Esdras 3

बेदिया रा फेर बणाया जाणा

1 जेबे इस्राएली लोका रे सालो रा सातुआ मीन्ना आया तदुए तक सेयो सब आपणे-आपणे शईरा दे बसी गे थे, तेबे लोक यरूशलेम शईरो दे एक मन ऊई की कट्ठे ऊए। 2 तेबे योसादाको रे पाऊ येशुअ आपणे पुरोईता पाईया साथे ओर शालतीएलो रे पाऊ जरूब्बाबेले आपणे पाईया साथे लक बानी की इस्राएलो रे परमेशरो री बेदी बणाई, ताकि तेते पाँदे होमबलि चढ़ाई सको, जेड़ा की परमेशरो रे दास मूसे री बिधानो री कताबा दे लिखी राखेया।*3:2 मत्ती 1:12, लूक. 3:27

3 तेबे तिने बेदी तेथे ई जगा पाँदे खड़ी कित्ती, कऊँकि तिना खे तेस कनारले देशो रे लोका रा डर रया ओर सेयो तेते पाँदे यहोवे खे होमबलि, मतलब हर रोज प्यागा रे ओर साँजके होमबलि चढ़ाणे लगे।

4 तेबे तिने चूँगड़िया रा त्योआर मनाया, जेड़ा कि मूसे रे बिधानो री कताबा दे लिखी राखेया ओर हर रोजके होमबलि एकी-एकी दिनो री गिणती ओर बिधानो रे मुताबिक चढ़ाए। 5 तिजी ते बाद, तिने लगातार चलणे वाल़े हर एकी दिनो री होमबलि ओर नवां चाँद ओर यहोवे रे पवित्र कित्ते रे सारे ठराए रे त्योआरो रे बलिदान ओर पेंट चढ़ाणे शुरू कित्ते जेड़ा की यहोवे आज्ञा दित्ती थी। लोक ओरी तिना पेंटा खे बी चढ़ाणे लगे जिना खे सेयो यहोवे खे चढ़ाणा चाओ थे। 6 सातुए मीन्ने रे पईले दिनो ते सेयो यहोवे खे होमबलि चढ़ाणे लगे। पर यहोवे रे मन्दरो री निऊँ तदुओ तक नि पाई राखी थी।

मन्दरो रा दुबारा बनाणे रा काम शुरू करना

7 तेबे तिने पात्थर कअड़ने वाल़े ओर कारीगरा खे पैसा ओर सीदोनी ओर सोरी लोका खे खाणे-पीणे रिया चीजा ओर तेल दित्तेया, ताकि सेयो फारसो रे राजा कुस्रूए री पर्चिया रे मुताबिक देवदारो री लकड़ी लबानोनो ते याफा रे समुद्रो तक पऊँचाओ। 8 तिना रे परमेशरो रे मन्दरो दे, जो यरूशलेम शईरो दे ए, आऊणे रे दूजे सालो रे दूजे मीन्ने, शालतीएलो रे पाऊ जरूब्बाबेल ओर योसादाको रे पाऊ येशुअ ओर तिना रे ओरी पाईए जो पुरोईत ओर लेविये थे ओर जितणे बन्दुआईया ते यरूशलेम शईरो दे आए थे तिने बी काम शुरू कित्तेया। ओर बीइ साल या तिजी ते जादा उम्रा रे लेविया खे यहोवे रे मन्दरो रा काम करने खे नियुक्त कित्तेया। 9 तेबे येशुअ ओर तेसरे पाऊ ओर पाई ओर कदमिएल ओर तेसरे पाऊ, जो यहूदा री ल्वाद थे ओर हेनादादो री ल्वाद परमेशरो रे मन्दरो दे कारीगरा रा काम चलाणे खे खड़े ऊए। ओर सेयो सब लेविया रे कराने रे थे। 10 जेबे राजमिस्त्रिए यहोवे रे मन्दरो री निऊँ पाई, तेबे पुरोईते आपणे खास टाल्ले पईने ओर तुरहिया लई की पुरोईत ओर छाज लई की आसापो रे कुलो रे लेवी इजी री खातर नियुक्त कित्ते, ताकि इस्राएली लोका रे राजा दाऊदो री चलाई री रवाजा रे मुताबिक यहोवे री स्तुति करो। 11 तेबे सेयो ये गायी की यहोवे री स्तुति ओर तन्यवाद करने लगे,

"से पला ए,

ओर तेसरी करूणा इस्राएलो पाँदे सदा बणी री ए।"

ओर जेबे सेयो यहोवे री स्तुति करने लगे, तेबे सबी लोके ये जाणी की कि यहोवे रे मन्दरो री निऊँ एबे पड़ने लगी री, जोरे की जयजयकार कित्ती। 12 पर बऊत सारे पुरोईत ओर लेविये ओर बुजुर्गा रे कराने रे बड़े मर्द, मतलब सेयो स्याणे जिने पईलका मन्दर देखेया था, जेबे एस मन्दरो री निऊँ तिना सामणे पड़ी तेबे जोरे-जोरे की रोणे लगे ओर बऊत खुशिया रे मारे जोरे की जयजयकार करने लगी रे थे। 13 इजी री खातर लोक, खुशिया री जयजयकारा री आवाज, लोका रे रोणे री आवाजा ते लग नि पछयाणी सके, कऊँकि लोक जोरे की जयजयकार करने लगी रे थे ओर से आवाज दूरो तक सुणने लगी री थी।