1 इतिआस 10

राजा शाऊलो री मौत

1 तेबे पलिश्ती सिपाई इस्राएली सिपाईया साथे लड़े; ओर कई इस्राएली सिपाई पलिश्ती सिपाईया रे सामणे ते नठीगे। तेबे पलिश्तिये कई इस्राएली सिपाई गिलबो नाओं रे पाह्ड़ो पाँदे काईते। 2 फेर पलिश्ती सिपाई शाऊल ओर तेसरे पाऊआ पीछे लगे दे रये ओर पलिश्तिये शाऊलो रे पाऊ योनातान, अबीनादाब ओर मल्कीशूअ काईते। 3 शाऊलो साथे घमासान युद्ध ऊँदा रया ओर धनुर्धारिये तेस पाँदे आपणे तीर चलाए। तिने तीरे की शाऊल काईल ऊईगा। 4 तेबे शाऊले आपणे अथियार टोणे वाल़े खे बोलेया, "आपणी तलवार निकयाल़ी की माँदे कोपी दे, केथी एड़ा नि ओ कि सेयो बिना खतना कित्ते रे लोक आई की मेरा मजाक करो" पर तेसरे अथियार टोणे वाल़े डरो रे मारे एड़ा करने ते ना करिती, तेबे शाऊल आपणी तलवार खड़ी करी की तेते पाँदे पड़ीगा। 5 ये देखी की कि शाऊल मरीगा दा तेसरा अथियार टोणे वाल़ा बी आपणी तलवारी पाँदे आपू पड़ी की मरी गा। 6 ईंयाँ शाऊल ओर तेसरे तीनो पाऊ ओर तेसरे कराने रे सारे लोक कट्ठे मरी गे। 7 काट्टिया दे रणे वाल़े इस्राएली लोके देखेया कि इस्राएली सिपाई नठीगे। तिने देखेया कि शाऊल ओर तेसरे माठे बी मरीगे। तेसा तराईया दे रणे वाल़े सब इस्राएली माणूं आपणे-आपणे शईरो खे छाडी की नठीगे ओर पलिश्ती आई की तिना शईरा दे रणे लगे।

8 दूजे दिने जेबे पलिश्ती मरे दे सिपाईया रा माल लुटणे खे आए, तेबे तिना खे शाऊल ओर तेसरे पाऊ गिलबो रे पाह्ड़ो पाँदे पड़े दे मिले। 9 तेबे तिने तेसरे टाल्ले खोली की तेसरा सिर ओर अथियार लई ले ओर पलिश्तिया रे देशो दे सारी जगा दे दूत इजी खे पेजे, ताकि तिना रे देवतेया खे ओर आम माणूंआ खे ये शुभ सन्देश देंदे जाओ। 10 तेबे तिने शाऊलो रे अथियार आपणे मन्दरो दे राखे ओर तेसरी खोपड़ी दागोन देवते रे मन्दरो रे बारे लटकाई ती।

11 जो कुछ बी पलिश्तिये शाऊलो साथे कित्तेया था तेतेरे बारे दे जेबे गिलाद इलाके रे याबेश शईरो दे रणे वाल़ेया सारेया लोके सुणेया, 12 तेबे सारे शूरवीर मर्द गये ओर शाऊल ओर तेसरे पाऊआ री लाशा खे चकी की याबेश जगा दे ली आए ओर तिना री आड्डिया याबेश जगा दे एक बाँजो रे डाल़ो निठे दबाई तिया ओर साता दिना तक कुछ नि खाया। 13 ईंयाँ शाऊल तेस विश्वासघातो रिया बजा ते मरीगा, जो तिने यहोवे साथे कित्तेया था; कऊँकि तिने यहोवे रा वचन टाल़ी ता था, तेबे तिने जादू-टोणा करने वाल़िया ते पूछी की सला लई थी। 14 तिने यहोवे ते नि पूछेया था, इजी बजा ते यहोवे से काई की राज्य यिशै रे पाऊ दाऊदो खे देईता।