1 इतिआस 26

यहोवे रे मन्दरो रे द्वारपाल

1 तेबे द्वारपाला रे दल यो थे: कोरहिया बीचा ते मशेलेम्याह, जो कोरे रा पाऊ ओर आसापो रिया ल्वादा बीचा ते था।

2 ओर मशेलेम्याह रे यो पाऊ ऊए, मतलब तेसरा जेठा जकर्याह, दूजा यदीएल, तीजा जबद्याह, 3 चौथा यातनीएल, पाँजुआ एलाम, छठा यहोहानान ओर सातुआ एल्यहोएनै। 4 परमेशरे ओबेदेदोमो खे आशीष दित्ती, फेर तेसरे बी पाऊ ऊए, तेसरा जेठा शमायाह, दूजा यहोजाबाद, तीजा योआह, चौथा साकार, पाँजुआ नतनेल, 5 छठा अम्मीएल, सातुआ इस्साकार ओर आठुआ पुल्लतै था। ईंयां परमेशरे तेसखे आशीष दित्ती। 6 ओर तेसरे पाऊ शमायाह रे बी पाऊ पैदा ऊए, जो शूरवीर ऊणे रिया बजा ते आपणे बाओ रे कराने पाँदे राज करो थे। 7 शमायाह रे पाऊ यो थे, मतलब ओतनी, रपाएल, ओबेद, एलजाबाद ओर तिना रे पाई एलीहू ओर समक्याह तागतबर मर्द थे। 8 यो सब ओबेदेदोमो री ल्वादा बीचा ते थे, सेयो ओर तिना रे पाऊ ओर पाई एसा सेवा रे कामो खे तागतबर ओर शक्तिशाली थे; यो ओबेदेदोमी बाठ जणे थे। 9 मशेलेम्याह रे पाऊ ओर पाई ठारा थे, जो तागतबर थे।

10 तेबे मरारिए रे कुलो बीचा ते होसा रे बी पाऊ थे, मतलब जेठा शिम्री (जो जेठा ना ऊँदे ऊए बी तेसरे बाओए जेठा ठराया), 11 दूजा हिल्किय्याह, तीजा तबल्याह ओर चौथा जकर्याह था; होसा रे सारे पाऊ ओर पाई मिली की तेरा थे।

12 यो द्वारपाला रे दलो रे मुख्य मर्द थे, यो आपणे पाईया रे बराबर ई यहोवे रे मन्दरो दे सेवा-टईल करो थे। 13 इने क्या छोटे, क्या बड़े, आपणे-आपणे पितरा रे कराने रे मुताबिक एक-एक बड़े द्वारो खे चिट्ठी पाई। 14 पूर्वो री तरफा री चिट्ठी शेलेम्याह रे नाओं पाँदे निकल़ी। तेबे तिने तेसरे पाऊ जकर्याह रे नाओं री चिट्ठी पाई से अक्लमंद मंत्री था ओर चिट्ठी उत्तरो री तरफा खे निकल़ी। 15 दक्खणा रिया तरफा खे ओबेदेदोमो रे नाओं पाँदे चिट्ठी निकल़ी ओर तेसरे पाऊआ रे नाओं पाँदे खजाने री कमरे री चिट्ठी निकल़ी जेती किमती चीजा थिया। 16 तेबे शुप्पीम ओर होसा रे नाओं री चिट्ठी पच्छमा रिया तरफा खे निकल़ी, ताकि सेयो शल्लेकेत नाओं रे बड़े द्वारो गे चढ़ाईया री सड़का पाँदे आमणे-सामणे चौकीदारी करेया करो। 17 पूर्वो रिया तरफा खे तो छे लेविये थे, उत्तरो रिया तरफा खे हर रोज चार, दक्खणा रिया तरफा खे हर रोज चार ओर खजाने रे कमरे गे दो ठईरे। 18 पच्छमा रिया तरफा रे पर्बार नाओं री जगा पाँदे ऊच्ची सड़का गे तो चार ओर पर्बारो गे दो रये। 19 यो द्वारपाला रे दल थे, जिना बीचा ते कई तो कोरह रे कुलो रे थे ओर कई जणे मरारिए रे कुलो रे थे।

मन्दरो रे पण्डारी ओर लग सेवा

20 तेबे लेविया बीचा ते अहिय्याह परमेशरो रे मन्दरो दे ओर पवित्र कित्ती री चीजा, दुँईं रे पण्डारो रा अधिकारी ठराया। 21 यो लादानो री ल्वादा रे थे, मतलब गेर्शोनिया री ल्वाद जो लादानो रे कुलो रे थे, मतलब लादान ओर गेर्शेनिया रे पितरा रे करानेया रे मुख्य मर्द थे, मतलब यहोएली। 22 यहोएलीए रे पाऊ यो थे, मतलब जेताम ओर तेसरा पाई योएल जो यहोवे रे मन्दरो रे खजाने रे अधिकारी थे। 23 अम्रामिया, यिसहारिया, हेब्रोनीया ओर उज्जिएलिया बीचा ते। 24 ओर शबूएल जो मूसे रे पाऊ गेर्शोमो रे कुलो रा था, से खजानेया रा मुख्य अधिकारी था।

25 ओर तेसरे पाईया री जानकारी ये ए: एलीएजेरो रे कुलो दे तेसरा पाऊ रहब्याह, रहब्याह रा पाऊ यशायाह, यशायाह रा पाऊ योराम, योरामो रा पाऊ जिक्री ओर जिक्रीए रा पाऊ शलोमोत था। 26 येई शलोमोत आपणे पाईया समेत तिना सबी पवित्र कित्ती री चीजा रे पण्डारो रा अधिकारी था, जो राजा दाऊद ओर पितरा रे करानेया रे मुख्य-मुख्य मर्द ओर सेनापति ओर बड़े सेनापति ओर मुख्य सेनापतिये पवित्र कित्तिया थिया। 27 जो लूट लड़ाईया दे मिलो थी, तिजी बीचा ते तिने यहोवे रा मन्दर बनाणे खे कुछ पवित्र कित्तेया। 28 बल्कि जितणा सेमुएल दर्शी, कीशो रे पाऊ शाऊल, नेरो रे पाऊ अब्नेर ओर सरूयाह रे पाऊ योआबे पवित्र कित्तेया था ओर जो कुछ जिने पवित्र करी राखेया था, से सब शलोमोत ओर तेसरे पाईया रे कब्जे दे था।

29 यिसहारिया बीचा ते कनन्याह ओर तेसरे पाऊ, इस्राएल देशो रा काम, मतलब सरदार ओर न्यायिया रा काम करने खे नियुक्त ऊए। 30 ओर हेब्रोनिया बीचा ते हशब्याह ओर तेसरे पाई जो 1,700 तागतबर मर्द थे, यहोवे रे सारे काम ओर राजे री सेवा रे बारे यरदन नदिया री पच्छमा रिया तरफा खे रणे वाल़े इस्राएली लोका रे अधिकारी ठईरे। 31 हेब्रोनिया बीचा ते यरिय्याह मुख्य था, मतलब हेब्रोनिया रिया पीढ़िया रे पीतरा रे करानेया रे मुताबिक दाऊदो रे राज्य रे चाल़िए साले सेयो टोल़े ओर तिना बीचा ते कई शूरवीर गिलादो रे याजेरो दे मिले। 32 तेसरे पाई जो वीर थे, पितरा रे कराने रे 2,700 मुखिया थे, यो दाऊद राजे परमेशरो री हर चीजा रे बारे दे ओर राजे रे बारे दे, रूबेनी, गादी ओर मनश्शे रे आदे गोत्रो रे अधिकारी चूणी राखे थे।