1 तेखअ शादै ईशू आपणैं बारा च़ेल्‍लै अर तिन्‍नां लै दैनी मणछा का भूत काढणें अर मणछा नरोगै करने शगती अर हक। 2 तिंयां च़ेल्‍लै छ़ाडै परमेशरे राज़े प्रच़ारा करदै अर बमारा ठीक करदै।

3 ईशू बोलअ तिन्‍नां लै इहअ, "बाता लै निं किछ़ै निंईं, नां शोठअ, नां झ़ोल़ी, नां रोटी, नां ढबैओ थैल्‍लू अर नां दूई कुर्तै। 4 तेखअ ज़हा घअरै बी तम्हैं बेशे, तम्हैं रहै तिधी अर तिधी का डेओऐ। 5 ज़ुंण तम्हां नांईं मने, तैहा नगरी का बागै निखल़दी ठुल़्हकै आपणैं खूरा का धूल़अ बी पोर्ही ताकि तिन्‍नां लै शाजत होए कि तिन्‍नैं निं थारअ सुआगत किअ।"

6 तिंयां डेऊऐ गराऊंऐं-गराऊंऐं खुशीए समादा खोज़दै अर हर ज़ैगा रहै रोगी मणछा नरोगै करदी हांढदै लागी।

7 तेऊ देशे च़ौथै निसब गलील मुल्खे राज़ै हेरोदेस राज़ै फिरअ इना गल्‍ला शूणीं हैल़अ, किल्हैकि कई लोगै बोलअ तेऊ का इहअ कि जोहन्‍ना हुअ मरी करै ज़िऊंदअ। 8 अर कई लोगै बोलअ इहअ बी कि हाम्हां का शुझुअ एलियाह, अर कई बोलअ इहअ कि परमेशरे पराणैं गूरा मांझ़ै हुअ कोई एक ज़िऊंदअ।

9 पर हेरोदेस राज़ै बोलअ, "जोहन्‍नो; आसा हेरअ द मंऐं कैल़अ काटी, पर ऐबै अह कुंण आसा? ज़सरै बारै हुंह एही गल्‍ला शूणां?" अर तेऊए हुई ईशू भाल़णें च़ाहा।

10 शधाणूं बी फिरै बापस अर ज़िहअ-ज़िहअ तिन्‍नैं किअ त तिन्‍नैं खोज़ी ईशू सेटा पुजी तिंयां सारी गल्‍ला बाढै अर सह डेऊअ तिन्‍नां छ़ाडी बैतसैदा नगरी लै। 11 ईशू भाल़ै आप्पू पिछ़ू खास्सै मणछ एछदै अर सह भेटअ तिन्‍नां का खुशी-खुशी, अर तिन्‍नां का खोज़ी परमेशरे राज़े गल्‍ला अर ज़ुंण रोगी नरोगै हणअ च़ाहा तै तिंयां किऐ नरोगै।

12 ज़ांऊं सान्ह च़ाल्‍ली पल़ी, तेऊए बारा च़ेल्‍लै बोलअ, "इना लोगा लै बोल ऐबै आपणैं घअरा लै डेओआ, ताकि ईंयां किधी गराऊंऐं आप्पू लै रोटी-पाणींओ इंतज़ाम करी सके अर तिधी रहे, किल्हैकि हाम्हैं आसा इधी बडी कांगनरांगी ज़ैगा दी।"

13 ईशू बोलअ तिन्‍नां लै, "तम्हैं ई दैआ इना लै खाणां पिणां लै," तिन्‍नैं दैनअ ईशू लै ज़बाब, "हाम्हां का निं पांज़ रोटी अर दूई म्हाछ़ली छ़ाडी होर किछ़ै आथी। पर हाँ ज़ै हाम्हैं इना लै रोटी मोल आणे लई तै सका हई।" 14 तिन्‍नैं बोलअ तिन्‍नां लै इहअ तै कि तिधी थिऐ आऐ दै कोई पांज़ हज़ार लोग, पर ईशू बोलअ च़ेल्‍लै लै, "इना लोगा बशैल़ा पज़ाह-पज़ाह करै घेहल़ी दी।"

15 च़ेल्‍लै बी किअ तिहअ ई अर तिंयां सोभ लोग बशैल़ै घेहल़ी। 16 ईशू ढाकी तिंयां पांज़ रोटी अर दूई म्हाछ़ली हाथै, संघा किअ सरगा बाखा भाल़ी परमेशरा लै शूकर, संघा दैनी रोटी च़ेल्‍लै लै अर तिन्‍नैं दैनी लोगा लै बांडी। 17 तेखअ ज़ांऊं तिंयां खाई करै रज्ज़ै, बच़ी दी रोटीए च़कै तिन्‍नैं बारा च़ठै।✝

18 ज़ांऊं ईशू कांगनरांगै ज़ैगा प्राथणां करदअ त लागअ द अर च़ेल्‍लै बी तै तेऊ संघा; ईशू पुछ़अ तिन्‍नां का, "लोग मुल्है किज़ै बोला कि हुंह कुंण आसा?"

19 तिन्‍नैं दैनअ ज़बाब, "जोहन्‍ना डुबकी दैणैं आल़अ, अर कई लोग बोला एलियाह, अर कई बोला इहअ कि परमेशरे पराणैं गूरा मांझ़ै हुअ कोई एक ज़िऊंदअ।"

20 तेऊ पुछ़अ तिन्‍नां का, "तम्हैं किज़ै बोला? हुंह कुंण आसा?" पतरासै बोलअ, "परमेशरो मसीहा।" 21 तेखअ नैरै तिंयां ईशू इहै कि ऐहा गल्‍ला निं कोही का खोज़ी।

22 तेखअ बोलअ ईशू तिन्‍नां लै इहअ, "मुंह मणछे पूता लै आसा ज़रूरी किई हुंह खास्सै घोर दुख ज़िरे अर सैणैं, बडै प्रोहत अर शास्त्री मुंह बृथा समझ़ी मारी पाए, अर हुंह चिऊथै धैल़ै ज़िऊंदअ होए।"

23 ईशू बोलअ तिन्‍नां सोभी लोगा लै इहअ, "ज़ुंण बी मेरअ च़ेल्‍लअ हणअ च़ाहे, सह निं तिन्‍नां गल्‍ला करी सकदअ ज़ुंण तेऊओ दिल च़ाहा। तेऊ लागणअ अपराधी ज़िहअ दाह-दुख ज़िरी आपणअ क्रूस आपणीं कान्हा आप्पै च़कणअ।

24 "किल्हैकि ज़ुंण बी ऐहा पृथूई दी आपणीं ज़िन्दगी बच़ाऊंणी च़ाहे, सह करा परमेशरा संघै सदा रहणैं आल़ी ज़िन्दगी बरैबाद, ज़ुंण मुंह दी विश्वास करनै पिछ़ू आपणैं प्राण दैए, तेऊ भेटणीं परमेशरा संघै सदा लै ज़िन्दगी। 25 ज़ै मणछ सारै संसारा आपणैं बशै करे अर आपणैं प्राण शोटे, कि तेऊए आपणैं प्राणें हान्‍नी होए, तै तेऊ लै किज़ै नफअ हणअ?

26 "ज़ुंण मुंह आपणअ प्रभू मनणै अर मेरी शिक्षा मनणै का हुधिए, तेभै हुधणअ मुंह मणछे पूता बी ज़ेभै हुंह आपणैं पबित्र स्वर्ग दूता संघै पृथूई दी फिरी एछणअ। तेभै भाल़णअ सोभी मेरअ प्रतप्प ज़िहअ मेरै बाबो आसा। 27 हुंह खोज़ा तम्हां का सत्त कि ज़ुंण इधी आसा खल़्हुऐ दै, तिन्‍नां मांझ़ै आसा कई इहै बी, तिन्‍नें निं तेभै तैणीं मौत हणीं ज़ेभै तैणीं तिंयां परमेशरो राज़ भाल़ी निं हेरे।"

28 इना गल्‍ला हणैं का बाद डेऊअ कोई आठा धैल़ै बाद पतरास अर जोहन्‍ना अर याकबा संघा निंईं करै धारा प्रैंदा लै प्राथणां करदअ। 29 ज़ांऊं ईशू प्राथणां करदअ त लागअ द, ईशूए मुंहों रूप बधल़ुअ अर तेऊए झिकल़ै हुऐ शेतै अर तिंयां लागै च़मकदै। 30 परमेशरो गूर मोसा अर एलियाह लागै दुहै ईशू संघै गल्‍ला करदै। 31 तिंयां शुझुऐ बडी प्रतप्पा संघै अर तिंयां लागै ईशूए मरने गल्‍ला करदै ज़िहअ-ज़िहअ एरुशलेम नगरी दी आजू हणैं आल़अ त।

32 पतरास अर तेऊए होर साथी तै निंजै भर्हुऐ दै अर ज़ांऊं तिंयां राम्बल़ै बिऊंछ़ुऐ, तेखअ शुझुई तिन्‍नां का ईशू झ़ामण लागअ द अर तिन्‍नां का शुझुअ इहअ बी कि दूई ज़ण्हैं आसा होर ईशू संघै खल़्हुऐ दै। 33 ज़ांऊं तिंयां दूई तेऊ सेटा का बापस डेऊंदै लागै, पतरासै ईशू का बोलअ, "हे मालक, अह हुअ ठीक कि हाम्हैं आसा इधी, हाम्हां बणाणैं इधी चअन मंडप, एक ताल्है, एक परमेशरे गूर मोसा लै अर एक परमेशरे गूर एलियाह लै।" पर पतरासा का निं थोघै त कि सह किज़ै बोला। 34 सह थिअ बोल्दअ ई लागअ द कि एक बादल़ घोर्हुअ तिन्‍नां प्रैंदै अर तिंयां डरै।

35 तेऊ बादल़ा पिछ़ू का बोलअ परमेशरै इहअ, "अह आसा मेरअ पूत ज़हा लै हुंह सोभी का खास्सअ झ़ूरा अर अह आसा मंऐं छ़ांटअ द, एऊए शूणां ज़िहअ अह तम्हां लै बोले तिहअ।"✝

36 स्वर्गा का परमेशरे बोलै दै इहै बैणा शुणनै का बाद दैनी तिन्‍नैं फेर आछ, तिधी भाल़अ तिन्‍नैं ईशू एक्‍कै, अर तिंयां रहै च़ुप्पी अर ज़ुंण बी तिन्‍नैं भाल़अ थिअ, तेते गल्‍ला निं तिन्‍नैं तिन्‍नां धैल़ै कोही का खोज़ी।

37 अर दुजै धैल़ै ज़ांऊं तिंयां धारा का उंधै होथै; तिन्‍नां सेटा लै आऐ एतरै खास्सै मणछ ज़हा कुंण गणी निं सकदअ। 38 तिन्‍नां लोगे जेल्ह-मरेल्ही जैंदरा का पाई एकी हाक्‍का, "हे गूरू," हुंह करा ताखा अरज़ कि मेरै शोहरू लै कर झींण, मेरअ आसा सह एक्‍कै पूत। 39 तेऊ दी आसा एक भूत शाचअ द अर सह लाआ लैल़ा-पकारा, अर सह मरोक्‍का तेऊ इहै कि तेऊ का निखल़ा शेफा अर सह हआ धरनीं चाछल़दअ अर तेऊ हआ बेघै खास्सी दाह। 40 "मंऐं किई ती तेरै च़ेल्‍लै सेटा बी अरज़ कि एऊ भूता काढ पोर्ही पर इने भलै निस्सअ अह निखल़ी।"

41 ईशू बोलअ, "हे बैहम करनै आल़ै अर हठी लोगो, मुंह कधू तैणीं रहणअ तम्हां संघा कि तम्हैं विश्वास करे? मुंह केभै तैणीं रहणअ तम्हां न्हैल़ै लागी कि तम्हैं विश्वास करे? आपणैं शोहरू आण ओर्ही।" 42 सह थिअ एछदअ ई लागअ द कि भूतै शोटअ सह शोहरू मरोक्‍की करै धरनीं। ईशू नैरअ तेभी सह भूत, "पोर्ही निखल़।" सह शोहरू हुअ तेभी नरोगअ, संघा सभाल़अ ईशू सह शोहरू तेऊए बाब का। 43 तेखअ हुऐ सोभ लोग परमेशरे इहै महान शगतीए कामां भाल़ी रहैन।

पर ज़ांऊं सोभै लोग तेऊ किऐ दै तिन्‍नां कामां भाल़ी रहैन थिऐ हुऐ दै, तेखअ बोलअ ईशू आपणैं च़ेल्‍लै लै, 44 "इना गल्‍ला डाहै तम्हैं आद, हुंह मणछो पूत बझ़ैल़णअ धोखै करै मेरै दुशमणा का कैद करनै कि मुंह मारी पाए।" 45 पर ईशूए ईंयां गल्‍ला निं तिन्‍नां समझ़ आई, तैही रही ईंयां गल्‍ला तिन्‍नां का गुप्त कि तिंयां समझ़ी नां सके अर ऐहा गल्‍ला पुछ़णा का बी डरा तै तिंयां।

46 अर एकी धैल़ै लागै तिंयां आप्पू मांझ़ै हठल़दै कि हाम्हां मांझ़ै बडअ कुंण आसा? 47 ईशू हेरी तिन्‍नें मन्‍नें गल्‍ल भुझ़ी अर एक लान्हअ आप्पू सेटा खल़अ किअ अर 48 संघा बोलअ ईशू तिन्‍नां लै, "ज़ुंण बी मेरै नाओंऐं एऊ शोहरूए कदर करे, सह करा मेरी अर परमेशरे दुहीए कदर ज़ुंणी हुंह संसारा लै आसा छ़ाडअ द। किल्हैकि ज़ुंण तम्हां मांझ़ै होछ़ै का बी होछ़अ आसा सह आसा सोभी का बडअ।"

49 तेखअ बोलअ जोहन्‍ना ईशू लै, "हे गूरू, हाम्हैं भाल़अ तेरै नाओंऐं एक मणछ भूता काढदअ हाम्हैं लागै तै तेऊ लै नांईं करदै बी कि इहअ निं करै। किल्हैकि सह हाम्हां संघै, एछदअ निं आथी।" 50 ईशू बोलअ तेऊ लै, "तेऊ रोक्‍कदै निं लागी। किल्हैकि ज़ुंण थारै खलाफ निं आथी सह आसा थारै पक्षा दी।"

51 ज़ांऊं ईशूए स्वर्गा डेऊणे धैल़ै नेल़ तै, ईशू किअ एरुशलेम नगरी लै डेऊणेओ बच़ार पाक्‍कअ। 52 अर ईशू छ़ाडै आप्पू आजू-आजू दूत कि सामरी गराऊंऐं डेओऐ अर तिधी करै मुल्है ज़ैगा तैर। 53 पर तिन्‍नैं निं ईशू तिधी एछणैं दैनअ किल्हैकि सह थिअ एरुशलेम नगरी लै च़ाल्‍लअ द। 54 ऐहा गल्‍ला भाल़ी तेऊए च़ेल्‍लै याकब अर जोहन्‍ना बोलअ इहअ, "प्रभू, तेरअ कै बच़ार आसा, हाम्हां इहअ हुकम दैणअ कि सरगा का लोल़ी आग पल़ी अर ईंयां लोल़ी सोभ भस्सम हुऐ?" 55 पर ईशू नैरै तिंयां, "तम्हां का निं थोघ कि तम्हैं केही आत्में आसा।" 56 पर तेऊ काढी तिन्‍नां लै झांश संघा बोलअ, "हुंह निं लोगे प्राणा बरैबाद करदअ आथी आअ द, हुंह आसा सोभी बच़ाऊंदअ आअ द।" अर तिंयां डेऊऐ कहा होरी गराऊंआं लै।

57 ज़ांऊं तिंयां बाता हांढदै तै लागै दै, तिन्‍नां जैंदरा का बोलअ ईशू लै कुंणी इहअ, "ज़िधा लै बी तूह डेओए, मुंह बी लागणअ ताह पिछ़ू हांढदै।"

58 ईशू दैनअ तेऊ लै इहअ ज़बाब, "शैल़ीए हआ जुहल़ी अर सरगै डैऊंदै च़ेल्‍लू-पखीरूए हआ कोल्ह। पर हुंह मणछो पूत ज़ुंण स्वर्गा का आसा आअ द मुल्है निं कोऐ घअर आथी ज़िधी हुंह सुत्ती सकूं।" 59 तेखअ बोलअ ईशू एकी होरी लै, "मुंह पिछ़ू एछ।" पर तेऊ दैनअ ज़बाब, "हे प्रभू, मुंह दै पैहलै आपणैं बाबे क्रिया कर्म एछणैं करी।" 60 ईशू बोलअ तेऊ लै, "ज़ुंण आत्मां दी मुल्दै आसा तिन्‍नां दै मुल्दै दाबणै पर तूह खोज़ लोगा सेटा डेऊई परमेशरे राज़ो समाद।" 61 तेखअ बोलअ एकी इहअ, "हे प्रभू, हुंह च़ाल्‍लअ ताह संघै, पर मुंह दै आपणैं घअरै टबरा का बिदा हई एछणैं।"✝ 62 ईशू बोलअ तेऊ लै, "ज़ुंण बी आपणअ हाथ हल़े आल़ी दी डाही करै पिछ़ू भाल़ा, सह निं परमेशरे राज़ा जोगी आथी।"