअ डाहा।

13 डेओआ संघा एछा भाल़ी कि पबित्र शास्त्रा दी किज़ै आसा लिखअ द, परमेशर बोलअ तेथ इहअ, ‘हुंह निं थारै डागै-चैणैंओ बल़ीदान च़ाहंदअ, हुंह च़ाहा इहअ कि तम्हैं झींण करे।’ किल्हैकि ज़ुंण आप्पू लै इहअ समझ़ा कि तिंयां आसा धर्मीं, तिन्‍नां शधाणूं निं हुंह आथी आअ द, पर हुंह आसा तिन्‍नां लै आअ द ज़ुंण इहअ समझ़ा कि तिंयां आसा पापी।"*होश. 6:6

नर्दैई दासे कथ्या

21 तेखअ बोलअ पतरासै, "हे प्रभू, ज़ै मेरअ साथी-संघी मुल्है ज़ुल्म करे, तै हुंह केतरी बारी छ़ाडूं तेऊ लै माफी? साता बारी छ़ाडूं तेऊ लै माफी?" 22 ईशू दैनअ तेऊ लै ज़बाब, "हुंह निं ताल्है बोल्दअ कि सिधअ साता बारी कर तेऊ माफ। पर साता बारीए सत्तर गुणा करी छ़ाडै तेऊ लै माफी।

14 "ज़ै तम्हैं होरी मणछे पाप माफ नांईं करे, तै निं थारै पाप बी थारै स्वर्गै रहणैं आल़ै बाब परमेशरा माफ करनै।

31 तज़ी बी रहअ तूह तिन्‍नां लै खास्सअ झणैल़ू बणी अर

तंऐं निं तिंयां शोटी डाहै अर नां पठी बरैबाद किऐ।

तूह आसा जश दैणैं आल़अ अर झणैल़ू परमेशर।

5 तेऊ मणछा लै हआ बर्गत ज़ुंण होरी लै बी ऋण दैआ अर

ज़ुंण बपार करना लै मानदार हआ।

17 ए म्हारै मालक, हाम्हां लै लोल़ी तेरी बर्गत हुई।

हाम्हां कर हर कामां दी सफल।

16 एछा, हाम्हां करनी हिम्मत संघा डेऊणअ तेऊ मसीहा नेल़, ज़ुंण स्वर्गे राज़गाद्दी का राज़ करा। तेऊ किई हाम्हां लै एही झींण ज़ेते हाम्हैं हकदार बी नांईं तै आथी। म्हारी खरीए पलका रहणअ सह मसीहा ई हाम्हां लै झणैल़ू अर म्हारी मज़त बी करनी तेऊ ई।

परमेशरे च़ाकरी करने ज़िन्दगी

1 भाईओ, हुंह करा तम्हां का परमेशरै झींण आद फरेऊई करै अरज़ कि परमेशरा सम्हनै करा आपणीं ज़िन्दगी ज़िऊंदै बल़ीदाना ज़िहअ पबित्र बल़ीदान अर ज़ुंण परमेशरा बधिया लागा। अह ई आसा तेऊए च़ाकरी करने असली बात।

16 "किल्हैकि परमेशरै किई सारै संसारा संघै एही झ़ूरी कि तेऊ दैनअ आपणअ कल्ही पूत बल़ीदान हणां लै, ताकि ज़ुंण बी तेऊ दी विश्वास करे सह निं लोल़ी मूंअ, पर तेऊ लोल़ी सदा रहणैं आल़ी ज़िन्दगी भेटी।

29 किल्हैकि मसीहा पिछ़ू आसा तम्हां लै इहअ जश हुअ द कि नां सिधअ तेऊ दी विश्वास करा, पर तेऊए तैणीं ज़िरा दुख बी।

राज़ै हिजकिया किई ऊवार्णे थैर मनाऊंणे तैरी

1 राज़ै हिजकिया दैनअ इज़राईल अर यहूदा मुल्खै सोभी लै समाद, एप्रैम अर मनिश्शे गोत्रा लै बी दैनअ तेऊ च़िठी लिखी समाद। तेऊ किअ सोभी लै छ़ांदअ कि राज़धानी एरुशलेम मनाऊंणअ इज़राईले परमेशर बिधाता लै ऊवार्णैओ थैर, तेता लै लोल़ी सोभै आऐ। 2 राज़ै अर कार-करिंदै किई आप्पू मांझ़ै सट-सलाह कि ऐहा बारी मनाऊंणअ हाम्हां ऊवार्णैओ थैर बशाहै। 3 एही ता मनाऊंआं तै ऊवार्णैओ थैर च़ैत्रै पर अज़ी ती कई प्रोहते शुधी हणीं बाकी अर सारै का होर लोग बी निं एरुशलेम अज़ी पुजै तै। 4 तेखअ हुऐ ऐहा गल्‍ला लै राज़अ अर सारी सभा दी सोभ राज्ज़ी कि ऊवार्णैओ थैर मनाऊंणअ बशाहै। 5 तेखअ पजैल़अ तिन्‍नैं दखण बेर्शेबा उझै उतर दान तैणीं सोभी इज़राईली सेटा समाद कि सोभै लोल़ी बधाने साबै आपणैं परमेशर बिधाते ऊवार्णे थैरा मनाऊंदै एरुशलेम आऐ। तधू आऐ तेऊ थैरा लै एतरै खास्सै मणछ कि तेतरै निं कधि आऐ तै। 6 राज़ै हिजकिया ज़ुंण दूत छ़ाडै, तिंयां डेऊऐ इज़राईल अर यहूदा मुल्खै सारै दी तिन्‍नां का थिअ च़िठी लिखी इहअ सारी परज़ा लै इहअ छ़ांदअ दैनअ द,

"इज़राईली मणछो, ज़ुंण तम्हैं अश्शूरी राज़ै का बच़ै दै आसा, ऐबै फिरा आपणैं दाद-बाब आबराम, इसहाक अर इज़राईले परमेशर बिधाता बाखा, तै जाणअ बिधातो कोप तम्हां का दूर हई। 7 थारै दाद-बाब अर इज़राईली मांझ़ै होर भाई-बंध ज़ुंण आपणैं परमेशर बिधाता लै शुचै-पाक्‍कै नांईं रहै, तम्हां निं तिन्‍नां ज़िहै हई। तम्हैं भाल़अ आपणीं आछी कि बिधाता तिन्‍नां लै केही सज़ा दैनी। 8 तम्हैं निं तिन्‍नां ज़िहै जर्ड हई अर तम्हैं करै तिहअ ज़िहअ बिधाता हुकम करा। तम्हैं लोल़ी एरुशलेम बिधाते भबना लै आऐ, ज़ुंण भबन म्हारै परमेशर बिधाता सदा लै पबित्र किअ कि तिधी तेऊए पूज़ा होए। तेखअ जाणअ बिधातो कोप तम्हां का दूर हई। 9 ज़ै तम्हैं बिधाता बाखा बापस एछे, तै जाणीं दुशमणा थारै तिन्‍नां भाई-बंधा लै झींण फिरी ज़ुंण तिन्‍नैं कैद करी गलामी दी आसा निंयैं दै अर तिंयां हेरनै तिन्‍नां घअरा लै बापस छ़ाडी। म्हारअ परमेशर बिधाता आसा झणैल़ू अर सह झ़ूरा हाम्हां लै खास्सअ। ज़ै तम्हैं तेऊ बाखा फिरे, तेखअ निं लाई तेऊ तम्हां बाखा पिठ डाही फरेऊई।"

10 नगरी-नगरी हांढदी पुजअ अह समाद एप्रैम, मनिश्शे, उतरा बाखा बस्सै दै ज़बलून गोत्रा आल़ै सेटा, पर तिंयां सोभै लागै तिन्‍नां लै हास्सदै अर सुहांगा करदै। 11 पर तज़ी बी थिऐ आशेर, मनिश्शे अर ज़बलून गोत्रा मांझ़ै कई भलै मणछ अर तिंयां आऐ एरुशलेम नगरी लै। 12 यहूदा सारै देशै बी हुअ बिधातो इहअ प्रतप्प कि तिंयां तैर्हुऐ ज़िहअ बोलअ तिहअ ई करना लै ज़िहअ राज़ै हिजकिया अर तेऊए कार-करिंदै हुकम किअ त।

राज़धानी एरुशलेम मनाऊंअ ऊवार्णैओ थैर

13 बशाहै झाल़्हुऐ राज़धानी एरुशलेम ऊवार्णे अर आखरी रोटीए थैरा मनाऊंदै खास्सै मणछ। 14 बिधाते भबना छ़ाडी एरुशलेम होर्ती नगरी ज़िधी बी बल़ीदान अर धूप ज़ाल़णा लै बेदी थिई बणाईं दी, तिंयां काढी तिन्‍नैं पोर्ही संघा शोटी किद्रोन नाल़ै। 15 ज़ांऊं च़ौदा बशाहै लोग ऊवार्णै लै मिम्मूं काटदै लागै, प्रोहत अर लेबी पल़अ आप्पू लै शर्मिंदै हणअ, तेखअ किई सोभी आपणीं शुधी संघा आणै बिधाते भबनै हूम बल़ीदान। 16 तेखअ हुऐ तिंयां तेऊ साबै बिधाते भबनै आपणीं-आपणीं ज़ैगा खल़ै ज़िहअ परमेशरे दास मोसा तिन्‍नां लै बधाना दी आसा लिखी डाहअ द। लेबी आणअ बल़ीदान किऐ दै पशूओ लोहू प्रोहता सेटा अर तिन्‍नैं छ़ल़िकअ सह बेदी दी। 17 किल्हैकि लोगा मांझ़ै बी थिऐ इहै ज़ुंण अज़ी बी छ़ोतलै थिऐ। तिन्‍नैं लोगै ज़ुंण ऊवार्णे चैणैं बिधाता लै ज़ुदै शुचै तै डाहै दै, तिन्‍नें तिंयां मिम्मूं काटै तेखअ लेबी आप्पै संघा किऐ बिधाता लै अर्पण।

18 इना का लाऊआ ज़ुंण एप्रैम, मनिश्शे, इस्साकार अर ज़बलून गोत्रा का थिऐ आऐ दै, तिन्‍नां मांझ़ै निं खास्सै ज़ण्हैं बधाने साबै आपणीं शुधी आथी ती किई दी। पर तिंयां बी हुऐ ऊवार्णे मिम्मूंए शिखा खाणां लै साझ़ू। राज़ै हिजकिया भाल़अ कि तिन्‍नैं किज़ै किअ अर तेऊ किई तिन्‍नां लै बिधाता सेटा अरज़, "परमेशर बिधाता, 19 एही ता निं आसा ईंयां बधाने साबै शुचै आथी हुऐ दै! तूह करै इनो पाप-दोश माफ, किल्हैकि ईंयां बी आसा इने दादा-बाबा ज़िहै तत्त-दिला का ताह बिधाता सेटा तेरी पबित्र ज़ैगा माथै टेक्‍कदै आऐ दै।" 20 बिधाता शूणीं हिजकिया राज़े अरज़ संघा किऐ तिन्‍नें पाप-दोश माफ अर तिन्‍नें निं किछ़ हान्‍नी हुई। 21 इज़राईली मांझ़ा का ज़ेतरै लोग एरुशलेम नगरी कठा हुऐ तै, तिन्‍नैं मनाऊंअ खुशी-खुशी साता धैल़ी तैणीं आखरी रोटीओ थैर अर हर धैल़ै करा तै लेबी अर प्रोहत गाज़ै-बाज़ै संघै बिधाते ज़ै-ज़ैकार। 22 ऊवार्णे थैरा लै लेबी अर प्रोहतै ज़ेही समझ़कारी संघै काम किअ, तेते किई राज़ै हिजकिया खास्सी तिन्‍नें सर्राफी।

ऊवार्णैओ थैर मनाऊंअ साता धैल़ै होर

तेखअ रहै तेता बाद साता धैल़ै तैणीं भिई सोभ लोग थैरा मनाऊंदै लागी। संघा किअ मेल़-ज़ोल़े बल़ीदान करी सोभी लोगै आपणैं दादा-बाबे परमेशर बिधातो शूकर। 23 सोभै हुऐ ऐहा गल्‍ला लै राज्ज़ी संघै रहै तेता बाद भिई होर साता धैल़ी तैणीं खुशी-खुशी ऊवार्णे थैरा मनाऊंदै लागी। 24 यहूदा मुल्खे राज़ै हिजकिया दैनै लोगा लै एक हज़ार बाछ़ू, सात हज़ार भेडा-बाकरी हेल़्ही बल़ीदान करी धाम। कार-करिंदै बाखा बी दैनै लोगा लै एक हज़ार बल्द अर दस हज़ार भेडा। तेखअ किई खास्सै प्रोहतै बधाने साबै आपणीं शुधी। 25 यहूदा मुल्खे प्रोहत, लेबी संघी सारी सभा, यहूदा बस्सै दै सोभ लोग, इज़राईल मुल्खा का आऐ दै लोग अर परदेसी बी ज़ुंण ऊवार्णे थैरा लै थिऐ आऐ दै तिंयां थिऐ सोभ खुश हुऐ दै। 26 सारी नगरी ती फेर-फिरदी खुशी किल्हैकि एचल़अ बडअ थैर निं आझ़ तैणीं एरुशलेम नगरीए बस्सै दै लोगै इज़राईले राज़ै दाबेदे शोहरू सुलैमाने ज़मानै ओर्ही भाल़अ ई आथी त। 27 तेखअ हुऐ खिरी प्रोहत अर लेबी खल़ै संघा मांगी सोभी लोगा लै बिधाता का बर्गत। बिधाता शूणीं स्वर्गै तिन्‍नें अरज़।

विश्वास घाती इज़राईल

1 बिधाता बोला इज़राईली लै इहअ, "ज़ै कुंण मणछ आपणीं बेटल़ी छ़ाडी दैआ,

तेऊ छ़ाडी सह बेटल़ी कहा होरी संघै बस्सदी,

तेखअ निं सह पैहलकअ मर्ध तैहा बापस आणी सकदअ।

ज़ै सह इहअ करे, तेता करै लागणीं सारी ज़ैगा छ़ोत!

पर तम्हैं इज़राईली आसा कंज़री बेटल़ी ज़िहै!

तम्हैं झ़ूरै होरी कई देअआ लै! तज़ी बी कै तम्हैं इहअ सोठा कि

तम्हैं सका मुंह सेटा फिरी एछी?✝

2 ओ इज़राईलीओ! उझै भाल़ा निखल़ी धारे च़ुंडी बाखा लै,

तम्हैं किअ मुंह संघै कंज़री बेटल़ी ज़िहअ विश्वास घात।

तम्हैं रहै बाते बाढै आपणैं लोभी न्हैल़ै बेशी।

तम्हैं रहै रेगीस्तानै मारने ताका रहै दै मणछा ज़िहै बेशी।

तम्हैं लाई सारै देशे ज़ैगा छ़ोत अर तम्हैं आसा कंज़री बेटल़ी ज़िहै पापी।

3 तैही निं सरग दैनअ हणैं, तैही निं भराल़ हुअ।

तम्हैं भाल़ा तज़ी बी कंज़री बेटल़ी ज़िहै, तम्हां निं थोल़ी ज़ेही शरम बी आथी!

4 ऐबै बोला तम्हैं मुल्है इहअ, ‘तूह आसा म्हारअ बाब!

तूह झ़ूरा हाम्हां लै होछ़ी उझै!

5 ताह निं सदा हाम्हां लै रोश्श करनै,

तूह जाणअ ज़रूर बिस्सरुई!’

इज़राईलीओ, तम्हैं बोलअ त इहअ ई, पर

तम्हैं रहै कबल्‍लै ज़िहअ थारअ दिल बोलअ तिहै कदुष्ट काम करदै लागी।"

इज़राईल अर यहूदा पल़णअ पछ़ताणअ

6 ज़धू यहूदा मुल्खो राज़अ जोशिया थिअ, तिन्‍नां धैल़ै बोलअ बिधाता मुल्है इहअ, "तंऐं भाल़अ बी कि इज़राईली परज़ा किज़ै किअ? तिन्‍नैं किअ मुल्है विश्वास घात। होरी देअए पूज़ा करी हुऐ तिंयां कंज़री बेटल़ी ज़िहै। तिंयां रहै उझै हर धारा अर हर हरै बूटा गोधै तिन्‍नां लै बल़ीदान करदै लागी।✝ 7 मंऐं सोठअ इहअ कि इना एतरी गल्‍ला करी बी जाणैं तिंयां मुंह सेटा लै बापस फिरी। पर तिन्‍नैं निं धख बी पिछ़ू भाल़अ! इज़राईलीए बैहण यहूदी बी किई तिन्‍नें ई नकल अर तिन्‍नैं बी किअ मुंह संघै विश्वास घात। 8 यहूदा भाल़अ कि मंऐं दैनअ इज़राईल छ़ाडी। मंऐं किऐ तिंयां दूर किल्हैकि इज़राईलै किअ मुल्है खास्सी बारी धोखअ। पर मुखा शुझुअ इहअ बी कि इज़राईले बैहण यहूदा बी निं मेरअ अदर करदी। तिंयां बी निं मुल्है शुचै-पाक्‍कै रहै। तिंयां बी निखल़ै होरी देअआ संघै कंज़रैई करदै। 9 एतरअ हई बी निं इज़राईला शरम आई! तिन्‍नैं लाई सारै देशा लै छ़ोत, तिन्‍नैं किई पात्थर अर डाल़ा-बूटा पूज़ी कंज़रैई। 10 एतरअ, हुअ, तेखअ करा इज़राईले कंज़री बैहण यहूदा मुंह सेटा बापस फिरनेओ दखाअ, दिला का निं सह मुंह संघै आथी! अह गल्‍ल डाही मंऐं बिधाता बोली।"

आजू इज़राईला लै आशा

11 तेखअ बोलअ बिधाता मुल्है इहअ, "इज़राईल अर यहूदा निं मुल्है शुचै-पाक्‍कै रहै। पर इज़राईल निं तेतरअ विश्वास घाती थिअ ज़ेतरअ यहूदा थिअ। 12 तूह डेऊ संघा खोज़ मेरै एऊ समादा उतरा* बाखा बस्सै दै लोगा का। तूह बोलै तिन्‍नां लै इहअ,

‘विश्वास घाती इज़राईलीओ, मुंह सेटा लै एछा बापस फिरी।

हुंह आसा झणैल़ू अर हुंह निं तम्हां लै रोश्श करदअ,

हुंह निं सदा तम्हां का रुश्शी रहणअ।

13 तम्हैं मना सिधअ इहअ कि तम्हैं किई गलती

तम्हैं किअ आपणैं परमेशर बिधाता लै द्रोह।

तम्हैं मना ऐहा गल्‍ला कि तम्हैं झ़ूरै बडै-बडै हर हरै डाल़ा बूटा हेठै होरी देअआ लै