1 तेबे सारी सभा उठी की तिना खे पिलातुसो गे लयी गी। 2 सेयो ये बोली की तिना पाँदे दोष लगाणे लगे, "आसे ये लोका खे रोमी सरकारा रे खलाफ बरोद करने खे बईकांदे ऊए और कैसरो खे कर देणे खे ना करदे ऊए और आपू खे मसीह, राजा बोलदे ऊए सुणी राखेया।" 3 पिलातुसे तेसते पूछेया, "क्या तूँ यहूदिये रा राजा ए?" यीशुए तेसखे बोलेया, "तूँ आपू ई लगी रा बोलणे।" 4 तेबे पिलातुसे बड़े पुरोईत और लोका खे बोलेया, "आऊँ एस माणूंए रे कोई दोष नि देखदा।" 5 पर सेयो ओर बी पक्के ऊई की बोलणे लगे, "ये गलीलो ते लयी की एथो तक, सारे यहूदिया रे उपदेश देई-देई की लोका खे उकसाओआ।" 6 ये सुणी की पिलातुसे पूछेया, "क्या ये माणूं गलीलो रा रणे वाल़ा ए?" 7 तेबे ये जाणी की कि ये हेरोदेसो री रियासता राए, से हेरोदेसो गे पेजी ता, कऊँकि तिना दिना रे से बी यरूशलेमो रे था।

8 हेरोदेस यीशुए खे देखी की बऊत खुश ऊईगा, कऊँकि से बऊत दिना ते तिना खे देखणा चाओ था, कऊँकि तिने तिना रे बारे रे सुणी राखेया था और यीशुए ते कोई चिह्न् देखणे री उम्मीद राखो था। 9 तेबे से तिना ते मुखती गल्ला पूछदा रया, पर तिने तेसखे कुछ बी ज्वाब नि दित्तेया। 10 तेबे बड़े पुरोईत और शास्त्री खड़े ऊई की तनो-मनो साथे तिना पाँदे दोष लगांदे रये। 11 तेबे हेरोदेसे आपणे सिपाईया साथे तिना रा मजाक उड़ाया और भड़किले टाल्ले पणयाई की पिलातुसो गे वापस पेजी ता। 12 तेसी दिनो ते हेरोदेस और पिलातुस दोस्त बणी गे, इजी ते पईले सेयो एकी-दूजे रे बैरी थे।

13 पिलातुसे बड़े पुरोईत, अधिकारी और लोक बुलाई की तिना खे बोलेया, 14 "तुसे एस माणूंए खे लोका खे रोमी सरकारा रे खलाफ बरोद करने खे बईकाणे वाल़ा बोली की मांगे ल्याई राखे और देखो, मैं तुसा सामणे एसरी जांच कित्ती, पर जिना गल्ला रा तुसे एस पाँदे दोष लगी रे लगाणे, तिना गल्ला रे मैं एसरे कोई बी दोष नि पाया। 15 ना ई हेरोदेसे, कऊँकि तिने ये आसा गे वापस पेजी ता रा और देखो, एसते एड़ा कुछ नि ऊई रा, जेतेरी बजअ ते एसखे मृत्यु दण्ड मिलो। 16 तेबे आऊँ तेसखे कोड़े लगवाई की छाडी देऊँआ।" 17 यहूदिया रे फसह रे त्योआरो रे दिने पिलातुस हर साल एकी कैदियो खे तिना खे छाडी देओ था। 18 तेबे सब मिली की चींगणे लगे, "एसरा काम-तमाम कर और आसा खे बरअब्बे खे छाडी दे।" 19 ये सेईए जो हुड़दंगो री बजअ ते, जो नगरो रे ऊआ था और अत्या री बजअ ते जेला रे पायी ता था। 20 पर पिलातुसे यीशुए खे छाडणे री इच्छा ते लोक फेर समजयाए। 21 पर तिने चींगी की बोलेया, "एसखे क्रूसो पाँदे चढ़ाई देओ, क्रूसो पाँदे।" 22 तिने तीजी बार तिना खे बोलेया, "कऊँ, इने कुण जी बुराई करी राखी? मैं एसरे मृत्यु दण्डो लायक कोई बी गल्ल नि देखी। इजी री खातर आऊँ एसखे कुटवाई की पेजी देऊँआ।" 23 पर सेयो चींगी-चींगी की पीछे ई पड़ी गे कि एसखे क्रूसो पाँदे चढ़ाओ और तिना रा चींगणा प्रबल ऊईगा। 24 तेबे पिलातुसे आज्ञा दित्ती कि इना री बिनतिया रे मुताबिक कित्तेया जाओ।

25 तिने से माणूं जो हुड़दंग और अत्या री बजअ ते जेला रे पाया था और जेसखे सेयो माँगो थे, छाडीता और यीशु तिना री इच्छा रे मुताबिक तिना रे आथो रे देई ते।

26 जेबे सेयो यीशुए खे निणे लगी रे थे, तेबे तिने शमौन नाओं रा एक कुरेनी माणूं, जो दूजे गांव ते आऊणे लगी रा था, तेसी बखते से तिसिये निकल़ेया, पकड़ी की तेस पाँदे क्रूस लादी ता, ताकि एसखे यीशुए पीछे लयी चलो। 27 तेबे लोका री बड़ी पीड़ तिना पीछे चली पड़ी और मुखती जवाणसा बी, जो तिना पीछे रोओ थिया और छाती पीटो थिया। 28 यीशुए तिना खे मुड़ी की बोलेया, "ओ यरूशलेमो री बेटियो! माखे नि रोओ, बल्कि आपू और आपणे बाल़का खे रोओ जो तुसा साथे ऊणे वाल़ा ए 29 कऊँकि सेयो दिन आऊणे, जेबे बोलणा कि धन्य ए से जवाणसा जो बांझ ए और से गर्भ जिने बच्चे पैदा नि कित्ते और सेयो स्तन जिने दूद नि पल़याया। 30 तेस बखते तिना पाह्ड़ो ते बोलणा कि आसा पाँदे आयी जाओ और टिलेया खे कि आसा खे टखी देओ।

31 "कऊँकि जेबे सेयो अरेया डाल़ा साथे एड़ा करोए, तो सूकेया साथे क्या कुछ नि करेया जाणा।" 32 सिपाई यीशुए साथे दो ओर माणूंआ खे जो कुकर्मी थे, काणे खे लयी चले। 33 तेबे सेयो तेते जगा रे जेतेखे खोपड़ी बोलो थे, पऊँचे, तेबे तिने तेती यीशु और सेयो दो जणे जो कुकर्मी थे, एक दाँणे कनारे और दूजा खूँजे कनारे क्रूसो पाँदे चढ़ाए। 34 तेबे यीशुए बोलेया, "ओ पिता! इना खे माफ कर, कऊँकि यो नि जाणदे कि क्या लगी रे करने?" और तिने चिट्ठिया पायी की तिना रे टाल्ले बांडी ते। 35 लोक खड़े-खड़े देखणे लगी रे थे और अधिकारी बी मजाक करी-करी की बोलो थे, "इने ओर बचाए, जे ये परमेशरो रा मसीह ए और तेसरा चूणे राए, तो आपणे आपू खे बचाई लो।" 36 सिपाई बी नेड़े आओ थे और सिरका देई की तिना रा मजाक करी की बोलो थे, 37 "जे तूँ यहूदिया रा राजा ए, तो आपू खे बचा।" 38 तिना पाँदे एक दोष-पत्र बी था लगे रा कि, "ये यहूदिया रा राजा ए।"

39 जो कुकर्मी लटाकाई राखे थे, तिना बीचा ते एकी जणे यीशुए री निन्दा करी की बोलेया, "क्या तूँ मसीह निए? तो आपू और आसा खे बचा।" 40 तेबे दूजे जणे तेसखे बकी की बोलेया, "क्या तूँ परमेशरो रा डर पनि मानदा? तूँ बी तो सेई सजा पुगतणे लगी रा। 41 आसे तो न्याय रे मुताबिक सजा पाणे लगी रे, कऊँकि आसे आपणे कामो रा अच्छा फल लगी रे पाणे, पर इने कोई बी बुरा काम नि कित्तेया।" 42 तेबे तिने बोलेया, "ओ यीशु! जेबे तूँ आपणे राज्य रे आए, तो मेरी सम्बाल़ बी लयी लया।" 43 तिने तेसखे बोलेया, "आऊँ ताखे सच्च लगी रा बोलणे कि तूँ आज ई मां साथे स्वर्गलोको रे ऊणा।"

44 और तकरीबन दोपईरो रे तीजे पईरो तक सारे देशो रे न्हेरा ऊईगा। 45 और सूरजो रा प्रयासा चली गा, तेबे मन्दरो रा पड़दा पाँदो ते लई की थालो तक फटीगा और तिजी रे दो टुकड़े ऊईगे। ए ये दखाओ कि एबे कोई माणूं परमेशरो री हजुरिया रे जाई सकोआ। 46 तेबे यीशुए जोरे की बोलेया, "ओ पिता! आऊँ आपणी आत्मा तुसा रे आथो रे सम्बाल़ूँआ और ये बोली की तिने प्राण छाडी ते।" 47 सूबेदारे जो कुछ ऊई रा था देखी की परमेशरो री तारीफ कित्ती और बोलेया, "सच्ची ये माणूं तर्मी था।" 48 तेबे पीड़ जो ये देखणे खे कट्ठी ऊई री थी, ये घटणा देखी की छाती पिटदी ऊई वापस ऊईगी। 49 पर तिना रे सब जाण-पछयाण वाल़े और जो जवाणसा गलील प्रदेशो ते तिना साथे आयी रिया थिया, दूर खड़िया ऊई की ये सब देखणे लगी री थिया।

50 तेती यूसुफ नाओं रा बड़ी सभा रा एक सदस्य था, जो पला और तर्मी माणूं था 51 और तिना री योजना और तिना रे इना कामो ते खुश नि था। से यहूदिया रे नगर अरिमतियाह रा रणे वाल़ा था और परमेशरो रे राज्य री बाट न्याल़ने वाल़ा था। 52 तिने पिलातुसो गे जाई की यीशुए री लोथ मांगी। 53 और से उतारी की मलमलो री चादरी रे लपेटी और कब्रा रे राखी, जो चट्टानी रे खणी राखी थी और तिदे कदी कोई नि राखी राखेया था। 54 से त्यारिया रा दिन था और रामो रा दिन शुरू ऊणे वाल़ा था। 55 तिने जवाणसे जो गलीलो ते तिना साथे आयी री थिया, पीछे-पीछे जाई की से कब्र देखी और ये बी कि तिना री लोथ किंयाँ थी राखी री। 56 तेबे तिने आपणे कअरे वापस आयी की खुशबूदार चीजा और इत्र यीशुए रे शरीरो पाँदे मल़ने खे त्यार कित्तेया और रामो रे दिने तिने आज्ञा रे मुताबिक राम कित्तेया।