1 तेबे लेवी वंशो रे लोके परमेशरो रा सन्दूक ल्याई की तेस तम्बूए दे राखेया, जो दाऊदे तेतेखे बणाया था। फेर दाऊदे परमेशरो सामणे होमबलि ओर मेलबलि चढ़ाए। 2 जेबे दाऊद होमबलि ओर मेलबलि चढ़ाई चुकेया, तेबे तिने यहोवे रे नाओं ते प्रजा खे आशीर्वाद दित्तेया। 3 तेबे तिने क्या मर्द, क्या जवाणस, सारे इस्राएली लोका खे एक-एक रोटी ओर एक-एक टुकड़ा मास ओर किशमिशा री एक-एक टिक्की बँडवाई ती।

4 तेबे दाऊदे यहोवे रे सन्दूको रे सामणे सेवा-टईल करने खे कुछ लेवी लोक ठराईते। तिने सेयो इस्राएलो रे परमेशर यहोवे रे कामो री चर्चा ओर तेसरा तन्यवाद ओर स्तुति करने खे ठराए। 5 तिना रा मुखिया आसाप था ओर तेसते बाद जकर्याह था, तेबे यीएल, शमीरामोत, यहीएल, मत्तित्याह, एलीआब, बनायाह, ओबेदेदोम ओर यीएल थे; इने तो सारंगिया ओर बीणा लई राखिया थिया ओर आसाप खंजरिया पाँदे राग बजाओ था। 6 बनायाह ओर यहजीएल नाओं रे पुरोईत परमेशरो री वाचा रे सन्दूको सामणे हमेशा रड़सिंगे बजाणे खे चूणी राखे थे।

7 तेबे तेस ई दिने दाऊदे यहोवे रा तन्यवाद करने रा काम आसाप ओर तेसरे पाईया गे सम्बाल़ी ता।

8 यहोवे रा तन्यवाद करो, तेसते प्रार्थना करो;

सबी देशा दे तेसरे कामो रा प्रचार करो।

9 तेसरा गीत गाओ, तेसरा पजन करो,

तेसरे सारे अचम्बे रे कामो रा त्यान करो।

10 यहोवे रे पवित्र नाओं री महिमा करो,

यहोवे खे टोल़ने वाल़ेया रे काल़जे खे शान्ति मिलो।

11 यहोवा ओर तेसरी सामर्था खे टोल़ो;

तेसरा दर्शण पाणे खे लगातार मईणत करदे रओ।

12 तेसरे कित्ते रे अचम्बे रे काम,

तेसरे चमत्कार ओर न्याय रे वचन याद करो।

13 ओ तेसरे दास इस्राएलो रे कुल,

ओ याकूबो री ल्वाद तुसे जो तेसरे चूणे रे ए!

14 सेई म्हारा यहोवा परमेशर ए,

तेसरे न्याय रे काम पूरी तरतिया पाँदे ओए।

15 तेसरी वाचा खे सदा याद राखो,

ये सेई वचन ए जो तिने ह्जार पीढ़िया खे ठराईता।

16 से वाचा जो तिने अब्राहमो साथे बानी

ओर तेसरे ई बारे दे तिने इसहाको ते कसम खाई,

17 ओर तेसखे तिने याकूबो खे बिदि करी की

ओर इस्राएलो खे सदा री वाचा बानी की ये बोली की मजबूत कित्ती,

18 तिने बोलेया, "मां कनान देश ताखे ई देणा,

से बांडा दे तेरा आपणा इस्सा ऊणा।"

19 तेस बखते तो तुसे गिणतिया दे थोड़े थे, बल्कि बऊत ई थोड़े

ओर तेस देशो दे परदेशी थे।

20 ओर सेयो एकी जातिया ते दूजी जातिया दे,

ओर एकी देशो ते दूजे देशो दे फिरदे तो रये,

21 पर तिने केसी माणूंए खे तिना पाँदे अन्देर नि करने दित्तेया

ओर से राजेया खे तिना रिया तँईं ये तमकी देयो था,

22 "मेरे अभिषिक्ता खे नि छूँओ

ओर ना ई मेरे नबिया रा नुकशाण करो।"

23 ओ सारी तरतिया रे लोको, यहोवे रा गीत गाओ।

हर दिन तेसरे कित्ते रे उद्धारो रा शुभ सन्देश सुणाओ।

24 दूजी जातिया बीचे तेसरी महिमा रा

ओर देशो-देशो रे लोका गे तेसरे अचम्बे रे कामो रे बारे बताओ।

25 कऊँकि यहोवा महान ओर स्तुतिया जोगा ए,

से तो सबी देवतेया ते जादा डरो जोगा ए।

26 कऊँकि देशो-देशो रे सब देवता मूर्तिया ई ए;

पर यहोवे ई स्वर्ग बणाई राखेया।

27 तेसरे चऊँ कनारे एशो अराम ए;

तेसरिया जगा दे सामर्थ ओर खुशी ए।

28 ओ देशो-देशो रे कुलो, यहोवे रे कामा रा बखाण करो,

यहोवे री महिमा ओर सामर्था खे मानो।

29 यहोवे रे नाओं री महिमा एड़ी मानो जो तेसरे नाओं जोगी ए।

पेंट लई की तेस सामणे आओ, पवित्र ऊई की यहोवे गे माथा टेको।

30 ओ सारी तरतिया रे लोको, तेस सामणे थरथराओ!

दुनिया एड़ी पक्की ए कि से टल़ी नि सकदी।

31 सर्ग खुशी मनाओ ओर तरती मगन ओ

ओर जातिया-जातिया रे लोक बोलो, "यहोवा राजा ऊई रा।"

32 समुद्र ओर तेते बीचलिया सारिया चीजा गरजो,

मैदान ओर जो कुछ तिदे ए, सब खुश ओ।

33 तेस ई बखते बणो रे डाल़ यहोवे सामणे जयजयकार करो,

कऊँकि से तरतिया रा न्याय करने खे आऊणे वाल़ा ए।

34 यहोवे रा तन्यवाद करो, कऊँकि से खरा ए;

तेसरी करूणा सदा री ए।

35 ओर ये बी बोलो, "ओ म्हारे उद्धार करने वाल़े परमेशर, म्हारा उद्धार कर

ओर आसा खे कट्ठा करी की दूजी जातिया ते छुड़ा,

ताकि आसे तेरे पवित्र नाओं रा तन्यवाद करुँ

ओर तेरी स्तुति करदे ऊए तेसरे बारे तारीफ करुँ।*

36 शुरूओ ते लई की अनन्तकालो तक इस्राएलो रा यहोवा परमेशर तन्य ए।"

तेबे प्रजा रे सबी लोके "आमीन्" बोलेया ओर यहोवे री स्तुति कित्ती।*

37 तेबे दाऊदे तेथी यहोवे री वाचा रे सन्दूको सामणे आसाप ओर तेसरे पाई छाडी ते, ताकि हर रोज सेयो सन्दूको सामणे सदा तेसरी सेवा-टईल करेया करो, 38 यदूतूनो रा पाऊ ओबेदेदोम ओर तेसरे कुलो रे ठाठ माणूं तिना री मताद करने खे थे। होसा ओर ओबेदेदोम बड़े द्वारा री रखवाल़ी करने वाल़ेया रे अधिकारी थे। 39 तेबे दाऊदे सादोक पुरोईत ओर तेसरे पुरोईत पाई यहोवे रे तम्बूए गे छाडी ते, जो गिबोन पाह्ड़ो रिया ऊच्ची जगा पाँदे था। 40 ताकि सेयो प्यागा-साँजा होमबलिया री बेदिया पाँदे यहोवे खे होमबलि चढ़ाया करो ओर तेस यहोवे रे बिधानो रे मुताबिक करेया करो, जो तिने इस्राएली लोका खे देई राखेया था। 41 ओर तिना साथे तिने हेमान ओर यदूतून ओर दूजे लोक बी जो नाओं लई की चूणे थे ठराईते, ताकि यहोवे री सदा री करूणा रिया बजा ते तेसरा तन्यवाद करो। 42 ओर तिना साथे तिने हेमान ओर यदूतून बजाणे वाल़ेया खे तूरहिया ओर खंजरी ओर परमेशरो रे गीत गाणेवाल़ेया खे बाजे दित्ते ओर यदूतूनो रे पाऊ बड़े द्वारो री रखवाल़ी करने वाल़ेया रे अधिकारी ठराईते। 43 तेबे इस्राएली प्रजा रे सारे लोक आपणे-आपणे कअरे चली गे ओर दाऊद आपणे कराने खे आशीर्वाद देणे खे प्रार्थना करने खे वापस ऊईगा।