1 रोमी राज़ा दी थिअ तिबरिउस माहा राज़अ, तेऊए राज़ा दी पंद्रुई साला त पुंतिउस पिलातुस यहूदा मुल्खो राज़पाल। तधू त हेरोदेस च़ऊ मुल्खा मांझ़ै* गलील मुल्खो राज़अ अर तेऊओ भाई फलिप्प त इतूरीआ अर तरखोनितिस इना दुही मुल्खो राज़अ। अबिलेना मुल्खै त लिसानियास राज़अ। 2 तधू थिऐ हन्‍ना अर काईफा माहा प्रोहते पदबी दी। तिन्‍नां ई धैल़ै किई परमेशरै जकर्ये शोहरू जोहन्‍ना संघै गल्‍ला, ज़धू सह दूर शुन्‍नैं रेगीस्तानै थिअ। 3 जोहन्‍ना लागअ जरदण नदी नेल़ सारै मुल्खै लोगा लै प्रच़ारा करदअ कि सह थिअ इहअ प्रच़ार करदअ लागअ द कि आपणैं पापो प्राश्त करा, अर परमेशरा सेटा एछा फिरी, ताकि परमेशर तम्हां माफ करे अर पाणीं दी लआ डुबकी। 4 ज़िहअ परमेशरे गूर ईशायाहे कताबा दी आसा लिखअ द,

"शुन्‍नैं रेगीस्ताना का आसा कुंण हाक्‍का लांदअ अर इहअ बोल्दअ लागअ द,

‘प्रभू एछणें धैल़ी लै डाहा बाता शुंहीं-शोधी,

तेऊए सुआगत करना लै रहा सोभ तैर्हुई।’

5 सोभी खागा भरा,

उछ़टी धारा करा धरनीं सरली।

बडी-बडी ज़ोता बणअ सरलअ देश,

उछ़टी-निंहंटी ज़ैगा हणीं बराबर च़कोर।

6 परमेशरो उद्धार शुझणअ सोभी मणछा का।"

7 लोगे छ़ुंड ई छ़ुंड एछा तै तेऊ सेटा लै डुबकी लंदै अर सह बोला त तिन्‍नां का इहअ, "तम्हैं मणछ आसा झ़रीली दानुईंए शोहरू ज़िहै! तम्हां का कोही निं खोज़अ कि ज़ुंण तम्हैं पाप किऐ परमेशरा दैणीं तम्हां सोभी लै तेते सज़ा? इहअ निं सोठा कि तम्हैं जाणैं तेऊ का बच़ी?" 8 इहै काम ता करा ज़ेता करै थोघ लागे कि तम्हैं हेरअ प्राश्त करी पाप करनअ छ़ाडी अर आपणैं-आपणैं मन्‍नैं निं इहअ सोठा कि हाम्हैं आसा आबरामे खिंबा का, तै निं हाम्हां लै परमेशरा सज़ा दैणीं। हुंह बोला तम्हां का इहअ कि परमेशर सका इना पात्थरा का बी आबरामा लै लुआद पैईदा करी। 9 परमेशर आसा तम्हां लै सज़ा दैणें ताका बेठअ द ज़िहअ मणछ राम्बल़ै फल़ नांईं दैणैं आल़ै बूटा खराल़ै करै गोधी का काटा। तिहै ई पाणै तेऊ बी तिंयां सारै बूट गोधी का पेच़ी करै आगी जैंदरी।

10 तेखअ लोगै जोहन्‍ना का पुछ़अ कि तै हाम्हां किज़ै लागणअ करनअ?

11 तेऊ दैनअ तिन्‍नां लै ज़बाब कि ज़हा का दूई कुर्तै आसा सह दैआ एक कुर्तअ तेऊ लै ज़हा का नांईं आथी अर ज़हा का रोटी आसा सह बी करा इहअ ई।

12 कारै गराहणै आल़ै बी आऐ तेऊ सेटा लै डुबकी लंदै अर तेऊ का पुछ़अ कि ए गूरू, हाम्हैं कै करूं?

13 तेऊ बोलअ तिन्‍नां लै, "लोगा का ज़ेतरै कारै लणा लै रोम राज़ै बधान आसा बणाअं द तेता का खास्सअ निं लोगा का लुटी।"

14 सपाही बी पुछ़अ तेऊ सेटा एछी "हाम्हैं कै करूं?"

जोहन्‍ना बोलअ तिन्‍नां लै, "थोघै बाझ़ी कूट-मार निं कोही लै करी अर नां कहा लै झ़ुठअ दोश लाई अर आपणीं मज़दूरी दी रहै खुश।"

15 सोभी लोगा ती मसीहा एछणें आशा अर तिंयां सोभ तै आपणैं-आपणैं मन्‍नैं जोहन्‍ने बारै सोठदै लागै दै कि अह ई किनी आसा मसीहा? 16 अर जोहन्‍ना तिन्‍नां लै ज़बाब दैनअ, "हुंह, दैआ तम्हां लै पाणीं दी डुबकी; पर सह आसा एछणैं आल़अ ज़ुंण मुंह बाद एछणैं आल़अ आसा, सह आसा सोभी का महान अर इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ दास बणी सकूं। तेऊ दैणअ तम्हां लै पबित्र आत्मां अर आगी दी डुबकी। 17 तेऊओ शूप आसा तेऊए हाथै, तेऊ करनी आपणैं खहल़े राम्बल़ै करै सफाई अर धर्मीं मणछ करनै तेऊ ज़ुदै ज़िहअ कृषाण कणक खुडी करा कठा, कदुष्ट मणछ पाणै तेऊ भुखलै ज़िहै एही आगी जैंदरी दहई, ज़ुंण आग कधि निं हिठदी आथी।"

18 सह रहअ कई शिक्षा दैई लोगा समझ़ाऊंदअ लागी अर लोगा लै खुशीए समादा खोज़दअ लागी। 19 पर जोहन्‍ना नैरअ गलील मुल्खो राज़अ हेरोदेस तेऊए भाई फलिप्पे बेटल़ी हेरोदियासा डाहणें पिछ़ू अर सोभ कदुष्ट काम ज़ुंण तेऊ राज़ै किऐ तै, तेता लै बोलअ, ईंयां आसा गलत। 20 अर हेरोदेस राज़ै किअ तेता का बी खास्सअ कदुष्ट काम कि जोहन्‍ना पाअ कैद खानै दी।

21 ज़ांऊं सोभी लोगै डुबकी लई, ईशू बी त डुबकी का बाद प्राथणां करदअ लागअ द। तेखअ हुअ इहअ कि हेरा-हेरी खुल्हअ सरग अर 22 पबित्र आत्मां होथी पालल़ी ज़ेही तेऊ दी अर परमेशरै किई स्वर्गा का ईशू संघै एही गल्‍ला, "तूह आसा मेरअ पूत ज़हा संघै हुंह खास्सी झ़ूरी करा। हुंह आसा ताखा खुश।"

23 ज़ांऊं ईशू आप्पू बी शिक्षा दैंदअ लागअ, तेऊए अमर ती कोई तिहा साले ज़िहअ लोग समझ़ा तै, ईशू त युसुफो शोहरू। युसुफो बाब त एली।

24 एली त मत्तातो शोहरू, मत्तात त लेबीओ शोहरू अर लेबीओ बाब त मलकी। मलकी त जानाई अर जानाई थिअ युसुफो शोहरू।

25 युसुफ त मतियाहो शोहरू। मतियाह थिअ आमोसो शोहरू। आमोस त नहूम अर नहूम त असलाहो शोहरू अर सह थिअ नगाईओ शोहरू।

26 नोगह त माथो अर सह थिअ मतियाहो शोहरू। मतियाह त शिमीओ अर सह थिअ जोसेको शोहरू। जोसेक त जोदो शोहरू।

27 जोदा त जोनान शोहरू। जोनान त रेसा अर सह थिअ जरूबाबलो शोहरू। जरूबाबल त शालतीएल अर तेऊओ बाब त नेरी।✝

28 नेरी त मलकीओ शोहरू। मलकीओ बाब थिअ आदी अर सह थिअ कोसामो शोहरू। कोसामो बाब थिअ इलमोदाम अर तेऊओ बाब त एर।

29 एर त ज़ैहसू अर जोशूओ बाब त एलीआजर।

एलीआजर त जोरीमो अर सह थिअ मत्तातो शोहरू अर मत्तातो बाब थिअ लेबी।

30 लेबी त शमौनो अर शमौन थिअ यहूदो शोहरू। यहूदा त युसुफो शोहरू अर युसुफ त जोनाम शोहरू। जोनाम त इल्याकिमो शोहरू।

31 इल्याकिम थिअ मलेआह अर मलेआह त मिनाहो शोहरू। मिनाह त मत्तातो अर मत्तातो बाब थिअ नातान अर सह थिअ दाबेद राज़ैओ शोहरू।✝

32 राज़अ दाबेद त ईशैई अर सह थिअ ओबेदो शोहरू। ओबेद त बोआज़ो अर बोआज़ थिअ सलमोनो शोहरू अर सलमोनो बाब त नहशोन।✝

33 नहशोन थिअ अमीनादाबो शोहरू अर तेऊओ बाब थिअ अदमीन। तेऊओ बाब थिअ अरनी अर सह थिअ हिस्रोनो शोहरू। हिस्रोन थिअ फिरिसो शोहरू अर फिरिसो बाब त यहूदा।✝

34 यहूदा थिअ याकबो शोहरू अर याकबो बाब थिअ इसहाक। इसहाक त आबरामो शोहरू अर आबराम थिअ तेराहो शोहरू। तेराहो बाब त नाहोर।✝

35 नाहोर थिअ सरूग, सह थिअ रऊओ अर रऊ थिअ फिलिगो शोहरू। फिलिग त एबेर अर एबेर थिअ शेलाहो शोहरू।

36 शिलोह त कनानो अर कनान थिअ अरफक्षदो शोहरू। अरफक्षद थिअ शेमो अर शेम त नूहो शोहरू। नूहो बाब थिअ लेमेक।✝

37 लेमेक थिअ मथूशिलोहो अर सह थिअ हणोको शोहरू। हणोक थिअ जेरेदो अर तेऊओ बाब त महलेल। महलेल थिअ कनानो शोहरू।

38 कनान थिअ एनोशो अर एनोश थिअ शेतो शोहरू। शेतो बाब त आदमी अर आदमी थिअ परमेशरो पूत ज़ुंण परमेशरै सोभी का पैहलै बणाअं।✝