1 इतिआस 23

लेविया खे जिम्मेदारिया रा दितिया जाणिया

1 दाऊद तो स्याणा बल्कि बऊत ई स्याणा ऊईगा था, इजी री खातर तिने आपणा पाऊ सुलैमान इस्राएलो पाँदे राजा बणाई ता। 2 तेबे तिने इस्राएलो रे सारे परदान, पुरोईत ओर लेवी लोक कट्ठे कित्ते। 3 जितणे लेवी लोक तीई साला रे ओर तेते ते जादा उम्रा रे थे, सेयो गिणे ओर एक-एक मर्दो रे गिणने ते तिना री गिणती 38,000 ऊई। 4 इना बीचा ते 24,000 तो यहोवे रे मन्दरो दे काम करने खे नियुक्त कित्ते ओर 6,000 अधिकारी ओर न्यायी बणाए। 5 ओर 4,000 द्वारपाल नियुक्त ऊए ओर 4,000 तिना बाजेया साथे यहोवे री स्तुति करने खे ठराए जो दाऊदे स्तुति करने खे बणाए थे।

6 तेबे दाऊदे सेयो गेर्शोन, कहात ओर मरारी नाओं रे लेविया रे पाऊआ रे मुताबिक दलो दे लग-लग करीते।

7 गेर्शोनिया रे कुलो बीचा ते तो लादान ओर शिमी थे।

8 ओर लादानो रे तीन पाऊ सरदार यहीएल, जेताम ओर योएल थे।

9 शिमीए रे तीन पाऊ शलोमीत, हजीएल ओर हारान थे। लादानो रे कुलो रे बुजुर्गा रे करानेया रे मुख्य मर्द यो ई थे।

10 फेर शिमीए रे चार ओर पाऊ थे, यहत, जीना, यूश ओर बरीआ।

11 यहत जेठा था ओर जीजा दूजा था। यूश ओर बरीआ रे बऊत पाऊ नि ऊए, इजी बजा ते सेयो सब मिली की एक ई कराना ठईरे। 12 कहातो रे पाऊ अम्राम, यिसहार, हेब्रोन ओर उज्जीएल, चार पाऊ ऊए।

13 अम्रामो रे पाऊ हारूण ओर मूसा ऊए। हारूण तो इजी री खातर लग कित्तेया, ताकि से ओर तेसरी ल्वाद सदा परम पवित्र चीजा खे पवित्र ठराओ ओर सदा परमेशरो सामणे तूप बाल़ेया करो ओर तेसरी सेवा-टईल करेया करो ओर तेसरे नाओं ते आशीर्वाद देया करो।

14 पर परमेशरो रे दास मूसे रे पाऊआ रे नाओं लेविया रे गोत्रा बीचे गिणे। 15 मूसे रे पाऊ, गेर्शोम ओर एलीएजेर ऊए।

16 ओर गेर्शोमो रा पाऊ शबूएल जेठा था।

17 एलीएजेरो रे एक ई पाऊ रहब्याह ऊआ तेसरे ओर कोई पाऊ नि ऊआ, पर रब्याह रे बऊत सारे पाऊ ऊए।

18 यिसहारो रे पाऊआ बीचा ते शलोमीत जेठा था।

19 हेब्रोनो रे पाऊ यरिय्याह जेठा, दूजा अमर्याह, तीजा यहजीएल ओर चौथा यकमाम था।

20 उज्जीएलो रे पाऊआ बीचा ते जेठा तो मीका ओर दूजा यिश्शिय्याह था।

21 मरारिए रे पाऊ महली ओर मूशी ऊए। महलीए रे पाऊ एलीआजार ओर कीश ऊए।

22 एलीआजार तो बिना पाऊआ ते ई मरी गा, तेसरे बस बेटिया ई ऊईया; तेबे कीशो रे पाऊए एलीआजारो री बेटिया साथे ब्या करी ला, जो तिना रे पाई थे।

23 मूशीए रे पाऊ महली; एदेर ओर यरेमोत यो तीन ऊए।

24 लेविया रे पीतरा रे कराने रे बड़े मर्द यो ई थे, यो नाओं लई की बुलाई राखे थे। यो सब मर्द बीइ साला रे ओर तिजी ते जादा उम्रा रे थे। यो सब यहोवे रे मन्दरो रे सेवा-टईल करने रा काम करो थे। 25 दाऊदे बोलेया था, "इस्राएलो रे यहोवा परमेशरे आपणी प्रजा खे राम देई राखेया ताकि से यरूशलेम शईरो दे सदा खे रई सको। 26 ओर लेविया खे रणे री जगा ओर तेसरी आराधना रा समान फेर चकणे रा काम नि पड़ना।" 27 कऊँकि दाऊदो री पिछली आज्ञा रे मुताबिक बीइ साल या तेते ते जादा उम्रा रे लेवी लोक गिणे। 28 कऊँकि तिना रा काम तो हारूणो रे पाऊआ री सेवा-टईल करना था, मतलब ये कि सेयो आँगण ओर कमरे दे ओर सब पवित्र चीजा खे शुद्ध करने दे ओर परमेशरो रे मन्दरो री आराधना दे ओर सब कामा दे सेवा-टईल करो; 29 ओर पेंटा री रोटिया रा, नज्जो री बलिया रे मैदे रा, बिना सजेड़े री पापड़िया रा ओर तवे पाँदे बणाए रे ओर गूँदे रे आटे रा ओर नापणे-तोलणे रा सब काम करो। 30 ओर हर प्यागा-साँजा खे यहोवे रा तन्यवाद ओर तेसरी स्तुति करने खे खड़े रया करो। 31 ओर रामो रे दिने, ओर नये चाँदो रे दिने ओर ठीक त्योआरो रे गिणतिया रे नियमो रे मुताबिक हमेशा यहोवे रे सारे होमबलि चढ़ाओ; 32 ओर यहोवे रे मन्दरो री आराधना रे बारे दे मिलणे वाल़े तम्बू ओर पवित्र जगा री रक्षा करो ओर आपणे पाई हारूणो रिया ल्वादा खे सम्बाल़े रे कामो खे चौकसिया साथे करो।