एज्रा 10

लोका रा आपणे पापो खे मानणा

1 जेबे एज्रा परमेशरो रे मन्दरो सामणे मुंए रे पारे पड़ेया दा, रोंदा ऊआ प्रार्थना करदा ओर आपणे पापो खे मानणे लगी रा था, तेबे इस्राएलो बीचा ते मर्द, जवाणसा ओर बच्चेया री एक बऊत बड़ी मण्डल़ी तेसगे कट्ठी ऊई ओर लोक ईंकी-ईंकी की रोणे लगी रे थे।

2 तेबे यहीएलो रा पाऊ शकन्याह नाओं रा माणूं जो एलामो रे कुलो रा था, एज्रा खे बोलणे लगेया, "आसे लोके एस देशो रे लोका बीचा ते दूजी जातिया रिया जवाणसा साथे ब्या करी की परमेशरो साथे विश्वासघात तो करी राखेया, पर एड़ा ऊँदे ऊए बी एबु बी इस्राएलो खे उम्मीद ए। 3 एबे आसे आपणे परमेशरो साथे ये वाचा बानूँ कि आसे आपणे प्रभुए री सलाह् ओर आपणे परमेशरो री आज्ञा सुणी की डरने वाल़ेया री सलाह् रे मुताबिक एड़िया सबी जवाणसा खे ओर तिना रे बच्चेया खे दूर करूँए ओर बिधानो रे मुताबिक काम करेया जाओ।" 4 तिने बोलेया, "तूँ उठ, कऊँकि ये तेरा ई काम ए ओर आसे तां साथे ए; इजी री खातर याओ बानी की एते कामो रे लगी जा।" 5 तेबे एज्रा उठेया ओर पुरोईत, लेविये ओर सबी इस्राएली लोका रे परदाना खे कसम खुल़ाई कि आसा एस वचनो रे मुताबिक ई करना ओर तिने तेड़ी ई कसम खाई।

6 तेबे एज्रा परमेशरो रे मन्दरो रे सामणे ते उठेया ओर एल्याशीबो रे पाऊ यहोहानानो रे कमरे खे गया ओर तेती पऊँची की ना तो रोटी खाई ओर ना ई पाणी पिया, कऊँकि से गुलामिया ते निकल़ी की आए रे विश्वासघातिया रिया बजा ते शोग मनांदा रया। 7 तेबे तिने यहूदा ओर यरूशलेम शईरो रे रणे वाल़े गुलामिया ते आए रे सबी लोका बीचे ये प्रचार करवाया कि तुसे यरूशलेम शईरो रे कट्ठे ओ; 8 ओर जो कोई परदान ओर बुजुर्गा री सलाह् नि मानोगा ओर तीऊँ दिना ते पीतरे नि आओगा, तो तेसरी सारी तअन-सम्पत्ति नाश करी देणी ओर से आपू गुलामिया ते आए रे लोका रिया सभा ते लग करना। 9 तेबे यहूदा ओर बिन्यामीन गोत्रो रे सारे माणूं तीऊँ दिना ते पीतरे यरूशलेम शईरो दे कट्ठे ऊए; ये नऊए मीन्ने रे बिऊए दिने ऊआ ओर सब लोक परमेशरो रे मन्दरो रे चौको दे तेस प्रचारो रिया बजा ते ओर पारी बर्खा रे मारे थरथरांदे ऊए बैठे दे रये। 10 तेबे एज्रा पुरोईत खड़ा ऊई की तिना खे बोलणे लगेया, "तुसे लोके परमेशरो साथे विश्वासघात करी की दूजी जातिया री जवाणसा साथे ब्या कित्तेया ओर इजी ते इस्राएलो रा दोष बढ़ी गा रा। 11 तो एबे आपणे पितरा रे परमेशर यहोवे सामणे आपणे पाप मानी लो ओर तेसरी इच्छा पूरी करो ओर एस देशो रे लोका ते ओर दूजी जातिया रिया जवाणसा ते लग ऊई जाओ।"

12 तेबे पूरी मण्डल़िया रे लोके कट्ठे ऊई की एज्रा खे ज्वाब दित्तेया। तिने जोरे की बोलेया, "एज्रा तूँ ठीक बोलेया! ओर जेड़ा तूँ बोलेया आसा खे बी तेड़ा ई करना चाईयो। 13 पर लोक बऊत ए ओर बरसाती रा मौसम ए ओर आसे बारे बरखा दे खड़े नि रयी सकदे ओर ये एक-दो दिना रा काम नि ए, कऊँकि आसे एते गल्ला दे बऊत बड़ा पाप करी राखेया। 14 सारी मण्डल़िया रिया तरफा ते म्हारे परदान नियुक्त करो ओर जदुओ तक म्हारे परमेशरो रा पड़केया रा कोप आसा ते दूर नि ओ ओर ये काम खत्म नि ऊई जाओ, तदुओ तक आसा रे शईरो दे जितणे रणे वाल़ेया दूजी जातिया रिया जवाणसा साथे ब्या करी राखेया, सेयो ठराए रे बखतो पाँदे आया करो ओर तिना साथे एकी शईरो रे बुजुर्ग ओर न्यायी आया करो।" 15 एतेरे खलाफ बस असाहेलो रा पाऊ योनातान ओर तिकवा रा पाऊ यहजयाह खड़े ऊए ओर मशुल्लाम ओर शब्बतै लेविये तिना रे खलाफ थे। 16 पर गुलामिया ते आए रे लोके तेड़ा ई कित्तेया। तेबे एज्रा पुरोईत ओर पितरा रे कराने रे बड़े मर्द आपणे-आपणे पितरा रे कराने रे मुताबिक आपणे सब नाओं लिखाई की लग कित्ते ओर दसुए मीन्ने रे पईले दिने एते गल्ला री पूछताछ करने खे बैठीगे। 17 ओर पईले मीन्ने रे पईले दिनो तक तिने तिना सबी मर्दा री छाणबीण पूरी करी ली, जिने दूजी जातिया री जवाणसा साथे ब्या कित्तेया था।

दूजिया जातिया रिया जवाणसा साथे ब्या करने वाल़ेया रे नाओं

18 तेबे पुरोईता री ल्वादा बीचा ते, यो माणूं थे जिने दूजी जातिया री जवाणसा साथे ब्या कित्तेया था: येशुअ रे पाऊ, योसादाको रे पाऊ, ओर तेसरे पाई मासेयाह, एलीएजेर, यारीब ओर गदल्याह। 19 इने सबी आथ आगे करी की वचन दित्तेया कि आसा आपणी जवाणसा खे तलाक देणा ओर तिने दोषी ऊई की, आपणे-आपणे दोषो रिया बजा ते एक-एक खाडू बलि कित्तेया।

20 इम्मेरो री ल्वादा बीचा ते, हनानी ओर जबद्याह। 21 हारीमो री ल्वादा बीचा ते मासेयाह, एलिय्याह, शमायाह, यहीएल ओर उज्जियाह। 22 पशहूरो री ल्वादा बीचा ते एल्योएनै, मासेयाह, इश्माएल, नतनेल, योजाबाद ओर एलासा। 23 तेबे लेविया बीचा ते योजाबाद, शिमी, केलायाह जेसखे कलीता बोलोए, पतह्याह, यहूदा ओर एलीएजेर। 24 गाणेवाल़ेया बीचा ते एल्याशीब ओर द्वारपाला बीचा ते शल्लूम, तेलेम ओर ऊरी। 25 इस्राएलो बीचा ते परोशो री ल्वाद रम्याह, यिज्जियाह, मल्कियाह, मिय्यामीन, एलीआजार ओर बनायाह। 26 एलामो री ल्वादा बीचा ते मत्तन्याह, जकर्याह, यहीएल अब्दी, यरेमोत ओर एलिय्याह। 27 ओर जत्तूए री ल्वादा बीचा ते एल्योएनै, एल्याशीब, मत्तन्याह, यरेमोत, जाबाद ओर अज़ीज़ा। 28 बेबैए री ल्वादा बीचा ते यहोहानान, हनन्याह, जब्बै ओर अतलै। 29 बानीए री ल्वादा बीचा ते मशुल्लाम, मल्लूक, अदायाह, याबूश, शाल ओर यरामोत। 30 पहत्मोआबो री ल्वादा बीचा ते अदना, कलाल, बनायाह, मासेयाह, मत्तन्याह, बसलेल, बिन्नूई ओर मनश्शे। 31 हारीमो री ल्वादा बीचा ते एलीएजेर, यिश्शिय्याह, मल्कियाह, शमायाह, शिमोन; 32 बिन्यामीन, मल्लूक ओर शेमर्याह। 33 हाशूमो री ल्वादा बीचा ते मत्तनै, मत्तत्ता, जाबाद, एलीपेलेत, यरेमै, मनश्शे ओर शिमी। 34 ओर बानीए री ल्वादा बीचा ते मादै, अम्राम, ऊएल; 35 बनायाह, बेदयाह, कलूही; 36 बन्याह, मरेमोत, एल्याशीब; 37 मत्तन्याह, मत्तनै, यासू; 38 बानी, बिन्नूई, शिमी; 39 शेलेम्याह, नातान, अदायाह; 40 मक्नदबै, शाशै, शारै; 41 अजरेल, शेलेम्याह, शेमर्याह; 42 शल्लूम, अमर्याह ओर यूसुफ। 43 नबो री ल्वादा बीचा ते; यीएल मत्तित्याह, जाबाद, जबीना, यद्दई, योएल ओर बनायाह। 44 इने सबी लोके दूजी जातिया री जवाणसा साथे ब्या करी ला था ओर बऊत जणेया री जवाणसा ते पाऊ बी पैदा ऊईगे थे।