1 तेबे एल्याशीब नाओं रे बड़े पुरोईते आपणे पुरोईता पाईया साथे मिली की पेडा री गवाईणी रे द्वारो री दुबारा मरम्मत कित्ती, तिने तेतेरी प्रतिष्ठा कित्ती ओर तेतेरे फल़े बी लगाए ओर हम्मेआ नाओं रे गुम्मटो तक, बल्कि हननेलो रे गुम्मटो तक तिने दवाला री प्रतिष्ठा कित्ती। 2 तिजी ते आगे यरीहो रे माणूंए मिली की मरम्मत कित्ती ओर इना ते आगे इम्रीए रे पाऊ जक्कूरे आपणे माणूंआ साथे मिली की मरम्मत कित्ती। 3 तेबे मछलिया रा बड़े द्वार हस्सना रे माठेया मरम्मत कित्ती; तिने तिजी रिया कड़िया लगाईया ओर तिजी रे दरवाजे, ताल़े ओर परेगा लगाईया। 4 तिना ते आगे मरेमोते जो हक्कोसो रा पोता ओर ऊरिय्याह रा पाऊ था, मरम्मत कित्ती। ओर इना ते आगे मशुल्लामे जो मशेजबेलो रा पोता ओर बेरेक्याह रा पाऊ था, तिजी री मरम्मत कित्ती। इजी ते आगे बाना रे पाऊ सादोके मरम्मत कित्ती। 5 इना ते आगे तकोई शईरो रे लोके मरम्मत कित्ती, पर तिना रे अमीर माणूंए आपणे प्रभुए री सेवा रे कामो री जिम्मेदारी आपू पाँदे नि लया। 6 तेबे पुराणे बड़े द्वारो री मरम्मत पासेह रे पाऊ योयादा ओर बसोदयाह रे पाऊ मशुल्लामे कित्ती; तिने तिजी दे कड़िया लगाईया ओर तिजी रे दरवाजे, ताल़े ओर परेगा लगाईया। 7 ओर तिना ते आगे गिबोन शईरो रे मलत्याह ओर मेरोनोत शईरो रे यादोने ओर गिबोन ओर मिस्पा शईरो रे माणूंए फरात नदिया रिया पच्छमा रिया जगा रे राज्यपाला रे सिंहासनो रिया तरफा खे मरम्मत कित्ती। 8 तिना ते आगे हर्हयाह रे पाऊ उजीएले ओर बाकी सन्यारे मरम्मत कित्ती, इजी ते आगे हनन्याहे, जो गन्धिया रे समाजो रा था, मरम्मत कित्ती, ओर तिने चौड़ी दवाला तक यरूशलेम शईर मजबूत कित्तेया। 9 तिना ते आगे हूरो रे पाऊ रपायाहे, जो यरूशलेम शईरो रे आदे जिले रा परदान था, मरम्मत कित्ती। 10 ओर तिना ते आगे हरुमपो रे पाऊ यदायाहे आपणे ई कअरो रे सामणे मरम्मत कित्ती ओर इजी ते आगे हशब्नयाह रे पाऊ हत्तूशे मरम्मत कित्ती। 11 हारीमो रे पाऊ मल्कियाहे ओर पहत्मोआबो रे पाऊ हश्शूबे एक ओर इस्से री ओर भट्टेया रे गुम्मटा री मरम्मत कित्ती। 12 इजी ते आगे यरूशलेम शईरो रे आदे जिले रे परदान हल्लोहेशो रे पाऊ शल्लूमे आपणी बेटिया साथे मिली की मरम्मत कित्ती। 13 तराईया रे बड़े द्वारो री मरम्मत हानून ओर जानोह शईरो रे रणे वाल़ेया लोके कित्ती, तिने से बणाया ओर तिजी रे ताल़े, परेगा लगाईया ओर दरवाजे लगाए ओर 1,500 फुट लाम्बी दवाल बी बणाई, मतलब कूड़े रे बड़े द्वारो तक बणाया।

14 कूड़ा बड़े द्वारो री मरम्मत रेकाबो रे पाऊ मल्कियाहे कित्ती, जो बेथक्केरेम जिले रा परदान था; तिने ई से बणाया ओर तिजी रे ताल़े, दरवाजे ओर परेगा लगाईया।

15 सूबल़ा रे बड़े द्वारो री मरम्मत कोल्होजो रे पाऊ शल्लूमे कित्ती, जो मिस्पा रे जिले रा परदान था तिने ई से बणाया ओर छवांया ओर तिजी रे ताल़े, परेगा ओर दरवाजे लगाए। ओर तिने ई राजे रे बगीचे रे नेड़े रे शेलह नाओं रे कुण्डो री दवाला खे बी दाऊदो रे शईरो ते उतरने वाल़ी पईड़िया तक बणाया। 16 तेसते बाद अजबूको रे पाऊ नहेम्याहे जो बेतसूरो रे आदे जिले रा परदान था, दाऊदो रे कब्रिस्तानो ते सामणे तक ओर माणूंआ रे बणाए रे तलाबो तक, बल्कि वीर माणूंआ रे कअरो तक बी मरम्मत कित्ती।

17 इजी ते बाद बानीए रे पाऊ रहूमे कई लेविया खे साथे लई की मरम्मत कित्ती। इजी ते आगे कीला रे आदे जिले रे परदान हशब्याहे आपणे जिले रिया तरफा ते मरम्मत कित्ती। 18 तेसते बाद तिना रे पाईया समेत कीला रे आदे जिले रे परदान हेनादादो रे पाऊ बव्वैए मरम्मत कित्ती। 19 तिजी ते आगे एक ओर इस्से री मरम्मत जो दवाला रे मोड़ो गे शस्त्रा रे कअरो री चढ़ाईया सामणे ए, येशूए रे पाऊ एज़ेरे कित्ती, जो मिस्पा रा परदान था। 20 तेबे एक ओर इस्से री मतलब तेस ई मोड़ो ते लई की एल्याशीब नाओं रे बड़े पुरोईतो रे कअरो रे द्वारो तको री मरम्मत जब्बैए रे पाऊ बारूके तनो-मनो ते कित्ती। 21 इजी ते बाद एक ओर इस्से री मतलब एल्याशीबो रे कअरो रे द्वारो ते लई की तेस ई कअरो रे सिरे तको री मरम्मत मरेमोते कित्ती, जो हक्कोसो रा पोता ओर ऊरिय्याह रा पाऊ था।

22 तेसते बाद तिने पुरोईते मरम्मत कित्ती जो तराईया दे रणे वाल़े माणूं थे। 23 तिना ते बाद बिन्यामीन ओर हश्शूबे आपणे कअरो रे सामणे मरम्मत कित्ती ओर तिना ते बाद अजर्याहे जो मासेयाह रा पाऊ ओर अनन्याह रा पोता था आपणे कअरो गे मरम्मत कित्ती। 24 तेबे एक ओर इस्से री, मतलब अजर्याह रे कअरो ते लई की दवाला रे मोड़ो तक बल्कि तिजी रे कूणे तको री मरम्मत हेनादादो रे पाऊ बिन्नूईए कित्ती। 25 तेबे तेस ई मोड़ो सामणे जो ऊच्चा गुम्मट राजमईलो ते बारे निकल़ेया रा जेला रे आँगणो रे नेड़े ए, तिजी ते सामणे ऊज्जै रे पाऊ पालाले मरम्मत कित्ती। इजी ते बाद परोशो रे पाऊ पदायाहे मरम्मत कित्ती। 26 मन्दरो दे सेवा करने वाल़े लोक तो ओपेलो रे पूर्वो रिया तरफा खे पाणिए रे बड़े द्वारो सामणे तक ओर बारे निकल़े रे गुम्मटो तक रओ थे। 27 पदायाह ते बाद तकोई शईरो रे लोके एक ओर इस्से री मरम्मत कित्ती, जो बारे निकल़े रे बड़े गुम्मटो रे सामणे ओर ओपेलो री दवाला तक ए।

28 तेबे कोड़ेया रे बड़े द्वारो पाँदे पुरोईते आपणे-आपणे कअरो रे सामणे मरम्मत कित्ती। 29 इजी ते बाद इम्मेरो रे पाऊ सादोके आपणे कअरो रे सामणे मरम्मत कित्ती ओर तेबे पूर्वो रे बड़े द्वारो रे रखवाल़े शकन्याह रे पाऊ शमायाहे मरम्मत कित्ती। 30 इजी ते बाद शेलेम्याह रे पाऊ हनन्याह ओर सालापो रे छठुए पाऊए हानूने एक ओर इस्से री मरम्मत कित्ती। तेबे बेरेक्याह रे पाऊ मशुल्लामे आपणी कमरे सामणे मरम्मत कित्ती। 31 तेसते बाद मल्कियाहे जो सन्यार था नतीनो ओर बपारिया री जगा तक ठराई री जगा रे बड़े द्वारो सामणे ओर कूणे रे कोठे तक मरम्मत कित्ती। 32 ओर कूणे वाल़े कोठे ते लई की पेडा रे बड़े द्वारो तक सन्यारे ओर बपारिये मरम्मत कित्ती।