एज्रा 4

दुश्मणा रे जरिये मन्दरो रा काम रोकणा

1 जेबे यहूदा ओर बिन्यामीनी गोत्रा रे दुश्मण सामरी लोके ये सुणेया कि गुलामिया ते छूटे रे लोक इस्राएलो रे यहोवा परमेशरो खे मन्दर बनाणे लगी रे, 2 तेबे सेयो जरूब्बाबेल ओर बुजुर्गा रे करानेया रे चूणे दे लोका गे आई की बोलणे लगे, "आसा खे बी आपू साथे एती मन्दर बनाणे खे काम करने देयो; कऊँकि तुसा जेड़े आसे बी तुसा रे परमेशरो री पग्ति करूँए ओर अश्शूरो रा राजा एसर्हद्दोन जिने आसे एती पऊँचाए, तेसरे दिना ते आसे परमेशरो खे ई बलिदान बी चढ़ाऊँए।"

3 पर जरूब्बाबेल, येशुअ ओर इस्राएलो रे बुजुर्गा रे कराने रे चूणे दे लोके तिना खे बोलेया, "ना, तुसे लोक म्हारे परमेशरो रा मन्दर बनाणे दे म्हारी मताद नि करी सकदे, आसा लोका ई कट्ठे ऊई की फारसो रे राजा कुस्रूए री आज्ञा रे मुताबिक इस्राएलो रे परमेशर यहोवे खे से मन्दर बनाणा।"

4 तेबे तेस देशो रे लोक जो इस्राएली लोका रे वापस आऊणे ते पईले तेती थे यहूदिया खे नराज करने ओर तिना खे डराई की मन्दर बनाणे ते रोकणे लगे। 5 ओर सेयो फारसो रे राजा कुस्रूए री पूरी जिन्दगी बल्कि फारसो रे राजा दारा रे राजो रे बखतो तक तिना री इच्छा खे निष्फल करने खे राजे रे अधिकारिया खे पैसा देंदे रये ताकि मन्दरो रा काम रूकी जाओ। 6 जेबे क्षयर्ष*4:6 क्षयर्ष एसरा दूजा नाओं अहषवेरोष फारसो रा राजा राज करने लगेया तेबे तेसरे राजो रे पईले साले ई तिना रे दुश्मण सामरी लोक यहूदा ओर यरूशलेम शईरो दे रणे वाल़े इस्राएली लोका रे दोषो री चिट्ठी तेसखे लिखी की पेजी। 7 बादो ते जेबे फारसो रे नवें राजा अर्तक्षत्रो रे दिना दे बिशलाम, मिथ्रदात ओर ताबेले ओर तेस साथले लोके फारसो रे राजा अर्तक्षत्रो खे चिट्ठी लिखी ओर चिट्ठी अरामी अक्षर ओर अरामी पाषा दे लिखी। 8 मतलब रहूम राजमंत्री ओर शिमशै मंत्रिये यरूशलेम शईरो रे खलाफ राजा अर्तक्षत्रो खे एते मतलबो ते चिट्ठी लिखी। 9 तेस बखते रहूम राजमंत्री ओर शिमशै मंत्री ओर तिना रा साथ देणे वाल़े ओर मतलब दीनी, अपर्सतकी, तर्पली, अफारसी, एरेकी, बाबेली, शूशनी, देहवी, एलामी, 10 आदि जातिये जिना खे महान ओर परदान ओस्नप्परे पार ल्याई की सामरिया रे शईरा दे ओर फरात नदिया रे पच्छमी प्रदेशो रे कईया जगा दे बसाया था तिने बी एक चिट्ठी लिखी।

11 जो चिट्ठी तिने अर्तक्षत्र राजे खे लिखी, तेतेरी ये नकल ए, "राजा अर्तक्षत्रो री सेवा दे तेरे दास जो फरात नदिया रे पच्छमी प्रदेशो दे रओए ताखे शुभ कामना पेजोए, 12 राजे खे ये पता ओ कि जो यहूदी तांगा गे ते चली गे, सेयो आसा गे यरूशलेम शईरो दे पऊँची रे। सेयो तेस दंगेबाज ओर घिनौने शईरो खे बसाणे लगी रे; बल्कि तेतेरी दवाल खड़ी करी चुके रे ओर तिजी री निऊँआ री मरम्मत करने लगी रे। 13 एबे राजे खे पता ओ कि जे से शईर बसी गा ओर तेतेरी दवाल बणीगी, तेबे तो तिना लोका कर देणा बन्द करी देणा ओर बादो ते राजे रा नुकशाण ऊणा। 14 आसे लोक तो राजमईलो रा लूण खाऊँए ओर ये ठीक नि ए कि आसा सामणे राजे री बेजती ओ, इजी बजा ते आसे ये चिट्ठी लिखी की आसे एतेरे बारे दे राजे खे बताई देऊँए। 15 तेरे बुजुर्गा रे इतिआसो री कताबा दे टोल़ेया जाओ; तेबे ताखे इतिआसो री कताबा दे पता लगी जाणा कि से शईर बगावत करने वाल़े ओर राजेया री ओर राज्य रा नुकशाण करने वाल़ा ए ओर पुराणे बखतो ते तिदे बगावत ऊँदी आई री। इजी बजा ते तेस शईरो रा नाश बी कित्तेया था। 16 आसे राजे खे निश्चा कराई देऊँए कि जे से शईर बसी गा ओर तेतेरी दवाल बणी चुको, तेबे इजी बजा ते फरात नदिया ते पार पच्छमा दे तेरा कोई कब्जा नि रणा।"

17 तेबे अर्तक्षत्र राजे रहूम राजमंत्री ओर शिमशै मंत्री ओर सामरिया ओर फरात नदिया ते पार पच्छमा दे रणे वाल़े तिना रा साथ देणे वाल़ेया खे ये ज्वाब पेजेया, "ठीक, ओ! 18 जो चिट्ठी तुसे लोके मांगे पेजी से मां सामणे पढ़ी की अनुवाद करी की मांगे सुणाई राखी। 19 ओर मेरी आज्ञा ते टोल़ने ते पता लगेया कि से शईर पुराणे बखतो ते राजेया रे खलाफ सिर चकदा आई रा ओर तिदे दंगा ओर बगावत ऊँदी आई री। 20 यरूशलेम शईरो दे सामर्थी राजा बी ऊए जो फरात नदिया ते पार पच्छमा दे सारे देशो पाँदे राज करो थे ओर सबी तरआ रे कर तिना खे देयो थे। 21 इजी री खातर एबे एसा आज्ञा रा प्रचार करो, ताकि सेयो माणूं रोके जाओ ओर जदुओ तक मेरी तरफा ते आज्ञा नि मिलो, तदुओ तक से शईर नि बणना चाईयो। 22 ओर चौकस रओ कि एते गल्ला दे सुस्त नि ऊणा; राज्य रा नुकशाण करने वाल़ी से बुराई कऊँ बढ़ो?"

23 जेबे राजा अर्तक्षत्रो री ये चिट्ठी रहूम ओर शिमशै मंत्री ओर तिना रे साथिया खे पढ़ी कि सुणाई, तेबे सेयो फटाफट यरूशलेम शईरो खे यहूदिया गे गये ओर आपणी तागत ओर जबरदस्ती सेयो रोकी ते। 24 तेबे परमेशरो रे मन्दरो रा काम जो यरूशलेम शईरो दे ए, रूकी गा ओर फारसो रे राजा दारा रे राज्य रे दूजे सालो तक रूकेया रा रया।