1 तेबे सोर शईरो रे राजा हीरामे दाऊदो गे दूत पेजे ओर तेसखे मईल बनाणे खे देवदारो री लकड़ी, राजमिस्त्री ओर ल्वार पेजे। 2 तेबे दाऊदो खे निश्चा ऊईगा कि यहोवे से इस्राएलो रा राजा ऊणे खे चूणी ला रा ए, कऊँकि परमेशरे तेसरा राज्य बऊत बढ़ाया था, ओर तिने इस्राएलो रे लोका री मताद कित्ती। 3 यरूशलेम शईरो दे दाऊदे फेर ओरी जवाणसा साथे ब्या करी ला ओर तिना रे ओर बी माठे-बेटिया पैदा ऊए। 4 दाऊदो रे जो ल्वाद यरूशलेम शईरो दे पैदा ऊई, तिना रे नाओं यो ए: शम्मू, शोबाब, नातान, सुलैमान; 5 यिभार, एलीशू, एलपेलेत; 6 नोगह, नेपेग, यापी, एलीशामा, 7 बेल्यादा ओर एलीपेलेत।

8 जेबे पलिश्तिये सुणेया कि पूरे इस्राएलो रा राजा ऊणे खे दाऊदो रा अभिषेक ऊआ, तेबे सारे पलिश्ती दाऊदो रिया टोल़ा दे लगी गे; जेबे दाऊदे ये सुणेया तेबे से तिना ते लड़ने लगेया। 9 तेबे पलिश्ती आए ओर रपाईम नाओं री तराईया दे अमला कित्तेया।

10 तेबे दाऊदे परमेशरो ते पूछेया, "क्या आऊँ पलिश्तिया पाँदे अमला करुँ? क्या तां सेयो मेरे आथो दे करी देणे?" यहोवे तेसखे बोलेया, "अमला कर, कऊँकि मां सेयो तेरे आथो दे करी देणे।" 11 इजी खे जेबे पलिश्ती बालपरासीम जगा दे आए, तेबे दाऊदे तिना पाँदे अमला कित्तेया ओर सेयो तेथी काईते; तेबे दाऊदे बोलेया, "परमेशर मेरे जरीये मेरे दुश्मणा पाँदे पाणिए री खाड्डा जेड़ा पड़ी रा।" इजी बजा ते तेसा जगा रा नाओं बालपरासीम* राखेया। 12 तेती सेयो आपणे देवतेया खे छाडी गे ओर दाऊदो री आज्ञा ते सेयो देवते आग लगाई की फूकी ते।

13 फेर दूजी बार पलिश्तिये तेसा ई तराईया दे आई की अमला कित्तेया। 14 तेबे दाऊदे परमेशरो ते फेर पूछेया ओर परमेशरे तेसखे बोलेया, "तिना रा पीछा नि कर; तिना ते फिरी की तूतो रे डाल़ा सामणे ते तिना पाँदे लूकी की अमला कर। 15 ओर जेबे तूतो रे डाल़ा बीचा ते सेना रे चलणे री जी आवाज ताखे सुणने लगो, तेबे ये जाणी की युद्ध करने खे निकल़ी जाणा कि परमेशर पलिश्तिया री सेना खे काणे खे तांते आगे जाणे लगी रा।"

16 परमेशरो री एसा आज्ञा रे मुताबिक दाऊदे कित्तेया ओर इस्राएलिये पलिश्तिया री सेना गिबोन शईरो ते लई की गेजेर शईरो तक काईती। 17 तेबे दाऊदो रा नाओं सारे देशो दे फैलीगा ओर यहोवे सबी जातिया रे मनो दे तेसरा डर परी ता।