1 यहूदा रा खानदान ये ऊआ; मतलब यहूदा ते पेरेस, हेस्रोन, कर्मी, हूर ओर शोबाल ऊए। 2 ओर शोबालो रे पाऊ रायाह ते यहत ओर यहतो ते अहूमै ओर लहद पैदा ऊए, ये सोराई कुल ए। 3 एतामो रे बाओ रे यो पाऊ ऊए: मतलब यिज्रेल, यिश्मा ओर यिद्वाश, तिना रिया बईणी रा नाओं हस्सलेलपोनी था; 4 ओर गदोरो रा बाओ पनूएल ओर हूशाहो रा बाओ एजेर। यो एप्राता रे जेठे पाऊ हूरो री ल्वाद थी, जो बेतलेहमो रा बाओ ऊआ। 5 ओर तकोआ रे बाओ अशहूरो रे हेला ओर नारा नाओं रिया दो लाड़िया थिया। 6 नारा ते अहुज्जाम, हेपेर, तेमनी ओर हाहशतारी पैदा ऊए, नारा रे यो ई पाऊ ऊए। 7 ओर हेला रे पाऊ, सेरेत, यिसहर ओर एत्ना ऊए। 8 तेबे कोसो ते आनूब ओर सोबेबा पैदा ऊए ओर तेसरे कुलो रे हारूमो रे पाऊ अहर्हेलो रे कुल बी पैदा ऊए।

9 याबेश नाओं रा एक माणूं था जो आपणे सबी पाईया ते जादा जाणेया-मानेया दा था। तेसरिये माये तेसरा नाओं याबेश राखेया, कऊँकि तेसरिये माये तेसखे पैदा करदे बखते बऊत पीड़ सईन कित्ती थी। 10 एक दिन याबेश इस्राएलो रे परमेशरो खे जोरे-जोरे की ये बोलणे लगेया, "खरा ऊँदा कि तूँ माखे सच्चो खे ई आशीष देंदा ओर मेरा देश बढ़ांदा, ओर तेरा आथ मां साथे रंदा ओर तूँ माखे बुराईया ते एड़ा बचाई की राखदा कि माखे तिजी ते पीड़ा नि ऊँदी!" ओर जो कुछ तिने मांगेया, से परमेशरे तेसखे दित्तेया। 11 तेबे शूह रे पाई कलूबो ते एशतोनो रा बाओ महीर पैदा ऊआ। 12 एशतोनो रे कुलो रे बेतरापा रा कराना ओर पासेह ओर ईर्नाहाशो रा बाओ तहिन्ना पैदा ऊए, रेका रे लोक यो ई ए।

13 कनजो रे पाऊ ओत्नीएल ओर सरायाह थे। ओर ओत्नीएलो रा पाऊ हतत था। 14 मोनोतै ते ओप्रा ओर सरायाह ते योआब जो गेहराशीमो रा बाओ ऊआ; सेयो कारीगर थे। 15 ओर यपुन्ने रा पाऊ कालेबो रा पाऊ ईरू, एला ओर नाओं; ओर एला रा पाऊ कनज। 16 यहलेलो रे पाऊ जीप, जीपा, तीरया ओर असरेल। 17 ओर एज्रा रे पाऊ येतेर, मेरेद, एपेर ओर यालोन ओर तेसरी लाड़िया ते, मिर्याम, शम्मै ओर एशतमो रा बाओ यिशबह पैदा ऊए। 18 तेसरी यहूदिणी जवाणसा ते गदोरो रा बाओ येरेद, सोको रा बाओ हेबेर ओर जानोह रा बाओ यकूतीएल पैदा ऊए, यो फिरौनो री बेटी बित्या रे पाऊ थे जेसा साथे मेरेदे ब्या कित्तेया था। 19 ओर होदिय्याहो री लाड़ी जो नहमो री बईण थी, तेसा रे पाऊ कीला रा बाओ एक गेरेमी ओर एशतमो रा बाओ एक माकाई ऊए। 20 ओर शिमोनो रे पाऊ अम्नोन, रिन्ना, बेन्हानान ओर तोलोन ओर यिशीए रे पाऊ जोहेत ओर बेनजोहेत।

21 यहूदा रे पाऊ शेला रे यो पाऊ थे; एर ओर लादा। एरो रे लेका नाओं रा पाऊ ऊआ, ओर लादा रे मारेश नाओं रा पाऊ ऊआ। इजी ते अलावा बरीक सूती टाल्लेया रा काम करने वाल़ेया रे परिवार जो बेत-अशबे जगा दे रओ थे, शेला रे कुलो रे थे। 22 ओर योकीम ओर कोजेबा शईरो रे माणूं ओर योआश ओर साराप जो मोआब इलाके दे राज करो थे ओर याशूब, लेहेम इना रा वृतांत पुराणा ए। 23 यो कुम्हार थे ओर नताईम ओर गदेरा शईरा दे रओ थे, जेती सेयो राजे रा काम-काज करदे ऊए तेसगे रओ थे।

24 शिमोनो रे पाऊ नमूएल, यामीन, यारीब, जेरह ओर शाऊल; 25 ओर शाऊलो रा पाऊ शल्लूम, शल्लूमो रा पाऊ मिबसाम ओर मिबसामो रा पाऊ मिश्मा ऊआ। 26 ओर मिश्मा रा पाऊ हम्मूएल, तेसरा पाऊ जक्कूर ओर तेसरा पाऊ शिमी। 27 शिमिये रे सोल़ा पाऊ ओर छे बेटिया ऊईया, पर तेसरे पाईया रे बऊत पाऊ नि ऊए ओर तिना रा सारा कुल यहूदिया रे बराबर नि बढ़ेया। 28 यो इना शईरा दे रओ थे; मतलब बेर्शेबा, मोलादा, हसर्शूआल, 29 बिल्हा, एसेम, तोलाद, 30 बतूएल, होर्मा, सिकलग, 31 बेत्मर्काबोत, हसर्सूसीम, बेतबिरी ओर शारैम; दाऊदो रे राजो रे बखतो तक तिना रे यो ई शईर रये। 32 ओर तिना रे गाँवो एताम, ऐन, रिम्मोन, तोकेन ओर आशान नाओं रे पाँज शईर थे; 33 ओर बाल शईरो तक जितणे गाँवो इना शईरा रे नेड़े तेड़े थे, तिना दे बसणे री जगा येई थी ओर ये तिना रा खानदान आ।

34 फेर मशोबाब ओर यम्लेक ओर अमस्याह रे पाऊ योशा, 35 ओर योएल ओर योशिब्याह रा पाऊ येहू, जो सरायाह रा पोता ओर असीएलो रा पड़पोता था, 36 ओर एल्योएनै, ओर याकोबा, यशोहायाह ओर असायाह ओर अदीएल ओर यसीमीएल ओर बनायाह, 37 ओर शिपीए रा पाऊ जीजा जो अल्लोनो रा पाऊ, ये यदायाह रा पाऊ, ये शिम्रीए रा पाऊ, ये शमायाह रा पाऊ था। 38 यो जिना रे नाओं लिखी राखे, आपणे-आपणे कुलो रे परदान थे; ओर तिना रे पितरा रे कराने बऊत बढ़ीगे। 39 यो आपणी पेडा-बाकरिया खे चराणे खे जगा टोल़ने खे गदोर शईरो री काट्टिया री तराईया दे पूर्वो रिया तरफा तक गये। 40 तेबे तिना खे खरी ते खरी चराई मिली ओर देश लाम्बा-चौड़ा, चैन ओर शान्तिया रा था; कऊँकि तेती पईले रणे वाल़े हामो रे कुलो रे थे। 41 जिना रे नाओं ऊबे लिखी राखे, तिने यहूदा रे राजा हिजकिय्याह रे दिना रे तेती आई की जो मूनी तेती मिले, सेयो डेरेया समेत काई की एड़े सत्यानाश कित्ते कि आजो तक तिना रा पता नि ए ओर सेयो तिना री जगा रे रणे लगे, कऊँकि तेती तिना रिया पेडा-बाकरिया खे चराणे खे जगा थी 42 शिमोन कुलो बीचा ते 500 मर्द सेईरो रे पाह्ड़ी इलाके रिया तरफा खे गये। तिना रे मुखिया पलत्याह, नार्याह, रपायाह ओर उज्जीएल थे। यो सब यिशीए रे पाऊ थे। 43 तेती जाईकी तिने अमालेकी जातिया रे लोक जो बची गे थे सेयो काईते। सेयो आजो तक तेथी रओए।