एज्रा 5

मन्दरो रा काम दुबारा शुरू ऊणा

1 एक दिन हाग्गै नाओं रा नबी ओर इद्दो रा पोता जकर्याह नबी यहूदा ओर यरूशलेम शईरो रे यहूदी लोका साथे भविष्यबाणी करने लगे, सेयो इस्राएलो रे परमेशरो रे नाओं ते तिना साथे भविष्यबाणी करी की ईम्मत देणे लगे। 2 तेबे शालतीएलो रा पाऊ जरूब्बाबेल ओर योसादाको रा पाऊ येशुअ, लक बानी की परमेशरो रे मन्दरो खे जो यरूशलेम शईरो दे ए बनाणे लगे ओर परमेशरो रे सेयो नबी तिना रा साथ देणे लगे। 3 तेस बखते फरात नदिया रे पच्छमी इलाके रा तत्तनै नाओं रा परदान था। तत्तनै ओर शतर्बोजनै आपणे साथिया साथे तिना गे जाई की पूछणे लगे, "तुसा खे एस मन्दरो खे बनाणे ओर एतेरी दवाला खे खड़ी करने री आज्ञा किने दित्ती?" 4 तेबे तिने लोका खे ये बी बोलेया, "एस मन्दरो खे बनाणे वाल़ेया रे क्या नाओं ए?" 5 पर यहूदिया रे बुजुर्गा रे परमेशरो री नजर तिना पाँदे रई, इजी री खातर जदुओ तक एसा गल्ला री चर्चा दारा राजे गे नि कित्ती ओर इजी रे बारे दे चिट्ठिया रे जरीये ज्वाब नि मिलेया, तदुओ तक काम करने वाल़ेया काम करना नि रोकेया।

6 जो चिट्ठी फरात नदिया ते पार पच्छमा रे इलाके रे परदान तत्तनै ओर शतर्बोजनै ओर फरात नदिया ते पारले संगी-साथिये फारसो रे राजा दारा गे पेजी तेतेरी नकल ये ए; 7 तिने तेसखे एक चिट्ठी लिखी, जिदे ये लिखी राखेया था: "राजा दारे खे हर प्रकारा ते शान्ति मिलो।" 8 राजे खे पता ए कि आसे लोक यहूदा नाओं रे राज्य रे महान परमेशरो रे मन्दरो गे गये थे, से बड़े-बड़े पात्थरा साथे बणने लगी रा ओर तेतेरे पीता रे कड़िया जुड़ने लगी रिया ओर ये काम सेयो लोक फटाफट करने लगी रे ओर सफल बी ऊणे लगी रे। 9 तेबे आसे तिना बुजुर्गा ते पूछेया, "एस मन्दरो खे बनाणे ओर एतेरी दवाल खड़ी करने री आज्ञा तुसा खे किने दित्ती?" 10 ओर आसे तिना रे नाओं बी पूछे, ताकि आसे तिना चूणे दे मर्दा रे नाओं लिखी की तांगे बताई सकिए। 11 तेबे तिने आसा खे ज्वाब दित्तेया, "आसे तो सर्ग ओर तरतिया रे परमेशरो रे दास ए ओर जो मन्दर बऊत साल पईले इस्राएली लोका रे एक बड़े राजे बणवाई की त्यार कित्तेया था, आसे तिजी खे ई बनाणे लगी रे। 12 जेबे म्हारे बुजुर्गे स्वर्गो रे परमेशरो री आज्ञा नि मानी, तेबे तिने सेयो बाबेलो रे कसदी राजा नबूकदनेस्सरो रे आथो दे करीते थे ओर तिने ये मन्दर नाश करी ता ओर लोका खे बानी की बाबेलो खे लईगा।" 13 पर बेबीलोनो रे राजा कुस्रूए आपणे पईले सालो देई एस मन्दरो खे बनाणे री आज्ञा दित्ती। 14 परमेशरो रे मन्दरो दे जो सूईने ओर चाँदिए रे पांडे नबूकदनेस्सर राजा यरूशलेम शईरो रे मन्दरो ते निकयाल़ी की बाबेलो रे मन्दरो खे लईगा था, सेयो कुस्रू राजे बाबेलो रे मन्दरो ते निकयाल़ी की शेशबस्सर नाओं रे एक माणूंए गे जो तिने परदान ठराईता था, सम्बाल़ीते।*5:14 एज्रा 1:7-8 15 तेबे तिने तेसखे बोलेया, "इना पांडेया खे लई जाई की यरूशलेम शईरो रे मन्दरो दे राख ओर परमेशरो रा मन्दर आपणी जगा देई बणाया जाओ।" 16 तेबे तिने शेशबस्सरे आई की परमेशरो रे मन्दरो री जो यरूशलेम शईरो दे ए निऊँ पाई ओर तदुओ ते यबुओ तक ये बणने लगी रा, पर यबुओ तक नि बणेया। 17 एबे जे राजे खे ठीक लगो तो बाबेलो रे राजपण्डारो दे एते गल्ला खे टोल़ो कि फारसो कुस्रू राजे सच्चो खे ई परमेशरो रे मन्दरो खे, जो यरूशलेम शईरो दे ए, बनाणे री आज्ञा दित्ती थी, या नि। तेबे राजा एतेरे बारे दे आपणी इच्छा आसा गे बताओ।