लूका 20

यीशुए रे अक्को पाँदे सवाल

1 एक दिन एड़ा ऊआ कि जेबे यीशु मन्दरो रे लोका खे उपदेश और सुसमाचार सुनाणे लगी रे थे, तेबे बड़े पुरोईत, शास्त्री और बुजुर्ग नेड़े आयी की खड़े ऊईगे 2 और बोलणे लगे, "आसा गे बता कि तूँ इना कामा केसरे अक्को ते करेया और से कूणे, जिने ताखे ये अक्क देई राखेया?" 3 यीशुए तिना खे ज्वाब दित्तेया, "आऊँ बी तुसा ते एक गल्ल पुछूँआ। माखे बी बताओ 4 यूहन्ने रा बपतिस्मा स्वर्गो री तरफा ते था या माणूंए री तरफा ते?" 5 तेबे सेयो आपू बीचे बोलणे लगे, "जे आसे बोलूँगे कि स्वर्गो री तरफा ते था, तेबे एस बोलणा कि तेबे तुसे तेस पाँदे विश्वास कऊँ नि कित्तेया? 6 और जे आसे बोलूँगे कि माणूंए री तरफा ते ए, तो सबी लोका आसा खे पात्थर बाणे, कऊँकि तिना खे पक्का पता ए कि यूहन्ना भविष्यबक्ता था।" 7 तेबे तिने ज्वाब दित्तेया, "आसे नि जाणदे कि से केसरी तरफा ते था।" 8 यीशुए तिना खे बोलेया, "तेबे आऊँ पनि बतांदा कि आऊँ इना कामा केसरे अक्को ते करूँआ।"

दुष्ट जिम्मीदारा रा उदारण

9 तेबे सेयो लोका खे ये उदारण बोलणे लगे, "एकी माणूंए अँगूरा रा बगीचा लगाया और ठेकेदारा खे तिजी रा ठेका देई की बऊत दिना खे परदेशो खे चली गा। 10 जेबे बखत आया तेबे तिने ठेकेदारा गे एक दास पेजेया कि से अँगूरा रे बगीचे रा कुछ इस्सा तेसखे देओ, पर ठेकेदारे से कुटी की खाली आथ पेजी ता। 11 तेबे तिने एक ओर दास पेजेया, पर तिने से बी कुटी की और तेसरी बेज्जती करी की खाली आथ पेजी ता। 12 तेबे तिने तीजा पेजेया, तेबे तिने से बी कायल करी की निकयाल़ी ता। 13 तेबे तिने मालके सोचेया कि एबे आऊँ क्या करुँ? आऊँ आपणे प्यारे पाऊए खे तिना गे पेजुँआ, क्या पता सेयो तेसरा आदर करो। 14 जेबे ठेकेदारे से देखेया तो आपू बीचे बिचार करने लगे कि ये तो बारिस ए आओ एसखे काई देऊँए, ताकि जायदात म्हारी ऊई जाओ। 15 तेबे तिने से अँगूरा रे बगीचे ते बारे निकयाल़ी की काई ता। तेबे अँगूरा रा बगीचे रे मालके तिना साथे क्या करना? 16 तेस आईकि तिना ठेकेदारा रा नाश करी देणा और अँगूरा रा बगीचा ओरी गे सम्बाल़ी देणा।" ये सुणी की तिने बोलेया, "परमेशर करो कि एड़ा नि ओ।" 17 यीशुए तिना री तरफा खे देखी की बोलेया, "तेबे ये क्या लिखी राखेया,

‘जो पात्थर राजमिस्त्रिए तुच्छ ठराई राखेया था,

सेई कूणे रा सिरा ऊईगा।’"

18 "जो कोई तेस पात्थरो पाँदे पड़ना, से चूर-चूर ऊई जाणा और जेस पाँदे ये पड़ना, तेस से पीसी देणा।"

कैसरो खे कर देणा

19 तेसी बखते शास्त्रीए और बड़े पुरोईते सेयो पकड़ना चाए, कऊँकि सेयो समजी गे थे कि इने ये उदारण आसा पाँदे ई बोलेया, पर सेयो लोका ते डरी गे। 20 तेबे सेयो तिना री ताका रे रये और आपणे, पेतिये पेजे कि तर्मो रा पेष बदली की तेसरी कोई ना कोई गल्ल पकड़नी, ताकि तेसखे हाकिमो रे आथो रे और अक्को रे देई देऊँ। 21 तिने यीशुए ते पूछेया, "ओ गुरू! आसा खे पता ए कि तुसे ठीक बोलोए और सिखाओए और केसी रा पक्षपात नि करदे, पर परमेशरो री बाट सच्चाईया साथे बताओए। 22 तो क्या कैसरो खे कर देणा खरी गल्ल या नि?" 23 यीशुए तिना री चलाकी जाणी की तिना खे बोलेया, 24 "एक चाँदिए रा सिक्का मांगे बताओ। इदे केसरी मूर्ति और नाओं ए?" तिने बोलेया, "कैसरो रा।" 25 यीशुए तिना खे बोलेया, "जो कैसरो राए, से कैसरो खे देओ और जो परमेशरो राए, से परमेशरो खे देओ।" 26 सेयो लोका सामणे एसा गल्ला रे तिना खे पकड़ी नि सके, बल्कि तिना रा ज्वाब सुणी की हैरान ऊईगे और चुप रये।

दुबारा जिऊँदा ऊणा और ब्या

27 तेबे सदूकी, जो बोलो थे कि मरेया रा जिऊँदा ऊणा आए ई नि, तिना बीचा ते कई जणेया आयी की यीशुए ते पूछेया, 28 "ओ गुरू! मूसे आसा खे ये लिखी राखेया कि जे केसी रा पाई आपणी लाड़िया रे रंदे ऊए बिना ल्वादा ते मरी जाओ, तो तेसरा पाई तेसरी लाड़िया साथे ब्या करी लो और आपणे पाईए खे कुल पैदा करो। 29 सात पाई थे पईला पाई ब्या करी की बिना ल्वादा तेई मरी गा। 30 तेबे दूजे और तीजे बी तेसा जवाणसा साथे ब्या करी ला। 31 ईंयां ई सातो पाई बिना ल्वादा ते मरी गे। 32 सबी ते बाद से जवाणस बी मरी गी। 33 तेबे जिऊँदी ऊणे पाँदे से तिना बीचा ते केसरी लाड़ी ऊणी? कऊँकि से साता जणेया री लाड़ी ऊई चूकी थी।"

34 यीशुए तिना खे बोलेया, "एस जुगो रे लोका बीचे तो ब्या-शादिया ओईया। 35 पर जो लोक एते जोगे ऊणे कि तेस जुगो खे और मरे रे बीचा ते जिऊँदे ऊणे ओ, तेबे तिना बीचे ब्या-शादिया नि ऊणिया। 36 सेयो फेर मरने पनि, कऊँकि सेयो स्वर्गदूता जेड़े ऊणे, और जिऊँदे ऊणे री ल्वाद ऊणे ते, परमेशरो री बी ल्वाद ऊणे। 37 पर ये गल्ल कि मरे रे बी फेर जिऊँदे ओए, मूसे जाड़ो री कथा रे प्रगट करी राखी कि से प्रभुए खे अब्राहम, इसहाक और याकूबो रा परमेशर करी की बोलोआ। 38 परमेशर मुड़देया रा नि, बल्कि जिऊँदेया रा परमेशर ए, कऊँकि तेसरे नेड़े सब जिऊँदे ए।" 39 तेबे ये सुणी की शास्त्रिया बीचा ते कई जणे बोलेया, "ओ गुरू! तुसे अच्छा बोलेया।" 40 तेबे तिना खे फेर तिना ते कुछ ओर पूछणे री ईम्मत नि ऊई।

मसीह केसरा पाऊ ए

41 तेबे यीशुए तिना ते पूछेया, "मसीहे खे दाऊदो री ल्वाद कऊँ बोलोए? 42 दाऊद आपू ई भजनसंहिता री कताबा रे बोलोआ,

प्रभुए मेरे प्रभुए खे बोलेया,

43 मेरे दाँणे बैठ,

जदुओ तक आऊँ तेरे बैरिया खे तेरे पैरा निठे नि करी देऊँ।

44 "दाऊद तो तेसखे प्रभु बोलोआ, तो तेबे से तेसरी ल्वाद किंयाँ ऊआ?"

शास्त्रिया ते चौकस

45 जेबे सब लोक सुणने लगी रे थे तेबे यीशुए आपणे चेलेया खे बोलेया, 46 "शास्त्रिया ते चौकस रओ, जो लाम्बे टाल्ले पईनी की कूमदे रओए और बजारो रे नमस्कार, और प्रार्थना रे कअरो रे खास-खास जगा और पाट्टिया रे खास जगा चाओए। 47 सेयो बिदुआ रे कअरो खे खाई जाओए और दखाणे खे मुखती देर तक प्रार्थना करोए, इना खे जादा सजा मिलणी।"