नहेम्याह 1

नहेम्याह री प्रार्थना

1 हकल्याह रे पाऊ नहेम्याह रे जरीये लिखिया दिया गल्ला: जेबे अर्तक्षत्र राजे रे राज करदे ऊए बीइ साल ऊए तेबे किसलेव नाओं रे मीन्ने दे, जेबे आऊँ शूशन नाओं रे राजगढ़ो दे रऊँ था, 2 तेबे हनानी नाओं रा मेरा एक पाई ओर यहूदा ते आए दे कई यहूदी पाई मांगे आए; तेबे मैं तिना ते तिना बचे रे यहूदिया रे बारे दे जो गुलामिया ते छूटी गे थे ओर एबे यरूशलेम शईरो दे रओ थे तिना रे बारे दे पूछेया। 3 तिने मांगे बोलेया, "जो बचे दे लोक गुलामिया ते छूटी की इस्राएल राज्य दे रओए, तिना री दशा बऊत ई खराब ए ओर तिना री बेज्जती बी ओई; कऊँकि यरूशलेम शईरो री दवाल टूटी री ओर तेतेरे बड़े द्वार फूकी रे ए।" 4 इना गल्ला खे सुणी की आऊँ बैठी की रोणे लगेया ओर कई दिना तक रोंदा रया ओर स्वर्गो रे परमेशरो रे सामणे बअरत कित्तेया ओर ये बोली की प्रार्थना करदा रया, 5 "ओ स्वर्गो रे यहोवा परमेशर, ओ महान ओर डरो जोगे परमेशर! तूँ जो आपणे प्यार राखणे वाल़ेया ओर आज्ञा मानणे वाल़ेया रे बारे दे आपणी वाचा पूरी करेया ओर तिना पाँदे दया करेया, 6 तूँ कान लगाई कि सुण ओर आखी खोली की देख, ताकि जो प्रार्थना आऊँ तेरा दास एस बखते तेरे सारे इस्राएली लोका खे दिन-रात करदा रऊँआ, तिजी खे तूँ सुण। आऊँ सबी इस्राएली लोका रे पाप जो आसे तेरे खलाफ करी राखे, मानी लऊँआ। मेरे बाओ रे कराने ओर मैं पाप करी राखेया।"

7 आसे तां सामणे बऊत बुराई करी राखी ओर जो आज्ञा, बिधिया ओर बिधान तैं आपणे दास मूसे खे दित्ते थे, सेयो आसे नि माने। 8 तेस वचनो री सुधि लओ, जो तैं आपणे दास मूसे खे बोलेया था, "जे तुसे लोक मेरिया आज्ञा खे ना मानी की विश्वासघात करो, तो मां तुसे दूजे देशा रे लोका बीचे तित्तर-बित्तर करी देणे। 9 पर जे तुसे मेरी तरफा खे फिरो ओर मेरी आज्ञा खे मानो ओर तिना पाँदे चलो, तेबे चाए तुसा बीचा ते निकयाल़े दे लोक तरतिया पाँदे जेती केथी बी ओ, तेबे बी मां सेयो तेथा ते कट्ठे करी की तेसा जगा दे पऊँचाणे, जो मैं आपणे आपू खे रणे री जगा चूणी राखी।" 10 एबे सेयो तेरे दास ओर तेरी प्रजा रे लोक ए जो तैं आपणी बड़ी सामर्थ ओर आपणे तागती ते छुड़ाई राखे। 11 ओ प्रभु प्रार्थना ये ए, "कि तूँ आपणे दासो री प्रार्थना पाँदे, ओर आपणे तिना दासा री प्रार्थना पाँदे, जो तेरे नाओं रा डर मानणा चाओए, कान लगा ओर आज आपणे दासो रा काम सफल कर ओर तेस माणूंए खे तिना पाँदे दयावान कर।" तिना दिना दे आऊँ तो राजे खे पल्याणे वाल़ा था।