नहेम्याह 5

नहेम्याह रा गरीबा री मताद करना

1 तेस बखते तेबे गरीब यहूदी लोक ओर तिना री जवाणसा रिया तरफा ते तिना रे पाई यहूदिया रे खलाफ बड़ा चींगणा ऊआ। 2 कई लोक तो बोलो थे, "आसे आपणे माठे-बेटिया समेत बऊत लोक ए, इजी री खातर आसा खे नज्ज ओर बी जादा मिलणा चाईयो, ताकि तिजी खे खाई की जिऊँदे रऊँ।" 3 कई बोलो थे, "आसे आपणे-आपणे डोरू, बगीचे ओर कअर अकाल़ो रिया बजअ ते गिरवी राखूँए, ताकि खाणे खे नज्ज मिलो।" 4 तेबे कई जणे ये बोलो थे, "आसे राजे खे कर देणे रिया तँईं आपणे-आपणे डोरूआ ओर अंगूरा रे बगीचे पाँदे पैसा त्वारा लई राखेया। 5 पर म्हारा ओर म्हारे पाईया रा शरीर ओर म्हारे ओर तिना रे बच्चे एक जेड़े ई ए, तेबे बी आसे आपणे माठे-बेटिया खे दास बणाऊँए; बल्कि म्हारिया कई बेटिया दासिया बी ऊई चूकी रिया ओर म्हारा कोई बस नि चलदा, कऊँकि म्हारे डोरू ओर अंगूरा रे बगीचे ओरी रे आथो दे पड़ी रे।"

6 ये चींगणा ओर इना गल्ला खे सुणी की माखे बड़ा रोष आया। 7 तेबे आपणे मनो दे सोच-बिचार करी की मैं मुखिये ओर परदाना खे रोषे ऊई की बोलेया, "तुसे आपणे-आपणे पाईया ते ब्याज लओए।" तेबे मैं तिना रे खलाफ एक बड़ी सभा कित्ती। 8 ओर मैं तिना खे बोलेया, "आसे लोके तो आपणी सामर्थ आपणे यहूदी पाईया खे जो दूजी जातिया रे आथो दे बिकी गये थे, कीमत देई की छुड़ाए, तेबे क्या तुसा आपणे पाई बेचणे? क्या सेयो म्हारे आथे बिकणे?" तेबे सेयो चुप रये ओर कुछ नि बोली सके। 9 तेबे आऊँ बोलदा गया, "जो काम तुसे करोए, से ठीक नि ए; क्या तुसा खे इजी बजा ते म्हारे परमेशरो रा डर मानी की चलणा नि चाईयो कि म्हारे दुश्मण जो दूजी जाति ए, सेयो म्हारी बेज्जती नि करो? 10 आऊँ बी ओर मेरे पाई ओर सेवक तिना खे पैसा ओर नज्ज त्वारा देऊँए, पर आसे इजी रा ब्याज छाडी देऊँए। 11 आज ई तिना खे तिना रे डोरू, ओर अंगूर, ओर जैतूनो रे बगीचे ओर कअर वापस देई देयो ओर जो पैसा, नज्ज, नया शराब ओर जैतूनो रा तेल तुसे तिना ते लओए, तिजी रा सौवा इस्सा वापस करी देयो?"

12 तिने बोलेया, "आसा तिना खे वापस देई देणा, ओर तिना ते कुछ नि लऊँगे; जेड़ा तुँ बोलेया, आसा तेड़ा ई करना।" तेबे मैं पुरोईता खे बुलाया ओर तिना मुखिया ओर परदाना खे कसम खुल़ाई, कि सेयो सेई काम करो जेते खे करने रा तिने बोली राखेया। 13 तेबे मैं आपणे टाल्ले रे कूणे खे चाड़ी की बोलेया, "ईंयाँ जो कोई एस वचनो खे पूरा नि करोगा, तेसखे परमेशर चाड़ी की, तेसरा कअर ओर कमाई तेसते छुड़ाओ ओर ईंयाँ से चाड़ेया जाओ ओर से कंगाल़ ऊई जाओ।" तेबे सभा रे सबी लोके बोलेया, "आमीन्!" ओर तिने सबी यहोवे री स्तुति कित्ती ओर लोके एस वचनो रे मुताबिक कित्तेया।

14 फेर जेबे आऊँ यहूदा प्रदेशो दे तिना रा राज्यपाल बणाया, मतलब राजा अर्तक्षत्रो रे बिऊए सालो ते लई की तेसरे बत्थिये सालो तक, मतलब बारा साल तक मैं ओर मेरे पाईए परदानो रे अक्को री रोटी नि खाई राखी। 15 पर पईलके राज्यपाल जो मांते पईले थे, सेयो प्रजा पाँदे पार पाओ थे ओर तिना ते रोटी, ओर शराब ओर इजी साथे चाल़ी शेकेल चाँदी लओ थे, बल्कि तिना रे नौकर बी प्रजा पाँदे अक्क जमाओ थे; पर आऊँ एड़ा नि करुँ था, कऊँकि आऊँ यहोवे रा डर मानूँ था। 16 तेबे आऊँ दवाला रे कामो दे व्यस्त रया ओर आसे लोके कोई जमीन मोले नि लई ओर मेरे सब नौकर तेती काम करने खे कट्ठे रओ थे। 17 तेबे मेरे मेजो पाँदे खाणे वाल़े 150 यहूदी ओर परदान ओर सेयो बी थे, जो चऊँ कनारे री दूजी जातिया बीचा ते आसा गे आये थे। 18 जो हर रोज बणो था से एक बल़द, छे ठीक-ठीक पेडा ओर बाकरिया थिया ओर माखे चिड़िया रा मास बी बणाओ थे; दस-दस दिना बाद कईया प्रकारा रा बऊत शराब बी त्यार करेया जाओ था, पर तेबे बी मैं राज्यपाला रे अक्को री रोटी नि लई, 19 कऊँकि प्रजा पाँदे कामो रा बड़ा पार था। ओ मेरे परमेशर! जो कुछ मैं एसा प्रजा रिया तँईं करी राखेया, तिजी रा फल माखे दे।