1 जेबे सातुआ मीन्ना नेड़े आया, तेस बखते सारे इस्राएली आपणे-आपणे शईरो दे थे। तेबे तिने सबी एक मन ऊई की, पाणिए रे द्वारो सामणे कट्ठे ऊई की, एज्रा शास्त्रिए खे बोलेया, कि मूसे रा जो बिधान परमेशरे इस्राएलो खे दित्तेया था, तेतेरी कताब ली आओ। 2 तेबे एज्रा पुरोईत सातुए मीन्ने रे पईले दिने क्या जवाणस, क्या मर्द, जितणे बिधानो खे सुणी की समजी सको थे, तिना सबी सामणे बिधानो री कताब ली आया। 3 से तेसरिया गल्ला प्यागा ते लई की त्याड़िया तक तेस चौको सामणे जो पाणिए रे बड़े द्वारो सामणे था, क्या जवाणस, क्या मर्द ओर सबी समजणे वाल़ेया खे पढ़ी की सुणांदा रया ओर लोके बिधानो री कताबा पाँदे कान लगाई राखेया। 4 एज्रा शास्त्री, लकड़िया री तेसा ऊच्चिया जगा पाँदे जो एस कामो खे ई बणाई राखी थी, खड़ा ऊईगा; ओर तेसरे दाँणे कनारे मत्तित्याह, शेमा, अनायाह, ऊरिय्याह, हिल्किय्याह ओर मासेयाह; ओर खूँजे कनारे, पदायाह, मीशाएल, मल्किय्याह, हाशूम, हश्बद्दाना, जकर्याह ओर मशुल्लाम खड़े उए। 5 तेबे एज्रे जो सबी ते ऊच्ची जगा पाँदे खड़ी रा था, सबी सामणे से कताब खोली ओर जेबे तिने से खोली, तेबे सारे लोक उठी की खड़े ऊए।

6 तेबे एज्रे महान परमेशर यहोवे खे तन्य बोलेया ओर सबी लोके आपणे-आपणे आथ चकी की आमीन्, आमीन्, बोलेया; ओर सिर चुकाई की आपणा-आपणा माथा जमीना दे राखी की यहोवे गे माथा टेकेया। 7 येशुअ, बानी, शेरेब्याह, यामीन, अक्कूब, शब्बतै, होदिय्याह, मासेयाह, कलीता, अजर्याह, योजाबाद, हानान ओर पलायाह नाओं रे लेविये, लोका खे बिधान समजयांदे गये, ओर लोक आपणी-आपणी जगा पाँदे खड़े रये। 8 तिने परमेशरो री बिधान री कताब ते पढ़ी की मतलब समजयाई ता ओर लोके पाठ समजी ला। 9 तेबे नहेम्याह जो परदान था, ओर एज्रा जो पुरोईत ओर शास्त्री था, ओर जो लेवी लोका खे समजयाणे लगी रे थे, तिने सबी लोका खे बोलेया, "आजका दिन तुसा रे परमेशर यहोवे खे पवित्र ए; इजी री खातर दु:खी नि ओ ओर ना रोओ।" कऊँकि सब लोक बिधानो रे वचन सुणी की रोंदे रये। 10 तेबे तिने तिना खे बोलेया, "जाई की तल़ी री रोटी खाओ, ओर मीठा-मीठा रस पियो ओर जिना खे कुछ बणी नि रया तिना गे रोटिया रा समान पेजो; कऊँकि आजका दिन म्हारे परमेशर यहोवे खे पवित्र ए; ओर उदास नि रओ, कऊँकि यहोवे री खुशी तुसा री मजबूत तागत ए।" 11 ईंयाँ लेविये सबी लोका खे ये बोली की चुप कराईते, "चुप रओ कऊँकि आजका दिन पवित्र ए; ओर उदास नि रओ।" 12 तेबे सब इस्राएली लोक खाणे-पीणे रोटी बांडणे ओर बड़ी खुशी मनाणे खे चली गे, कऊँकि जो वचन तिना खे समजयाए थे, सेयो तिना खे समज आईगे थे।

13 सातुए मीन्ने रे दूजे दिने बी सारी प्रजा रे पितरा रे कराने रे खास-खास मर्द, ओर पुरोईत ओर लेवी लोक, एज्रा शास्त्रिए गे बिधानो रे वचन त्यानो साथे सुणने खे कट्ठे ऊईगे। 14 तिना खे बिधानो दे ये लिखेया दा मिलेया, कि यहोवे मूसे खे ये आज्ञा दलाई थी, कि इस्राएली सातुए मीन्ने दे त्योआरो रे बखते चूँगड़िया दे रया करो, 15 ओर आपणे सबी शईरा दे ओर यरूशलेम शईरो दे ये सुणाया करो ओर प्रचार करेया करो, "पाह्ड़ो पाँदे जाई की जैतून, तेलो रे डाल़, मईंदी, खजूर ओर कणे-कणे डाल़ा रिया डाल़िया ल्याई की चूँगड़िया बणाओ, जेड़ा कि लिखी राखेया।" 16 तेबे सब लोक शईरो ते बारे जाई की डाल़िया ली आए, ओर आपणे-आपणे कअरो रे छतो पाँदे ओर आपणे आँगणो दे, ओर परमेशरो रे मन्दरो रे आँगणो दे, ओर पाणिए रे बड़े द्वारो रे चौको दे ओर एप्रैमो रे बड़े द्वारो रे चौको दे, चूँगड़िया बणाई तिया। 17 बल्कि सारी मण्डल़िया रे लोक जितणे गुलामिया ते छूटी की आए थे, चूँगड़िया बणाई की तिना दे रये। नूनो रे पाऊ यहोशूए रे दिना ते लई की तेस दिनो तक इस्राएली लोके एड़ा नि कित्तेया था। ओर तेस बखते बऊत बड़ी खुशी ऊई। 18 तेबे पईले दिनो ते अन्तो रे दिनो तक एज्रा हर दिन परमेशरो री बिधान री कताबा बीचा ते पढ़ी-पढ़ी की सुणाया करो था। सेयो साता दिना तक त्योआर मनांदे रये, ओर आठुए दिने बिधानो रे मुताबिक बड़ी सभा ऊई।