1 इजी ते बाद अम्मोनिया रा राजा नाहाश अम्मोनी लोका रा राजा था। जेबे से मरेया, तेसते बाद तेसरा पाऊ हानून तेसरी जगा पाँदे राजा बणेया। 2 तेबे दाऊदे ये सोचेया, "हानूनो रे बाओ नाहाशे जो मां साथे प्यार दखाई राखेया, इजी री खातर मां बी तेस साथे तेड़ा ई प्यार दखाणा।" तेबे दाऊदे तेसरे बाओ रे बारे दे शान्ति देणे खे हानूनो गे दूत पेजे। ओर दाऊदो रे कर्मचारी अम्मोनिया रे देशो दे हानूनो गे तेसखे शान्ति देणे खे आये। 3 पर अम्मोनिया रे परदान हानूनो खे बोलणे लगे, "दाऊदे जो तांगे शान्ति देणे वाल़े दूत पेजी राखे, सेओ क्या तेरी समजा ते तेरे बाओ रा आदर करने री इच्छा ते पेजी राखे? क्या तेसरे कर्मचारी एड़ी इच्छा तेई नि तांगे आए कि टोल़-टाल़ करिए ओर नाश करने खे देशो रा पेत लईये?" 4 तेबे हानूने दाऊदो रे कर्मचारी पकड़े ओर तिना रे बाल़ कटवाए ओर आदे टाल्ले, मतलब लको ते थाले तक कटवाई की सेयो जाणे दित्ते। 5 तेबे कईये लोके जाई की राजा दाऊदो गे बताईता कि तिना दूता साथे केड़ा बर्ताव करी राखेया, तेबे तिने कुछ लोक तिना साथे मिलणे खे पेजे, कऊँकि सेयो दूत बऊत बेज्जत ऊई रे थे, तेबे राजे बोलेया, "जदुओ तक तुसा री दाढ़िया बढ़ी नि जाओ, तदुओ तक यरीहो देई रूके दे रओ ओर बादो ते वापस आई जाएयो।"

6 जेबे अम्मोनी लोके देखेया कि आसे दाऊदो खे बुरे लगूँए, तेबे हानूने ओर अम्मोनी लोके 34,000 किलो चाँदी, अरम्नहरैम ओर अरम्माका ओर सोबा शईरो खे पेजेया, ताकि रथ ओर कोड़ेया रे सवार कराये पाँदे बुलाओ। 7 तेबे तिने 32,000 रथ ओर माका देशो रा राजा ओर तेसरी सेना कराये पाँदे बुलाए ओर तिने आई की मेदबा शईरो रे सामणे आपणे डेरे खड़े कित्ते ओर अम्मोनी लोक आपणे-आपणे शईरो ते कट्ठे ऊई की लड़ने खे आए।

8 ये सुणी की कि अम्मोनी सेना लड़ने खे त्यार ऊई री, राजा दाऊदे योआब ओर इस्राएलो री पूरी सेना पेजी। 9 तेबे अम्मोनी निकल़े ओर शईरो रे बड़े द्वारो गे पंग्ति बानी ओर जो राजा आए थे, सेयो तिना ते लग मैदानो दे थे। 10 ये देखी की कि आगे-पीछे दुनी कनारे आसा रे खलाफ पंग्ति बानी राखी, योआबे सब बड़े-बड़े इस्राएली वीरा बीचा ते कई छाँटी की अरामिया सामणे तिना री पंग्ति बणाई; 11 ओर बाकी लोक आपणे पाई अबीशै रे आथो दे सम्बाल़ीते ओर तिने अम्मोनिया सामणे पंग्ति बानी। 12 तिने बोलेया, "जे अरामी मां पाँदे प्रबल ऊणे लगो, तो तैं मेरी मताद करनी ओर जे अम्मोनी तां पाँदे प्रबल ऊणे लगोगे, तो मां तेरी मताद करनी। 13 तूँ याओ बान ओर आसे सब आपणे लोक ओर आपणे परमेशरो रे शईरो रिया तँईं मईणत करूँए ओर यहोवा जेड़ा तेसखे अच्छा लगो, तेड़ा ई करोगा।" 14 तेबे योआब ओर जो लोक तेस साथे थे, अरामिया साथे युद्ध करने खे तिना सामणे आए ओर अरामी तिना रे सामणे ते नठीगे। 15 ये देखी की कि अरामी नठीगे रे, अम्मोनी बी तेसरे पाई अबीशै रे सामणे ते नठी की शईरो ते पीतरे कूसी गे। तेबे योआब यरूशलेम शईरो खे वापस आया। 16 तेबे ये देखी की कि सेयो इस्राएली लोका ते आरी गे रे, अरामिये दूत पेजी की फरातो ते पार रणे वाल़े अरामी बुलाए ओर हदादेजेरो रे सेनापति शोपको खे आपणा परदान बणाया। 17 इजी रा सन्देश सुणी की दाऊदे सारे इस्राएली कट्ठे कित्ते ओर यरदन नदिया ते पार ऊई की तिना पाँदे चढ़ाई कित्ती ओर तिना रे खलाफ पंग्ति बणाई, तेबे सेयो तेस साथे लड़ने लगे। 18 पर अरामी इस्राएली लोका ते नठीगे ओर दाऊदे तिना बीचा ते 7,000 रथ ओर 40,000 सैनिक काईते ओर शोपक सेनापति बी काई ता। 19 ये देखी की कि सेयो इस्राएली लोका ते आरी गे, हदादेजेरो रे कर्मचारिये दाऊदो साथे सन्धि कित्ती ओर तेसरे वशो दे ऊईगे ओर अरामी लोके अम्मोनी लोका री फेर मताद नि करनी चाई।