1 तेबे सारे इस्राएली लोक हेब्रोन शईरो दे कट्ठे ऊई की दाऊदो गे आए। तिने दाऊदो खे बोलेया, "सुण, आसे लोक ओर तूँ एकी ई आड्ड ओर मास ए। 2 पईले जेबे शाऊल राजा आसा पाँदे राज करो था, तेबे बी लड़ाईया दे तूँ ई इस्राएली लोका ते आगे चलो था ओर तेरे यहोवा परमेशरे ताखे बोलेया कि मेरी इस्राएली प्रजा रा ग्वाल़ा ओर परदान तूँ ई ऊणा।"* 3 इस्राएलो रे खास बुजुर्ग हेब्रोन शईरो दे दाऊदो गे आए ओर दाऊदे तिना खास बुजुर्गा साथे हेब्रोन शईरो दे यहोवे रे सामणे वाचा बानी ओर तिने यहोवे रे वचनो रे मुताबिक, जो तिने शमूएलो खे बोलेया था, इस्राएलो रा राजा ऊणे खे दाऊदो रा अभिषेक कित्तेया। 4 तेबे दाऊद ओर सारे इस्राएली लोक यरूशलेम शईरो खे गए, तेस बखते यरूशलेम शईरो खे यबूसो रे नाओं ते जाणो थे। तेस शईरो दे रणे वाल़े लोक यबूसी थे। 5 तेबे यबूसो दे रणे वाल़ेया दाऊदो खे बोलेया, "तूँ एती आसा रे शईरो दे नि आई सकदा।" तेबे बी दाऊदे सेयो लड़ाईया दे अराईते। दाऊदे सिय्योन नाओं रा गढ़ आपणे कब्जे दे लई ला, तेतेखे ई दाऊदपुर बी बोलोए।

6 तिना पाँदे अमला करने ते पईले दाऊदे बोलेया, "जो कोई यबूसिया ते लड़ाई करने खे सबी ते पईले जाओगा, से मां आपणी सारी सेना पाँदे परदान ठराणा, जेबे सरूयाह रे पाऊ योआबे ये सुणेया तेबे से सबी ते पईले यबूसिया पाँदे अमला करने खे आगे चलेया। ये देखी की दाऊदे से आपणी सारी सेना पाँदे परदान सेनापति बणाईता।" 7 तिजी शईरो खे आपणे कब्जे दे लणे ते बाद दाऊद तेस शईरो दे रणे लगेया, इजी बजा ते तेस शईरो रा नाओं दाऊदपुर पड़ेया। 8 ओर तिने शईरो रे चऊँ कनारे, मतलब ऊँदले छज्जे* ते लई की चऊँ कनारे दवाल बणवाई ओर योआबे बाकी शईरो रे खण्डहर फेर बसाए। 9 ओर दाऊदो रा नाओं चऊँ कनारे फैलीगा कऊँकि सेना रा यहोवा परमेशर तेस साथे था।

10 यहोवे इस्राएलो रे बारे दे जो वचन बोलेया था, तिजी रे मुताबिक दाऊदो रा इस्राएल देशो रा राजा बणने खे कुछ शूरवीरे सबी इस्राएली लोका साथे मिली की तेसरा साथ दित्तेया था, तिना बीचा ते मुख्य मर्द यो ए।

11 दाऊदो रे शूरवीरा रे नाओं यो ए, मतलब एक याशोबाम जो हक्मोनीए रा पाऊ था, से दाऊदो रे खास तीईया जणेया बीचे बड़ा था, तिने आपणा भाल़ा चलाई की 300 दुश्मण एक ई बार काईते थे।

12 तेसते बाद एलीआजर था जो तीनो महान वीरा बीचा ते एक था से अहोही दोदो रा पाऊ था। 13 एलीआजर पसदम्मीमो दे दाऊदो साथे था। तेती पलिश्ती लोक युद्ध करने खे कट्ठे ऊए थे। तेती जौआ रा एक डोरू था। ये सेई जगा थी जेथा ते इस्राएली लोक पलिश्ती लोका रे सामणे ते नठीगे थे। 14 तेबे एलीआजारे तेस डोरूए दे खड़े ऊई की दाऊदो री रक्षा कित्ती ओर पलिश्ती काये ओर यहोवे पलिश्तिया खे अराणे खे इस्राएली लोका री बऊत बड़ी मताद कित्ती।

15 एक दिन दाऊद अदुल्लाम नाओं री गुफा गे था। तेती तेसगे तेसरे तीई मुख्य मर्दा बीचा ते तीन मर्द तेसगे लूकी की चट्टानी गे आए। कऊँकि पलिश्तिए आपणे डेरे रपाईम नाओं री तराईया दे खड़े करी राखे थे। 16 तेस बखते दाऊद गढ़ो दे था ओर तेस बखते पलिश्तिया री एक चौकी बेतलेहमो दे थी। 17 तेबे दाऊदे बड़ी इच्छा साथे बोलेया, "माखे बेतलेहमो रे बड़े द्वारो रे कुएँ रा पाणी केस पल़्याणा।" 18 तेबे तिने तीऊँ जणेया पलिश्तिया रे डेरे दे जाई की तिना पाँदे अमला कित्तेया ओर तिना बिछिए निकल़ी की बेतलेहमो रे बड़े द्वारो रे कुएँ ते पाणी परी की दाऊदो गे ली आए; पर दाऊदे पीणे खे ना कित्ती ओर यहोवे सामणे अर्घ करी की चढ़ाईता।

19 दाऊदे बोलेया, "मेरा परमेशर मांते एड़ा काम कदी नि कराओ, ये पाणी पीणे रा मतलब ए कि इना मर्दा रा खून पीणा, कऊँकि इने मर्दे आपणे प्राणो पाँदे खेली की माखे पाणी ल्याया। इजी री खातर तिने से पाणी पीणे ते ना करिती। इने तीऊँ वीरे यो ई काम कित्ते।"

20 योआबो रा पाई अबीशै था, से तीऊँ बीचे मुख्य था। तिने आपणा भाल़ा चलाई की 300 दुश्मण काये थे जेतेरिया बजा ते तिना तीऊँ बीचे तेसरा नाओं ऊईगा। 21 से तिना तीई मर्दा बीचे प्रतिष्ठित तो बणीगा था ओर तिना रा परदान बी ऊईगा था। पर तिना ते बी बड़े तीऊँ मर्दा बराबर नि बणेया था जो दाऊदो रे नेड़े रओ थे।

22 यहोयादो रा पाऊ बनायाह था, जो कबसेलो रे एक वीरो रा पाऊ था, जिने बड़े-बड़े काम कित्ते थे, तिने शेरो जेड़े दो मोआबी माणूं काये थे ओर ठण्डी रे बखते तिने एकी गड्डे रे उतरी की एक शेर काया था। 23 तेबे तिने एक मिस्री मर्द काया। से लगभग पाँज आथ लाम्बा मर्द था, तेस मिस्रिए रे आथो दे एक बऊत बड़ा ओर पारी भाल़ा था। से जुलाए री खड्डिया रिया लकड़िया रे बराबर मोटा था। पर बनायाहे एक डण्डा ई लई राखेया था, तेबे तिने मिस्रिए रे आथो ते भाल़ा छुड़ाई की तेसरे ई भाल़े साथे से काई ता। 24 एड़े-एड़े काम करी की यहोयादो रा पाऊ बनायाह तीना तीऊँ वीरा बीचे नामी ऊईगा। 25 से तो तीई जणेया बीचे प्रतिष्ठित था, पर मुख्य तीऊँ रे बराबर नि पऊँचेया। तेसखे दाऊदे आपणे अंगरक्षका रा परदान बणाया।

26 दाऊदो री सेना रे तीई वीर सिपाई यो थे, मतलब योआबो रा पाई असाहेल, बेतलेहम शईरो रे दोदो रा पाऊ एल्हानान, 27 हरोरी शईरो रा शम्मोत, पलोनी शईरो रा हेलेस, 28 तकोई शईरो रा इक्केशो रा पाऊ ईरा, अनातोत शईरो रा अबीएजेर, 29 सिब्बकै शईरो रा हूशाई, अहोही शईरो रा ईलै, 30 महरै शईरो रा नतोपाई, एक ओर नतोपाई बानाह रा पाऊ हेलेद, 31 बिन्यामीनिया रे गिबा रे रणे वाल़े रीबै रा पाऊ इतै, पिरातोनी शईरो रा बनायाह, 32 गाश जगा रे नाल़ेया गे रणे वाल़ा हूरै, अराबा दे रणे वाल़ा अबीएल, 33 बहूरीमी, अज्मावेत, शालबोनी एल्यहबा, 34 गीजोई शईरो रा हाशेमो रा पाऊ, तेबे हरारी शागे रा पाऊ योनातान, 35 हरारी साकारो रा पाऊ अहीआम, ऊरो रा पाऊ एलीपाल, 36 मकेराई हेपेर, पलोनी अहिय्याह, 37 कर्मेली, हेस्रो एज्बैए रा पाऊ नारै, 38 नातानो रा पाई योएल, हग्रीए रा पाऊ मिभार, 39 अम्मोनी सेलेक, बेरोती नहरै जो सरूयाह रे पाऊ योआबो रा अथियार टोणे वाल़ा था, 40 येतेरी ईरा ओर गारेब, 41 हित्ती ऊरिय्याह, अहलैए रा पाऊ जाबाद, 42 रूबेनी शीजा रा पाऊ अदीना जो रूबेनिया रा मुखिया था ओर तेस साथे तीई मर्द थे, 43 माका रा पाऊ हानान, मेतेनी योशापात, 44 अश्तारोती उजिय्याह, अरोएरी होतामो रा पाऊ शामा ओर यीएल, 45 शिम्रीए रा पाऊ यदीएल ओर तेसरा पाई तीसी, योहा, 46 महवीमी एलीएल, एलनामो रे पाऊ यरीबै ओर योशव्याह, मोआबी यित्मा, 47 एलीएल, ओबेद ओर मसोबाई यासीएल।