1 इतिआस 21

दाऊदो रे जरिये इस्राएलो री गिणती

1 एक दिन शैतान इस्राएलो रे खलाफ उठेया ओर तिने दाऊद बईकाया कि इस्राएली लोका री गिणती लओ। 2 तेबे दाऊदे योआब ओर प्रजा रे परदाना खे बोलेया, "तुसे जाई की उतर दिशा दे दानो रे इलाके ते लई की दक्खणा दे बेर्शेबा शईरो तक इस्राएली लोका री गिणती लई की मांगे बताओ, ताकि माखे पता लगो कि सेयो कितणे ए।" 3 योआबे बोलेया, "यहोवे री प्रजा कितणी ई कऊँ नि ओ, से तिना खे सौ गुणा बढ़ाई देयो; पर ओ मेरे प्रभु! ओ राजा! क्या सेयो सारे राजे रे वशो दे नि ए? मेरा प्रभु एड़ी गल्ल कऊँ चाओआ? से इस्राएलो पाँदे दोष लगणे री बजा कऊँ बणो?"

4 तेबे बी राजे री आज्ञा योआबो पाँदे प्रबल ऊई। तेबे योआब बिदा ऊई की सारे इस्राएलो दे कूमी की यरूशलेम शईरो खे वापस आया। 5 तेबे योआबे प्रजा री गिणतिया रा जोड़ दाऊदो खे सुणाया ओर सारे तलवार चलाणे वाल़े मर्द इस्राएलो दे तो 1,100,000 लोक ओर यहूदा दे 470,000 लोक ठईरे। 6 पर तिना बीचे योआबे लेवी ओर बिन्यामीनी नि गिणे, कऊँकि से राजे री आज्ञा ते नफरत करो था, 7 ओर ये गल्ल परमेशरो खे बुरी लगी, इजी री खातर परमेशरे इस्राएलो खे सजा दित्ती।

8 तेबे दाऊदे परमेशरो ते प्रार्थना करी की बोलेया, "ये काम जो मैं करी राखेया, से महापाप ए। पर एबे आपणे दासो रा पाप दूर कर; मांते तो बड़ी पारी मूर्खता ऊई री।" 9 तेबे यहोवे दाऊदो रे दर्शी गादो खे बोलेया, 10 जाई की दाऊदो खे बोल, "यहोवा ईंयाँ बोलोआ कि आऊँ ताखे तीन मुसीबता दखाऊँआ, तिना बीचा ते एकी खे चुण कि आऊँ तिजी खे तां पाँदे पाऊँ।" 11 तेबे गादे दाऊदो गे जाई की तेसखे बोलेया, "यहोवा ईंयाँ बोलोआ कि जेतेखे तूँ चाए से चूणी लो: 12 या तो तीऊँ साला रा अकाल़ पड़ो, या तीन मीन्ने तक तेरे बिरोदी ताखे नाश करने खे तां पीछे लगे दे रओ ओर तेरे दुश्मणा री तलवार तां पाँदे चलदी रओ; या तीऊँ दिना तक यहोवे री तलवार चलो, मतलब मरी देशो दे फैलो ओर यहोवे रा दूत इस्राएल देशो रे चऊँ कनारे नाश करदा रओ। एबे सोच कि आऊँ आपणे पेजणे वाल़े खे क्या ज्वाब देऊँ।"

13 दाऊदे गादो खे बोलेया, "आऊँ बड़ी मुसीबता दे पड़ीगा रा; आऊँ यहोवे रे आथो दे पड़ूँ, कऊँकि तेसरी दया बऊत बड़ी ए; पर माखे माणूंआ रे आथो दे नि पड़ना पड़ो।" 14 तेबे यहोवे इस्राएलो दे मरी फैलाई ओर इस्राएलो दे 70,000 लोक मरी गे। 15 तेबे परमेशरे एक दूत यरूशलेम शईरो रा नाश करने खे पेजेया ओर से नाश करने ई वाल़ा था, कि यहोवा दु:ख देणे ते बऊत दु:खी ऊआ ओर नाश करने वाल़े दूतो खे बोलेया, "बस कर; एबे आपणा आथ पीछे टाईलो।" ओर यहोवे रा दूत यबूस शईरो दे रणे वाल़े ओर्नान नाओं रे माणूंए रे खल्याणो गे खड़ी रा था।

16 दाऊदे आखी चकी की देखेया कि यहोवे रा दूत आथो दे खींजी री ओर यरूशलेम शईरो पाँदे प्वारी री एक तलवार लई की सर्गो बीचे खड़ी रा, तेबे दाऊद ओर बुजुर्ग लोक टाट पईनी की मुंए रे पारे थाले पड़े। 17 तेबे दाऊदे परमेशरो खे बोलेया, "जिने प्रजा री गिणती लणे री आज्ञा दित्ती थी, से आऊँ ए। आ, जिने पाप कित्तेया ओर बऊत बुराई कित्ती, से तो आऊँ ईए। पर इने पेडे-बाकरिये कुछ नि करी राखेया जिना पाँदे ये मुसीबत पड़ी। इजी री खातर ओ मेरे यहोवा परमेशर! तेरा आथ मेरे बाओ रे कराने रे खलाफ ओ, पर मेरी‍ प्रजा रे खलाफ नि ओ, कि सेयो मरी जाओ।" 18 तेबे यहोवे रे दूते गादो खे दाऊदो खे ये बोलणे री आज्ञा दित्ती कि दाऊद चढ़ी की यबूसी ओर्नानो रे खल्याणो दे यहोवे री एक बेदी बणाओ। 19 गादो रे एस वचनो रे मुताबिक जो तिने यहोवे रे नाओं ते बोलेया था, दाऊद तेते खल्याणो खे चलीगा। 20 तेबे ओर्नाने पीछे फिरी की दूत देखेया ओर तेसरे चारो पाऊ जो तेस साथे थे लूकी गे, ओर्नान तो कणक काडणे लगी रा था। 21 जेबे दाऊद ओर्नानो गे आया, तेबे ओर्नाने नजर करी की दाऊद देखेया ओर खल्याणो ते बारे जाई की जमीना तक चूकी की दाऊदो गे माथा टेकेया। 22 तेबे दाऊदे ओर्नानो खे बोलेया, "एस खल्याणो री जगा माखे देई दे, ताकि आऊँ एते पाँदे यहोवे खे एक बेदी बणाऊँ, इजी री पूरी कीमत लई की एस माखे दे, ताकि ये मुसीबत प्रजा पाँदा ते दूर ऊई जाओ।" 23 ओर्नाने दाऊदो खे बोलेया, "इजी खे लई लो ओर मेरे प्रभु राजे खे जो कुछ अच्छा लगो सेई कर; सुण, आऊँ ताखे होमबलिया खे बल़द ओर लकड़ी बाडणे खे अथियार ओर नज्जो री बलिया खे कणक, ये सब आऊँ देऊँआ।" 24 राजा दाऊदे ओर्नानो खे बोलेया, "ईंयाँ नि ये लणा, मां जरूर इजी रा पूरा मोल देई की ये खरीदणा; जो तेरा ए, से मां यहोवे खे नि लणा ओर ना मुफ्तो री होमबलि चढ़ाणी।" 25 तेबे दाऊदे तेसा जगा दे ओर्नानो खे लगभग सात किलो सूईने रे सिक्के तोली की दित्ते।

26 तेबे दाऊदे तेथी यहोवे री एक बेदी बणाई ओर होमबलि ओर मेलबलि चढ़ाए। फेर तेथी तिने यहोवे ते प्रार्थना कित्ती। यहोवे होमबलिया री बेदिया पाँदे स्वर्गो ते आग सेटी की दाऊदो री सुणी ली। 27 तेबे यहोवे दूतो खे आज्ञा दित्ती; ओर तिने आपणी तलवार फेर म्यानो दे राखी ती। 28 ये देखी की कि यहोवे यबूसी ओर्नानो रे खल्याणो दे मेरी सुणी ली, दाऊदे तेस ई बखते तेथी बलिदान कित्तेया। 29 यहोवे रा तम्बू जो मूसे जंगल़ो दे बणाया था ओर होमबलि चढ़ाणे खे बलिया री बेदी, यो दोनो तेस बखते गिबोनो रिया ऊच्ची जगा दे थे। 30 पर दाऊद परमेशरो गे तेस सामणे नि जाई सकेया, कऊँकि से यहोवे रे दूतो री तलवारी ते डरीगा था।