1 जेबे राजा दाऊद सिकलग शईरो दे कीशो रे पाऊ शाऊलो रे डरो रे मारे लूकी की रओ था, तेबे यो तेसगे तेती आए ओर यो तीना वीरा बीचा ते थे, जो युद्धो दे तेसरी मताद करने वाल़े थे। 2 ये धनुर्धारी थे, जो दाँणे-खूँजे, दुँईं आथो ते गूलेला दे पात्थर ओर धनुषो रे तीर चलाई सको थे ओर यो शाऊलो रे परिवारो रे बिन्यामीनी गोत्रो रे थे, तिना रे नाओं यो थे; 3 मुख्य तो अहीएजेर ओर दूजा योआश था जो गिबा रे रणे वाल़े शमाआ रा पाऊ था; तेबे अज्माबेतो रे पाऊ यजीएल ओर पेलेत, तेबे बराका ओर अनातोती येहू, 4 ओर गिबोनी यिशमायाह जो तीईया बीचा ते एक वीर ओर तिना पाँदे परदान बी था; तेबे यिर्मयाह, यहजीएल, योहानान, गदेरा दे रणे वाल़ा योजाबाद, 5 एलूजै, यरीमोत, बाल्याह, शेमर्याह, हारूपी शपत्याह, 6 एल्काना, यिश्शिय्याह, अजरेल, योएजेर, याशोबाम, जो सारे कोरह रे कुलो रे थे,

7 ओर गदोर शईरो दे रणे वाल़ा यरोहामो रे पाऊ योएला ओर जबद्याह।

8 फेर जेबे दाऊद जंगल़ो रे गढ़ो दे रओ था, तेबे यो गादी जो शूरवीर थे ओर युद्ध बिद्या सीखे रे ओर ढाल ओर भाल़े रा इस्तेमाल करने वाल़े थे ओर तिना रे मूँ शेरो जेड़े ओर सेओ पाह्ड़ी ईरणो जेड़े तेज दौड़ने वाल़े थे, यो ओरी गादिया ते लग ऊई की तेसगे आए, 9 मतलब मुख्य तो एजेर, दूजा ओबद्याह, तीजा एलीआब, 10 चौथा मिश्मन्ना, पाँजुआ यिर्मयाह, 11 छठा अत्तै, सातुआ एलीएल, 12 आठुआ योहानान, नऊआ एलजाबाद, 13 दसुआ यिर्मयाह ओर ग्यारुआ मकबन्नै था, 14 यो गाद गोत्रो रे मुख्य योद्धा थे, तिना बीचा ते जो सबी ते छोटा था, से तो 100 पाँदे परदान ओर जो सबी ते बड़ा था, से 1,000 पाँदे परदान था। 15 यो सेयो ईए, जो पईले मीन्ने दे जेबे यरदन नदी सबी कनारेया पाँदे-पाँदे बह्ओ थी, तेबे तेते ते पार उतरे ओर पूर्ब ओर पच्छम दुँईं तरफा रे सब तराईया रे रणे वाल़े नठाईते।

16 कई जणे बिन्यामीनी ओर यहूदी बी दाऊदो गे गढ़ो दे आए। 17 तिना साथे मिलणे खे दाऊद निकल़ेया ओर तिना खे बोलेया, "जे तुसे मांगे मेल-जोलो रे नाते मेरी मताद करने खे आई रे, तेबे तो मेरा मन तुसा साथे लगेया रा रणा; पर जे तुसे माखे तोखा देई की मेरे दुश्मणा रे आथो दे पकड़वाणे आई रे, तो म्हारे पितरा रा परमेशर ये देखो ओर सजा देयो, कऊँकि मेरे आथो ते कोई उपद्रव नि ऊई रा।" 18 तेबे आत्मा अमासै दे समाया, जो तीईया वीरा बीचे मुख्य था ओर तिने बोलेया, "ओ दाऊद! आसे तेरे ए; ओ यिशै रे पाऊ! आसे तेरी तरफा रे ए, तेरा पला ई पला ओ ओर तेरे मतदगारा रा कल्याण ओ, कऊँकि तेरा परमेशर तेसरी मताद करेया करोआ।" इजी री खातर दाऊदे सेयो राखी ते ओर आपणे दलो रे मुखिये ठराईते।

19 फेर कुछ मनश्शे रे गोत्रो रे लोक बी तेस बखते दाऊदो गे नठीगे, जेबे दाऊद पलिश्तिया साथे ऊई की शाऊलो साथे लड़ने खे गया, पर दाऊद ओर तेसरे लोक पलिश्तिया री कोई मताद नि करी सके, कऊँकि पलिश्तिया रे सरदारा री सला लणे ते बाद ये बोली की दाऊद तेथा ते ये बोली की पेजीता, "जे ये आपणे स्वामी शाऊलो साथे फेर मिलीगा तो एस मारे सिर बाडी देणे।" 20 जेबे दाऊद सिकलगो खे जाणे लणी रा था, तेबे यो मनश्शे गोत्रो रे मर्द तेसगे नठी की आए; मतलब अदनह, योजाबाद, यदीएल, मीकाएल, योजाबाद, एलीहू ओर सिल्लतै जो मनश्शे रे ह्जारा सिपाईया पाँदे मुखिये थे। 21 इने लूटेरेया रे दलो रे खलाफ दाऊदो री मताद कित्ती, कऊँकि यो सारे शूरवीर थे ओर सेना रे परदान बी बणीगे। 22 बल्कि हर रोज लोक दाऊदो री मताद करने खे तेसगे आया करो थे, एथो तक कि परमेशरो री सेना जेड़ी एक बड़ी ओर तागतबर सेना बणीगी। 23 तेबे योद्धा लड़ने खे अथियार बानी की हेब्रोनो दे दाऊदो गे इजी खे आए कि यहोवे रे वचनो रे मुताबिक शाऊलो रा राज्य तेसरे आथो दे करी देयो; तिना रे मुखिया री गिणती ये ए।

24 यहूदा गोत्रो रे योद्धा ढाल ओर भाल़ा लई की 6,800 अथियार बानी की लड़ने खे आए।

25 शिमोनी गोत्रो रे 7,100 त्यार शूरवीर लड़ने खे आए।

26 लेवी गोत्रो रे 4,600 शूरवीर आए।

27 ओर हारूणो रे कराने रा परदान यहोयादा था ओर तेस साथे 3,700 योद्धा आए।

28 ओर सादोक नाओं रा एक जवान वीर बी आया ओर तेसरे बाओ रे कराने रे बाई परदान आए।

29 ओर शाऊलो रे परिवारो रे बिन्यामीनिया बीचा ते 3,000 योद्धा आए, कऊँकि तेस बखतो तक आदे बिन्यामीनिया ते जादा शाऊलो रे कराने रा पक्ष करदे रये।

30 तेबे एप्रैमो रे गोत्रो बीचा ते बड़े वीर ओर आपणे-आपणे पितरा रे करानेया रे नामी योद्धा 20,800 आए।

31 मनश्शे रे आदे गोत्रो बीचा ते दाऊदो खे राजा बनाणे खे 18,000 योद्धा आए, जिना रे नाओं बताए थे।

32 इस्साकार गोत्रो रे लोका बीचा ते जो बखतो खे पछयाणो थे कि इस्राएलो खे क्या करना चाईयो, तिना रे परदान 200 थे; ओर तिना रे सारे पाई तिना री मानो थे।

33 तेबे जबूलून गोत्रो रे लोका बीचा ते युद्धो रे सब प्रकारा रे अथियार लई की लड़ने खे पंग्ति बानणे वाल़े योद्धा 50,000 आए, सेयो पंग्ति बानणे वाल़े थे ओर चंचल नि थे।

34 तेबे नप्ताली गोत्रो रे लोका बीचा ते परदान तो 1,000 ओर तिना साथे ढाल ओर भाल़ा लई की 37,000 योद्धा आए।

35 दान गोत्रो रे लोका बीचा ते लड़ने खे पंग्ति बानणे वाल़े 28,600 योद्धा आए।

36 ओर आशेर गोत्रो रे लोका बीचा ते पंग्ति बानणे वाल़े 40,000 योद्धा आए।

37 ओर यरदनो ते पार रणे वाल़े रूबेन ओर गाद गोत्रो रे लोक ओर मनश्शे रे आदे गोत्रो रे लोका बीचा ते युद्धो रे सारे अथियार लई की 120,000 योद्धा आए।

38 यो सारे युद्ध करने खे पंग्ति बानणे वाल़े दाऊदो खे सारे इस्राएलो रा राजा बनाणे खे हेब्रोनो दे सच्चे मनो ते आए ओर सारे इस्राएली लोक बी दाऊदो खे राजा बनाणे खे त्यार थे। 39 सेयो तेथी तीऊँ दिना तक दाऊदो साथे खांदे-पींदे रये, कऊँकि तिना रे पाईए तिना खे त्यारी कित्ती थी, 40 तेबे जो तिना रे नेड़े बल्कि इस्साकार, जबूलून ओर नप्तालिया रिया जगा तक रओ थे, सेयो बी गह्दे, ऊँट, खच्चर ओर बल़दा पाँदे मैदा, दाऊगल़े ओर किशमिशा रिया टिक्किया, शराब ओर तेल बगैरा खाणे रिया चीजा लादी की ल्याये ओर बल़द ओर पेडा-बाकरिया बऊत जादा ल्याये; कऊँकि इस्राएलो रे सारे देशो दे सब लोक बऊत खुश थे।