1 इतिआस 29

मन्दरो रा काम करने रिया तँईं पेंट

1 तेबे दाऊद राजे सारी प्रजा खे बोलेया, "मेरा पाऊ सुलैमान बच्चा ईए ओर परमेशरे बस सेई चूणी राखेया; मन्दरो रा काम तो पारी ए, कऊँकि ये मन्दर माणूंए खे नि, बल्कि परमेशर यहोवे खे बणना। 2 जदुओ तक मांदे तागत थी, मैं आपणे परमेशरो रे मन्दरो खे सूईने रिया चीजा खे सूईना, चाँदिए रिया चीजा खे चाँदी, पीतल़ी रिया चीजा खे पीतल़ ओर लोए रिया चीजा खे लोआ ओर लकड़िया रिया चीजा खे लकड़ी ओर सुलैमानी पात्थर, जड़ने जोगी मणि, ओर पच्चीकारीया रे कामो खे लग-लग रंगो रे नग ओर हर प्रकारा रिया मणिया ओर बऊत सारा संगमरमर कट्ठा कित्तेया। 3 तेबे मेरा मन आपणे परमेशरो रे मन्दरो दे लगी रा, इजी बजा ते मैं जो कुछ पवित्र मन्दरो खे कट्ठा करी राखेया, तिना सबी ते जादा आऊँ आपणा तअन बी जो सूईने-चाँदिए रे रूपो रे मांगे ए, आपणे परमेशरो रे मन्दरो खे देई देऊँआ। 4 मतलब लगभग 100 टन*29:4 100 टन 3,000 किक्कार ओपीरो रा सूईना ओर लगभग 260 टन*29:4 260 टन 7,000 किक्कार शुद्ध कित्तेया रा चाँदी, जेते की कमरे री पीत मढ़नी। 5 ओर सूईने रिया चीजा खे सूईना, ओर चाँदिए री चीजा खे चाँदी देई राखी। ताकि तिजी ते बढ़िया काम करने वाल़े कारीगर सबी प्रकारा रिया चीजा बणाई सको। एबे तुसा लोका बीचा ते कुण ए जो आपणे आपू खे यहोवे खे अर्पित करी सकोआ?"

6 तेबे पितरा रे कराने रे परदान, ओर इस्राएलो रे लग-लग गोत्रा रे परदान ओर ह्जारा सिपाईया पाँदे जो सेनापति ओर सौ सिपाईया पाँदे जो सेनापति ए ओर राजे रे कामो रे अधिकारी आपणी-आपणी इच्छा ते, 7 परमेशरो रे मन्दरो रे कामो खे लगभग 185 टन*29:7 185 टन 5,000 किक्कार ओर 10,000 सूईने रे सिक्के, लगभग 370 टन*29:7 370 टन 10,000 किक्कार चाँदी, लगभग 670 टन*29:7 670 टन 18,000 किक्कार पीतल़ ओर लगभग 3,700 टन*29:7 3,700 टन 100,000 किक्कार लोआ देईता। 8 ओर जिना गे मणि थे, तिने सेयो यहोवे रे मन्दरो रे खजाने खे गेर्शोनो रे रणे वाल़े यहीएलो रे आथो दे देईता। 9 तेबे प्रजा रे लोक खुश ऊए, कऊँकि सबी परदाने खुश ऊई की खरे मन ओर आपणी-आपणी इच्छा ते यहोवे खे पेंट दित्ती थी ओर दाऊद राजा बऊत ई खुश ऊआ।

दाऊदो रे जरिये परमेशरो रा तन्यवाद

10 तेबे राजा दाऊदे सारी सभा सामणे यहोवे रा तन्यवाद कित्तेया ओर दाऊदे बोलेया, "ओ यहोवा! ओ म्हारे मूल़ मर्द इस्राएलो रे परमेशर! शुरूओ ते लई की अन्तो तक तूँ ई तन्य ए। 11 ओ यहोवा! महिमा, पराक्रम, शोभा, सामर्थ ओर वैभव तेरा ईए; कऊँकि सर्ग ओर तरतिया पाँदे जो कुछ ए, से तेरा ईए; ओ यहोवा! राज्य तेरा ए ओर तूँ सबी ते बड़ा ओर महान् ए। 12 तअन ओर महिमा तेरी तरफा ते मिलोई ओर तूँ सबी पाँदे राज करेया। सामर्थ ओर पराक्रम तेरे ई आथो दे ए ओर सबी लोका खे बढ़ाणा ओर तागत देणी तेरे ई आथो दे ए। 13 इजी री खातर एबे ओ मेरे परमेशर! आसे तेरा तन्यवाद ओर तेरे महिमा वाल़े नाओं री स्तुति करूँए। 14 ना तो आऊँ कुछ ए ओर ना ई मेरी‍ प्रजा कुछ ए। आसा दे इतणी तागत नि ए आसे आपणिया मर्जिया ते ताखे कुछ पेंट देई सकिए। तांते ई आसा खे सब कुछ मिलोआ ओर आसे तांते ई लया ओर ताखे ई दित्तेया। 15 तेरी नजरा दे तो आसे आपणे सबी बुजुर्गा जेड़े पराए ओर परदेशी ए; तरतिया पाँदे आसा रे दिन छांयी जेड़े बीतणे लगी रे ओर आसा रा कुछ ठकाणा नि ए।*29:15 इब्रा. 11:13, पज. 39:12, पज. 114:4 16 ओ म्हारे यहोवा परमेशर! आसे तेरे पवित्र नाओं रा एक मन्दर बनाणे खे जो इतणा सारा समान कट्ठा करी राखेया, से आसा खे तेरे ई आथो ते मिलेया था ओर सब तेरा ईए। 17 ओ मेरे परमेशर! आऊँ जाणूंआ कि तूँ मनो खे परखेया ओर सच्चाईया ते खुश रएया मैं तो ये सब कुछ बिना भेदभाव ते ओर आपणी इच्छा ते देई राखिया ओर एबे मैं खुशिया साथे देखी राखेया कि तेरी प्रजा रे लोक जो एती आजीर ए, सेयो आपणी इच्छा ते ताखे पेंट देओए। 18 ओ यहोवा! ओ म्हारे बुजुर्ग अब्राहम, इसहाक ओर इस्राएलो रे परमेशर! आपणी प्रजा रे मनो री सोचा दे ये गल्ल बणाई री राख ओर तिना रे मन आपणी तरफा खे लगाए रे राख। 19 ओर मेरे पाऊ सुलैमानो रा मन एड़ा खरा करी दे कि से तेरी आज्ञा, चितौणी ओर बिधिया खे मानदा रओ ओर ये सब कुछ करो ओर तेस मन्दरो खे बणाओ, जेतेरी त्यारी मैं करी राखी।" 20 तेबे राजा दाऊदे सारी सभा खे बोलेया, "तुसे आपणे परमेशर यहोवे रा तन्यवाद करो।" तेबे सभा रे सबी लोके आपणे पितरा रे परमेशर यहोवे रा तन्यवाद कित्तेया ओर आपणा-आपणा सिर चुकाई की यहोवे गे ओर राजे गे माथा टेकेया।

सुलैमानो रा राज्याभिषेक

21 ओर दूजे दिने तिने यहोवे खे बलिदान चढ़ाए, मतलब अर्घा समेत 1,000 बल़द, 1,000 खाडू ओर 1,000 पेडा रे बच्चे होमबलि करी की चढ़ाए ओर सारे इस्राएलो रे लोका खे बऊत मेलबलि चढ़ाए। 22 तेस ई दिने तिने यहोवे रे सामणे बड़ी खुशिया साथे खाया ओर पिया। तेबे तिने दाऊदो रा पाऊ सुलैमान दूजी बार राजा बणाई की यहोवे रिया तरफा ते परदान ऊणे खे तेसरा ओर पुरोईत ऊणे खे सादोको रा अभिषेक कित्तेया। 23 तेबे सुलैमान आपणे बाओ दाऊदो री जगा पाँदे राजा ऊई की यहोवे रे सिंहासनो पाँदे बैठणे लगेया ओर भाग्यशाली ऊआ ओर इस्राएल तेसरे वशो दे ऊआ। 24 तेबे सबी परदाने ओर शूरवीरे दाऊद राजे रे पाऊ सुलैमान राजे रे वशो दे रणा मानी ला। 25 ओर यहोवे सुलैमान सबी इस्राएली लोका सामणे बऊत बढ़ाया ओर तेसखे एड़ा राजो रा ऐश्वर्य दित्तेया, जेड़ा तेसते पईले इस्राएलो दे केसी राजे खे नि ऊआ था।

राजा दाऊदो री मौत

26 ईंयाँ यिशै रे पाऊ दाऊदे सारे इस्राएलो पाँदे राज कित्तेया। 27 ओर तिने इस्राएलो पाँदे चाल़िया साला तक राज कित्तेया; तिने सात साल तो हेब्रोनो दे ओर तेत्तीया साला तक यरूशलेम शईरो दे राज कित्तेया। 28 ओर से पूरा स्याणा ओर लाम्बी उम्रा रा ऊई की ओर तअन ओर वैभव, मनमाना पोगी की मरी गा ओर तेसरा पाऊ सुलैमान तेसरी जगा पाँदे राजा बणेया। 29 शुरूओ ते लई की अंतो तक दाऊद राजे रे सबी कामा रा वर्णन, सेमुएल नबीए, नातान नबीए ओर गाद नबीए रिया इतिआसो रिया कताबा दे लिखी राखे। 30 ओर तेसरे सब राज्य ओर पराक्रमो रा, ओर तेस पाँदे ओर इस्राएलो पाँदे, बल्कि देश-देशो रे सबी राजो पाँदे जो कुछ बीतेया, इजी रा बी वर्णन शमूएल दर्शी ओर नातान नबी ओर गाद दर्शीए री कताबा दे लिखी राखेया।