1 जेबे दाऊद आपणे मईलो दे रणे लगेया, तेबे दाऊदे नातान नबीए खे बोलेया, "देख, आऊँ देवदारा रे बणे दे कअरो दे रऊँआ, पर यहोवे री वाचा रा सन्दूक तम्बूए दे रओआ।" 2 नाताने दाऊदो खे बोलेया, "जो कुछ तेरे मनो दे ओ, से कर, कऊँकि परमेशर तां साथे ए।"

3 तेस ई दिने राथियो खे परमेशरो रा वचन नातानो गे पऊँचेया, जाई की मेरे दास दाऊदो खे बोल, 4 "यहोवा ईंयाँ बोलोआ कि मेरे रणे खे तां कअर नि बणाई सकणा। 5 कऊँकि जेस दिनो ते आऊँ इस्राएली लोका खे मिस्रो ते ल्याया, आजके दिनो तक आऊँ कदी कअरो दे नि रया; पर एकी तम्बूए ते दूजे तम्बूए खे ओर एकी जगा ते दूजी जगा खे आया-जाया करूँआ। 6 जेती-जेती मैं सबी इस्राएली लोका बीचे आऊणा-जाणा कित्तेया, क्या मैं इस्राएली लोका रे न्यायिया बीचा ते जो मैं आपणी प्रजा री देखपाल़ करने खे ठराई राखे थे, केसी साथे एड़ी कोई गल्ल बोली कि तुसे लोके माखे देवदारो रा कअर कऊँ नि बणाया?" 7 तो एबे तूँ मेरे दास दाऊदो ते ईंयाँ बोल कि सेना रा यहोवा ईंयाँ बोलोआ कि मैं तो तूँ पेडा री गवाईणी ते ओर पेडा-बाकरिया रे पीछे-पीछे फिरने ते एते इच्छा ते बुलाया, ताकि तूँ मेरी इस्राएली प्रजा रा परदान ऊई जाए; 8 ओर जेती केथी तूँ आया ओर गया, तेती आऊँ तां साथे रया ओर तेरे सारे दुश्मण तां सामणे ते नाश कित्ते। एबे मां तेरा नाओं तरतिया रे बड़े-बड़े लोका जेड़ा बड़ा करना। 9 ओर मां आपणी इस्राएली प्रजा खे एक जगा देणी जो तिना री ई ऊई जाणी, ताकि से आपणी ई जगा दे बसी दी रओ ओर कदी चलदी नि रओ ओर बुरे लोक तिजी खे नाश नि करी सकणे, जेड़ा कि पईलके दिना दे करो थे। 10 बल्कि तेस बखते बी जेबे आऊँ आपणी इस्राएली प्रजा पाँदे न्यायी ठराऊँ था। मां तेरे सारे दुश्मण दबाई देणे। तेबे मां ताखे ये बी बताई देणा कि यहोवे तेरा कअर बणाया दा राखणा। 11 जेबे तूँ मरी जाणा ओर ताखे आपणे पितरा साथे जाणा पड़ना, तेबे मां तांते बाद तेरे कुलो खे जो तेरे पाऊआ बीचा ते ऊणा, खड़ा करी की तेसरा राज्य स्थिर करना।* 12 तेस ई माखे एक मन्दर बनाणा ओर मां तेसरा सिंहासन सदा बणाया दा राखणा। 13 आऊँ तेसरा बाओ ठईरना ओर से मेरा पाऊ ठईरना ओर जेड़ी मैं आपणी करूणा तेस पाँदे जो तांते पईले था टाई, तेड़ी मां तेस पाँदा ते नि टाणी।* 14 पर मां से आपणे मन्दरो दे ओर आपणे राज्य दे सदा बणाया दा राखणा ओर तेसरा सिंहासन सदा बणाया दा राखणा।* 15 इना सबी गल्ला ओर दर्शणो रे मुताबिक नाताने दाऊदो खे समजयाई ता।

16 तेबे दाऊद राजा पीतरे जाई की यहोवे सामणे बैठेया ओर प्रार्थना करने लगेया, "ओ यहोवा परमेशर! आऊँ क्या ए? ओर मेरा कराना क्या ए कि तैं आऊँ एथो तक पऊँचाई राखेया? 17 ओ परमेशर! ये तेरी नजरा दे छोटी जी गल्ल ऊई, कऊँकि तैं आपणे दासो रे कराने रे बारे दे आऊणे वाल़े कई दिना तक री चर्चा करी राखी ओर ओ यहोवा परमेशर! तैं आऊँ एक खास माणूं जाणी राखेया। 18 जो महिमा तैं आपणे दासो पाँदे दखाई राखी, तेतेरे बारे दे दाऊद ताखे ओर क्या बोली सकोआ? तूँ तो आपणे दासो खे जाणेया। 19 ओ यहोवा! तैं आपणे दासो रिया तँईं ओर आपणे मनो रे मुताबिक ये बड़ा काम करी राखेया कि तेरा दास तिजी खे जाणी लो। 20 ओ यहोवा! जो कुछ आसे तेरे कामा रे बारे दे आपणे कानो साथे सुणी राखेया, तेतेरे मुताबिक तां जेड़ा कोई नि ए ओर ना ताखे छाडी की ओर कोई परमेशर ए। 21 तरतिया पाँदे परमेशरो री इस्राएली प्रजा जेड़ी ओर कोई जाति नि ए। आसे सेयो लोक ए जो तैं बचाई राखे। तैं ये दखाणे खे एड़ा कित्तेया कि तेरा नाओं आदरो जोगा ए। तैं आपणे लोक मिस्र देशो ते बचाई की बड़े चमत्कारो रे काम कित्ते। तैं सेयो लोक बारे निकाल़े जो तेरी प्रजा खे रोकणा चाओ थे। 22 कऊँकि तैं आपणी प्रजा इस्राएलो खे आपणी सदा री प्रजा ऊणे खे ठराई ओर ओ यहोवा! तूँ आपू तेसा प्रजा रा परमेशर ठईरेया। 23 इजी री खातर एबे ओ यहोवा, तैं जो वचन आपणे दास ओर तेसरे कराने रे बारे दे देई राखेया, से सदा अटल़ रओ ओर आपणे वचनो रे मुताबिक ई कर। 24 तेरा नाओं सदा अटल रओ ओर ये बोली की तेरी तारीफ सदा करी जाओ कि सेना रा यहोवा इस्राएलो रा परमेशर ए, बल्कि से इस्राएलो खे ई परमेशर ए ओर तेरे दास दाऊदो रा कराना तां सामणे परोसे वाल़ा बणेया रा रओ। 25 कऊँकि ओ मेरे परमेशर, तैं ये बोली कि आपणे दासो गे बताई राखेया कि मां तेरा कअर बणाया दा राखणा, इजी बजा ते तेरे दासो खे तां सामणे प्रार्थना करने रा याओ ऊई रा। 26 ओर एबे ओ यहोवा तूँ ई परमेशर ए ओर तैं आपणे दासो खे ये पलाई करने रा वचन देई राखेया; 27 ओर एबे तैं आपणे दासो ते खुश ऊई की आपणे दासो रे कराने पाँदे एड़ी आशीष देई राखी कि से तां सामणे सदा बणेया रा रओ, कऊँकि ओ यहोवा, तूँ आशीष देई चुकेया रा, इजी री खातर से सदा आशीषित बणेया रा रओ।"