1 इतिआस 22

1 तेबे दाऊदे बोलेया, "परमेशर यहोवे रा मन्दर येई ए ओर इस्राएलो खे होमबलि चढ़ाणे खे बलिया री बेदी येई ए।"

मन्दरो रे बनाणे री त्यारी

2 तेबे दाऊदे इस्राएलो रे देशो दे जो परदेशी थे तिना खे कट्ठे करने री आज्ञा दित्ती ओर परमेशरो रा मन्दर बनाणे खे पात्थर कअड़ने खे राजमिस्त्री ठराईते। 3 फेर दाऊदे बड़े द्वारो रे दरवाजेया री परेगा ओर जोड़ो खे बऊत सारा लोआ ओर तोलणे ते बारे बऊत सारा पीतल़, 4 ओर गिणतिया ते बारे देवदारो रे डाल़ कट्ठे कित्ते; कऊँकि सीदोन ओर सोर जगा रे लोक दाऊदो गे बऊत सारे देवदारो रे डाल़ ल्याये थे। 5 ओर दाऊदे बोलेया, "मेरा पाऊ सुलैमान नासमज ओर बाल़क ई ए ओर जो मन्दर यहोवे खे बनाणा, से बऊत तेजोमय ओर सारे देशा दे प्रसिद्ध ओर शोभा जोगा ऊणा चाईयो; इजी री खातर मां तिजी खे त्यारी करनी।" तो दाऊदे मरने ते पईले बऊत त्यारी कित्ती। 6 तेबे दाऊदे आपणा पाऊ सुलैमान बुलाया ओर तेसखे इस्राएलो रे परमेशर यहोवे रा मन्दर बनाणे री आज्ञा दित्ती।

7 दाऊदे आपणे पाऊ सुलैमानो खे बोलेया, "मेरी इच्छा तो थी कि आपणे परमेशर यहोवे रे नाओं रा एक मन्दर बणाऊँ। 8 पर यहोवे रा ये सन्देश माखे मिलेया, तैं बऊत खून बाह्यी राखेया ओर बड़े-बड़े युद्ध करी राखे, इजी री खातर तू मेरे नाओं रा मन्दर नि बणाई सकदा, कऊँकि तैं तरतिया पाँदे मेरी नजरा दे बऊत खून बाह्यी राखेया। 9 देख, तांते एक पाऊ पैदा ऊणा, जो शान्त मर्द ऊणा ओर मां तेसखे चऊँ कनारले दुश्मणा ते शान्ति देणी; तेसरा नाओं तो सुलैमान ऊणा ओर तेसरे दिना रे मां इस्राएलो खे शान्ति ओर चैन देणा। 10 तेस ई मेरे नाओं रा मन्दर बनाणा। ओर सेई मेरा पाऊ ठईरना ओर आऊँ तेसरा बाओ ठईरना ओर तेसरी राजगद्दी मां इस्राएलो पाँदे सदा बणाई दी राखणी।"

11 एबे ओ मेरे पाऊ, यहोवा तां साथे रओ ओर तूँ आपणे काम पूरा करने खे तेस वचनो रे मुताबिक जो तेरे यहोवा परमेशरे तेरे बारे दे बोलेया था, तेसरा मन्दर बनाणा। 12 एबे यहोवा ताखे बुद्धि ओर समज देयो ओर इस्राएलो रा अधिकारी ठराओ ओर तूँ आपणे परमेशर यहोवे रे बिधानो खे मानदा रओ। 13 तूँ तेबेई आपणा काम पूरा करी सकेया जेबे तिना नियमा ओर बिदिया पाँदे चलणे रे चौकसी करेगा, जिना री आज्ञा यहोवे इस्राएली लोका रिया तँईं मूसे गे दितिया थिया। याओ बान ओर मजबूत ओ। डर नि ओर तेरा मन कच्चा नि ओ। 14 सुण, मैं आपणे क्ल़ेशो रे बखते यहोवे रे मन्दरो खे तीन ह्जार टन*22:14 तीन ह्जार टन 100,000 किक्कार सूईना ओर चौंती ह्जार टन*22:14 चौंती ह्जार टन 1,000,000 किक्कार चाँदी ओर पीतल़ ओर लोआ इतणा कट्ठा करी राखेया कि बऊत जादा ऊणे रिया बजा ते तोलणे ते बारे ए ओर लकड़ी ओर पात्थर मैं कट्ठे करीते दे ओर तूँ तिना खे ओर बी बढ़ाई सकेया। 15 तांगे बऊत कारीगर ए, मतलब पात्थर कअड़ने वाल़े ओर लकड़िया खे बाडणे वाल़े, बल्कि सब केड़ा काम करने खे निपुण मर्द ए। 16 सूईना, चाँदी, पीतल़ ओर लोए री तो कोई गिणती नि ए, तो तूँ तेस कामो दे लगी जा! यहोवा तां साथे सदा रओ।

17 तेबे दाऊदे इस्राएलो रे सारे परदाना खे आपणे पाऊ सुलैमानो री मताद करने री आज्ञा ये बोली की दित्ती, 18 "क्या तुसा रा यहोवा परमेशर तुसा साथे नि ए? क्या तिने तुसा खे चऊँ कनारे ते राम नि देई राखेया? तिने तो देशो दे रणे वाल़े ओरी जातिया रे सब लोक मेरे वशो दे करी राखे ओर देश यहोवा ओर तेसरी प्रजा सामणे दबेया राए। 19 एबे तन-मनो साथे आपणे परमेशर यहोवे गे जाया करो ओर मन लगाई की परमेशर यहोवे री पवित्र जगा बनाणी, ताकि तुसे यहोवे री वाचा रा सन्दूक ओर परमेशरो रे पवित्र पांडे तेस मन्दरो दे ल्याओ जो यहोवे रे नाओं रा बणने वाल़ा ए।"