लूका 20

ईशूए हको सुआल

1 एकी धैल़ी हुअ इहअ कि ज़ांऊं ईशू भबनै लोगा लै शिक्षा दैंदअ अर खुशीए समादा खोज़दअ त लागअ द, तिधी नेल़ एछी खल़्हुऐ बडै प्रोहत, शास्त्री अर तिन्‍नें सैणैं। 2 तिंयां लागै बोल्दै, "हाम्हां का खोज़ इहअ कि ताह इना कामां करनैओ किज़ै हक आसा अर सह कुंण आसा, ज़ुंणी ताल्है हक आसा दैनअ द?"

3 ईशू बोलअ तिन्‍नां लै, "हुंबी पुछ़ा तम्हां का एक सुआल, तम्हैं खोज़ा मुखा इहअ 4 जोहन्‍ने डुबकी कहा बाखा का आसा ती? स्वर्गा बाखा का कि संसारे मणछा बाखा का?"

5 तिंयां लागै तेखअ आप्पू मांझ़ै इहै हठल़दै, "ज़ै हाम्हैं इहअ बोले कि स्वर्गा का, तै एऊ बोल़णअ हाम्हां लै इहअ कि तै तम्हैं तेऊओ विश्वास किल्है निं किअ? 6 अर ज़ै हाम्हैं बोले कि मणछा बाखा का, लोगा मारनै हाम्हैं पात्थरा करै, किल्हैकि तिंयां मना इहअ कि जोहन्‍ना थिअ परमेशरो गूर।" 7 तिन्‍नैं बोलअ ईशू लै इहअ, "हाम्हां का निं थोघै कि जोहन्‍ना कहा का भेटअ तेतो हक।"

8 ईशू दैनअ तिन्‍नां लै ज़बाब, "तम्हैं निं मेरी सुआलो ज़बाब दैनअ आथी! हुंबी निं तम्हां लै ऐहा गल्‍ला खोज़दअ कि मुल्है हिझ़ इना कामां करनैओ हक कुंणी दैनअ।"

कदुष्ट कृषाणे कथ्या

9 तेखअ खोज़ी ईशू लोगा का एक कथ्या, "एकी मणछै लाअ दाखो बाग। तेखअ डाहअ सह बाग होरी कृषाणा का ठेकै दी दैई अर आप्पू डेऊअ परदेसा लै।✝20:9 मार्क. 12:1-12; मोत्त. 21:33-46

10 "तेखअ हुअ खास्सै धैल़ै बाद इहअ कि तेऊ छ़ाडअ आपणअ एक दास तिन्‍नां सेटा लै कि दाखे बागे साला बाद हुई कमाई मांझ़ै तेऊओ हेस्सअ दैआ ओर्ही। पर तिन्‍नैं पाअ सह च़िक्‍की अर सह फिरअ रित्तअ बापस। 11 तेखअ छ़ाडअ तेऊ तिन्‍नां सेटा लै एक होर दास, पर सह बी छ़ाडअ तिन्‍नैं च़िक्‍की मारी बेइज़ती करी बापस रित्तै हाथै। 12 तेखअ छ़ाडअ तेऊ चिऊथअ अर सह बी किअ तिन्‍नैं ज़खमी, तेखअ दरल़ाऊअ तिधा का।

13 "खिरी सोठअ दाखे बागे मालकै इहअ, ‘ऐबै हुंह कै करूं?’ ऐबै छ़ाडणअ मुंह आपणअ शोहरू ज़हा संघै हुंह खास्सी झ़ूरी करा तेऊओ अदर, हेरे तिंयां करी।

14 "ज़ांऊं तिन्‍नैं कृषाणै भाल़अ कि तेऊओ शोहरू आअ, तिन्‍नैं किअ आप्पू मांझ़ै बच़ार, ‘अह आसा तेऊए लुआद, एछा अह पाणअ हाम्हां मारी अर बादा का हणीं सारी ज़ैदात म्हारी।’ 15 तिन्‍नैं बी काढअ सह दाखे बागा का बागै, संघा पाअ सह मारी। ऐबै सोठा तम्हैं ऐहा गल्‍ला कि दाखे बागे मालका तिन्‍नां संघै किज़ै करनअ? 16 तेऊ एछणअ, संघा करनै तिंयां कृषाण तेऊ मारी हक्‍क अर दाखो बाग दैणअ तिन्‍नां होरी का।"

इहअ शूणीं तिन्‍नैं बोलअ, "परमेशर निं इहअ करे।"

17 ईशू बोलअ तिन्‍नां बाखा भाल़ी करै, "तै अह कै आसा शास्त्रा दी लिखअ द,

* 20:17 भज. 118:22,23 ‘ज़ुंण पात्थर राज़ मिस्त्री बृथा समझ़अ त,

सह ई बणाईं कूणींए ज़ान।’

18 "ज़ुंण ऐहा ज़ानीं प्रैंदै पल़े, तेऊए हणीं छ़णीं-छ़णीं अर ज़हा प्रैंदै अह ज़ान पल़े तेऊओ हणअ च़ूर।" * 20:18 दान. 2:34,35

माहा राज़ै लै कारअ दैणअ

19 शास्त्री अर बडै प्रोहतै च़ाहअ ईशू ढाकणअ किल्हैकि तिंयां गऐ समझ़ी कि अह कथ्या खोज़ी एऊ हाम्हां लै, पर तिंयां डरै तिधी लोगा का। 20 पर तिंयां रहै ईशू लै ताखुई अर तेऊ पिछ़ू लाऐ भेद लणैं आल़ै धर्मीं मणछे भेश बणाईं करै, ताकि तेऊए कोई नां कोई गलती ढाके, अर तेऊ हाम्हैं सैणें हाथै दैई सके।

21 तिन्‍नैं पुछ़अ ईशू का, "हे गूरू, हाम्हां का आसा थोघ कि तूह आसा शुचअ अर सखाऊआ बी शुचअ, अर कहा संघै भेदभाब बी निं करदअ, परमेशरा सेटा डेऊणे बात खोज़ा तूह सत्ता दी।" 22 ऐबै खोज़ तूह इहअ कि म्हारअ माहा राज़ै लै कारअ दैणअ राम्बल़ी गल्‍ल आसा कि माल़ी?

23 पर ईशू हेरी तिन्‍नें दिलो कपट समझ़ी संघा बोलअ तिन्‍नां लै, "रोम राज़ो एक सिक्‍कअ रहैऊआ मुखा। 24 एथ दी कसरी मुहुर्ती अर नाअं आसा?"

तिन्‍नैं बोलअ, "माहा राज़ैओ।"

25 ईशू बोलअ तिन्‍नां लै, "ज़ुंण माहा राज़ैओ आसा, तेऊ दैआ माहा राज़ै लै अर ज़ुंण आसा परमेशरो तेऊ दैआ परमेशरा लै।" 26 तिंयां निं लोगे सम्हनै तैहा गल्‍ला ढाकी सकै पर तिंयां हुऐ तेऊए ज़बाबा शूणीं रहैन अर तिंयां रहै च़ुप्पी।

भिई ज़िऊंदै हणअ अर बैह

27 तेखअ सदुकी पंथे लोग ज़ुंण इहअ बोला कि मूंऐं दै का ज़िऊंदअ हणअ निं किधी आथी अर तिन्‍नां मांझ़ै कई आऐ ईशू सेटा लै अर पुछ़अ कि 28 "हे गूरू, परमेशरे गूरै मोसा आसा हाम्हां लै इहअ लिखअ द कि, ज़ै कसरअ भाई आपणीं लाल़ी रहंदी बाझ़ी लान्हैं हई मरे, तेऊओ दुजअ भाई करै तैहा संघै बैह अर आपणैं भाई लै करै लुआद पैईदा।✝20:28 मूल. 38:8; बधा. 25:5

29 "ता एकी ज़ैगा तै सात भाई अर पैहलअ भाई मूंअ बैह करी अर तेऊए निं कोई बी लुआद हुई। 30 इहअ करै दुजै अर चिऊथै बी किअ तैहा संघै ई बैह। 31 इहअ करै तिंयां सात भाई मूंऐं बाझ़ी लुआद पैईदा करी। 32 खिरी तिन्‍नां सोभी का पिछ़ू मूंईं सह बेटल़ी बी। 33 ता, ऐबै ज़ेभै सह भिई ज़िऊंदी हणीं, सह कसरी बेटल़ी हणीं? किल्हैकि सह, पैहलै साता ज़ण्हे बेटल़ी ती।"

34 ईशू बोलअ तिन्‍नां लै, "एऊ जुगे मणछ, करा बैह शादी 35 पर ज़ुंण तेता जोगी होए, कि तेऊ जुगै तिन्‍नां मरी करै भिई ज़िऊंणअ भेटे, तिन्‍नें निं बैह शादी हणीं। 36 नां तिंयां भिई मरनै, तिंयां हणैं स्वर्ग दूता ज़िहै, अर ज़िऊंदै हणें आल़ी लुआद हई हणैं तिंयां परमेशरे लुआद।

37 "परमेशरे गूरै मोसा आसा ज़ल़दै झ़ाकल़ा आल़ी कथ्या दी अह गल्‍ल प्रगट किई दी कि मूंऐं दै हआ ज़िऊंदै। सह बोला प्रभू लै, ‘हुंह आसा सह परमेशर ज़हा तेरै दाद-बाब आबराम, इसहाक अर याकब मना तै।’ * 20:37 लुआ. 3:2,6 38 परमेशर निं मुल्दैओ आथी पर सह आसा ज़िऊंदैओ परमेशर। किल्हैकि तेऊ लै आसा सोभै ज़िऊंदै।" *20:38 तिंयां लोग तै मरी गऐ दै तैबी बी बोला परमेशर तिन्‍नां लै कि हुंह आसा तिन्‍नों परमेशर, एता करै हआ अह गल्‍ल प्रगट कि तिंयां आसा परमेशरा संघै ज़िऊंदै।

39 इहअ शूणीं तिन्‍नां शास्त्री मांझ़ा का कई ज़ण्हैं बोलअ इहअ, "हे गूरू, तंऐं बोलअ ठीक।" 40 तेखअ निं तिन्‍नां कोही बी तेऊ का पुछ़णें हिम्मत हुई।

मसीहा कसरअ शोहरू आसा

41 ईशू पुछ़अ तिन्‍नां का सुआल, "मसीहा लै दाबेद राज़ैओ शोहरू किल्है बोला? 42 राज़अ दाबेद बोला आप्पै भज़ने कताबा दी इहअ,

‘प्रभू बोलअ मेरै प्रभू का,

मेरै दैहणै बेश,

43 ज़ेभै तैणीं कि हुंह तेरै दुशमणा

तेरै खूरा हेठै निं करूं।’

44 "राज़अ दाबेद ता तेऊ लै प्रभू बोला, तै सह तेऊओ शोहरू किहअ करै हुअ?"

शास्त्री का चतैन

45 ज़ांऊं सोभ लोग तै शुणदै लागै दै, ईशू बोलअ आपणैं च़ेल्‍लै का, 46 "इना शास्त्री का रहै चतैन, ज़ुंणी ईंयां लोगा रहैऊंणा लै लाम्मै च़ोल़ै हआ बान्हैं दै। कि तिंयां किहै महान आसा। ईंयां च़ाहा कि लोगै लोल़ी तिन्‍नां सेटा हाथ ज़ोल़ै। सभागृहा लोल़ी इना खास-खास ज़ैगा बेशणा लै, धामा दी च़ाहा तिंयां ज़ुदै ज़िहै खास ज़ैगा बेशणअ। 47 ईंयां लुटा च़लाकी करै बिधबा बेटल़ीए घअर। होरी का रहैऊंणा लै फिरा ईंयां खास्सी घल़ी प्राथणां करदै। इना लै भेटणीं सोभी का खास्सी सज़ा।"