1 जनाब थियुफिलुस, ज़ुंण गल्‍ला हाम्हां जैंदरी हुई-बिति दी आसा, तिन्‍नां गल्‍ला झाल़णैं अर लिखणा लै आसा हाम्हां मांझ़ै खास्सै मणछै मैन्थ किई दी। 2 ईंयां गल्‍ला पजैल़ी हाम्हां सेटा तिन्‍नैं ज़ुंणी ईंयां गल्‍ला पैहलै ई आपणीं आछी भाल़ी अर ईशूए खुशीए समादा ज़ैगै-ज़ैगै खोज़णैं आल़ै थिऐ। 3 तैही सोठअ मंऐं इहअ ठीक कि हुंह लिखूं ताल्है ज़ाच़ी-भाल़ी करै शुरू ओर्ही बाढै इना गल्‍लो पूरअ हाल। 4 ताकि ताखा ऐहा गल्‍लो थोघ लागे कि ज़ुंण गल्‍ला ताखा खोज़ी दी आसा, तिंयां आसा शुची अर अटल़।

5 ज़धू यहूदा मुल्खै हेरोदेस राज़ैओ राज़ थिअ, तधू थिअ अबियाह प्रोहते दला* दी एक जकर्या नाओं प्रोहत अर तेऊए लाल़ी इलीशिबा* ती हारण प्रोहते खिंबा का। 6 तिंयां दुहै ज़ण्हैं तै परमेशरा सेटा धर्मीं अर प्रभूए सारै हुकम अर बधाने बिधी मनणा लै आसा तै तिंयां नर्दोश। 7 पर तिन्‍नें निं आजू आद-लुआद किछ़ै आथी ती! किल्हैकि इलीशिबा ती बांढी अर ऐबै गऐ तै तिंयां दुहै ज़ण्हैं खास्सै प्रोढै बी हई।

8 तेखअ हुअ इहअ कि जकर्ये टोली ती बिधाते भबनै प्रोहतच़ारी करने बारी अर जकर्या त परमेशरे भबनै च़ाकरी करदअ लागअ द। 9 आपणैं रबाज़े साबै परच़ी पाई छ़ांटअ जकर्या तेऊए टोली आल़ै कि सह प्रभूए भबना भितरी डेऊई धूप ज़ाल़े।✝ 10 ज़ांऊं सह भितरी धूप ज़ाल़दअ लागअ, तेभै तै बागा बाखा भबने ताटी खास्सै मणछ प्राथणां करदै लागै दै।

11 तेऊ का शुझुअ नभैऊशै कि एक परमेशरो स्वर्ग दूत हुअ धूप बेदीए दैहणीं बाखा प्रगट। 12 तेऊ स्वर्ग दूता भाल़ी झशकुअ जकर्या! अर डरअ बी खास्सअ। 13 पर स्वर्ग दूतै बोलअ जकर्या लै, "जकर्या, तूह निं डरै आथी, प्रभू हेरी तेरी प्राथणां शूणीं अर तेरी बेटल़ी इलीशिबा का हणअ तेरअ एक शोहरू, तूह डाहै तेऊ शोहरूओ नाअं जोहन्‍ना।" 14 ताह हणीं तेऊ करै नंद अर खुशी, होरी बी भेटणीं खास्सै मणछा तेऊए ज़ल्म हणैं करै खुशी। 15 किल्हैकि सह हणअ प्रभू सम्हनै महान। तेऊ निं कधि दाखो रस अर शराब झुटणअ, सह हणअ आपणीं माए ओदरा ई का पबित्र आत्मां करै भर्हुअ द।✝ 16 तेऊ फरेऊंणै इज़राईला का खास्सै मणछ परमेशर बिधाता बाखा लै। 17 सह डेऊणअ प्रभू आजू-आजू शगती अर पबित्र आत्मां दी एलियाह गूरा ज़िहअ ताकि सह सैणैंओ मन्‍न तिन्‍नें लान्हैं बाखा लै फरेओए अर परमेशरे हुकम नांईं मनणै आल़ै मणछा धर्में समझ़ एछे अर प्रभू लै एक धर्मीं परज़ा बणाईं सके।✝

18 जकर्या पुछ़अ स्वर्ग दूता का, "हुंह किहअ करै करूं ऐहा गल्‍लो भरोस्सअ? आप्पू; हुंह प्रोढअ आसा अर मेरी लाल़ी बी गई प्रोढी हई?"

19 स्वर्ग दूतै बोलअ तेऊ लै इहअ, "हुंह आसा जिबराईल स्वर्ग दूत, अर हुंह रहा सदा परमेशरा सम्हनै खल़्हुई। हुंह आसा परमेशरै ताह सेटा लै गल्‍ला करदअ अर ऐहा खुशीए समादा खोज़दअ छ़ाडअ द।✝ 20 पर ऐबै शुण, ज़ेभै तैणीं ईंयां गल्‍ला पूरी निं हई मुक्‍के, तेभै तैणीं रहणअ तूह काल्‍लअ अर तूह निं किछ़ै बोली सकदअ। इहअ हणअ तै किल्हैकि तंऐं निं मेरी इना गल्‍लो विश्वास किअ ज़ुंण ठीक बगती पूरी हणीं।" 21 लोग तै बागै जकर्या न्हैल़ै-भाल़ै लागै दै अर तिंयां हुऐ रहैन कि जकर्या भबना भितरी एतरी बल़ैग किल्है पाई? 22 ज़ांऊं जकर्या बागै निखल़अ, सह निं किछ़ै बोली सकअ, जकर्या लागअ तिन्‍नां लै शारै करदअ अर सह रहअ काल्‍लअ ई। तै गऐ तिंयां समझ़ी कि बिधाते भबना भितरी शुझुअ हणअ एऊ का किज़ै।

23 ज़ांऊं तेऊए च़ाकरीए धैल़ै पूरै हुऐ, सह डेऊअ आपणैं घअरा लै। 24 इना धैल़ै बाद हुई तेऊए लाल़ी इलीशिबा सुंदी। पर सह निं पांज़ा भिन्‍नैं तैणीं आपणैं घअरा का ओर्ही-पोर्ही दूर डेऊई। 25 सह लागी आपणैं मन्‍नैं बोल्दी कि इना धैल़ै किई अह क्रिप्पा प्रभू मुंह संघै मणछा मांझ़ै इज़त डाहणें तैणीं।✝

26 इलीशिबा सुंदी हणें छ़हा भिन्‍नैं बाद छ़ाडअ परमेशरै जिबराईल नाओं स्वर्ग दूत गलील मुल्खै नासरत नाओंऐं नगरी एकी कुंआरी सेटा। 27 तैहा कुंआरी नाअं त मरिअम अर तेसे बरनीं ती दाबेदे राज़े खिंबे एकी युसुफा नाओंऐं मर्धा संघै हुई दी। 28 स्वर्ग दूत आअ तैहा सेटा भितरी संघा बोलअ तैहा लै, "तेरी हणीं बधाई, परमेशरै दैनअ ताल्है जश अर प्रभू आसा ताह संघै।"

29 एऊ बैणा शूणीं पल़अ मरिअमे मन्‍नैं झाख अर सह लागी इहअ सोठदी कि इना गल्‍लो किज़ै मतलब आसा। 30 तेखअ बोलअ स्वर्ग दूतै तैहा लै, "हे मरिअम, तूह निं फिकर करी ताल्है किई परमेशरै झींण। 31 भाल़, तूह हणीं सुंदी अर तेरअ हणअ एक शोहरू अर तूह डाहै तेऊ नाअं ‘ईशू।’✝ 32 सह हणअ महान अर परम प्रधान परमेशरो पूत। परमेशर बिधाता तेरै दाद-बाब राज़ै दाबेदे राज़गाद्दी तेऊ लै।✝ 33 तेऊ करनअ याकबे घरानै दी सदा राज़, अर सह हणअ सदा लै राज़अ।"✝

34 मरिअमै बोलअ स्वर्ग दूता लै, "इहअ किहै करै सका हई? हुंह, कुंआरी आसा?"

35 स्वर्ग दूतै बोलअ तैहा लै, "ताल्है एछणअ पबित्र आत्मां अर परम प्रधान परमेशरे शगती रहणीं ताह संघै। ज़ुंण सह पबित्र शोहरू पैईदा हणैं आल़अ आसा, तेऊ लै बोल़णअ परमेशरो पूत।" 36 शुण, तेरी मसेरी बैहण इलीशिबे बारै आसा सोभी का थोघ कि सह आसा बांढी; एभै आसा तेसो छ़ऊअ भिन्‍नअ लागअ द। 37 परमेशरे भलै सका सोभै गल्‍ला हई।✝

38 मरिअमै बोलअ तेऊ स्वर्ग दूता लै, "भाल़, हुंह आसा प्रभूए दासी, ज़िहअ तूह बोला तिहअ ई लोल़ी मुल्है हुअ।" सह स्वर्ग दूत डेऊअ तेखअ तिधा का।

39 संघा डेऊई तिन्‍नां ई धैल़ै बाद मरिअम उझै सराज़ा दी यहूदा मुल्खै एकी नगरी लै ज़िधी जकर्या प्रोहत रहा त। 40 ज़ांऊं सह जकर्ये घअरै पुजी, तैहा पुछ़ी इलीशिबा का राज्ज़ी-खुशी, 41 ज़हा घल़ी इलीशिबा मरिअमे राज्ज़ी-खुशी शूणीं, तैहा ई घल़ी लागअ तेसे पेटै शोहरू च़ुकदअ अर इलीशिबा भर्हुई पबित्र आत्मां करै।

42 इलीशिबा बोलअ ज़ोरै हाक पाई, "परमेशरै बणाईं तूह सोभी बेटल़ी दी बडी अदर करनै जोगी अर ज़हा शोहरू लै ताह ज़ल्म दैणअ, तेऊ लै बी दैनी परमेशरै बर्गत। 43 मेरै ईंयां भाग किधा का खुल्है कि मेरै प्रभूए ईज आई मुंह सेटा लै? 44 भाल़ मरिअम, ज़ांऊं तंऐं मुल्है राज्ज़ी-खुशी पुछ़ी अर सह बोल ज़ांऊं मेरै कानै पुजअ, तैहा ई घल़ी लागअ मेरै पेटै शोहरू खुशी-खुशी च़ुकदअ। 45 परमेशरा दैणीं ताल्है बर्गत, किल्हैकि तंऐं किअ विश्वास कि ज़ुंण गल्‍ला प्रभू बाखा का ताल्है बोली ती, तिंयां हणीं पूरी।"

46 तेखअ बोलअ मरिअमै,✝

"मेरी आत्मां करा प्रभूए ज़ै-ज़ैकार

47 अर हुंह हुई उद्धार दैणैं आल़ै परमेशरा करै खुश।

48 किल्हैकि तेऊ भाल़ी हुंह ज़ुंण तेऊए दासी अर तैही भाल़ा,

एभा पोर्ही जुगे-जुगे लोगा बोल़णअ इहअ कि परमेशरै दैनी मुल्है बर्गत।

49 किल्हैकि स्वर्गे सारी सैने मालक परमेशरै किऐ मुल्है बडै-बडै काम

अर तेऊओ नाअं आसा पबित्र

50 अर तेऊए झींण हआ तिन्‍नां लै ज़ुंण तेऊए डरा हेठै रहा,

अर सह झींण रहा पोस्ती दर पोस्ती बणी।

51 "तेऊ रहैऊअ आपणीं बाहो बल✝

अर ज़ुंण आप्पू बडअ समझ़ा तै तिंयां दरल़ाऊऐ तेऊ सातै-बातै।

52 तेऊ किअ बडै-बडै राज़ैओ राज़ खतम,

अर दुखी-दल़िदर किऐ बडै।

53 भुखै दैनै तेऊ बधिया गल्‍ला करै रज़ैऊई

अर सेठ काढै रित्तै हाथै दरल़ाऊई।

54 "आपणैं च़ाकरी करनै आल़ै इज़राईलीए किई तेऊ हेर-सभाल़

कि तिंयां तेऊए झींण आद डाहे,

55 ज़ुंण आबरामा अर तेऊए खिंबा दी सदा रहणीं।

"ज़िहअ तेऊ म्हारै दादा-बाबा का बोलअ त।"✝

56 मरिअम रही चिई भिन्‍नैं तैहा सेटा अर तेखअ आई सह घअरा लै फिरी।

57 तेखअ आऐ इलीशिबे सूंणें धैल़ै अर तेसो हुअ एक शोहरू। 58 ज़ांऊं तेसे साथी-संघी शूणअ कि परमेशरै किई तैहा लै झींण अर तेसो हुअ शोहरू, तिंयां बी हुऐ खास्सै खुशी।

59 तेखअ हुअ इहअ कि आठुऐ धैल़ै निंयं आपणअ शोहरू तिन्‍नैं खतैर करना लै, तिन्‍नैं लाअ त तेऊओ नाअं तेऊए बाब ज़िहअ जकर्या डाही।✝ 60 पर तेऊए ईजै बोलअ इहअ, "एऊ शोहरूओ नाअं डाहंणअ जोहन्‍ना।"

61 तिन्‍नैं होरी बोलअ तैहा लै इहअ तेरै खिंबा दी निं इहअ नाअं कोहिओ आथी? 62 तेखअ पुछ़अ तिन्‍नैं तेऊ शोहरूए बाबा का शारै करै, "किहअ करनअ? कि तूह एऊओ नाअं कै च़ाहा डाहंणअ?" 63 तेखअ मांगी तेऊ तिन्‍नां का लिखणे तगती अर तेथ लिखअ, "एऊओ नाअं आसा जोहन्‍ना।" तिंयां सोभ हुऐ रहैन। 64 तेऊओ खाख अर ज़िभ खुल्ही तेभी; सह लागअ गल्‍ला करदअ अर परमेशरो शूकर करदअ।

65 तेऊ ओरी-पोरी रहणैं आल़ै डरै सोभ अर तिंयां गल्‍ला पुजी तेस्सी बाती तेस्सी कई ज़ैगा यहूदा मुल्खै सारै सराज़ै। 66 ईंयां गल्‍ला ज़ुंणी बी शूणीं तिंयां लागै आपणैं मन्‍नैं सोठी बोल्दै कि अह शोहरू किहअ हणअ? किल्हैकि प्रभूए शगती आसा तेऊ संघै।

67 तेऊ शोहरूओ बाब जकर्या भर्हुअ पबित्र आत्मां करै अर सह लागअ आजू हणैं आल़ी गल्‍ला प्रगट करदअ,✝

68 "प्रभू, इज़राईले परमेशरे ज़ै-ज़ैकार✝

तेऊ दैनअ आपणीं परज़ा लै धैन अर तेऊ दैनअ तिन्‍नां लै छ़ुटकारअ।

69 आपणैं दास राज़ै दाबेदे खिंबा दी दैनअ आजू एक इहअ शगती आल़अ,

ज़हा हाम्हां लै उद्धार दैणअ।

70 ज़िहअ परमेशरै खास्सी साला पैहलै आपणैं पबित्र गूरा का खोज़अ

ज़ुंण एऊ संसारे शुरू ई का थिऐ बोल्दै लागै दै।

71 म्हारै तिन्‍नां दुशमणे हाथा का दैनअ हाम्हां लै उद्धार

ज़ुंण हाम्हां संघै ज़ीद डाहा तै।

72 परमेशरै डाही म्हारै दादा-बाबा लै झींण करी

आपणीं पबित्र करार आद।

73 "ता सह करार ज़ुंण तेऊ म्हारै दाद-बाब आबरामा संघै किई ती,✝

74 कि तेऊ दैणअ हाम्हां लै इहअ कि

हाम्हैं आपणैं दुशमणे हाथा का बच़ी

75 तेऊ सम्हनै पबित्र धर्मीं अर निहंचै

सारी ज़िन्दगी तेऊए च़ाकरी करदै रहे।

76 "हे शोहरूआ,✝

तूह हणअ परम प्रधान परमेशरो गूर,

किल्हैकि तूह हांढणअ आजू-आजू ताकि प्रभू एछणें धैल़ी लै लोगा तैर करी सके,

77 ताकि तूह तेऊए लोगा लै उद्धारो ज्ञैन दैई सके,

ज़ुंण तिन्‍नें पाप माफ हई भेटणअ।

78 किल्हैकि परमेशर आसा हाम्हां लै झणैल़ू

तेऊ करनै हाम्हैं माफ इहअ करै अह उद्धार करनै आल़अ

ज़ुंण दोत्ती सुरज़ा ज़िहअ आसा, अह एछणअ स्वर्गा का म्हारी मज़त करदअ ताकि

79 न्हैरै अर मौते छ़ैल्‍ली दी बेशणै आल़ै लै प्रैश्शअ होए।

"तेऊ खोज़णीं हाम्हां का सुंबल़ी बात ताकि हाम्हैं शांती दी ज़िऊई सके।"✝

80 इहअ करै लागअ सह शोहरू जोहन्‍ना बढदअ अर आत्मां दी जोधअ हंदअ अर इज़राईल देशे लोगा मांझ़ै प्रच़ार करनै का आजी तैणीं रहअ सह शुन्‍नैं रेगीस्तानै।