28 इजी ते बाद यीशुए ये जाणी की कि एबे सब कुछ ऊईगा, ताकि पवित्र शास्त्रो री गल्ल पूरी ओ, तिने बोलेया, "आऊँ त्याया ए।" 29 तेती एक सिरके रा पांडा परी की था राखेया रा, तेबे तिने स्पंजो रा टाल्ला सिरके रे सेड़ेया और डण्डे पाँदे राखी की तिना रे मुंओ रे लगाया। 30 जेबे यीशुए से सिरका चाखेया, तेबे बोलेया, "पूरा ऊआ" और सिर चुकाई की प्राण छाडी ते।

23 जेबे सिपाई यीशुए खे क्रूसो रे चढ़ाई चुके, तेबे तिना रे टाल्ले लयी की चार इस्से कित्ते, हर सिपाईए खे एक इस्सा, तेबे तिने कुरता बी लया पर कुरता बिना सलाईया ते ऊबो ते लयी की ऊँदो तक बुणेया रा था। 24 तेबे तिने आपू बीचे बोलेया, "आसे एसखे फाड़ना रणी देऊँए, पर एते पाँदे पर्ची पाऊँए कि ये केसरा ऊणा। ये तेबे ऊआ कि पवित्र शास्त्रो री गल्ल पूरी ओ कि

‘तिने आपू बीचे मेरे टाल्ले बांडी ते

और मेरे टाल्लेया पाँदे पर्ची पायी’"

25 तो सिपाईए एड़ा ई कित्तेया। यीशुए रे क्रूसो गे तिना री आम्मा और तेसा री बईण, क्लोपासो री लाड़ी मरियम और मरियम मगदलिनी खड़ी रिया थिया। 26 जेबे यीशुए आपणी आम्मा और तेस चेले खे जेसते से प्यार राखो था, नेड़े खड़े रा देखेया तो आपणी आम्मा खे बोलेया, "ओ जवाणसे, देख, ये तेरा पाऊए।" 27 तेबे तिने चेले खे बोलेया, "ये तेरी आम्मा ए।" तेबे तेसी बखते से चेला तेसा खे आपणे कअरे लयी गा।

33 तेबे सेयो तेते जगा रे जेतेखे खोपड़ी बोलो थे, पऊँचे, तेबे तिने तेती यीशु और सेयो दो जणे जो कुकर्मी थे, एक दाँणे कनारे और दूजा खूँजे कनारे क्रूसो पाँदे चढ़ाए। 34 तेबे यीशुए बोलेया, "ओ पिता! इना खे माफ कर, कऊँकि यो नि जाणदे कि क्या लगी रे करने?" और तिने चिट्ठिया पायी की तिना रे टाल्ले बांडी ते। 35 लोक खड़े-खड़े देखणे लगी रे थे और अधिकारी बी मजाक करी-करी की बोलो थे, "इने ओर बचाए, जे ये परमेशरो रा मसीह ए और तेसरा चूणे राए, तो आपणे आपू खे बचाई लो।" 36 सिपाई बी नेड़े आओ थे और सिरका देई की तिना रा मजाक करी की बोलो थे, 37 "जे तूँ यहूदिया रा राजा ए, तो आपू खे बचा।" 38 तिना पाँदे एक दोष-पत्र बी था लगे रा कि, "ये यहूदिया रा राजा ए।"

39 जो कुकर्मी लटाकाई राखे थे, तिना बीचा ते एकी जणे यीशुए री निन्दा करी की बोलेया, "क्या तूँ मसीह निए? तो आपू और आसा खे बचा।" 40 तेबे दूजे जणे तेसखे बकी की बोलेया, "क्या तूँ परमेशरो रा डर पनि मानदा? तूँ बी तो सेई सजा पुगतणे लगी रा। 41 आसे तो न्याय रे मुताबिक सजा पाणे लगी रे, कऊँकि आसे आपणे कामो रा अच्छा फल लगी रे पाणे, पर इने कोई बी बुरा काम नि कित्तेया।" 42 तेबे तिने बोलेया, "ओ यीशु! जेबे तूँ आपणे राज्य रे आए, तो मेरी सम्बाल़ बी लयी लया।" 43 तिने तेसखे बोलेया, "आऊँ ताखे सच्च लगी रा बोलणे कि तूँ आज ई मां साथे स्वर्गलोको रे ऊणा।"

33 और जेबे त्याड़ी ऊई, तेबे सारे देशो रे न्हेरा ऊईगा और तीजे पईरो तक रया। 34 तीजे पइरो रे यीशुए जोरे की बोलेया, "इलोई, इलोई लमा शबक्तनी?" जेतेरा मतलब ए, "ओ मेरे परमेशर, ओ मेरे परमेशर! तुसे आऊँ कऊँ छाडीता?"

51 तेबे मन्दरो रा पड़दा पाँदो ते लई की थालो तक फटीगा और तिजी रे दो टुकड़े ऊईगे। ये ए दखाओआ कि एबे कोई बी माणूं परमेशरो री हजुरिया रे जाई सकोआ। तरती ईलणे लगी और जानी तिड़की गिया 52 और कब्रा खुली गिया और मरे रे पवित्र लोका रिया बऊत लोथा उठी गिया। 53 और तिना रे जिऊँदे ऊणे ते बाद सेयो कब्रा ते निकल़ी की पवित्र नगरो खे गए और बऊत लोका खे दिखे। 54 तेबे सूबेदार और जो तेस साथे पईरा देणे लगी रे थे, ईल्लण और जो कुछ तेती ऊआ, देखी की बऊत डरी गे और बोलणे लगे, "सच्ची, ये तो परमेशरो रा ई पुत्र था।"

5 पर से म्हारे ई पापो रिया बजा ते कायल कित्तेया, से म्हारे पापो रे कामो रिया बजा ते दबाया; म्हारी ई शान्तिया रिया खातर तेस पाँदे ताड़ना पड़ी, ताकि तेसरे कोड़े खाणे ते आसे ठीक ऊई जाऊँ।* 6 आसे तो सारे के सारे पेडा जेड़े राची गे थे; आसा बीचा ते हर एक आपणी-आपणी बाटा दे चली रा था।* ओर यहोवे आसा सबी रे पापा रा बोज आपणे दासो पाँदे लादी ता।* 7 तेसखे दु:ख देंदे रये, तेबे बी से सयीन करदा रया ओर आपणा मूँ नि खोलेया; जिंयाँ पेड फाटणे रे बखते ओर ऊन कतरने रे बखते चुपचाप शान्त रओई, तिंयाँ ई से बी आपणा मूँ खोले बिना चुपचाप रया।*

16 मेरेया दुश्मणे आऊँ चऊँ कनारा ते केरी ला कटणे वाल़े कुत्तेया रे चूण्डो जेड़ा,

तिने मेरे आथ-पैर कटी ते दे।*

17 आऊँ आपणी एक-एक आड्डी गिणी सकूँआ;

मेरे दुश्मण माखे कूरदे ऊए मेरा मजाक उडाणे लगी रे।

18 तिने मेरे टाल्ले आपू बीचे बांडी ले

ओर मेरे टाल्लेया पाँदे चिट्ठी पाई।*

7 माखे देखणे वाल़े सब जणे मेरा मजाक उडाओए

ओर ओठ चबाओए

ओर सिर ईलाई की ओर मेरी बेजती करोए ओर बोलोए,*

8 "से यहोवे पाँदे परोसा करोआ ओर बोलोआ,

कि यहोवा तेसते बऊत खुश ए;

जे एड़ा ए, तो सेई एसखे छुड़ाओ ओर मताद करो!"*

13 इजी ते बड़ा प्यार केसी रा निए कि कोई आपणे दोस्ता खे आपणा प्राण देओ।

16 "कऊँकि परमेशरे दुनिया रे लोका ते एड़ा प्यार कित्तेया कि तिने आपणा एकलौता पुत्र देईता, ताकि जो कोई तेस पाँदे विश्वास करो, से नाश नि ओ, पर अनन्त जीवन पाओ।

10 जेबे आसे परमेशरो रे बैरी ई थे तो तेसरे पुत्रो री मौत ऊणे रे जरिए आसा रा मेल परमेशरो साथे ऊआ, तेबे मेल ऊई जाणे पाँदे, तेसरे जीवनो री बजअ ते आसा उद्धार कऊँ नि पाणा?

16 आसे प्यार इजी तेई जाणेया कि यीशु मसीहे आसा री खातर आपणे प्राण देई ते। तेबेई आसा खे बी आपणे पाईया री तँईं प्राण देणे चाईयो।

2 और सेई म्हारे पापो खे बलिदान ए और बस म्हारे ई नि, बल्कि सारी दुनिया रे लोका रे पापो रा बी।

8 और माणूंए रे रूपो रे आयी की आपू खे दीन कित्तेया

और से आपणी मौता तक आज्ञाकारी रया, एथो तक कि तिने क्रूसो पाँदे दर्दनाक मौत बी सईन करी ली।

9 आसे ये जाणूंए कि मसीह मरे रेया बीचा ते जिऊँदा ऊई की फेर मरना नि। तेस पाँदे फेर मौत नि आऊणी। 10 जेबे मसीह मरी गा, तो पापो खे एक ई बार मरी गा, पर एबे जो जिऊँदा ए, तो परमेशरो री खातर जिऊँदा ए।

3 आसे जाणूंए कि आसे जितणेया बी प्रभु यीशु मसीह रा बपतिस्मा लया, तो तेसरी मौता रा बपतिस्मा लया। 4 इजी खे जेबे आसे बपतिस्मा लया तो आसे यीशु मसीह साथे मारे गये और गाड़े गये। ताकि जिंयाँ मसीह पिता परमेशरो री महिमा रे जरिए मरे रेया बीचा ते जिऊँदा कित्तेया, तिंयाँ ई आसे बी नये जीवनो री जी चाल चलिए।

27 जेड़ा माणूंए खे एक बार मरना और तिजी ते बाद न्याय रा ऊणा नियुक्त ए, 28 तिंयाँ ई मसीह बी बऊत जणेया रे पाप ऊठाणे खे एक ई बार बलिदान ऊआ। से दूजी बार आऊणा पापो री बजअ ते नि बल्कि तिना लोका खे उद्धार देणे खे जो तेसखे न्याल़ने लगी रे।

22 "ओ इस्राएलियो! इना गल्ला खे सुणो, यीशु नासरी एक माणूं था। जेसरा परमेशरो री तरफा ते ऊणे रा सबूत, तिना सामर्था रे कामो, अचम्बे रे कामो ते और चमत्कारा ते प्रगट ए। जो परमेशरे तुसा बीचे, तेसरे जरिए दखाए, जेसखे तुसे आपू बी जाणोए। 23 तेस ई यीशुए खे, जो परमेशरो री ठराई री योजना और पईलके ज्ञानो रे मुताबिक पकड़वाया। तेबे तुसे से पापिया रे आथे क्रूसो पाँदे चढ़ाई की मरवाईता। 24 पर सेई परमेशरे मौता रे बंदनो ते छुड़ाई की जिऊँदा कित्तेया, कऊँकि ये ऊणा नि था कि से तेसरे वशो रे रंदा।"

11 अच्छा चराणे वाल़ा आऊँ ए, अच्छा चराणे वाल़ा आपणी पेडा खे आपणा प्राण तक देई देओआ।

26 कऊँकि जेबे कदी तुसे ये रोटी खाओए और एस कटोरे बीचा ते पियोए, तो प्रभुए री मौता खे, जदुओ तक से नि आओ, प्रचार करोए।