1 इजी ते बाद एड़ा ऊआ कि दाऊदे पलिश्तिया खे अराई की सेयो आपणे वशो दे करीते ओर गाँवो समेत गत शईर पलिश्तिया रे आथो ते छुड़ाई ला। 2 तेबे तिने मोआबी लोक बी अराईते ओर मोआबी लोक दाऊदो रे वशो दे ऊई की पेंट ल्याऊणे लगे।

3 फेर जेबे सोबा रा राजा हदादेजेर फरात नदिया गे आपणा राज्य पक्का करने खे जाणे लगी रा था, तेबे राजा दाऊदे हमात जगा दे तेस पाँदे अमला कित्तेया ओर से अराईता। 4 दाऊदे तेसते 1,000 रथ, 7,000 कोड़ेया रे सवार ओर 20,000 सिपाई जीती ले ओर राजा दाऊदे सबी रथो वाल़े कोड़ेया री नस कटवाई, पर 100 रथ वाल़े कोड़े बचाई की राखी ले।

5 जेबे दमिश्को री अरामी सेना सोबा रे राजा हदादेजेरो री मताद करने खे आई, तेबे राजा दाऊदे अरामी सेना बीचा ते 22,000 सिपाई काये। 6 तेबे दाऊदे दमिश्को रे अराम शईरो दे सिपाईया री चौकिया बठयाल़िया, तेबे अरामी लोक दाऊदो रे वशो दे ऊई की पेंट ल्याऊणे लगे। ओर जेती-जेती दाऊद जाओ था, तेती-तेती यहोवा तेसखे जीत दलाओ था। 7 राजा दाऊदे सोबा रे राजा हदादेजेरो रे कर्मचारिया ते सूईने रिया ढाला लईया। तिना खे लई की राजा दाऊद यरूशलेम शईरो खे ली आया। 8 फेर राजा दाऊद हदादेजेरो रे तिभत ओर कून नाओं रे दूई शईरा ते बऊत सारा पीतल़ ल्याया ओर तिजी ते ई सुलैमाने पीतल़ी रे अऊद, खम्बे ओर पीतल़ी रे पांडे बणवाए।

9 जेबे हमात शईरो रे राजा तोऊए ये सुणेया कि राजा दाऊदे सोबा रे राजा हदादेजेरो री सारी सेना जीती ली री, 10 तेबे तिने आपणा हदोराम नाओं रा पाऊ दाऊद राजे गे तेसरा सुख-साँद ओर मुबारकबाद देणे खे पेजेया, इजी खे कि तिने हदादेजेरो साथे लड़ी की से जीती ला था; कऊँकि राजा हदादेजेर राजा तोऊए साथे लड़ेया करो था, ओर हदोराम सूईने, चाँदी ओर पीतल़ी रे हर प्रकारा रे पांडे लई की आया। 11 यो पांडे दाऊद राजे यहोवे खे पवित्र करी की राखे ओर तेड़ा ई तेस सूईने चाँदिए साथे बी कित्तेया जो सबी जातिया ते, मतलब एदोमी, मोआबी, अम्मोनी, पलिश्ती ओर अमालेकिया ते मिलेया था।

12 तेबे सरूयाह रे पाऊ अबीशै लूणो रिया काअटिया दे 18,000 एदोमी लोक काईते। 13 तेबे तिने एदोम शईरो दे सिपाईया रिया चौकिया बठयाल़िया ओर सारे एदोमी लोक दाऊदो रे वशो दे ऊईगे। राजा दाऊद जेती-जेती जाओ था तेती-तेती यहोवा तेसखे जीत दलाओ था।

14 राजा दाऊद तो सारे इस्राएलो पाँदे राज करो था ओर से आपणी सारी प्रजा साथे न्याय ओर तार्मिकता रे काम करो था।

15 राजा दाऊदो रा परदान सेनापति योआब था। से सरूयाह रा पाऊ था। इतिआसो खे लिखणे वाल़ा यहोशापात था। से अहीलूदो रा पाऊ था। 16 परदान पुरोईत, अहीतूबो रा पाऊ सादोक ओर एब्यातारो रा पाऊ अबीमेलेक थे, मंत्री शबशा था; 17 करेती ओर पलेतिया रा परदान यहोयादा रा पाऊ बनायाह था ओर दाऊदो रे पाऊ राजे गे मुखिये ऊई की रओ थे।